A Jehovah Ochotii A Klebekellel El Mo Er A Rengar Er A Eou A Rengrir El Chad

“Moluu er a Rubak, e le bor iou a rengum, me bo meteet, e mkuoll, e le kemanget a klengar er kau.”​—⁠OSISECHAKL 22:⁠4.

A STEFANUS a chad el mle “mui ra kloumerang ma Chedaol Reng.” Ngii a dirrek el mle “mui ra grazia ma klisiich.” Ngmle ta er tirke el kot el disciplo er a Jesus, me ngmle sebechel el meruul a meklou el ongasireng ma olangch er a delongelir a rechad. A ta el taem, e a rebebil el chad a mlo dechor el mengaititekangel er ngii, “e mlo diak el sebechir el mtekengelii a llomeserreng ma Reng el longedecheduch.” (Rellir 6:​5, 8-10) Me ngkmal bleketakl el kmo a Stefanus a chad el mle blak a rengul el mesuub er a Tekingel a Dios, e mle meduch el ousbech er ngii er a mederir a remengeteklel a klechelid er a Rechijudea er a sils er ngii. Ma cheldechedechal, el llechukl er a Rellir er a 7 el bliongel, a ochotii sel klou el klemeriarreng er ngii er a lomeketakl a moktek er a Dios.

² A Stefanus a mle ngar er a eou a rengul el chad, el diak leua itirke el mengeteklel a klechelid , el deruchellir ma klemedengei er tir a rirelleterir el mo omdasu el kmo te kuk ngar er a bab er a rechad. (Matteus 23:​2-7; Johanes 7:​49) Ma ltang ngmle klou a klemedengei er ngii er a Bades, ngdi ngmle ungilbesul er a rengul el nguu a ngerachel el “mosiou ra blengur” me bo lsebechir a rechapostol el “bo ki di mkirel a nglunguuch ma chomesiou lolisechakl a Tekoi.” A Stefanus a mle ungil a chisel er a delongelir a rudam me seikid e ngmlengilt el ta er tirke el teuid el ungil a chisir el chad el merous a kall er a bek el sils. Ngmle ngar er a eou a rengul el kongei er tia el ngerachel. ​—Rellir 6:​1-6.

³ A klengareourreng er a Stefanus, el obengkel a klemeriarreng er ngii er a tekoi er a klereng ma blakerreng er ngii, a lulemes a Jehovah. A Stefanus er a longedecheduch er mederir a rumtok er ngii el mengeteklir a Rechijudea el ngar er a Sanhedrin, e tirka el omtok er ngii a “ullengeng ra medal a Stefanus el mlo uaia medal a anghel.” (Rellir 6:​15) A klikm er a medal a mle ua teletelel a oderchelel a Dios, el ngar er ngii a budech er ngii el mla er a Dios er a klebkall, el Jehovah, el mei. Uriul er a bocha lemerek a cheldechedechal el mo er a rechedal a Sanhedrin, e a Stefanus a milsa mengasireng el grazia er a Dios. “Ngdi ngii a mle mui ra Chedaol Reng, me ngmlo ngellomel ra eanged e milsa klebkellel a Dios, ma Jesus el dechor re kidekmel a Dios.” (Rellir 7:55) Ma kuk kirel a Stefanus, e tia el mengasireng el ues a ulterekeklii a deruchellel a Jesus el Ngelekel a Dios e Messias. Tia millisiich er ngika el ngar er a eou a rengul el Stefanus e ulterekeklii a rengul el kmo ngii oba a kengei er a Jehovah.

⁴ Sel ues el mlo er a Stefanus a olecholt el kmo, a Jehovah olecholt er a klebekellel ma moktek er ngii el mo er a rechad el tir a ngar er a eou a rengrir e medengelii a kerresel a deleuill er tir me ngii. “Moluu er a Rubak, e le bor iou a rengum, me bo meteet, e mkuoll, e le kemanget a klengar er kau,” ngdmung a Biblia. (Osisechakl 22:4) Me tiaikid a uchul, me ngklou a ultutelel a bo dodengelii a mera el belkul a klengareourreng, e mekerang e sebeched el omekeroul er tia el klou a ultutelel el blekeradel, e mekerang e mo uchul a klungioled a dolecholt er ngii er a klengar er kid el rokir.

