A Rechad er a “Ngodech el Beluu” a Orrenges a Ungil el Chais

“Seikid e a re truich el chad er a ngodech el beluu a dmu el kmo, ‘Aki obengkem el mor sel bor ngii, ele kim mla remenges el kmo a Dios a obengkem.’”​—SEKARIA 8:23.

1. Ngmilekerang a Jehovah e uluusbech er a ungil el blsechel ma basio el mengetmokl er a Klekristiano el mo melekoi a kakerous el omelekoi er a beluulechad el rokir?

 SEL taem ma basio a kmal mle ungil. Ngmle Pentekost er a  33 C.E. A sesei el sandei er a uchei, e a Rechijudea ma remla obult el chad el mla er a bekord el 15 el cheroid el beluu er a Renged er a Rom a mlo er a Jerusalem el mlo mengedaol er a Baskua. Seikid el sils, e a rebetok el telael el chad el ulerrenges a mlo omtab a tekoi, te dimlak lerrau a rengrir el uai a rechad er a Babel er a irechar. Te di chad engdi te mlokeek er a chedaol el reng me chelechang e te omerk er a ungil el chais el ngar er a betok el omelekoi el ousbech er a chelsel a renged. (Rellir 2:1-12) Aike el dilubech el tekoi a mle olangch el kirel a uchelel a ongdibel er a Klekristiano ma uchelel a omesuub el ousbech a kakerous el omelekoi er seikid el taem el me er a chelechang.

2. Te milekerang a redisciplo er a Jesus e “mlo odikel a rengrir” tirke el ullerrenges, el tir a mla er a ngodech el beluu el mei er a taem er a Pentekost er a 33 C.E?

² A redisciplo er a Jesus a mle sebechir el melekoi a tekoi er a Griik, el sel di mla tekingir a rechad er sel taem. Te dirrek el millekoi a tekoi er a Hebru, el luluusbech sel lengar er a templo. Engdi, sel sils er a Pentekost, e te “kilebetiekl” a ruulerenges el mla er a ngodech el beluu el mei e le te ulerrenges er tir el melekoi el ousbech a omelekingir. Ngera mlo rsel? A meklou a ultutelel el klemerang el tekoi a rirutech a rengrir e le te rirenges el oeak a omelekingir. Ma bocha lekebesengei, e tia el kekerei el cheldebechel er a redisciplo a mlo klou el ildois el kuk betok er a 3,000 el chad!​—Rellir 2:37-42.

3, 4. Ngmilekerang e a ureor er a berkel a klumech a uleberk el mo klou er sera ltobed a redisciplo er a Jerusalem ma Judea ma Galilea?

³ E di mle telkib er a uriul er seikid el taem, e a klou el odechelakl a mlo er ngii er a Jerusalem, e “tirikel melterakl a merrael el meliuekl lomerk a tekingel a Dios.” (Rellir 8:1-4) El ua itiang, kede menguiu el ngar er a Rellir Ar Apostel er a 8 el bliongel el kirel a Filipus, el chad el melekoi a tekoi er a Griik. A Filipus a ulemerk a klumech el mo er a rechad er a Samaria. E dirrek el ulemerk el mo er a ofiser er a Ethiopia el kilengei er a klumech el kirel a Kristus.​—Rellir 6:1-5; 8:5-13, 26-40; 21:8, 9.

⁴ Ma loleklukl el osiik er a mo delengcheklir el cheroid er a Jerusalem ma Judea ma Galilea, e a Rekristiano a mlo chobangel a kakerous el omelekoi ma siukang. A rebebil er tir a locha di mlengedecheduch a tekoi er a Chijudea e merekong. Engdi a disciplo el Lukas a ouchais el kmo: “E mlarngii ar bebil er tir, el chad ra Siprus ma Kirene, ma le bocha ra Antiok e te dirrek el mlengedecheduch rar Chigriik lomerk ra evangkelio ra Rubak el Jesus el mor tir.”​—Rellir 11:19-21.

