A Bleob A Ouchais Er A Klebkellel A Dios!

“Ngkmal bleketakl a eanged el olecholt ra klebkellel a Dios! Ngkmal bleketakl el olecholt a bla lruul!”​—PSALM 19:1.

“NGDIAK lsebechem el mesa medak, ele ngdiak a chad el mesa medak e di chad.” (Exodus 33:20) Seikid a rolel e a Jehovah a ulemeklatk er a Moses. E le rechad a rruul el mechitechut el tech, me ngdiak lsebechir el omes er a klebkellel a Dios e melemolem el di chad. Engdi, ngar er a ues, e a apostol el Johanes a mle sebechel el mesa Jehovah el ngar er sel mengasireng el Kingelel.​—Chocholt 4:​1-3.

² Te diak leua rechad, e le a reblak a rengrir el bleob el reng a sebechir el omes er a medal a Jehovah. Ngngar er a delongelir e ngngar er ngii tirke el “lluich ma teual mechuodel” el ngar er sel ues er a Johanes er a eanged, el tir a omtechei tirke el 144,000. (Chocholt 4:4; 14:​1-3) Me te mekerang er a osengir er a klebkellel a Dios? A doltirakl er a Chocholt 4:​11, e te melekoi el kmo: “Rubak e Dios er kemam, ikau a redemelel a nguu a klebkall, ma chomengull, ma klisiich, ele kau a mileob a rokuil tekoi, ma rokuil tekoi a ngarngii luleltirakl a uldesuel a rengum e ulebeob.”

Ngera Uchul Me “Ngdiak a Cheldechulir e Lsodeterir”

³ Kau ke mo modubech el mo kobkellii a Dios? A ruumesingd el chad a bai diak, ma rebebil a melekoi el kmo ngdiak a Dios. El ua itiang, a ta el chad el mesuub a btuch er a eanged a milluches el kmo: “A Dios ngngii a ulemeob a rokui el klekedall er a eanged el kirel a klungioled? . . . Ngkora kmal ungil el uldasu. Engdi ngak a oumerang el kmo tia el uldasu a sebechel el mengeuid er kid. . . . Ngdiak lsebeched el ousbech el kmo a Dios a mlo uchul a rokui el tekoi.”

⁴ A omerritel er a tekoi er a science a ngar er ngii a telkelel​—⁠el di oltirakl aike el sebechir a rechad el omes ma lechub e te mesuub. E a lak e ngdi tekoi er a uldasu ma lechub a omecheritem el tekoi. E le “Dios a reng,” me ngdiak lsebeched el merritel e mesuub er ngii el oeak a omesuub er a science. (Johanes 4:​24) Me nguaisei, ngolechotel a kldidai el reng a loltngakl a klaumerang el kirel a Dios e le tekoi er a science a diak el sebechel el smodii. Ngike el chad er a science el Vincent Wigglesworth er a Cambridge University a millekoi el kmo a rolel a science a “di ua rolel a klechelid, el ultuil er a klaumerang.”  Ngmekerang e uaisei? “Ngultuil er a ulterekokl el klaumerang el kmo a rokui el tekoi el duubech a oltirakl er aike el ‘llach el omekerreu a klengar.’ ” Me sel lsekum a chad a otngkelii a klaumerang el mo er a Dios, e ngii ngdiak el di lomtechei er a ta er a bedengel a klaumerang er a kuk tang? A lebebil er a taem, e a lak a klaumerang el mo er a Dios a belkul a kmo a chad a kmal chetil el kongei er a klemerang. Me ngike el milluches er a psalm a milluches el kmo: “Me ngike el mekngit el oltirakl er a kldidiul a rengul a diak lorritel; e a uldesuel el rokui a kmo: ‘Ngdiak a Dios.’ ”​—⁠Psalm 10:⁠4, NW.