Klengareourreng​—A Blekerdelel a Dios

⁵ A rebebil a locha mo mechas a rengrir sel bocha  lodengei el kmo a Jehovah el Dios, el ngike el kot el ngar er a bab e kot el kebkall er a eanged ma chutem, a ngar er a uchei el kerebai er a klengareourreng. A David a dilu aikang, el mo er a Jehovah el kmo: “Ke mla meskak omekreakl er osobel er kau, ma kadekmel a chimam a ngilsukak. A ngelsuim a rirellak el mo merael a chisek.” (Psalm 18:35) Ma losaod er a Jehovah el kmo ng ngar er a eou a rengul, e a David a uluusbech er a tekoi er a Hebru el belkul a kmo “mo terrob.” El uldak er a tekoi el “klengareourreng,” e a bebil er a tekoi el ngar er ngii a delongelel ngii me tia el osisiu el tekoi a uldimukl er a “ngareourreng,” ma “medemedemek,” ma “ olenganget er ngii.” Ma Jehovah ulechotii a klengareourreng er sera longengetii el me er a eou el me obengkel a David el ngii a diak el cherrungel chad e uluusbech er ngii el mo omtechei er ngii el king. Me ngdi ua lolecholt aike el tekoi el ngar er a bebul a Psalm 18, a Jehovah a ulumekerreu e melsebechakl er a David, el ulsebelii “er a chimorir a recherroel el rokui ma chimal a Saul.” Me nguaisei, a David a mle medengei el kmo a ngii di el chetengakl ma lechub e ngklebkall el mo er ngii er a leking a rokui el di ultuil er a Jehovah el ngar er a eou a rengul e meruul a tekoi el kirel. Tiaikid a ngilsuir a David el mo melemolem el ngar er a eou a rengul.

⁶ E kid kede kuk mekerang? A Jehovah a mla ngiltii el mo osisecheklid a klemerang, e dirrek el mla meskid a ileakl el techall er a omesiou loeak a cheldebechelel, ma lechub e ngousbech er kid er a bebil rolel el oltaut er a uldesuel a rengul. Ngkirel mo ua ngera uldesued el kirel aika el tekoi? Aikang ngdiak bai lerellid el mo ngar er a eou a rengud? Kid ngdiak bai doureng a sulel a Jehovah el ngii a ngar er a eou a rengul e dongeroid er kid er a blekeradel el di kid el mengedidai er kid, el sebechel el mo uchul a tellemall?​—⁠Osisechakl 16:18; 29:23.

⁷ A Jehovah a diak di lolecholt er a klou el klengareourreng el me obengked el diak demecherrungel el chad e lemerekong, ngdirrek el mla kongei el mo mesterir a klechubechub el mo er tirke el ngar er a eou a rengrir el chad, el olekiis er tir, ma lechub el mengebkall, er tirke el ngar er a eou a rengrir el chad. (Psalm 113:​4-7) El ua tiang, ka molatk er a King Manase er a Juda. Ngii a mle meterekakl er a deruchellel el king el uluusbech er ngii el melisiich a klsuul omengull e “mirruul a betok el mekngit el kmal ulengesechii a rengul a Rubak.” (2 Kronika 33:6) Nguaisei, a Jehovah milelsii e mecherei a king er a Asiria me ngorebetii er a kingellel er a kleking. Me sera lengar er a kelebus, e a Manase a “ngiluu a rengul el mor iou, e ulebult el mor a Rubak el Dios er ngii,” me seikid e a Jehovah ullutii el mo er a kingellel el ngar er a Jerusalem, e ngii el Manase a “mlo medengei el kmo a Rubak a Dios.” (2 Kronika 33:11-​13) Choi, uriul, e a klengareourreng er a Manase a uldeuir a rengul a Jehovah, me ngulechotii a ngareourreng e uluusubes er  ngii e liluut el mekedengcheklii el king.

⁸ A Jehovah el kilengei el ousubes ma bulterreng er a Manase a meskid a meklou el suobel el kirel a klengareourreng. Ngkired el blechoel el melatk el kmo a omerelled el mo er tirke el tilemellii a rengud ma teletelel a blekerdeled sel derebet er a klengit a ngar er ngii a lerellii er a rolel a Jehovah a losmechokl er kid. A lsekum kede kongei el ousubes a telemellir a rechad el kired e mo ngar er a eou a rengud el olecholt a kngtid, e ngsebeched el omes el bedul a Jehovah el kirel a klechubechub er ngii..​—Matteus 5:​23, 24; 6:​12.

