Kemiu el Mekekerei el Chad​—Molisiich a Urunguliu el Mo Mesiou er a Jehovah

“Molatk er Omebelem sel dirk mngeasek.”​—OLISECHAKL 12:1.

1. Ngera el okedong a mlo er a rengalek er a Israel?

 BEKORD el 3,500 el rak er a mla me mong e a profet er a Jehovah el Moses a milengelechel er a reprist me a remechuodel el sechal er a Israel el kmo: “Kom omekedong er a rokui el sechal, ma redil, ma re ngalek . . . , bo le rengesii e losuub el mo meluu er a Rubak el Dios er kemiu e le blak a rengrir el olengesenges osisecheklel.” (Duteronomi 31:12) Kede mesang el kmo a resechal me a redil me a rengalek a mle kirir el mo kldibel e mengull er a Dios. Choi, mo lmuut er a rengalek me te dirrek el mle kirir el mo blak a rengrir el orrenges e mesuub e dirrek el oltirakl a ulekrael er a Jehovah.

2. Nguleak a ngera el rolel e a Jehovah a ulechotii el kmo, ngmle kerekikl er a remekekerei el chad er a ongdibel er a Rekristiano er a irechar?

² Ngar er a kot el dart el rak e a Jehovah a millemolem el kerekikl er a rengalek el ngar er a delongelir a rechedal. El ua tiang, ngulemekreng er a Paulus me ngmilluches a ulekrael er a bebil er a babilengel el mo er a ongdibel, el ileakl el kirir a remekekerei el chad. (Monguiu er a Efesus 6:1; Kolose 3:​20.) A remekekerei el Kristiano el tir a oltirakl aika el ulekrael a toketekii a omereng el saul er tir el mo er a Demerir er a eanged, e ulterekokl el mo mukngeltengat.

3. Te mekerang a remekekerei el chad er a chelechang e ochotii a urungulir el sorir el mesiou er a Dios?

³ A remekekerei el chad er a ongdibel, te mokedong el me teloi er kid el mengull er a Jehovah? Chochoi! Ngkmal uchul a klou el deurreng el kirir a rokui el chedal a Dios sel lomes er a rebetok el mekekerei el chad, el tir a mesiou er a Dios el meliuekl er a beluulechad el oltirakl er a tekingel a Paulus el kmo: “E bo de kasisiich el omekses a bltikerreng ma ungil lomeruul, e lak de ua blekerdelir a bebil rar chad el mengoit chongdibel er kid, e bai de kachelechel, e domes er ngiil Sils lolekeed, me de mengal mo uaisei.” (Hebru 10:24, 25) Te dirrek el betok el ngalek a mla mo sebechir el omerk er a ungil el chais er a Rengedel a Dios el obengterir a rechad er a blirir. (Matteus 24:14) Me a rebetok el telael el mekekerei el chad a mo metecholb er a bek el rak e dirrek el mukngeltengat el mo disaiplo er a Kristus, el olechotel a bltkil a rengrir el mo er a Jehovah.​—Matteus 16:24; Markus 10:29, 30.

Mkengei er a Okedong er a Chelechang

4. Ngoingerang e a rengeasek a mo sebechir el kongei er a okedong el mo mesiou er a Dios?

⁴ A Olisechakl 12:1 a kmo: “Molatk er Omebelem sel dirk mngeasek.” Ngmo tela rekil a ngeasek e mo sebechel el kongei er a okedongel a Jehovah el mo mesiou er ngii? Ngdiak a ulterekokl el rekil a chad el medung er a Bades. Me a leuaisei, e lak momdasu el kmo ke kmal dirk kekerei me ngdirkak bo el sebechem el orrenges er a Jehovah e mesiou er ngii. Ngdiak el rekim a uchul e lak mosiou er a Dios, ngbai kirem el kongei er tia el okedong er a chelechang.

