Mongeroid er Kau er a Klsuul el Omengull!

“Ngdilu Rubak el kmo, mtobed ra chelsir el mo cheroid er tir, e lako morreek a idokel.”​—2 KORINTH 6:17.

1. A rebetok el chad te ngar er a chelsel a ua ngera el blekeradel er a klereng?

 A REBETOK el chad a diak lodengelii a klemerang el kirel a Dios ma ike el mo duubech er a ngar er a mederir el klebesei. E le tir el dirkak lebetik a nger er aike el dmolech el tekoi er a klereng a uchul, me ngrrau a rengrir. A rebetok el milliol a mla mo sibil a superstition ma betok el siukang ma ungil el klebesei el louketui er ngii a Omebeled. Nguaisei, alta e a retonari er kau ma rechedam a oumerang er a beluu er a ngau, ma Dios a trinidad, ma soul a diak lemad, ma lmuut el bebil er a klsuul el osisechakl.

2. A remengeteklel a klechelid ngera te mla remuul, e ngera dilubech?

² Ngerang sel uchul tia el klou el ilkolk er a klereng? Ngmechas a rengud e le ngklechelid a uchul, el ileakl aike el cheldebechel ma remengeteklel a klechelid el tir a olisechakl a tekoi el omtok er a uldesuel a Dios. (Markus 7:7, 8) Isei a uchul, e a rebetok el chad a mla mecheblad el leko te mengull er a mera el Dios, e a lechub e te bai omtok er ngii. Ma klsuul el klechelid a mera el uchul tiaikid el mekngit el blekeradel.

3. Ngtechang ngike el ngar er a uchei el oldubech a klsuul el klechelid, e mekera Biblia a losaod el kirel?

³ Ngar er ngii a diak lemeues el chad el ngii a oldubech a klsuul el klechelid. A apostol el Paulus a melutk el kirel el kmo: “A chelid er tial belulechad a mla chouid a rengrir tirikel diak loumerang, e meruul er tir me lak lesa llemesel a evangkelio ra klebkellel a Kristus, el ingii a teletelel a Dios.” (2 Korinth 4:4) “A chelid er tial belulechad” a ngike el Satan el Diabelong. Ngii a ngike el ngar er a uchei el oldubech a klsuul el omengull. E le Paulus a milluches el kmo: “A Satan me ngdirrek el meruul a teletelel el leko ngchanghel ra llomes. Misei e ngdiak le rrau a rengmiu a loruul er tir ar mesiungel a Satan el leko te mesiou ra llemalt.” (2 Korinth 11:14, 15) A Satan a meruul a mekngit el kora mo ungil, e mengeblad er a rechad me loumerang er aike el blulekngel.

4. Ngerang melekoi a Llach er a Dios el mo er a Israel er irechar el kirir a reklsuul el profet?

⁴ Ngmera el ngar er ngii a ungil el uchul e a Biblia a omtok er a klsuul el klechelid! El ua itiang, a Llach er a Moses a kmal ulemeklatk er a rechedal a Dios el kirir a reklsuul el profet. Ma ngii di el chad el olduubech a klsuul el osisechakl ma omengull el mo er a reklsuul el chelid a ‘kirel el mo mokoad’ e le ngii el omtok er a Jehovah. A Rengalek er a Israel a mlellach el kmo: “Tiakid a rolel e kom oridii tial mekngit.” (Duteronomi 13:1-5) Chochoi, a Jehovah a omes a klsuul el klechelid el kmo ngmekngit.​—Esekiel 13:3.

5. Ngera el uleklatk a kired el melatk er ngii er a chelechang?

⁵ A Jesus Kristus ma rechapostol er ngii a dul ullecholt er a osengel a Jehovah el kirel a klsuul el klechelid. A Jesus a ulemeklatk er a redisciplo er ngii el kmo: “Mkekerengemiu rar klsuul profet, toubail ra sib e ekor kemiu, e a chelsel a rengrir a bekeu el merechorech el okami.” (Matteus 7:15; Markus 13:22, 23) Ma Paulus a milluches el kmo: “E a cheldechuderreng ra Dios a ngara eanged el me chemolt el bedul a rokui blekeradel rar chad el diak loluu ra Dios, ma chelebirukel el melenget ra klemerang.” (Rom 1:18) Ngkol ua ngera el klou  a ultutelel el kirir a remera el Kristiano el mo melatk aikang e mengeroid er tir er a ngii di el chad el omtok er a klemerang er a Tekingel a Dios ma lechub el omerk a klsuul el osisechakl!​—1 Johanes 4:1.