Klebekellel a Dios a Mocholt el mo er a Rengar er a eou a Rengrir el Chad

⁹ A klengar er a eou el reng ma ike el blekeradel el kaisisiu a belkul, a diak el kirel rullid el mo cheleuid el omdasu el kmo aikang a olechotel a chelitechut ma lechub e ngua lerolel e kede kongei er a mekngit el tekoi. Me ngua lolecholt a Chedaol el Llechukl el kmo, a Jehovah altang ngar er a eou a rengul, ngdi ngii olecholt er a melemalt el ngasecherreng ma kmal klou el klisiich a lsekum ngkirel el olecholt er ngii. E le ngii a ngar er a eou a rengul, misei a Jehovah a mesterir a kengei er ngii, ma lechub e ngileakl el kerekikl, er tirke el ngar er a eou a rengrir, e bai mengeroid er ngii er tirke el mekedidai a rengrir. (Psalm 138:6) Ngmlekera Jehovah er a lolecholt el kmo ngkmal kerekikl er tirke el ngar er a eou a rengrir el mesiungel?

¹⁰ Ngar er sel belsechel el lolatk er ngii el okiu sel bla lengiltii el rael el ouchais a tekingel, e a Jehovah mla olecholt a komakai el omesodel a bo loltaut er a moktek er ngii el mo er a rengar er a eou a rengrir el chad. Aika el kebkall el tekoi a melemolem el di berrotel er tirke el chad el mekedidai a rengrir, ma lechub e ngsorir el di orreked, a llomeserreng ma lechub a uldesuir a rechad. (1 Korinth 2:​6-​10) Ngdi a rengar er a eou a rengrir el chad, el mla nguu a melemalt el klemedengei el kirel a moktek er a Jehovah, a modubech el mo mengebkall er a Jehovah e le te kmal ungil el medengelii a klou el klebekellel.

¹¹ Sera kot el dart el rak, e a rebetok el chad, el uldimukl er tir a rebebil el leko te Kristiano, a dimlak lengar er a eou a rengrir me te milsibas er a tekingel a Paulus el lullekoi el kirel a moktek er a Dios. Ma Paulus a mlo “apostel rar Chisentail,” el dimlak lultuil er a kmo ngii ngchad er a ngera el beluu, ma skulel, ma rekil, ma lechub a kemanget el taem el lurruul a ungil el lurreor. (Rom 11:13) Nguaisei, a rechad el di oltirakl a tekoi er a tech, a blechoel el omes choua ikeikid el tekoi el ua letekoi a lousbech a Jehovah el melutk er tirke el mo meruul a urerel. (1 Korinth 1:​26-​29; 3:1; Kolose 2:​18) Ngdi, a Paulus a lengileltii a Jehovah, el oltirakl er a bekokuii-el-bltikerreng er ngii ma melemalt el moktek er ngii. (1 Korinth 15:​8-10) Tirke el chad el lulsaod er tir a Paulus el kmo tir a “leko te kmal ngarbab el apostol,” ma rekuk bebil el omtok el chad, a dimlak el sorir el kongei er a Paulus ma rolel a losaod a tekoi er a Bades. Me tir el diak a klengareourreng er tir a uchul me ngdimlak lenguu a klemedengei ma utebengel a tekoi er a kebkall el rolel a loltaut a moktek er ngii a Jehovah. Me kid lak dolenganget ma lechub e demerreched el oukerrekeriil er tirke el chad el tir a lolilt er tir a Jehovah el mo oltaut a soal a rengul.​—2 Korinth 11:​4-6.

¹² E ngar er a kuk bitang, e ngar er ngii a betok el okesiu er a Biblia el olecholt el kmo a rengar er a eou a rengrir el chad a mlo sebechir el mesa telkib er a klebekellel a Dios. A Moses, “ngkuk ngariou a rengul rar bek el chad” a milsa klebekellel a  Dios e kmal mle kmes a delongelel ngii ma Dios. (Ulecherangel 12:3) Ngika el ngar er a eou a rengul el chad, el mle ngar er a eou el chad el mengkar a sib el 40 el rak, el ngar er a Ked er a Arabia, a mlocholt er ngii a ungilreng er a Omebelel el ngar er a betok el rolel. (Exodus 6:​12, 30) Me ngoeak a ulengeseuil a Jehovah, e a Moses a mlo melekingir a rechad er a Israel e ngar er a bab el mengeteklir. Ngmle sebechel el chadecheduch ngii ma Dios. E ngoeak a ues, “ngdirrek el mla mesekak” el milsa teletelel a Jehovah. (Ulecherangel 12:​7, 8; Exodus 24:10, 11) Me tirke el kilengei er ngika el ngar er a eou a rengul el mesiou el omtechei er a Dios a dirrek el mlukngeltengat. Me ngosisiu, kid a mo mukngeltengat a lsekum kede kongei e olengesenges er a profet el kuk ngar er a bab er a Moses, el Jesus, me ngike el “blak a rengul e mellomes a rengul mesiou” el mla metutk er ngii.​—Matteus 24:45, 46; Rellir Ar Apostel 3:​22.