5. Te mekerang a ruungalek el chad e ngosuterir a rengelekir el mo olengeriakl er a tekoi er a klereng?

⁵ A rebetok er kemiu a mlongeseu er a rechad er a blimiu el mo olengeriakl er a tekoi er a klereng. Ngoeak itiang e kom di ua Timoteus er a taem er a Biblia. A delal el mechas el Lois me a delal el Junis a ulsisecheklii er a chedaol llechukl er a dirk el tolechoi. (2 Timoteus 3:14, 15) Me ngdi osisiu, a rechad er a blimiu a olisechakl er kemiu er a  rolel a omesubel a Biblia, e meluluuch el obengkemiu, e obekemiu el mo er aike el miting er a ongdibel, me aike el meklou el ongdibel er a rechedal a Dios, e dirrek el obekemiu el mo oldingel a obliil. Me nguaisei, ngkmal klou a ultutelel el ngerachel el kirir a ruungalek er kemiu el olisechakl er kemiu er a rolel a Jehovah. Kemiu, ko mereng a sulir el kirel a bltkil a rengrir, me tir el kmal kerekikl er kemiu?​—Osisechakl 23:22.

6. (a) Ngera el rolel a omengull a odeuir a rengul a Jehovah el medung er a Psalm 110:3? (b) Kede mo mesaod a ngerang er a chelechang?

⁶ Sel morael el mo meklou kemiu el ngeasek, e a Jehovah a kmal soal a “bo msal medengei el kmo ngngera soal a Dios, me ngngera ungil lodeuir a rengul a Dios.” (Rom 12:2) Sel moruul el uaisei, e ngmo sebechiu el meruul a ureor er a ongdibel, el diak el rechad er a blimiu a orrimel er kemiu el meruul, e ngbai somiu el meruul a soal a Dios. Ngmo uchul a deuil a rengul a Jehovah sel mosiou er ngii el mera el ngar er a rengum. (Psalm 110:3) Ke mekerang e ochotii el kmo ngsoam el melisiich er a urungulem el mo orrenges er a Jehovah e oltirakl a ulekrael er ngii? Kede mo mesaod a edei el meklou a ultutelel el tekoi el sebechem el meruul. Aikang a omesuub me a nglunguuch me a omerellel a chad. Me bo dosaod a derta er aika el tekoi.

Mo Medengelii a Jehovah el Ua Mera el Chad

7. Ngmilekerang a Jesus e kutmeklii a ungil el kerebai el kirel a omesubel a Bades, e ngera ngilsuir el mo meruul el uaisei?

⁷ A kot el rolel e ngsebechem el smisichii a urungulem el soam el mesiou er a Jehovah a oeak a omengiuel a Biblia er a bek el sils. Ngsebechem el meleketek a tekoi er a klereng er kau, me a klemedengei er kau sel bo blechoel el menguiu er a Tekingel a Dios el Biblia. (Matteus 5:3) A Jesus a kmal lungil el kerebai. Ta el taem er a dirk el 12 a rekil, e a rechad er a blil a miltik er ngii er a templo “el dengchokl ra delongelir ar sensei, el orrenges a cheldechedecherir e okerker.” (Lukas 2:44-​46) Ngdi mle kekerei e mekurulii a urungulel el soal el mo medengei a belkul ma omesodel a Bades. Ngerang a ngilsuir el mo meruul er tia el tekoi? A demal me a delal el Josef me a Maria a ngilsuir. Tir el terung el mesiungel a Dios a ngilsuir el mo medengei a osisecheklel a Dios er a dirk el tolechoi.​—Matteus 1:18-20; Lukas 2:41, 51.

8. (a) Ngoingerang a ungil el taem el lomuchel a ruungalek el omekeroul er a bltikerreng er a rengelekir er a Tekingel a Dios? (b) Ka mosaod er a tekoi el dilubech el ochotii a klungel a ultutelel a dosisecheklii a ngalek sel dirk el kekerei.

⁸ Me nguaisei, a ruungalek el meluu er a Dios er a chelechang a melechesuar a klungel a ultutelel a lomekeroul er a klemeriarreng er a rengelekir el kirel a klemerang er a Biblia er sel taem el dirk el mekekerei. (Duteronomi 6:6-9) A Rubi el odos er kid a ulemuchel el olisechakl er a ngelekel el Josef er a dirk el tolechoi. Bek el sils e ngmenguiu er a A Babilengek el kirel a Cheldecheduch er a Biblia el mo er ngii. Ngngilsuir el mo medengei a betok el kakerous el bades. Me tiang ngmlo uchul a klungiolel a Josef? Chochoi, sera lomuchel el mengedecheduch e ngmla mo sebechel el di ngii el mesaod a betok el cheldecheduch er a Biblia. E sera bocha el eim a rekil e ngmlo oltobed er a kot el cheldechedechal er a Skuul el kirel a Berkel a Klumech.

