A BIBLIA a kmo: “E ngikel diak loubltikerreng a diak lodengelii a Dios; le Dios a bltikerreng.” (1 Johanes 4:8) Misei, e a ungil el klechelid a melisiich er a bltikerreng er a rudam.

A betok el klechelid a kmal kerekikl er a resmecher me a remechuodel me a remechebuul. Te melisiich er a rechederir el mo oltaut er sel uleklatk er a apostol el Johanes el kmo: “A le ngarngii choba kerruul ra belulechad e omes er chodam er ngii el metacherbesul, e mtekii a rengul ra klechubechub, ngmekera e a bltikerreng ra Dios a di ngara chelsel ngiil chad? Rengelekei, lak di doba chomelekoi  ma berdel a ngor loubltikerreng, e bai doba chomeruul ma klemerang el kaubltikerreng.”​—1 Johanes 3:17, 18.

Engdi ngera mo duubech sel lebo er ngii a mekemad? Kede di mo oltaut er sel omellach er a Dios el mo ‘betik a rengud era ngar bita er kid’ er sel taem er a budech, engdi ngdiak doltaut er ngii sel ledu merreder er a beluu el kmo ngkired el mo er a mekemad?​—Matteus 22:39.

A Jesus a dilu el kmo: “Cho bo mkaubltikerreng, e te mo medengelkemiu a rokuil chad el kmo kom Obengkek.” (Johanes 13:35) Sel monger aika el ongingil el ker, e di el kau el oker er kau el kmo: ‘A rechedal tia el klechelid te olecholt er a bltikerreng el mo er a rokui el chad er a bek el taem, el diak di el okiu a ngor e ngdirrek el chemolt er a omerellir?’

TEKOI EL SOADEL: Mekemad.

A OSISECHEKLEL A BIBLIA: A Jesus a milellach er a rulebengkel el kmo: “Ngdi ngak a dmu er kemiu ar urrenges el kmo, Bo le betik a rengmiu erar cherrouiu, e bo moruul a ungil el mor tirikel ouketui er kemiu.”​—Lukas 6:27.

Sera be lomdechem er a Jesus a resoldau, e a apostol el Petrus a ultebedii a saider el mo mesebechakl er ngii. Engdi a Jesus a dilu el kmo: “Mlia saider er kau era le mlarngii; e tirikel rokui el ousbech a saider a mo nguemed era saider.”​—Matteus 26:52.

A apostol el Johanes a milluches el kmo: “Itiaikid a meketeklii a klekakerous erar ngelekel a Dios mar ngelekel a diabelong el kmo: ngikel diak loruul a llemalt a dimlak le ngara Dios el mei, me ngikel diak le betik a rengul er chodam er ngii me nguaisei. Le tiakid a klumech el mrirengesii ra kot luchul el kmo, ngkired el mo dul kaubltikerreng, e lak bo de ua Kain el mlar ngikel mekngit el mei, me ngmilekodir a chochellel.”​—1 Johanes 3:10-12.

KER: Tia el klechelid ngmelisiich er a rechedal el mo teloi er a mekemad?

TEKOI EL SOADEL: Tekoi er a politiks.

A OSISECHEKLEL A BIBLIA: A uriul er a bo lodengei el kmo a Jesus a sebechel el meruul a mengasireng el tekoi, e a rebebil a mlo sorir el melai er ngii el mo chad er a politiks. Me ngmilekerang? “Ma Jesus ra bocha lodengei el kmo te merekung lomdechem er ngii e meruul er ngii el mo king, e ngulibngii el lmuut el mora rois el di ngiil tang.”​—Johanes 6:15.

Sera lebdechemii a Jesus e lotelecheklii el kmo ngmelisiich er a rechad el mo omtok er a kabelment, e ngdilu el kmo: “A rengedek a diak le ngar tial belulechad; le kmo rengedek a ngar tial belulechad, e ar chederdellek chokoad, me ngdiak kbora chimorir ar Chijudea; ngdi rengedek a diak le ngar tial belulechad.”​—Johanes 18:36.

A Jesus er sera loluluuch el mo er a Dios el kirir a rulebengkel, e ngdilu el kmo: “A tikingem a bla kbesterir; e a belulechad chouketui er tir, ele te diak le klalo ra belulechad, el ua ngak el diak kklalo ra belulechad.”​—Johanes 17:14.

 KER: A rechedal tia el klechelid te oltirakl er a kerebil a Jesus el diak el teloi er a tekoi er a politiks, alta e te medengei el kmo te mo muketui er a rebebil el chad er a politiks?

TEKOI EL SOADEL: Omengetukel er a rechad.

A OSISECHEKLEL A BIBLIA: A uriul er a lebo el Kristiano tirke el mle kot el diak el blotk el Chisentail, e a apostol el Petrus a dilu el kmo: “Chelecha e ak meral mocha medengei el kmo a Dios a diak longetukel rar chad, me tirikel meluu ra Dios e meruul a llemalt a le ngiiteterir ra bek el beluu.”​—Rellir 10:34, 35.

A Jakobus er a loluches el mo er a Rekristiano er a kot el dart el rak e ngdilu el kmo: “Rudam er ngak, lak lurrechomel er chomengetukel rar chad sel kloumera er kemiu el mora Rubak er kid el Jesus Kristus, el Rubak er a klebkall. Chomko ngngarngii a chad el mo soiseb ra chongdibel er kemiu el ngarngii a kolt el kebkab ra chimal e oubail ra klebokel el bail, e dilerrek el soiseb a chebuul el chad el oubail ra mechut el bail, isei e ngblak a rengmiu er ngikel oubail ra klebokel el bail, me kom dmu er ngii el kmo, ‘Bo mdengchokl er tial ungil kingall;’ e ngikel chebuul cho mdu er ngii el kmo, ‘Bo mdechor er sei,’ malechub e ‘Bo mdengchokl er bita er chochik,’ isei e ngdiak le ua cho bocha molekiakl rar chad ra delongeliu e bocha moukerrekeriil loba mekngit luldasu?”​—Jakobus 2:1-4.

KER: Tia el klechelid ngolisechakl el kmo a rokui el chad a di osisiu er a medal a Dios me a rechedal a diak longetukel er a ngii di el chad, e le tir el chad er a ngodech el beluu me a lechub e te merau me a lechub e te chebuul?

[Blurb er a 7 el llel]

Ngera el klechelid a olisechakl er a rechederir el mo diak el teloi er a tekoi er a politiks me a omengetukel er a rechad me a omengirt el cheldebechel, el ngii a meruul a klekakeakl er a delongelir a rechad?