Mtobed er a “Kloul Babilon”

6. Ngmekerang a Biblia a losaod er a “Kloul Babilon”?

⁶ Ka momes er sel rolel a babier er a Chocholt a losaod el kirel a klsuul el klechelid. Ngolecholt er ngii el ua letingaol el dil el cheltelaol er a bilong el olab a dereder el mengedereder er a betok el renged ma dirrek a rechad. Ngika el okesiu el dil a ngar er a deleboes el obengterir a reking er a beluulechad e cheltelaol er a rsechir a remera el mengull er a Dios. (Chocholt 17:1, 2, 6, 18) Ngar er ngii a ngakl el llechukl er a medal a bdelul el olecholt er a kmal mekngit el blekerdelel ma omerellel. Tia el ngakl a “Kloul Babilon, el derrir ar tingaol dil ma ketiaol ra belulechad.”​—Chocholt 17:5.

7, 8. Ngmekerang a loruul a deleboes aike el klsuul el klechelid, e ngera mlo rsel?

⁷ A omesodel a Bades el kirel a Klou el Babilon a melutk el mo er aike el rokui el klsuul el klechelid. Alta e aike el betok el telael el klechelid a diak di lebo er a chimo el cheldebechel el meliuekl er a beluulechad, engdi a moktek er tir ma omerellir a di osisiu. El di ua ochotel el ngar er a Chocholt el tingaol el dil, ma klsuul el klechelid a ngar er ngii a klou el klisichel el orrurt aike el kabelment er a klechad. A klsuul el klechelid a lomekesiu er ngii er a redil el diak loltirakl a telbiil er a chebechiielel, me ngmerruul a deleboes el obengterir a rechad er a betok el kabelment. A disciplo el Jakobus a milluches el kmo: “Kemiu el melaok a rengmiu! Ngdiak modengei el kmo a dousechelei ra belulechad e kede cherarou ra Dios? Tirikel sorir lousechelei ra belulechad a di tir el rulleterir el mo cherarou ra Dios.”​—Jakobus 4:4.

⁸ Tia el blekeradel el klsuul el klechelid el urrachem er a kabelment a mlo uchul a klou el ringel er a klechad. A chad er a Africa el merritel a tekoi er a politiks el Dr. Xolela Mangcu a dilu el kmo: “A reksi er a beluulechad a mui er a okodellir a rebetok el chad el klechelid ma politiks a uchul.” Ma ta er a simbung a millekoi el kmo: “A klechelid a uchul aike el meklou e kdekudel el merserasech el koadelchad er a chelecha el taem.” A betok el milliol el chad a mla mad e le ngultok er a klechelid a uchul. A Klou el Babilon a dirrek el oldechelakl e mla mekodeterir a remesiungel a Dios, me ngua lecheltelaol er a rsechir.​—Chocholt 18:24.

9. Ngmekera babier er a Chocholt a mesaod er a kltui er a Jehovah el mo er a klsuul el klechelid?

⁹ A Jehovah a ouketui a klsuul el omengull, e tia kmal bleketakl sel domes a tekoi el dilubech el mo er a Klou el Babilon. A Chocholt 17:16 a kmo: “Ma ikel mules el truich lorus, ma charm iaikai a mo ouketui er ngikal tingaol dil; me te mo rullii  el mo cheloit e meau, e mo kma techel a bedengel e durur lokngemedii ra ngau.” A kot, e a klou el charm a odelecheklii el mekodir e kma techel a bedengel. E aike el mo medechel a mo medul er a ngau. Me nguaisei, ngdi kmedung e a kabelment er a beluulechad a mo omtok er a klsuul el klechelid. A Dios a mo oterekeklii tia el tekoi. (Chocholt 17:17) A Klou el Babilon, el renged er a klsuul el klechelid el ngar er a beluulechad, a mo “nguemed el rokir.”​—Chocholt 18:21.