⁵ Engdi, a klaumerang el mo er a Dios a diak el meiiko el klaumerang, e le ngngar er ngii a kmal betok el ocholt el kmo ngar er ngii a Dios. (Hebru 11:⁠1) Ngike el mesuub a btuch el Allan Sandage a dilu el kmo: “Ngkora ngodech a renguk er a kmo choua itia el ungil el chelderoder [el eanged ma chutem] a uleak a chelimeluk el blekeradel el mei. Ngkmal kirel el ngar er ngii a ulemtebechel er a omengetmeklel. Ngak a omdasu el kmo a Dios a berrotel, engdi ngii a di ta el omesodel a rokui el mengasireng el tekoi, e dirrek el uchul e ngngar er ngii a rokui el tekoi.” A apostol el Paulus a millekoi er a Rekristiano el ngar er a Rom el kmo “le sel diak le meues el blekerdelel a Dios, el diak a ullebengelel klisichel ma klechelid er ngii a domtab el bleketakl meues ra ikel ulebeob ra uchelel a belulechad. Me ngdiak a cheldechulir e lsodeterir. (Rom 1:​20) Sera “uchelel a belulechad”​—el ileakl er sera taem er a omebelel a mellomes a rengul el chad, el ngii a mle sebechel el omtab el kmo ngngar er ngii a Dios​—ngmle bleketakl el kmo ngar er ngii a Ulemeob el kmal mesisiich, a Dios el rredemelel a omengull. Me tirke el diak lekengei er a klebkellel a Dios a diak a cheldechulir e lsodeterir. Engdi, ngera el ocholt a lebeskid a bleob?

A Eanged ma Chutem a Olecholt er a Klebkellel a Dios

⁶ A Psalm 19:1 a onger er a ledu el kmo: “Ngkmal bleketakl a eanged el olecholt ra klebkellel a Dios! Ngkmal bleketakl el olecholt a bla lruul!” A David a ulemtab el kmo aike el btuch er a eanged ma ike el planet el didichel a me tmoech er aike el “bla lruul,” ma lechub a melidiul, a meskid a ulterekokl el ocholt el kmo ngngar er ngii a kebkall el Dios. Ngmelemolem el kmo: “A dertal sils chouchais er ngii el mor chongingil; ma bek el kesus chomelekl er ngii el mor chongingil kesus.” (Psalm 19:2) A bek el sils ma bek el kesus, e aike el klekedall er a eanged a ochotii a llomeserreng er a Dios ma klisichel el omeob. Me ngua lengar er ngii a ngor er a eanged el “chouchais” a odanges el mo er a Dios.

⁷ Engdi, kede ousbech er a sekutaberreng el mo omtab er a choua itia el odanges el mo er a Dios. “Ngdiak le cheldecheduch ma tekoi a lousbech, ma diak a ngeral morenges.” Engdi sel diak lemorenges el ocholt er a eanged a kmal mesisiich. “Ngdi klmechir a tuobed el mora belulechad el rokir, ma klmechir  a mo turkii ra ikel ullebengelel a belulechad.” (Psalm 19:​3, 4) A eanged a ua loltobed a “klmechir” me bo lsebechel sel diak lemorenges el ocholt el mo turkii er a bek el ullebongel er a beluulechad.

⁸ Ma ongingil e a David a mesaod er a kuk ta er a mengasireng el blebelel a Jehovah el kmo: “A Dios a rirellii a blil a sils ra eanged; ngme duum el ua chad el mlo bechiil el me duum ra blil el ungil a rengul, el ua chad ra klekool el semeriar el mora klaidesachel ra rurt. Ngomuchel el ngara bital ullebengelel a milidiul, e mo meliuekl el mor sel kuk bitang. Ngdiak a ngera el sebechel el obart ra kleldelel.”​—Psalm 19:​4-6.

⁹ Sel domekesiu er ngii er a kuk bebil er a btuch, e a sils a di ungil a klungel. Engdi, ngkmal ileakl el btuch, ma klungel a remuul aike el planet el meliuekl er ngii el kora kmal mo mekekerei. A chimo el babier a melekoi el kmo a berredel a sils a “2 el billiol er a billiol er a billiol el ton”​—tiang a 99.9 el basent er a berredel tia el cheldellel a planet er kid el rokir! A klisichel a gravity er a sils a rullii tia el beluulechad el mo meliuekl er a sils el ngar er a 93 el milliol el mail a cheridel e diak lorael el mo cheroid ma ka lorael el mo kmeed er a sils. Ngdi telkib er a klisichel a sils a me er tia el beluulechad, el ngii a kmal ungil el omekerreu a klengar.