A Diak Longetukel el Dios​—A Klumech el Mo er a Rokui el Chad

5. A Jehovah ngmekera e olecholt el kmo ngdiak longetukel er a rechad el kirel a ungil el chais?

⁵ A choua ike el blekeradel a oltirakl er a rolel a Dios e le ngii a diak longetukel er a rechad. Uriul er a Jehovah er a lengesuir a Petrus el omeklemalt er a osengel el bedul a rechad er a ngodech el beluu, e ngmillekoi el kmo: “Chelecha e ak meral mocha medengei el kmo a Dios a diak longetukel rar chad, me tirikel meluu ra Dios e meruul a llemalt a le ngiiteterir ra bek el beluu.” (Rellir 10:34,  35; Psalm 145:9) Sel taem e a apostol el Paulus, el ngii a uleldechelakl er a Rekristiano, a millekoi el kmo a Dios a “soal a le mosobel a rokuil chad” e ngmileketeklii el kmo a Dios a diak longetukel er a rechad. (1 Timoteus 2:4) Ngike el diak longetukel er a rechad el Ulemeob a ulterekeklii el kmo a omelatk er a Renged a nglai a chesmerel el mo er a resechal ma redil er a bek el bliongel er a rechad er a ngii di el beluu ma omelekoi.

6, 7. Ngera el ulochel a Biblia a ulemlaoch el kirel a berkel a ungil el chais el ngar er a kakerous el omelekoi er a betok el beluu?

⁶ Tia el klou el ildois er a rechad er a beluulechad a lulemlaoch el kirel er a betok el dart el rak er a uchei. Sel ulochel a Daniel a kmo: “E [a Jesus a] ngiluu a klisiich, ma omengull, ma klisichel omerreder, el kirel me losiou er ngii a re chad er bek el beluu, ma re bek el bedengir a re chad, ma kakerous el omelekoi.” (Daniel 7:14) A omelechesel tia el magazine el ngar er a 151 el kakerous el omelekoi ma omerusel el mo er a beluulechad el rokir me bo lsebechem el menguiu el kirel a Rengedel a Jehovah a olecholt er a otutel a ulaoch er a Biblia.

⁷ A Biblia a ulemlaoch el kirel sel taem el rechad el ousbech a kakerous el omelekoi a mo rongesii tia el klumech el omeskid a klengar. A Sekaria a milsaod el kirel a mera el omengull el mo olechau a rengrir a rebetok el kmo: “Seikid e a re truich el chad er a ngodech el beluu a mor a tal chad er a Judea [a rengellitel el Kristiano, el chedal a “Israel er a Dios”] e dmu el kmo, ‘Aki obengkem el mor sel bor ngii, ele kim mla remenges el kmo a Dios a obengkem.’” (Sekaria 8:23; Galatia 6:16) E a losaod er a lilsa el ues, e a apostol el Johanes a dilu el kmo: “Mesang, a diak le mochur el kloul seked a bek el renged, ma klebliil rar chad, ma bliongel rar chad, ma chomelekoi e dechor er medal a kingall ma Ngelekel a sib.” (Chocholt 7:9) Kede mla omes a otutel aike el ulaoch!

 El Mo er a Rebek el Chad

8. Ngera el blekeradel er a chelecha el sils a uchul me ngkired el ngodechii a rolel a urered er a berkel a klumech?

⁸ Chelecha el taem, e a rebetok el chad a melukl el mo er a ngodech el beluu. A keizai er a beluulechad a mlo uchul ma rechad meleklukl a delengcheklir. A rebetok el chad el belurir a ngar er ngii a mekemad ma mekngit el keizai er ngii a mellukl el mo er aike el beluu el ungil a keizai er ngii, e le te osiik a ungilbesul el rolel a klengar. El ngar er a betok el beluu, e a rechad el chiliis er a belurir, a mo dmak el kiei er sel kuk ta er a basio el lullukl el mo er ngii. El ua itiang, el ngar er a beluu er a Finland e a kuk betok er a 120 el omelekoi a lolekoi er isei; e ngar er a Australia e ngngar er ngii a kuk betok er a 200. E ngar er a di chimo el beluu er a Merikel​—el San Diego​—e ngar er ngii a kuk betok er a 100 el omelekoi a sebeched el remenges.