10. Ngkirel el mo ua ngera osenged el bedul a klsuul el klechelid?

¹⁰ Ngkirel el mo ua ngera osengir a remera el mengull el bedul a Klou el Babilon? Ngkmal bleketakl a omellach er a Biblia el kmo: “Kemiul chad er ngak, mtobed ra chelsel, me lak mobengkel er a kngtil, me lak bo mobengkel el mukringel.” (Chocholt 18:4) Tirke el sorir el mo suobel a kirir el tuobed er a klsuul el klechelid er a uchei er a bo lemeoud. Sera lengar er a chutem, e a Jesus Kristus a ulemlaoch el kmo, a uriul el sils e te betok a mo melekoi el kmo te obengkel. (Matteus 24:3-5) Ngmelekoi el mo er tirkaikid el kmo: “Ngkmal diak kudengelkemiu; mcheridemiu ar meruul a chelebirukel.” (Matteus 7:23) Ngika el mla mo King el Jesus Kristus a mla otngeklii a klsuul el klechelid.

Mongeroid er Kau​— El Mekerang?

11. Ngera kired el rullii me bo decheroid er a klsuul el omengull?

¹¹ A remera el Kristiano a mengeroid er tir er a klsuul el omengull sel loltngakl a klsuul el osisechakl. Tia belkul a kmo ngdiak dorrenges a tekoi er a klechelid el ngar er a razio ma tv ma diak donguiu a babier er a klechelid el oldubech a blulak el kirel a Dios ma Tekingel. (Psalm 119:37) Ngdirrek el kired el mengeroid er kid er aike el kldibel ma rolel a omilil el loruul a ngii di el cheldebechel er a klsuul el klechelid. Ma dirrek el diak dolengeseu er a klsuul el klechelid er a ngii di el rolel a ngeso. (1 Korinth 10:21) A bo doruul el uaisei e ngmo omekerreu er kid me “lak mudechem ra bechachau lomengeblad el llomeserreng el mengetiit ra belulechad, e tia diak loltirakl ra Kristus.”​—Kolose 2:8.

12. Ngera sebechel el rullii a chad me lemengai a ngklel er a ngii di el cheldebechel er a klsuul el klechelid?

¹² A lsekum a chad a soal el mo ta er a Sioning er a Jehovah e a ngklel a dirk ngar er a klsuul el klechelid, e ngkirel el mo mekerang? Oumesingd el taem e ngkirel el lluchesii a babier me lemengai a ngklel el olecholt el kmo ngmla mo diak el soal el chedal sel klsuul el klechelid. Ngkmal klou a ultutelel el kirel a  chad el rullii tia el tekoi me lak bo lechelsechusem er a ngii di el tekoi er a klsuul el omengull. A omerellel ngike el melatk el mo ta er a Sioning a kirel el mo bleketakl el mo er sel mle klechelid er ngii ma rechad er a buai el kmo ngmla mo diak el chedal seikid el klechelid.

13. Ngera el uleklatk a lebeskid a Biblia me bo lsebeched el mengeroid er kid er a klsuul el omengull?

¹³ A apostol el Paulus a milluches el kmo: “Lako mobenterir ar diak loumerang el ngara tal ongelungel, e ngdiak bo ltang. Ngera ra llemalt ma chelebirukel a dmak? Ma ngera klaodengei ra llomes ma ilkolk? Ngeral klaiuedak a ngarngii ra Kristus ma Belial? Ma ngeral klauchad a ngarngii er choumerang ma diak loumerang? Ma ngeral kltang a ngarngii ra templo ra Dios ma bleob el chelid? . . . Misei, e ngdilu Rubak el kmo, ‘mtobed ra chelsir el mo cheroid er tir, e lako morreek a idokel.’ ” (2 Korinth 6:14-17) Kede oltirakl aike el tekoi sel bo decheroid er a klsuul el omengull. A uleklatk er a Paulus ngbelkul a kmo ngkired el mengeroid er kid er a rechad er a klsuul el omengull?