9. Ngera uchul me ngklou a ultutelel a omengiuel a Biblia ma omelebedebekel?

⁹ Kemiu el ngeasek sel moleketek a klereng er kemiu e ngkiriu el menguiu er a Biblia er a bek el sils el mo lmuut er sel bo meklou el chad. (Psalm 71:17) Ngera uchul me a omengiuel a Biblia a sebechel el ngosukemiu el mo olengeriakl er a tekoi er a klereng? Ka momtab aike el tekoi el ngar er a nglunguchel a Jesus el mo er a Demal el kmo: “A diak a ullebengelel klengar tiakid el bo lodengelkau el dital meral Dios.” (Johanes 17:3) Me sel loleketek a klemedengei er kemiu er a Jehovah, e ngmo sebechiu el omes er ngii el ua mera el Chad e dirrek el lmuut el kilungii a bltkil a rengmiu el mo er ngii. (Hebru 11:27) Me a bek el taem el monguiu er a Biblia, e mousbech er tia el techall el mo medengei a lmuut el betok el kirel a Jehovah. Di el kemiu el oker el kmo: Aika el bades el kunguiu, ngngera ngolisechakl er ngak el kirel a Jehovah el ngii a mla mo ua mera el Chad er a osengek? Ngmekerang e ochotii a bltkil a rengul me a ulekerreuil el bedul ngak? Sel molebedebek aika el ker e ngsebechel el ngosukemiu el mo medengelii a rolel a lomdasu el  lomelechesiu a tekoi a Jehovah, e dirrek el mo medengei aike el tekoi el soal a obo moruul. (Monguiu er a Osisechakl 2:​1-5.) El di ua Timoteus, ngsebechiu el mo “ulterekokl loumerang” aike el mosuub er a Bades e dirrek el rullemiu el mo somiu el mesiou er a Jehovah er a rengmiu el rokir.​—2 Timoteus 3:14.

Sel Rolel a Nglunguuch a Loleketek er a Bltkil a Rengum el Mo er a Jehovah

10, 11. Ngmekerang a nglunguched e smisichii a urunguled el soad el mo mesiou er a Dios?

¹⁰ A ongeru el rolel e ngsebechem el smisichii a urungulel a rengum el soam el mesiou er a Jehovah a oeak a nglunguuch. Kede menguiu el ngar er a Psalm 65:2 el kmo: “Ele konger a nglunguuch. A rokui el chad a mer kau el kirel a kngterir.” Ngar er sel taem el rechad er a Israel a dirk mle ileakl el chedal a Dios, e a rechad er a ngodech el beluu el mlo er a templo er a Jehovah a mle sebechir el meluluuch el mo er ngii. (1 King 8:41, 42) A Dios a diak el longetukel er a rechad. Me tirke el oltirakl a llechul a ulterekokl a rengrir el kmo ngorrenges a nglunguchir. (Osisechakl 15:8) Me nguaisei, a tekoi el “rokui el chad” a belkul a kmo nguldimukl er kemiu el ngeasek.

¹¹ Kede medengei el kmo a uchetemel a ungil el klausechelei a oeak a ungil el rolel a cheldecheduch. Me ngblechoel el soad el ouchais a ngar er a uldesued me a tekoi el suebek a rengud er ngii el mo er a kmal kmeed el sechelid. Me ngdi osisiu, sel doluluuch el mera el ngar er a rengud e ngolechotel a ungil el rolel a cheldechedechad el mo er a Ngike el Ulemeob. (Filipi 4:6, 7) Kede mengedecheduch er a Jehovah el ouchais aike rokui el ngar er a rengud el ua sel dongedecheduch er a rechad er a blid me a lechub a sechelid. Me nguaisei, sel rolel a doluluuch a ngar er ngii a klou el lerellii er a osenged me a uldesued el bedul a Jehovah. Kede mo melechesuar el kmo sel lolekes a deleuill er kid me a Jehovah, e ngmo beot er kid el meluluuch el ouchais aike el mera el ngar er a rengud el mo er Ngii.

12. (a) Ngera uchul me a nglunguuch a diak di el tekoi er a ngor e lemerekong? (b) Ngera sebechel el ngosukau el mo melechesuar el kmo a Jehovah a kmeed er kau?