¹³ ‘A klebkellel a Rubak ngdiliich’ el mo er a rua techang er a taem e a rechanghel a uluuchais er a ungil el chais er a cherellel a “Chosobel, ingii a Kristus el Rubak”? Tiang a dimlak lebo er a remekedidai a rengrir el mengeteklel a klechelid ma lechub e le blo er a rechad el ngar er a bab a deruchellir er a beluu e ngbai mlo er a rengar er a eou el chad el mengkar a sib “el mengkar a charm el ngara ked ra klebesei, el mengkar a delebechel el sib.” (Lukas 2:​8-​11) Tirkang el chad a dimlak a rumdasu er tir el kmo te meduch er a ngera el tekoi ma ngera el urreor. Me nguaisei, ngdi a Jehovah a mle biusech a medal er tir e mellilt el mo kot el ouchais er tir el kirel a cherellel a Messias. Choi, a Jehovah olecholt er a klebekellel el mo er a rengar er a eou a rengrir el chad el medakt er a Dios.

¹⁴ Aika el okesiu ngera el tekoi a losisecheklid er ngii? Aikang olecholt el kmo a Jehovah a kongei er a rengar er a eou a rengrir el chad e olecholt er tir a klemedengei ma utebengel a tekoi el kirel a moktek er ngii. Ngii a melilt er a derta el chad el tir a diak a ileakl el duch er tir el ua lomdasu a rebebil er a rechad e sola e ousbech er tir el mo ouchais a kebkall el moktek er ngii el mo er a rebebil. Ma dodengelii tiang a kirel rullid el melemolem el omes el bedul a Jehovah, ma Tekingel er a Ulaoch, ma cheldebechelel el kirel a ulekrael. E kmal sebeched el mesubed er a rengar er a eou a rengrir el mesiungel aike el mo duubech el kirel a otutel a kebkall el moktek er ngii. A profet el Amos a dilu el kmo: “Ng ulterekokl el diak a ngeral loruul er ngii a Rubak el Dios e lak lochotii a uldesuel er a re mesiungel el profet.”​—Amos 3:7.

Momekeroul er a Klengareourreng e Mnguu a Kengei er a Dios

¹⁵ A bo doba a diak a ullebengelel el kengei er a Dios, e ngkired el melemolem el ngar er a eou a rengud. A ta el bla bo lengar er a eou a rengud a diak lebelkul a kmo kede melemolem el ngar er a eou a rengud. Ngkmal sebechel a chad el choitii a klengareourreng e kongei er a kldidairreng ma reng el di ngii el mengedidai er ngii, el sebechel el mo uchul a telemall. Ma Saul el mlechilt el kot el king er a Israel, a mirruul a tekoi el uaisei. Sera lekot el mengilt, e ngii a ulemdasu el kmo ‘ngdiak a belkuk.’ (1 Samuel 15:17) Me nguaisei, ngdi uriul er a longedereder el eru el rak, e a omerellel a mocha olecholt a klimang. Ngmlengemikr er a uleketmokl el rolel er a Jehovah el kirel a omelenget a tenget loeak a profet el Samuel, e di mle ngii el melibech er a uchul me bo lolenget a tenget. (1 Samuel 13:​1, 8-​14) Tiang a mle uchelel a telechesuch el tekoi el kmal mileketeklii el kmo ngii a diak lengar er a eou a rengul. Me tia mlo uchul e ngurridii a reng er a Dios ma kengei er ngii, e uriul e ngmlad er a otuball el kodall. (1 Samuel 15:​3-​19, 26; 28:6; 31:4) Ma suobel a kmal bleketakl: Ngkmal kired el melemolem el urrekodel er a klengar er a eou el reng ma delemedemek e olekebai a klimang me ngmo sebeched el mengeroid er kid er a ngii di lengera el tekoi el sebechel el mo uchul e kede oridii a kengei er a Jehovah.