9. Ngkirel el mo ua ngera osenged el kirir a rechad el tir a melekoi a ngodech el omelekoi el kiei er territory er kid?

⁹ Kid el Kristiano, kede omes er a rechad el melekoi a ngodech el omelekoi el ua longesengsang er kid er a urered? Ngkmal diak! Ngbai kired el ouetkeu er ngii el ua letedebechel a territory er kid​—‘a sers a medechang el mengiil er chomeridm.’ (Johanes 4:35) Kede olengeseu er a rechad el kerekikl er a tekoi er a klereng er tir, e alta e te chad er a ngodech el beluu el ngodech a omelekingir. (Matteus 5:3) Misei a uchul ma bek el rak e a klou el ildois er a rechad er a ‘bek el chomelekoi’ a mocha disciplo er a Kristus. (Chocholt 14:6) El ua itiang, sera Ongeai el Buil er a 2004, a ureor er a berkel a klumech el ngar er a beluu er a Dois a ngar er ngii er a bekord el 40 el kakerous el omelekoi. E a osisiu el taem, e a ungil el chais a oberkang er a beluu er a Australia el kmedu el mo ngar er a 30 el omelekoi, engdi mle 18 el omelekoi er a teruich el rak er a mla me mong. Ngar er a beluu er a Gris, e a Resioning er a Jehovah a omerk el mo er a rechad el ousbech a 20 el kakerous el omelekoi. Meliuekl er a beluulechad, e ngar er ngii a bekord el 80 el basent er a Resioning er a Jehovah el melekoi er a kuk ta er a bedengel a tekoi el diak el Tekoi er a Merikel, el ngii a lousbech er ngii er a beluulechad el rokir.

10. Ngerang a ngerechelel a derta el publisher el rulleterir a rechad er a “rokuil renged” el mo disciplo?

¹⁰ Nguaisei, a Jesus a dilu el kmo “morael el mora rokuil renged el rulleterir ar chad el mo Obengkek” a toutang! (Matteus 28:19) A Resioning er a Jehovah a blak a rengrir el meruul er tia el ureor el ngar er a 235 el beluu, e merous a babier el ngar er a kuk betok er a 400 el kakerous el omelekoi. A cheldebechelel a Jehovah a meskid aike el dousbech el mo omerk, engdi a derta el publisher er a Renged a kirir el oba tia el klumech er a Biblia el mo er a “rokuil chad” el ngar er a omelekoi el tir a medengelii. (Johanes 1:7) Me tia el kltang er a reng el ureor a mesterir a rebetok el milliol el chad er a kakerous el omelekoi a uchul a klungiolir el ngar er a ungil el chais. (Rom 10:14, 15) Chochoi, a derta ma derta er kid a teloi er tia el klou a ultutelel el ureor!

Kongei er a Omelsemai

11, 12. (a) Ngera el omelsemai a kired el outekangel er ngii, e mekerang e a chedaol el reng a ngosukid? (b) Ngera uchul ma domerk el ousbech a omelekingir a rechad a lmuut el ungil?

¹¹ Chelechang, e a rebetok el omerk er a klumech er a Renged a sorir el mesuub er a kuk ta er a omelekoi, engdi diak el sebechir el ultuil ma ka lousbech el kmo a ongasireng el omerellel a chedaol el reng er a Dios a mo ngosuterir. (1 Korinth 13:8) A omesubel a ngodech el omelekoi a kmal merringel el tekoi. Mo lmuut er tirke el melekoi a eru el bedengel a omelekoi a kirir el ngodechii a uldesuir ma rolel a longedecheduch me bo lsebechir el rullii a klumech er a Biblia el mo olechau a rengrir a rechad el tir a medengei a tekingir engdi  a siukang ma blekerdelel a klengar er tir a kakerous. Ma dirrek, a rechad el dirk millukl el mei alta e te merur e melengmes, me ngmeringel a bo dodengei a ngar er a uldesuir.