¹⁰ Ngike el milluches er a psalm a ousbech a okesiu e melekoi el kirel a sils, el omekesiu er ngii er a “mesisiich el chad” el remurt el ngar er a bita el uchul a eanged el mo er sel kuk bita el uchul a eanged a lemellomes, e a leklebesei e ngmo bad er a chelsel a “blil.” Sel bo lengelt a sils, e kid el ngar er a chutem el omes er ngii, e ngua bo lesiseb er a “blil,” el mo olengull. E a bocha letutau, e ngua lobuu a llomes, el kmal el medidiich “el ua chad el mlo bechiil el me duum ra blil el ungil a rengul.” E le ngii a mle klekerengel a sib, e a David a mle medengelii a klou el kerrasem a leklebesei. (Genesis 31:40) Ngmillatk er a didichel a sils el mle mereched el mengeald er a bedengel ma basio el lemlar er ngii. Ngbleketakl el kmo, ngdimlak lebo lemesaul a sils er sera ‘lorael’ el ngar er a ongos el mo er a ngebard ngbai mle ua “mesisiich el chad,” el kltmokl el mo melemolem er a omerollel.

Aike el Mengasireng el Btuch ma Cheldellel a Btuch

¹¹ Ngdimlak a telescope er ngii, ma David a mle sebechel el mes a di mekesai el telael el btuch. Engdi, a doltirakl er a ta el beches el omesuub, e a ildisel a btuch er a eanged el sebeched el mes a dousbech aike el beches el telescope a 70 el sextilliol​—⁠el ngii a 7 ma 22 el zero el oeakuriul er ngii! A Jehovah a ullecholt er a kmal klou el ildisel er sera lomekesiu aike el btuch er a eanged el mo er a “chelechol ra rriil.” ​—Genesis 22:17.

¹² Ngar er a betok el rak, e a remesuub a btuch a ulemes a bebil er a “mekekerei el mellomes el basio el chelsel a kora mengab, el diak lebleketakl er a ues.” A rescientist a millatk el kmo aike el “spiral nebulae” a mle klalo el ngar er a chelsel a cheldellel a btuch er kid el Milky Way. Sera 1924, e te mlo medengei el kmo sel kot el kmeed el nebula, el ngii a Andromeda, a mle ta er a cheldellel a btuch​—⁠el ngii a bekord el eru el milliol el [light years] a cheridel! Engdi chelechang e a rescientists a omdasu el kmo ngar er ngii a betok el billiol el cheldellel a btuch, e a derta er aikang a ngar er ngii a betok el telael​—⁠e a lebebil er a taem e ngbetok el billiol​—⁠el btuch el ngar er ngii. Nguaisei engdi, a Jehovah “a omechur a ildisel er a btuch er a eanged; e ngii a omekedong ngii el rokui er a ngklir.”​—Psalm 147:​4NW.

¹³ A Jehovah a ulleker er a Job el kmo: “Ngkol sebechem el remenged a ikel btuch el Pleiades [Kimah] el mo dmak, malechub e ngimersii a lechet el orreked ra Orion [Kesil]?” (Job 38:31) A cheldull el btuch a betok el btuch el ngar er ngii a ulterekokl el blechebechel. Altang aike el btuch a kmal chacheroid a delongelel, engdi a deruchellel a dertang a ulterekokl sel dengar er tia el chutem e domes el bedulbab. E le a deruchellir a kmal ulterekokl, ma ike el btuch a “kmal ungil el omekrael er a omerollel a diall ma skoki, me tirke el ngar er aike el ileakl el skoki el suebek er a melidiul, ma dirrek el kirel a omelangch er a btuch.” (The Encyclopedia Americana) Engdi, ngdiak a ungil el medengelii sel “remenged” el sebechel el orreked er aike el cheldull el btuch me di leuaisei. Chochoi, a rescientist a dirkak bo lsebechir el onger  er sel ker el ngar er a Job 38:33 el kmo: “Ke kol medengei a ikel llach el mengedereder ra milidiul?”

¹⁴ A rescientist a dirrek el diak lsebechir el onger er a ta er a ker el meldung er a Job el kmo: “Ke kol mla mor sel be le ngasech er ngii a sils?” (Job 38:24) A ta el chad er a omeluches a dilu el kmo tia el ker el kirel a llomes “a kmal ngar er a bab el ker el kirel a science er a chelecha el taem.” Engdi ngar er a kuk bitang, e a rebebil er a ruumdasu el chad er a Griik a uluumerang el kmo a llomes a me tuobed er a medal a chad. Chelecha el taem er kid, e a rescientist a omdasu el kmo a llomes a rruul er a betok el mekekerei el klalo el kora chebechab. E a rekuk bebil a omdasu el kmo a rolel a kora meluil a daob. Chelecha el sils, e a rescientist a oumerang el kmo a llomes a dul kora meluil el daob e kmal mekekerei el klekedall el dirrek. Engdi, ngdirkak bo dungil el medengelii a blekerdelel a llomes e mekerang e “sel be lengasech a sils.”