¹⁶ Ma lta a klengareourreng a diak leteloi er aike el rodech er a reng er a Dios, ngdi tiang a blekerdelel a Dios el kired el omekeroul er ngii. (Galatia 5:​22, 23; Kolose 3:​10, 12) E le tia uldimukl er a uldesuel a chad​—choi, ngua ngera osenged el kired ma kirir a rekuk bebil​—⁠ma domekeroul  er a klengareourreng ousbech er a klou el telekangel. A bo dungil el lomdasu e domtab a tekoi el kirel a deleuill er kid ma Jehovah ma deleuill er kid ma rechad a sebechel el ngosukid el melemolem el ngar er a eou a rengud. Ngar er a osengel a Dios, e a rokui el diak lemecherrungel el tech a di ua mellekulek el chudel el meloseb el telkib, e mo moalech e ngmill. A rechad a di ua mekekerei el chebud el ngar er a ked. (Isaia 40:​6, 7, 22) A chimong el llel a chudel ngngar er ngii a uchul e ngousimang er ngii e le ngii el telkib el kemanget er aika el bebil er a llel a chudel? Ma chebud ngoumead er ngii e le ngii el sebechel el merdekekl el kuk mo cheroid er a rebebil el chebud? Tiang a kora di klebelung el uldasu e merekong. Misei, e a apostol el Paulus a ulemeklatk er a rekldemel el Kristiano el kmo: “Ngkol techa ngikel omekmeteet er kau? Ma ikel ngarngii er kau ngngera er ngii a dimlak mnguu? Cho mngilai, e ngera me komkuuk el ua le mlak mngai?” (1 Korinth 4:7) A bo dolebedebek choua ika el bades er a Biblia a sebechel el ngosukid el mo omekeroul el olecholt er a klengareourreng.

¹⁷ A profet el Daniel el chad er a Hebru a mlokedong el kmo “a Dios a betik a rengul er a kau” e le ngii a “oltubokl” er ngii, el belkul a kmo, ngmle ngar er a eou a rengul. (Daniel 10:11, 12) Ngera ngilsuir a Daniel el mo omekeroul a klengareourreng? A kot, e ngullecholt el kmo ngmle mui el ultuil er a Jehovah, el blechoel el meluluuch el mo er ngii. (Daniel 6:​10, 11) Ma dirrek, a Daniel a mle blak a rengul e melemalt a uldesuel el mesuub er a Tekingel a Dios, me tia ngilsuir el mo bleketakl osengel er a kebkall el moktek er a Dios. Ngii a dirrek el kilengei el olecholt a chelitechetul, ma dirrek el chelitechetul er a rechedal. E ngii a kmal mle semeriar el omerk er a llemeltel a Dios, el diak lomerk er a llemeltel. (Daniel 9:​2, 5, 7) Kid ngsebeched el mesuub er a ungil el kerebai er a Daniel e melasem el omekeroul e olecholt er a klengareourreng er a bek el blekerdelel a klengar er kid?

¹⁸ “Moluu er a Rubak, e le bor iou a rengum, me bo meteet, e mkuoll, e le kemanget a klengar er kau,” ngdmung a Osisechakl 22:⁠4. Choi, a Jehovah a kongei er tirke el ngar er a eou a rengrir, el sebechel el mo uchul a klebkall ma klengar. Uriul el  ngii a kilong choitii a omesiungel el mo er a Dios ma Jehovah ngilsuir el ngodechii a uldesuel, e a milluches er a psalm el Asaf a uleba ngareourreng e melekoi el kmo: “Ke mengetikaik er ngak el oba ngesou ra ungil uldasu er kau, e a uriul e ke ngoikak el oba chetengakl.” (Psalm 73:24) E kuk mekerang er a chelechang? Ngera el chetengakl a mo er tirke el olecholt a klengareourreng? Ma loldeu a rengrir er a kengei ma ngeltengat el deleuill er tir lobengkel a Jehovah, e tir a dirrek el sebechir el omes el bedul a otutel a mlukreng el tekingel a King el David el kmo: Ngdi tirkel medemedemek a mo ungilbesrir el ngar a beluu el ungil a rengrir er a cherrungel budech.” Ngkol ua ngera el klebkall el mo er ngii er a ngar er a medad el klebesei!​—Psalm 37:11.

Ke Dirk Melatk?

• Ngmekera e a Stefanus a kerebai el ngar er a eou a rengul el chad el Jehovah a ulechotii a klebkellel er ngii?