¹² Lak mobes el kmo a nglunguuch a diak di el tekoi er a ngor e lemerekong, e ngdirrek el uldimukl er aike el tekoi el mera el ngar er a rengum. Sel moluluuch e ngkirem el ochotii a bltkil a rengum me a dmolech el omengull el mo er a Jehovah, e dirrek el mo mui el ultuil er Ngii el kirel a ngeso. Sel bo molechesuar el kmo a Jehovah a onger a nglunguchem, e ke mo medengei el kmo, “Ng kmeed er tirkel rokui el omekedong er ngii.” (Psalm 145:18) Nguaisei, a Jehovah a me kmeed er kau, e smisichau el mo omtok er a Diabelong, e dirrek el ngosukau el mo ungil el melilt a tekoi er a klengar er kau.​—Monguiu er a Jakobus 4:​7, 8.

13. (a) Ngmilekerang a ta el odos e mongeseu el oeak a kmes el deleuill er ngii me a Jehovah? (b) Ngmekerang e sebechel a kmes el deleuill er kau me a Dios el ngosukau el outekangel orimel er a rechad?

¹³ Ka molatk er a Cherie el mlo ungil a omelilt el lerirellii el kmes el deleuill er ngii me a Jehovah a uchul. Ngkmal mle ungil a teng er ngii er a skuul, e dirrek el kmal mle meduch el chad er a klekool. Sera letobed er a skuul e ngmla er ngii a techellel el nguu a scholarship el mo soiseb er a ngar er a bab el skuul. Me ngmelekoi el kmo, “Tia kmal lungil el techall, e a resensei er ngak me a  rengalek er a skuul a kmal ulerrimel er ngak el mo kongei er tia el techall.” Ngmlo melechesuar el kmo a lolemolem er a skulel e ngbelkul a kmo, ngmo mengoit er a klou el temel el mesuub e mengetmokl er ngii el kirel a klekool me ngmo kekerei a temel el mesiou er a Jehovah. Me ngmilekerang? Ngdilu el kmo, “A uriul er a kululuuch el mo er a Jehovah, e ak kultngeklii tia el ileakl el techall e mlo soiseb er a mui el taem el omesiou.” Me chelechang e ngmla mo eim el rak el losiou el mui el taem. Ngmelekoi el kmo, “Ngkmal diak kuuchel er a renguk, e le ak medengei el kmo a telbiil el krirellii a odeuir a rengul a Jehovah. Me ngklemerang el tekoi, a lsekum e kede nguu a Rengedel a Dios el mo kot e a rokui el tekoi a medechel el kired.”​—Matteus 6:33.

A Ungil el Omerelled a Ochotii el Kmo ‘Ngklikiid a Uldesued’

14. Ngera uchul me a ungil el omerelled a klou a ultutelel er a osengel a Jehovah?

¹⁴ A ongedei el rolel e ngsebeched el ochotii el kmo kede mesiou er a Jehovah er a rengud el rokir a mocholt er a omerelled. A Jehovah a omekngeltengat er a rengeasek el tir a melemolem el klikiid a omerellir. (Monguiu er a Psalm 24:​3-5.) A kekerei el chad el Samuel a dimlak el kengei el mo oltirakl a mekngit el omerellir a rengelekel a Ngar er a bab el Prist el Eli. A ungil el omerellel a Samuel a ble lodengelii a rechad. A Biblia a kmo: “E a bedengel a buik el Samuel a mirrael el mo klou e mengal mlo betik er a rengul a RUBAK ma re chad.”​—1 Samuel 2:26.

15. Ngera bebil el uchul me ngsoad el melemolem a ungil el blekerdeled?

¹⁵ Kid a kiei er a chelsel a beluulechad el mui er a rechad el mekngit a blekerdelir el ua lolekoi a Paulus el kmo, te di chemat er a di tir, e kedidai a rengrir, e omtok er a redemerir me a rederrir, e diak lodengei a saul, e diak le chedaol, e teleberechel, e blkuuk, e betik a rengrir er a tametereng el kuk ngaruchei er a le betik a rengrir er a Dios. (2 Timoteus 3:1-5) Me ngsebechel el mo meringel er kid el olecholt a ungil el omeruul e le kid el iliuekl er tia el mekngit el beluulechad. Me nguaisei, a bek el taem el doruul a llemalt e de kerekikl el mengeroid er kid er a mekngit el omeruul, e kede olecholt el kmo kede kongei er a Jehovah el Ngike el mengedereder er a eanged me a chutem. (Job 2:3, 4) Kede medengei el kmo ngmo uchul a klungioled a doltirakl a tekingel a Jehovah el kmo: “Bo le mellomes a rengum e rungalek, e mrellii a renguk el mo ungil, me le bor ngii a nger er ngak el mor a chad el mekngit a uldesuel el kirek.” (Osisechakl 27:11) Me sel klemedengei er kid el kmo a Jehovah a kongei er kid a smisichii a urunguled el soad el mesiou er ngii.