¹⁵ Sel dolatk el kirel aika el rokui el tekoi, e kede mo melatk el di ua David, el dilu el kmo: “Sel kumes ra milidiul el mrirellii, e kisa buil ma btuch el mlilechang er cholsechelel, eng ngera blkul a chad me ke kmal melatk er ngii; ngdi chad, e ke kmal omekerreu er ngii?”​—Psalm 8:​3, 4.

Tia el Chutem ma Ike el Charm a Mengebkall er a Jehovah

¹⁶ A Psalm 148 omasech a kuk bebil er a rolel e aike el blebelel a olecholt er a klebkellel a Dios. A 7 el kekere el bades a melekoi el kmo: “Mngara chutem e moldanges ra Rubak, a mekloul charm ra daob ma rokuil bertakl ra ngeuaol.” Chochoi, a “bertakl ra ngeuaol” a mui er a mengasireng el tekoi el lolecholt er a llomeserreng ma klisichel a Dios. A average el berredel a mellemau el kuzira a 120 el ton​—⁠el di ua berredir a 30 el elefant! A di berredel a chaidireng er ngii a oberaod er a 1,000 el bongd e sebechel el omomb a bekord el 14,000 el bongd el rasech er a chelsel a bedengel! Choua ike el imis el meklou el charm te kora meoud e klaskokl er a chelsel a daob? Ngkmal diak. Te kmal mereched el “merael el meliuiekl er a daob,” ngmelekoi a report er a European Cetacean Bycatch Campaign. Te uluusbech a satellite el oltirakl er a omerolir aike el mellemau el kuzira e tia ullecholt el kmo a “omerollel a ta er aike el charm a mle ngar er a kuk betok er a 10,000 el mael er a chelsel a 10 el buil.”

¹⁷ A ta el bedengel a demul a blechoel el melechelbakl el mo er a eou er a bekord el 150 el sak a delechel, engdi sel kot el dmolech el lulechelbakl er ngii a ta el demul a mle 1,795 el sak! Ngmekerang e tia el charm a sebechel el suobel sel lolechelbakl el uaisei? Sel lolechelbakl e a chaidireng er ngii a kmal mo meoud el melekedukem, ma rsechel a mo er a chaidireng er ngii, ma olmedel, ma no er a bdelul. E dirrek, a techel a bedengel a ngar er ngii a kar er ngii el orreked a eolt. Ma ike el elephant seal ma sperm whale a sebechel el melechelbakl er a kuk lmuut el dmolech el daob. A Discover el magazine a melekoi el kmo, “Aike el charm a mechei a olmedir me ngmengimetemet, er a bai lolasem el omtok er sel mesisiich el berredel (pressure) a daob.” A eolt el lousbech a di ngar er a chelsel a techel a bedengir. Ngkmal bleketakl el kmo, aika el charm a di ngar el ocholt el kirel a llomeserreng er ngike el kot-el-mesisiich el Dios!

¹⁸ Mo lmuut er a daob me ngdirrek el olecholt er a llomeserreng er a Jehovah. A Scientific American a melekoi el kmo: “A bek el telngimech el ralm el ngar er aike el 300 el sak el dolech er a daob e ngngar er ngii a betok el telael el ombibechakl el kmal mekekere el dellomel er a chelsel el domekedo er ngii el kmo phytoplankton.” Tia el “diak lemeues el chereomel” a omekbeches er a eolt er kid sel lolai a betok el billiol el ton er sel dok er a eolt el carbon dioxide e loltobed a beches el eolt el oxygen. A phytoplankton a meruul a kuk betok er a tedobech er a eolt el oxygen el doutelil er ngii.