“Bo Morael el Ngar er a Llomeserreng”

14. Me kid ngkmal kired el mengeroid er kid er tirke el chad el ngar er a klsuul el omengull? Mosaod.

¹⁴ A rengar er a mera el omengull ngkirir el mengeroid er tir er a rokui el chad el ngar er a klsuul el omengull? Kid ngkmal diak el sebeched el obengterir a rechad el tir a diak lobengked el ngar er a ta el klaumerang? A nger a kmo ngdiak. E le a ongerung er aike el eru el meklou el llach a kmo: “Bo le betik a rengum era ngar bita er kau el ua le betik a rengum er kau.” (Matteus 22:39) Kede olecholt a bltikerreng el mo er a rengar er a bita er kid sel domerk er a ungil el chais er a Renged el mo er tir. A bltkil a rengud el mo er tir a mocholt sel dosuub a Biblia el obengterir me bo lsebechir el mo medengelii a uchul e ngkirir el mengeroid er tir er a klsuul el omengull.

15. Ngera belkul sel tekoi el kmo, ng “diak le klalo ra belulechad”?

¹⁵ Alta e kede omerk er a ungil el chais el mo er a retonari er kid, engdi kid a oltirakl er a Jesus me ngdiak de “chedal a belulechad.” (Johanes 15:19) Sel tekoi el “belulechad” a melutk el mo er a klechad el ngii a cheroid er a Dios. (Efesus 4:17-19; 1 Johanes 5:19) Kede meleakl er kid er a beluulechad e le kede mengeroid er kid er aike el uldasu ma omelekoi ma omeruul el louketui er ngii a Jehovah. (1 Johanes 2:15-17) Ma doltirakl er sel omellach el kmo “a mekngit el klausechelei a tomii a ungil blekeradel,” e ngdiak dobengterir tirke el chad el tir a diak loltirakl a llach er a Rekristiano. (1 Korinth 15:33) A lak bo deteloi er a beluulechad e ngkired el “diak le mechesechusem ra idek ra belulechad.” (Jakobus 1:27) Me nguaisei, a bo dechileakl er a beluulechad a diak lebelkul a kmo kede mo cheroid er a rokui el chad.​—Johanes 17:15, 16; 1 Korinth 5:9, 10.

16, 17. Ngkirel el mo ua ngerang a omerellir a Rekristiano el mo er tirke el diak lodengelii a klemerang er a Biblia?

¹⁶ Ma leuaisei, e kede mo mekerang el kirir tirke el chad el diak el lodengelii a klemera er a Biblia? El mo er a ongdibel er a Kolose, e a Paulus a milluches el kmo: “Bo le mellomes a rengmiu era blekerdeliu el kirir tirikel ngara ikrel, e le blak a rengmiu lousbech lotutii chelechal techall. Mdiblechoel lousbech a medemedemek el cheldecheduch, el ulsar, me bo modengei a ikel kiriu longer ra dertal chad.” (Kolose 4:5, 6) E a apostol el Petrus a milluches el kmo: “E di mongedaol ra Kristus el Rubak ra chelsel a rengmiu. E mkedmeklemiu el di sebechiu loba delemedemek ma chomeluu el smodii a blkul sel omelatk el ngara chelsiu er tirikel mengeriil chomesaod.” (1 Petrus 3:15) A Paulus a millellach er a Rekristiano me “lak  lolaes rar chad el ka longaititekangel , e bai le sorir a budech e dileblechoel lolecholt ra delemedemek el mora rokuil chad.”​—Titus 3:2.

¹⁷ Kid el Sioning er a Jehovah a diak lemekngit a blekerdeled ma diak dongedidai er kid el bedul a rekuk bebil. Ngdiak dousbech a mekngit el tekoi el mesaod er a rechad el ngar er a kuk bebil er a klechelid. Ngdiak, kede bai kerekikl a cheldechedechad, el mo lmuut ma lsekum a tonari er kid ma chad er a urered a melekoi a mekngit el tekoi el me er kid.​—Kolose 4:6; 2 Timoteus 2:24.