16. Ngmilekerang a ta el odos e mlo uchul a deuil a rengul a Jehovah?

¹⁶ A ngeasek el odos er kid el ngklel a Carol a mle blak a rengul el oltirakl a omellach er a Biblia er a le ngar er a skuul, me a rechad a mle medengelii a ungil el blekerdelel. Ngera dilubech? A rengalek er a skuul a millenguul er ngii e le ngii el dimlak el kengei el mo teloi er a ngii di el ungil klebesei er a skuul me aike el ileakl el sils er a omengull er a beluu. Ngar er aika el taem e nguluusbech er a techellel el ouchais er a klaumerang er ngii el mo er a rebebil. Betok el rak er a uriul e a ta er a redil el ledilak el skuul a milluches el mo er ngii el kmo: “Ngkmal meketeketang er a kulatk el meluches el oureng a sulem el kirel a ungil el blekerdelem me a blekeu el reng er kau el mle sebechem el dechor el mesebechakl er a klaumerang er kau. A ungil el blekerdelem a mle bleketakl er a osengir a rechad. Kau a mle kot el Sioning er a Jehovah el blo kudengelii.” A ungil el blekerdelel a Carol a mlo uchul me ngika el redil a mlo omuchel el mesuub er a Biblia. Ngar er tia el babilengel e nguluuchais er a Carol el kmo,  ngmla mo 40 el rak er a bo lemetecholb el Sioning er a Jehovah! Me kemiu a rengeasek a kmal sebechiu el mo ua Carol el mle bekeu el oltirakl a omellach er a Biblia el mo uchul e ngsebechiu el olengeseu er a remelemalt a rengrir el chad el mo medengelii a Jehovah.

A Remekekerei el Chad el Mengebkall er a Jehovah

17, 18. (a) Ngua ngera uldesuem el bedul tirke el mekekerei el chad er a chelsel a ongdibel? (b) Ngera el techall a ngar er ngii el kirir a remekekerei el chad el meluu er a Dios?

¹⁷ Kid el rokui el ngar er a chelsel a cheldebechelel a Jehovah a dmeu a rengud el mesterir a rebetok el telael el mekekerei el chad el teloi er kid el blak a rengrir el kirel a mera el omengull! Tirkang a melisiich a urungulir el sorir el mengull er a Jehovah el oeak a omengiuel a Biblia er a bek el sils, e meluluuch, e meruul a blekerdelir el mo oltirakl a soal a Dios. Te kmal ungil el kerebai el uchul a deurreng el mo er a ruungalek er tir me a dirrek el rokui el chedal a Jehovah.​—Osisechakl 23:24, 25.

¹⁸ Ngdi kmedung e tirka el blak a rengrir el mekekerei el chad a mo teloi er tirke el mo soiseb er a beches el beluulechad el Dios a tilbir el kired. (Chocholt 7:9, 14) Ngar er isei, e ngmo dmeu a rengrir er a betok el klengeltengat e melemolem el obang a omereng el saul el mo er a Jehovah, e dirrek el mo sebechir el mengebkall er Ngii el mo cherechar.​—Psalm 148:12, 13.

Ngsebechem el Mesaod?

• Te mekerang a remekekerei el chad e mo teloi er a mera el omengull er a chelechang?

• Ngera me ngklou a ultutelel el molebedebek aike el monguiu er a Biblia, el ngii a mo uchul a klungiolem?

• Ngmekerang a nglunguuch e rullau el mo kmeed er a Jehovah?

• Ngerang a sebechel el meketmokl el oeak a ungil el blekerdelel a Kristiano?

[Aike el Ker er a Suobel]

[Siasing el ngar er a 17 el llel]

Kau ke menguiu er a Biblia er a bek el sils?