¹² Nguaisei, a chedaol el reng a dirrek el melisiich er a remesiungel a Jehovah el kirel a urerir el olengeseu er a rechad el melekoi a kakerous el omelekoi. (Lukas 11:13) A chedaol el reng a sebechel el smisiich a rengud el mo mengedecheduch er a rechad el diak lodengei a tekinged er a bai lomeskid a duch el kirel a kakerous el omelekoi el oeak a ongasireng el tekoi. (Psalm 143:10) A domerk ma lechub a dolisechakl er a klumech er a Biblia el mo er a rechad el diak el ngar er a omelekingir e ngsebechel a suobel el mo soiseb er a uldesuir, engdi lsekum ngmo remutech a rengrir, e nglmuut el ungil a dousbech er a omelekingir​—sel omelekoi el melekoi aike el dmolech el urungulir ma omelatk el ngar er a rengrir.​—Lukas 24:32.

13, 14. (a) Ngerang a rulleterir a rebebil el mo mesiou el ousbech er a ngodech el omelekoi? (b) Ngmekera e mocholt a reng er a omelenget?

¹³ A rebetok el omerk el kirel a Renged a kilengei el mo mesiou el ousbech er a ta er a omelekoi er a lomes er a klemeriarreng el mocholt el kirel a klemerang er a Biblia. A rekuk bebil a mo semeriar sel lebo lechebangel a kora meringel el rolel a blekeradel el ngar er a omesiungir. A branch el obis er a Resioning er a Jehovah el ngar er a dimes er a Europe a kmo, “a rebetok el chad el mla er aike el beluu er a Ongos el Europe a meched a rengrir el kirel a klemerang.” Ngkol ua ngera el uchul a ungilreng a dolengeseu er a ruaisei el chad!​—Isaia 55:1, 2.

¹⁴ Nguaisei, a lebo er ngii a belkul a urered, e kede ousbech er a ducherreng ma reng er a omelenget. (Psalm 110:3) El ua itiang, a rebebil el telungalek el tir a Sioning, el ngar er a beluu er a Siabal, a milechei a ungil el delengcheklir el ngar er aike el meklou el mats e mellukl el mo er a inaka el beluu el mo olengeseu er a rechad er a Sina el mo medengelii a Biblia. E ngar er a ngeberdel a beluu er a Merikel, e a republisher a blechoel el omekall a mlirir el tang ma lechub el eru el sikang me bo lsebechir el mesuub el obengterir a rechad er a Huiribing. El ngar er a Norway, e a teru el obekel a mesuub el obengkel a telungalek el mla er a Afghanistan el mei. Tirka el Sioning el obekel a ousbech er a Ngerang a Soal a Dios a  Doruul? a el brochure er a tekoi er a Merikel ma Norway. E sel telungalek a menguiu a babilengir er a tekoi er a Persia, e le ngkmeed el osisiu er a omelekingir el tekoi er a Dari. E tir a chadecheduch el ousbech er a tekoi er a Merikel ma tekoi er a Norway. Choua itia el reng er a omelenget me kid el kongei el merderodel a blekerdeled a mo uchul e a rechad er a ngodech el beluu a mo kongei er a ungil el chais.

15. Ngmekerang e kid el rokui a sebeched el mo teloi er tia el ureor el omerk er a klumech el ousbech a kakerous el omelekoi?

¹⁵ Kau ngsebechem el mo teloi er tia el ureor el ousbech a betok el kakerous el omelekoi? A leuaisei, e kele lsebechem el merritel el kmo ngera el kakerous el omelekoi a ngar er ngii er a territory er kau? E sola e morous aika el tract ma brochure er aike el omelekoi. Sel babier el Good News for People of All Nations, el tilobed er a 2004, a bla lousbech er ngii el omerk er a omelatk er a Renged el oeak a beot el ungil el klumech el ousbech a betok el kakerous el omelekoi.​—Momes er a suobel el “Good News for People of All Nations,” er a 32 el llel.

“Betik a Rengul er a Re Chad er a Ngodech el Beluu”

16. Ngmekerang e a ruungerachel el odam a sebechir el ochotii a diak lebechelechelingaol el reng el mo er a rechad el melekoi a ngodech el omelekoi?

