NGAR ER A MATEUS 13:24-26, e a Jesus a dmu el kmo: “Ng ua tiakid a Rengedel a eanged. A tal chad a ulemriid a ungil tane er a sersel. A tar a klsus er a bla bo le bad a re bek el chad e a cherarou a mlei el mriid a tane er a mekngit el dellomel er a delongelel ngiil tane er a ungil dellomel e merael. Me tia er a bo le meklou ngiil dellomel el mocha oltobed a bngal, e ng mocha bleketakl a ikal mekngit el dellomel.” A rekakerous el chad er a omeluches a uluumededenger el kirel tia el okesiu. Me nguaisei, engdi a babier el mesaod a llecherir a rechad er a Rom a millekoi el kirel tia el okesiu el kmo ngklemerang.

A ta er a dictionary er a Biblia a melekoi el kmo: “A omriid el tane er a mekngit el dellomel er a sers el omelaitechei a uchul . . . a millemall a llecherir a rechad er a Rom. Me a klisichel a llach el milerrob er tia el omeruul a ochotii el kmo, tia el tekoi a dimlak el blechoel el duubech.” A chad er a llach el Alastair Kerr a milsaod el kmo, sera 533 C.E., e a Emperor el Justinian a lilechesii a babier el Digest, e tiang a milsaod a llach er a Rom el mleketmokl er seikid el taem er a (bekord el 100-250 C.E.). Me a doltirakl er tia el babier el (Digest, 9.2.27.14), e a chad el meluches a llach el Ulpian a milsaod el kirel a kerrekeriil er sera ongeru el dart el rak el uluungerachel er ngii a chad er a Rom el Celsus. E tiang a kerrekeriil el kirel a chad el mirriid a mekngit el tane er a sersel a ta er a chad el mlo uchul a telemellel tia el sers. Me tia el Digest a milsaod a kakerous el rolel a otireklel a llach el rullii a chad el ouklalo er a sers, me a lechub e ngchad el meleng a chutem e ousers el mo ngmai a medal me a lechub e ngtechil a dellemelel el miltemall el tia el omeruul a uchul.

A choua tia el mekngit el omeruul el mla er ngii er aike el beluu el lulengedereder a beluu er a Rom er a irechar, a ochotii el kmo a omesodel a Jesus el kirel a klemerang.

TIAIKID el taem, e a beluu er a Judea a lulengedereder er ngii a rechad er a Rom el lulemtechei er ngii a kabernor el mla er ngii a resoldau er ngii. A mle moktek er ngii a millai a tax el kirel a beluu er a Rom e oterekeklii el kmo, ngar er ngii a budech me a kltarreng er a beluu. A rechad er a Rom a mle semeriar el merrob aike el omeruul el omtok a llach er a beluu, e oukerekeriil er tirke el meruul a uldikel er a chelsel a beluu. Me nguaisei engdi, te di milechei a tekoi er a bek el sils me ngmelemolem el oltirakl a llecherir a rechad er a Judea.

A Ngarbab el Kort er a Rechad er a Judea a uleltaut a llecherir a Rechijudea. Engdi ngmla er ngii a ngariou el blai er a kerrekeriil er a chelsel a beluu. Me a oumesingd el kerrekeriil a meketmokl er a chelsel aika el ngariou el blai. Engdi sel kerrekeriil el kirel a chad el lokodall, a ngar er ngii a llemeltir a rechad er a Rom el oukerrekeriil el kirel. Me a merael a chisel el kerrekeriil el mileketmokl er a Ngarbab el Kort er a Rechad er a Judea, a sera lebetechii a Stefanus el mekodir.​—Rellir 6:8-15; 7:54-60.

A Ngarbab el Kort er a Rechad er a Judea a mlo oltaut a llechul er a oumesingd el beluu er a Judea. Me nguaisei, engdi sel “mle kot el ngarbab el tekoi,” a ua lolekoi a Emil Schürer el kmo, “a kabelment er a Rom a mle sebechel el di soiseb er a beluu el oba klisichel el oukerrekeriil e meruul a tekoi. E tiang a dilubech er a taem el luluumerang el kmo, ngmla er ngii a tekoi el mleketmokl er a beluu el kirel a ultok er a balatiks.” A ta er a olechotel tiang a dilubech er a taem er a longkar er a beluu a merreder er a soldau er a Rom el Claudius Lysias, er a ludechemii a apostol el Paulus el ngii a mle chad er a Rom.​—Rellir 23:26-30.