¹⁹ A Psalm 148:8 a melekoi el kmo: “Ma bisebusech ma chull el kori ma yuki ma eabed, ma mesisiich el eolt el olengessenges a tikingel!” Chochoi,  a Jehovah a dirrek el ousbech aike el diak a klengar er ngii el klisiich el meliuekl er kid el mo oltaut aike el soal. Ka molatk er a ngau. Ngar er aike el mereko el betok el rak, e a osengir a rechad el kirel aike el seseb er a chereomel a uaisei el leko ngdi melemall e merekong. Engdi chelechang e a remerritel a suobel a oumerang el kmo a ngau a kmal klou a lerellii el kirel a chereomel, e le ngolekngemed aike el mechetong ma medkung el kerrekar, e melisiich a betok el tane el mo duubech, e omekbeches a ramek, e dirrek el mengesadel er a techall er a klou el seseb. A yuki a dirrek el kmal klou a ultutelel, el melubs e mengoeas a chutem, e omekeek a omoachel er a ralm, e omekerreu a dellomel ma charm er a kelekolt.

²⁰ A Psalm 148:9 a melekoi el kmo: “Moldanges er ngii kemiul bukl ma rois, ma ourodech el kerrekar ma chereomel.” Aike el meklou el rois a ochotii sel klou el klisichel a Jehovah. (Psalm 65:⁠6) Ngdirrek el ngar er ngii a ungil el moktek er ngii. A report el mla er sel Institute of Geography el ngar er a Bern, er a Switzerland, a melekoi el kmo: “A uchul a ralm er a rokui el meklou el omoachel el ngar er tia el beluulechad a ngar er aike el rois el mei. Ngbetok er a tedobech er a klechad a ultuil er aike el beches el ralm el ngar er ngii er aike el rois . . . Aike el ‘blil a ralm’ a kmal klou a ultutelel el kirel a klengar er a klechad.” Ma lmuut er a kerrekar me ngdirrek el kobkellii ngike el Mirruul er ngii. A report er a United Nations Environment Programme a melekoi el kmo a kerrekar “a kmal meklou a ultutelel el kirel a klengar er a rechad er a bek el beluu . . . A betok el bedengel a kerrekar a kmal klou a ultutelel el kirel a keizai e le ngmengai er ngii choua ike el tekoi el ua kerrekar, ma rodech, ma nuts, ma ngebtel a kerrekar, ma uid. Ngar er a beluulechad el rokir, e a 2 el billiol el chad a ousbech er a kerrekar el kirel a omeruul el kall ma idungel.”

²¹ A olechotel a llemesel a rengul ulemeob a desang er a teletelel a kerrekar. Ka di molatk er a llel. A ikrel a ngar er ngii a kora uaks el omekerreu er ngii me ngdiak bo lemerat sel llel. E ngar er a cheungel sel uaks el ngar er a bebul sel llel e ngngar er ngii a betok el cells el ngar er ngii a chloroplast er a chelsel. E aike el chloroplast a ngar er ngii a chlorophyll er a chelsel, e ngii a melai a klisiich er a dichel a sils. Ngoeak a omeruul el domekedo er ngii el kmo photosynthesis, e aike el llel a mo ua ike el “meklou el blai er a kombalii el meruul a kall.” A risel a kerrekar a melai a ralm e oliuul el mo er aike el llel el di ua blai el ngar er ngii a “baeb el merael a ralm er a chelsel.” A betok el telael el mekekere el “barb” (el ngklel a stomata) el ngar er a cheungel a llel a obok e obutek, el olsiseb a carbon dioxide. A dichel a sils a omsa klisiich me bo lsebechel el omrachem a ralm ma carbon dioxide e loltobed a carbohydrate. E sola e ngii el dellomel a mocha sebechel el ousbech er sel osisiu el kall el bla lebebii. Engdi, ngdiak a cherrodech el morenges er tia el “blai er a ureor” e ngkmal klebokel el dirrek. Ngoltobed a eolt el oxygen, er a bai longikiongel er a beluu!

²² A Psalm 148:10 a melekoi el kmo: “Ma rokuil charm, a turturk ma tebelik, ma melekesakou el charm ma suebek el charm!” A betok el charm er a beluu ma suebek el charm a olecholt a kmal mengasireng el blekeradel. A suebek el charm el Laysan albatross a sebechel el suebek el kmal mo cheroid (e a tang a silebek er a 25,000 el mael er a chelsel a di 90 el sils). A kuk ta er a suebek el charm el blackpoll warbler a ngklel a blechoel el suebek el ngar er a Diluches el Merikel el mo er a Dimes el Merikel, el suebek er a betok er a 80 el sikang el diak lolengull. A rakuda a oreked a ralm, el diak el ngar er sel tebull er a ulkel el ua lomdasu a rechad, e ngbai ngar er a chelsel a delel, el uchul e ngsebechel el merael el meketeket e diak bo lengesonges a ralm er a bedengel. Misei a uchul, ma  remeduch el meruul a klalo a kmal kerekikl el merritel er a charm sel lolatk el mo meruul a mesil ma lechub a beches el klalo. A Gail Cleere, el chad er a omeluches a milluches el kmo: “A lsekum ngsoam el mo meruul a klalo el sebechel el ungil el oureor . . . e diak lolemall er a chutem el meliuekl er kid, e ngulterekokl el sebechem el metik er a ungil el okesiu er ngii el ngar er aike el bleob.”