“Moukerebai a Diak a Rekdel Losisechakl”

18. Ngera el mekngit el blekeradel er a klereng a bo lecheremii tirke el chad el liluut el mo er a klsuul el omengull?

¹⁸ Ngkol ua ngera el klengiterreng a lsekum a uriul er a lesuubii a klemerang er a Biblia, e a chad a lmuut el mo er a klsuul el omengull! A Biblia a mesaod aike el mekngit el sebechel el mo duubech a bo leuaisei a tekoi el kmo: “A le chiis ra ngellengalek er tial belulechad el oeak sel klemedengei el medengelii a Rubak er kid e Osobeled el Jesus Kristus, e uriul e lluut el mechiseksikt e le mechedereder er ngiil ngellengalek, e a blekerdelir a lmuut el mo mekngit er sera kot luchul. . . . Ngarngii a blkul a tekoi el merang el kmo, ‘A bilis a lmuut el mor sel le bildechii’ ma dmu el kmo, ‘A babii a metecholb e lmuut el mo melitai er ngii ra chelsel a dechudech.’”​—2 Petrus 2:20-22.

19. Ngera uchul me ngkired el kerekikl er a ngii di el tekoi el sebechel el tomellii a klereng er kid?

¹⁹ Ngkired el mo kerekikl er a ngii di el tekoi el sebechel el melemall er a klereng er kid. Ngmera el ngar er ngii a kengaol el tekoi! A apostol el Paulus a omeklatk el kmo: “Ngdi Reng a bleketakl el mesubed el kmo, a le bor sel uriul blsechel e ar bebil rar chad a mo merodel a rengrir ra reng el mengeuid ma chosisechakl rar mekngit el reng, me toberuud el mo cheroid ra kloumerang.” (1 Timoteus 4:1) Kede kiei er “sel uriul blsechel.” Tirke el diak longeroid er tir er a klsuul el omengull a sebechir el mo “oberius el mechetakl ra bek el eltel chosisechakl el duubech ra cheleblad rar chad, el ngara ulekbat el mengeuid.”​—Efesus 4:13, 14.

20. Kede mekerang e sebeched el omekerreu er kid er a klisichel a klsuul el klechelid?

²⁰ Kede mekerang e omekerreu er kid er a klisichel a klsuul el klechelid? Bo molebedebek aike el rokui el bla lebeskid a Jehovah. Kede oba Tekingel a Dios, el Biblia. (2 Timoteus 3:16, 17) A Jehovah a dirrek el mla meskid a obdois el okelel a reng el oeak “ngikel blak a rengul e mellomes a rengul mesiou.” (Matteus 24:45) Sel dolengeriakl el ngar er a klemerang, e kid ngdiak bai bo dolemolem el osiik a “medecherecher el kall a lousbech ar mla mukeroul,” e bo deblechoel el mo kldibel e dedak el mesuub a klemerang el tekoi er a klereng? (Hebru 5:13, 14; Psalm 26:8) Mada me bo leblak a rengud el ousbech aike el omeskid a Jehovah me bo lsebeched el “moukerebai a diak a rekdel losisechakl” el bla derenges. (2 Timoteus 1:13) E seikid e ngmo sebeched el mengeroid er kid er a klsuul el omengull.

Ngera Ke Silubii?

• Ngerang a “Kloul Babilon”?

• Ngera kired el meruul me bo decheroid er a klsuul el klechelid?

• Ngera el kdekudel el tekoi el sebechel el tomellii a klereng er kid a kired el mo cheroid er ngii?

[Aike el Ker er a Suobel]

[Siasing er a 4 el llel]

Ke medengelii a uchul e a “Kloul Babilon” a lomekesiu er ngii er a tingaol el dil?

[Siasing er a 5 el llel]

A “Kloul Babilon” a mo nguemed

[Siasing er a 7 el llel]

Kede olecholt a “delemedemek ma chomeluu” el reng el mo er tirke el diak lobengked el ngar er a ta el klaumerang