• Ngoeak a ngera el rolel e a Jehovah el Dios a mla ochotii a klengar er a eou el reng?

• Ngera el okesiu a ochotii el kmo a Jehovah olecholt er a klebekellel el mo er a rengar er a eou a rengrir el chad?

• Ngmekera e a kerebai er a Daniel a ngosukid el mo omekeroul er a ngar er a eou el reng?

[Study Questions]

1, 2. (a) Ngmekera e a babier er a Rellir olecholt el kmo a Stefanus a mle “chad el mui ra kloumerang ma Chedaol Reng”? (b) Ngera ulechotii el kmo a Stefanus a mle ngar er a eou a rengul?

3. Ngera el klou el olechotel a grazia er a Dios a lechirremii a Stefanus?

4. A Jehovah ngolecholt er a klebekellel el mo er a rua techang?

5, 6. (a) Ngera klengareourreng? (b) Ngmilekerang a Jehovah er a lochotii a klengareourreng? (c) Kede mo mekerang el kirel a klengareourreng er a Jehovah?

7, 8. (a) Ngmlekera a klengareourreng er a Jehovah a mlocholt er a losmechokl er a Manase? (b) Ngoeak a ngera el rolel e a Jehovah, ma Manase el dirrek, a meskid a kerebai el bo doltirakl er ngii el olecholt er a ngareourreng?

9. A klengareourreng ngolecholt a chelitechut? Mosaod.

10. A Jehovah ngera ngochotii el mo er a rengar er a eou a rengrir el chad, el ua lochotii a 1 Korinth 2:6-10?

11. Sera kot el dart el rak, e te mlekera rebebil e ochotii el kmo ngdiak lengar er a eou a rengrir, e mlekera e tia mlo uchul a tellemall el kirir?

12. Ngmekerang e a okesiu er a Moses a ochotii el kmo a Jehovah a kongei er tirke el ngar er a eou a rengrir?

13. Ngmlekerang e a klebekellel a Jehovah a mlocholt el mo er a rengar er a eou a rengrir el mengkar a sib er a kot el dart el rak?

14. Ngera el klengeltengat a mo er tirke el ngar er a eou a rengrir?

15. Ngera uchul me ngkired el outekangel el orreked er a ngareourreng, e mlekera e tia mlocholt er a klengar er a King el Saul er a Israel?

16. Ngmekerang e a dolebedebek er a deleuill er kid ma Jehovah ma deleuill er kid ma rechad a sebechel el ngosukid el omekeroul er a klengareourreng?

17. Ngera ngilsuir a profet el Daniel el omekeroul a klengareourreng, e ngera sebechel el ngosukid el mo meruul el uaisei?

18. Ngera el klebkall a mo er tirkel el olecholt a klengareourreng er a chelechang?

[Box on page 21]

Mesisiich e Ngar er a Eou a Rengul

Sera 1919 el ngar er a convention er a Rengalek er a Skuul er a Biblia (chelechang e tir a Sioning er a Jehovah) el ngar er a Cedar Point, Ohio er a beluu er a Merikel, e a 50-a-rekil el J. F. Rutherford, e seikid e ngii a uluungerachel er a ureor, a kilengei el oureor el bellhop, el olengemai a kloklir e obengterir a rechad el mo er a delmerab er tir. Ngar er sel ulebongel el sils er a convention, e ngii a mera el chilas a rengrir tirka el 7,000 el chad el orrenges er ngii er a ldu el kmo: “Kemiu a odruchel er a King er a reking ma Rubak er a rubak, el omerk el mo er a rechad. . . a kebkall el renged er a Rubak er kid.” Ma lta e a Brother Rutherford a chad el mle mesisiich a klaumerang er ngii, el mle bekeu el mengedecheduch e dimlak lebecherei a ngii di lengerang el mo tomellii a klemerang el luluumerang er ngii, a dirrek el mera el mle ngar er a eou a rengul er a medal a Dios, el blechoel el mocholt el ngar er a nglunguchel a letutau er a temel a omengull el ngar er a Bethel.

[Picture on page 18]

A Stefanus, el kmal mle medengei a Bades, a ulechotii a ngareourreng e mirrous a kall

[Picture on page 19]

A klengareourreng er a Manase a uldeuir a rengul a Jehovah

[Picture on page 21]

Ngera rirellii a Daniel ma “Dios a betik a rengul er kau”?