²³ Chochoi, a bleob a mera el ouchais er a klebkellel a Dios! Ngar er aike el btuch er a eanged el mo lmuut er a dellomel ma charm, e a derta ma derta er aikang a oldanges er ngike el Ulemeob er ngii. Engdi kid el chad kede kuk mekerang? Kede mekerang e mo dmak kid ma bek el bleob e mengitakl a odanges el mo er a Dios?

Ke Dirk Melatk?

• Ngera me tirke el oumededenger er a Dios a diak lsebechir el smodeterir?

• Ngmekerang aike el btuch ma planet a kobkellii a Dios?

• Ngmekerang aike el charm er a daob ma beluu a olecholt el kmo ngngar er ngii a betik a rengul el Ulemeob?

• Ngmekerang aike el diak a klengar er ngii el klisiich el meliuekl er kid a oltaut er a soal a Jehovah?

[Study Questions]

1, 2. (a) Ngera uchul ma rechad a diak lsebechir el mesa klebkellel a Dios el ousbech er a di mederir? (b) Te mekerang tirke el 24 el mechuodel e mengebkall er a Dios?

3, 4. (a) Ngera uchul ma klaumerang el kirel a Dios a oltirakl a tekoi er a science? (b) A lebebil er a taem, e ngngera uchul ma rebebil a diak lolatk el kirel a klaumerang el mo er a Dios?

5. Ngera uchul me ngdiak a cheldechulir e lsodeterir tirke el diak a klaumera er tir el mo er a Dios?

6, 7. (a) Ngmekerang a eanged a ouchais el kirel a klebkellel a Dios? (b) Ngera uchul ma eanged a uleltobed er a “klmechir”?

8, 9. Ngera bebil er a mengasireng el tekoi el kirel a sils?

10. (a) Ngmekerang a sils a mo soiseb e me tuobed er a “blil”? (b) E mekerang e remurt el ua “mesisiich el chad”?

11, 12. (a) Ngera me ngkora mengasireng el tekoi er a Biblia er a lomekesiu er aike el btuch el mo er aike el chelechol er a rriil? (b) Ngua ngera klungel a eanged?

13. (a) Ngera kora mengasireng el tekoi el kirel aike el cheldull el btuch? (b) Kede mekerang e medenge el kmo a rescientist a diak lodengei “a ikel llach el mengedereder ra melidiul”?

14. Ngoeak a ngera el rolel e a ngesechel el ua sils a dirke berrotel el tekoi?

15. Ngua David, e kid ngkirel el mo ua ngerang a uldesued sel dolatk el kirel a eanged?

16, 17. Ngmekerang aike el charm el ngar er a “bertakl ra ngeuaol” a oldanges er a Jehovah?

18. Ngmekerang a daob a ochotii a llomeserreng er a Jehovah?

19. Ngmekerang a ngau ma yuki a oltaut er a soal a Jehovah?

20. Ngmekerang aike el rois ma kerrekar a mo uchul a klungiolir a rechad?

21. Mosaod el kmo ngmekerang a llel a kerrekar a ochotii a olechotel a omengetmokl.

22, 23. (a) Ngera el mengasireng el duch a lolab a bebil er a suebek el charm ma charm er a beluu? (b) Ngera el kuk bebil er a ker a kired el merritel er ngii?

[Picture Credit on page 18]

Frank Zullo

[Picture on page 18]

A rescientists a omdasu el kmo a ildisel a btuch el sebeched el omes er ngii a 70 sextillion!

[Picture on page 20]

Demul

[Picture on page 21]

Yuki

[Picture on page 21]

Ngelekel a Laysan albatross

[Picture Credit on page 21]

snowcrystals.net