Ngkirem el Mo Chedal a Klechelid?

‘NGDIAK el kirek el mo chedal a klechelid ma lechub el blechoel el mo er a eklesia e mo oumerang er a Dios!’ Seikid a uldesuir a rebetok el chad el kirel a bo lechedal a klechelid ma lechub a ngii di el cheldebechel er a klechelid. Me nguaisei, a rebebil a melekoi el kmo te melechesuar el kmo te mera el kmeed er a Dios sel lengar er a rikl el oldeu a rengrir er aike el tekoi el meliuekl er tir er a bai lengar er a eklesia. Chelecha el sils, e a rebetok el chad a omdasu el kmo ngdiak el kirir el mo obengterir a rechedal a klechelid ma lechub a cheldebechel mo lsebechir el oumerang er a Dios.

Engdi, ngkakerous a uldesuir, a rekuk bebil. Te melekoi el kmo ngkmal klou a ultutelel, a bo dechedal a klechelid e mo er a eklesia, a lsekum a chad a mo nguu a kengei er a Dios. Ma leuasiei a ker el kmo a chad ngkirel el mo chedal a klechelid a lmuut el klou er a di letekoi er a omesuub er a ocherengir a rechad ma kuk bebil el tekoi. Me nguaisei, e le tia uldimukl er a deleongel er kid ma Dios, me ngdiak bai lungil a bo dodengelii a osengel a Dios el kirel tia el tekoi? Ma leuaisei, ngera kede mesuub er a Tekingel, el Biblia, el kirel tia el tekoi?

Ngmilekerang a Dios el Kirir a Rechad er a Irechar

Ngbekord el 4,400 el rak er a mla memong, e a kmal klou el ieleb a ilelebii tia el beluulechad el rokir. Choua itia el tekoi a diak a sebechel el mereched el dobes er ngii, ma rechad er a bek el merekelel a beluulechad a ngar er ngii a cheldecheduch el kirel tiang el ngar er a reksi er tir. Altang ngar er ngii a klekakerous er aike el komakai el tekoi, engdi ngar er ngii a betok el kaisisiu el tekoi el ngar er aike el cheldecheduch, el uldimukl er sel tekoi el kmo te mla er ngii a di mekesai el chad ma bebil er a charm el silobel.

Tirke el silobel er a Ieleb te di mle melusech el chad el oeak a ngabtechelid el blekeradel e te silobel? Sel cheldecheduch el ngar er a Biblia a olecholt el kmo ngdimlak leuaisei. A klou a ultutelel el tekoi a kmo, a Dios a dimlak louchais er a derta el chad el kirel sel mereku el Ieleb. Ngbai, Ngii a  uluuchais er a Noah, e ngii a uluuchais er a rechad er sel taem el kirel sel mereku el Ieleb.​—Genesis 6:​13-​16.

A rolel a osobel a mle ultuil er a bo leteloi er a cheldebechel er a rechad el dmak-el-kaingeseu ma kengei el mo oltirakl er a ulekrael er a Dios el lebilsa Noah. Mo lmuut er aike el charm er a chelsel a arhe el silobel er a Ieleb a dimlak el sebechel el mo suobel a lsekum ngmle ileakl er tia el cheldebechel er a rechad. A komakai el osisechakl a lebilsa a Noah me bo lsebechel el mengetmokl a rolel a osobel el kirel a klengar er a charm.​—Genesis 6:⁠17–​7:8.

A betok el dart el rak er a uriul, e a ruldidellel a rsechel a Noah el oeak a ngelekel el Sem a mlo chebuul er a klsibai er a beluu er a Egipten. Engdi, ngmle moktek er a Dios el mo otebedeterir e ngoititerir el mo er sel beluu el letilbir el mo er ngike el demerir er a irechar el Abraham. Me nguaisei, tiang a dimlak lemocholt el mo er a derta el chad e ngbai kot e ngmlocholt el mo er tirke el mlengilt el mo merredelir​—⁠el Moses ma obekul, el Aron. (Exodus 3:7-10; 4:27-31) Uriul er a lemengubet tirke el mle sibai er a beluu er a Egipten, e te ngilai aike el Llach er a Dios el ngar er a Rois el Sinai e mlo medalem el renged er a Israel.​—Exodus 19:1-6.

Ngmla er ngii a osobel er a derta el Ngalek er a Israel e le tir el ulebengkel tia el cheldebechel el mla medalem er a Dios e uleltirakl er a ulekrael er tirke el mlengilt el merredelir. Ngmle sebechir a dersta el chad er a Egipten el mo obengkel tia el cheldebechel el uleba kengei er a Dios. Me sera letobed er a Egipten a Rengalek er a Israel, e tirka el chad e ulebengterir, me ngmlo er ngii a techellir el ngmai a klengeltengat er a Dios.​—Exodus 12:37, 38.

E sola, e ngar er a chelsel a kot el dart el rak, e a Jesus a ulemuchel er a urerel el omerk er a klumech, el mengudel er a rechad el mo disciplo er ngii. Nguluusbech er tir el ua ta el cheldebechel, engdi dirrek el ullengeseu er a derta er tir el oltirakl er aike lousbech. Ma longedecheduch el mo er tirke el 11 el blak a rengrir el apostol er ngii, e a Jesus a dilu el kmo: “Kemiu tirikel dimleblechoel lobengkek era ikel ongarm el mer ngak; misei a ak mo oterekeklii er kemiu chomengedereder ra renged, el ua Demak el ulterekeklii er ngak.” (Lukas 22:28, 29) Uriul, e a chedaol el reng er a Dios a miltengel er bebrir tirke el disciplo er sera ledak el rokui.​—Rellir Ar Apostel 2:1-4.

Aika el okesiu a kmal el meketeklii el kmo a ngar er mong e a Dios a mle blechoel el ousbech er a rechedal el ua ta el cheldebechel. Tirke el mekesai el chad el Dios a uluusbech er tir el ua derta el chad​—⁠el Noa, ma Abraham, ma Moses, ma rekuk bebil​—⁠Ngii a uluusbech er tir el mo mengedecheduch el mo olekeed er a delongelir el cheldebechel. Ngdiak a ungil el uchul e bo doumerang el kmo ngkakerous a omerellel a Dios el mo er a remesiungel er a chelecha el sils. Engdi, tia omekdubech er a kuk ta er a ker el kmo: Ngungil a bo dechedal a ngii di el klechelid? Kede mo merritel er tia el klou a ultutelel el ker el ngar er sel ongingil el suobel.

[Picture on page 4]

A Dios a di mle blechoel el ousbech er a rechedal el ua ta el kltmokl el cheldebechel