¹⁶ Ma dosuub er a ta er a omelekoi ma lak, me kid el rokui a di sebeched el ngosuterir a rechad er a ngodech el beluu el kiei er a beluad el mesuub a tekoi er a klereng. A Jehovah a ulsisecheklterir a rechedal el “mochotii a bltikerreng er kemiu el mor a re chad er a ngodech el beluu.” (Duteronomi 10:18, 19) El ua itiang, ngar er a klou el mats er a beluu er a Merikel, e a eim el ongdibel a ousbech er a di ta el Kingdom Hall. E a bek el rak e aike el ongdibel a mo mengodech a temel a miting er tir. Ma leuaisei, e a miting el ousbech a tekoi er a Sina a kirel el mo er ngii er a telia el sils er a Sandei, e le a rebetok el chad a oureor er a restorangd me ngmo meringel er tir el mo er a miting. Misei e a rechelder er aike el bebil er a ongdibel a kilengei me bo lousbech er a blil el ongdibel er a tutau er a Sandei.

17. Ngerang a mo uldesued a lsekum a rebebil a sorir el melukl el mo olengeseu er a rechad el melekoi a ngodech el omelekoi?

¹⁷ A rechoverseer a chemat er a rudam ma rudos el meduch e sebechir el melukl el mo ngosuterir a rechad el melekoi a ngodech el omelekoi. A remeduch el olsisechakl a Biblia a mo cheroid er a ongdibel er tir, engdi a rechoverseer a oba osisiu el uldasu el di ua rechelder er a Listra ma Ikonium. Tirke el mechuodel a milecherei a Timoteus me lorael el obengkel a Paulus, altang a Timoteus a mle uchul a klungiaol el mo er a ongdibel er tir. (Rellir 16:1-4) Ma dirrek, tirke el ngar er a medal a ureor er a berkel a klumech a diak bo lemechitechut a rengrir er a ngii di el uldasu ma siukang ma omerellir a rechad er a ngodech el beluu. Ngdiak, te bai osiik a rolel me bo lungil a delongelir e le ungil el chais a uchul.​—1 Korinth 9:22, 23.

18. Ngera el klou el ureor a dirk nglai a chesmerel el mo er a rokui el chad?

¹⁸ El ua lulemlaoch el kmo, a ungil el chais a mo oberk el mo er a ‘rokui el omelekoi er a beluulechad.’ A ungil el techall el kirel a klou el ildois a dirk nglai a chesmerel el kirel a ureor el ousbech a ngodech el omelekoi. A rebetok el telael el meduch el publisher a mla soiseb er a “kloul blkais a siseball ra ngarngii a klisichel lurreor.” (1 Korinth 16:9) Me nguaisei, engdi ngngar er ngii a lmuut el betok el usbechall el tekoi el kirel choua ikeikid el territory, el bo dosaod er a ongingil el suobel.

[Footnote]

Ngsebechem el Mesaod?

• Ngmekerang a doukerebai er a Jehovah el diak dongetukel er a rechad?

• Ngua ngerang a osenged el mo er a rechad er a ngodech el beluu el kiei er a beluad el tir a diak lodengei a tekinged?

• Ngera me ngungil a domerk er a klumech el ousbech a omelekingir a rechad?

• Kede mekerang e olecholt el kmo kede kerekikl er a rechad er a ngodech el beluu el kiei er a beluad?

[Aike el Ker er a Suobel]

[Map/​Siasing er a 4 el llel]

(A lsoam el omes er ngii, e momes er a babier)

Rom

KRETE

ASIA

FRIGIA

PAMFILIA

PONTUS

KAPADOSIA

MESOPOTAMIA

MEDIA

PARTHIA

ELAM

ARABIA

LIBIA

EGIPTEN

JUDEA

Jerusalem

[Daob]

Daob er a Mediteranea

Chedelekelek el Daob

Bekerkard el Daob

Persian Gulf

[Siasing]

Sera Pentekost er a  33 C.E., e a rechad el mla er a 15 el kakerous el beluu er a Renged er a Rom a ullerrenges er a ungil el chais el ngar er a tekingir

[Siasing er a 6 el llel]

A rebetok el chad er a ngodech el beluu a kongei er a klemerang er a Biblia

[Siasing er a 5 el llel]

A olangch er a Kingdom Hall el ngar er a eim el kakerous el omelekoi