A LSEKUM e ke osiik a ulekrael el kirel a omerellel a tekoi, e ngkmal betok a ngar er ngii el sebechem el metik. Aike el siobai el oltobed a babier el mesaod a omerellel a tekoi el sebechem el menguiu e di kau el meruul a bebil er aike el kot el mereched el mukeroul el siobai er a beluulechad. Ngar er a betok el kakerous el beluu el ua Britain me a Latin America me a Siabal me a Merikel, e a babier el kirel a omesodel a di el kid el meruul a tekoi a merael a chisel. A video me a seminar me a program er a TV el kirel a kmo ngmekerang e di kid el meruul a tekoi a mla mo haeri. Sel uldasu el kmo a chad a sebechel el di ngii el sumechokl a mondai er ngii el diak bo lomes er a retoktang er a uldasu me a rekonsol er a chebechiil me a lechub a remengeteklel a klechelid, sei a mengesuseu a uldesuir a rechad.

A omellach el loltobed ngoureor? A lebebil er a taem e ngoureor, engdi oumesingd el taem e ngdiak. Me seikid e ngmellomes a bo dolatk a uleklatk el ngar er a Biblia el kmo: “A meleolt a rengul chad a oumerang a rokui el tekoi, e a mellomes a rengul a omes er a le bor ngii.”​—Osisechakl 14:15.

A ulekrael el kirel a kmo ngmekerang a domekungil a klengar er kid a kmal ngodech ngii me aike el ulekrael el lolisechakl a duch er a omelai el siasing me a accounting me a omelekoi. A babier el omekrael er kid er aikang a oureor e kuk beot a cheral er a debo er a ileakl el skuul el kirel aikang. Engdi babier el olengeseu er a di kid el kirel a tekoi er a siobai me a chebechiil me a klengelakel me a klisichel a uldesued a kmal ngodech. Ngblechoel el melisiich a ileakl el rolel a klengar me a lechub e nguldasu. Me seikid e ngmellomes a doker el kmo: Ngtecha ngike el uleltobed er tia el ulekrael? Me a tekoi el losaod ngngilai er ker?

A rechellimosk el mesaod a tekoi a diak el blechoel el ultuil a uldesuir er a mla meketmokl el omesuub. A rebebil a oltobed a ulekrael el rebetok el chad a omechar e le tir el medengei el kmo ngsebechir el mo koreker a betok el udoud a di lolekoi er a rechad aike el sorir el orrenges. Ngar er a chelsel a ta el beluu, e a siobai er a otebedel a babier el kirel a dolengeseu er a di kid a kuk betok er a eai el billiol el kluk a sisebellel er a bek el rak!

Ngua Ngera Klungiolel a Ulekrael el kirel a Dolengeseu er a Di Kid?

Sel bo mosiik a ulekrael el di kau el olengeseu er kau, e ke melatk el mo ngmai a ulekrael el mera el oureor. Engdi lebebil er a taem, e ke mo metik el kmo ngdi uldasu el diak el sebeched el mera el ousbech er a klechad er kid. Ke blechoel el metik a choua isei el ulekrael el melekoi el kmo: ‘A bo lemelemalt a uldesuem, e a tekoi el moruul a mo ungil. A ngii di el ngerang el soam, a ludoud me a leklisichel a bedengem me a lechub el deurreng er a deluill er kau me a rebebil, me ngsebechem el di mo nguu a lsekum e ngmelemalt a uldesuem.’ A choua isei el ulekrael ngmera el ngar er ngii a lerellii? Ngsebechel el ngosukau el mo chobangel a mera el blekerdelel a klengar me a tekoi el mo duubech el sebechel el mo uchul a klengiterreng?

El ua tiang, ka molatk a babier el kirel a deluill er a rechad me a tekoi er a chebechiil, el ngii a uldimukl er aike el kmal merael a chisel el babier. Ngsebechel el ngosuterir a rechad el smisiich a deurreng e remuul a telungalek el mo ulterekokl? Ngdiak el blechoel el uaisei. A ta er a merritel aika el babier a ulemes er a babier el kirel a bltikerreng el kmal mle betok el chad a ulemechar er ngii er a beluu er a Latin America e kmo “ngmelisiich er a remenguiu el kmo te mekerang e mekdubech a ungil el deluill er tir me a rechad e toketek a ungil el uldasu el di kirir.” A chad el milluches er ngii el babier a melekoi el kmo a omolemolem el ngar er a chelsel a deluill el diak el oureor e ngdi ua di el kau el oltuub er kau. Me sel lolisiich er ngii el tekoi a ua el du el kmo ngkmal klou a ultutelel a chad a loruul a tekoi el oldeu er a rengul er a bai lolengeseu er a chad el mo mes el kmo ngerang a mondai er ngii e mekerang a lolasem el mesmechokl.

Me alta e a babier el omsa chad a ulekrael el kirel a di el ngii el olengeseu er ngii a ngar er ngii a bebil er a ungil el ulekrael er a chelsel engdi ngdirrek el sebechel el msa ulekrael el mo uchul a telemellel. Oumesingd el taem, e a rechellimosk el mesaod a tekoi a oltobed a ulekrael el sebechel el ngosuir a chad er a ta er a tekoi engdi ulekrael el kuk kirel a tang a sebechel el remuul a blekeradel el mengal mo mekngit. Ngkmal meringel a bo doledaes aika el betok e blechoel el ketouch el uldasu el kirel a ulekrael el lomeskid ngii el babier. Me ngulekrael el mla er techang a sebeched el otuil a klaumerang er kid er ngii? Di el kau el oker er kau el kmo: ‘Tia el ulekrael ngmla er ngii a ungil el omesuub el mleketmokl el kirel, me a lechub e ngkuk di uldesuel a chad el melluches er tia el babier? A tekoi er a skel a kerruul me a klengarbab el deruchall, ngmengetikaik er a blakerreng er a chad el melluches er tia el babier?’

 A ta el ulekrael el mla measem er a klteketel a taem e diak lemengodech a Biblia. Ngmeskid a ulekrael el kirel a betok er aika el tekoi el losaod aike el babier el donguiu e di kid el olengeseu er kid me a lmuut el bebil. Ngmla rulleterir a rebetok el milliol el mo meruul er a tekoi el loltirakl er a omellach el kmo: “Ma reng er chomelebedebekiu bo le mukbeches, e moubail er ngikel beches el chad.” (Efesus 4:23, 24) A Biblia a meskid a klemedengei er a kmo ngera uchul me ngngar er ngii a mondai er kid e osisecheklid el kmo ngmekerang a dosmechokl. E a ngar er a bab er ngii, e ngmeskid a mesisiich e mera el oureor el ulekrael el olengeseu er kid el mo meruul a melemalt el tekoi. Sel ongingil el suobel a mo smodii el kmo tiang mekerang e mo uaisei.