1. Ngera uchul me ngungil a rengud e dirrek el kmal soad el Sioning er a Jehovah?

NGMERA el ungil a rengud e dirrek el kmal soad el Sioning er a Jehovah! Kede oba ngklel a Jehovah e kiei el rodemii tia el ngakl loeak a berkel a klumech me a urered er omeruul el disaiplo. Ngkmal dmeu a rengud sel dengesuir a chad el “rredemelel a diak a ulebengelel el klengar” el mo oumerang. (Rel. 13:48, NW) Kede oba uldesuel a Jesus el ngii a kmal “mlo dmeu a rengul [er a] klisichel a Chedaol Reng” er sel taem el disaiplo a uluuchais er ngii a ungil tekoi el dilubech er a bo lomerk er a klumech.​—Lk. 10:1, 17, 21.

2. Ngmekera dochotii el kmo kede omes er a berkel a klumech el kmal klou a ultutelel?

² Kede omes er a berkel a klumech el kmal klou a ultutelel. A apostol Paulus a millisiich er a Timothy el kmo: “Bo mkerekikl er kau, ma tekoi el molisechakl. Ele cho bo mua isei, e kosebelau kau me tirkel orrenges er kau.” (1 Ti. 4:16) Me a berkel a klumech a olsobel a klengar. Me kede kerekikl er kid le kid el ngar cheungel a omengederederel a Rengedel a Dios. Ngkmal soad a blekerdeled a bo leblechoel luchul a odanges el mora Jehovah e dirrek el oltirakl er a ungil chais el domerk er ngii. (Fil. 1:27) Kede ochotii el mo kede ‘kerekikl . . . a tekoi el dolisechakl’ sel dongetmokl er kid el mo oldingel e dirrek sel dolengit er a Jehovah me lomekngeltengat er kid.

3. Nglocha mo ngera uldesuir a rechad el kirel a klumech er a Renged? Mouchais er a ta er a olechotel.

³ Me nguaisei el kede locha mora tkurrebab el sebeched el omerk er a klumech engdi ngdiak a chad er a territory el soal el orrenges er a klumech er a Renged. Molatk er a experience er a odam el Georg Lindal el ngii a di mle ngii el tang lomerk er a klumech er a beluu er a Iceland er a 1929 el mora 1947. Ngika rirous a betok el telael el babier me nguaisei engdi ngdimlak a ta el chad el mei er a klemerang. Ngmilluches el kmo: “Te ngar ngii a omtok er a klemerang engdi oumesingd el chad a diak el semeriar.” Ngmo lmuut me a lebong a remissionari el tilobed er a Gilead  el mo olengeseu er a ureor me ngii a di dimlak a rechad lolecholt er a klemeriarreng. Uriul er a etiu el rak e te mlo er ngii a rechad el tonget a klengar er tir el mora Jehovah e metecholb. *

4. Nglocha mo uangerang a uldesued sel lak lekengei a rechad lorrenges er a klumech?

⁴ Ngmo mekngit a rengud sel lak el sorir a rechad lorrenges er kid. Kede locha ua Paulus el ‘kmal [mle] mekngit a rengul, e diak bo lak a ringel er a chelsel a rengul’ e le Rechijudea dimlak el kengei el kmo a Jesus a Mesias. (Rom 9:1-3) Engdi ngmekerang a lsekum e ngkmal blak a rengum lolengeseu er a chad e dirrek el meluluuch el kirel e ngii a di diak lolengeriakl me ngmocha kirem el torebengii a omesubel? Me a lechub ngdirkak a ta el mngesuir a chad el mo nguu a techolb? Tia ngbelkul a kmo ngngar ngii a diak lungil moruul er ngii me a Jehovah a diak ledeu a rengul er a omesiungem? Ngar tia el suobel e kede mo onger a eru el ker: (1) Ngera oterekeklii el kmo a urered er a berkel a klumech a ungil? (2) Ngera kired el mo medengelii sel domerk er a klumech?

5. Ngera uchul me a omesiunged el mora Jehovah diak leblechoel meketmokl el ngar sel rolel el soad?

⁵ A Biblia melekoi el kmo a chad el meruul er a soal a Dios a “di mo ungil er a ikel bek el loruul.” (Psa. 1:3) Me nguaisei engdi tia diak lebelkul a kmo a bek el tekoi el doruul el kirel a Jehovah a mo meketmokl el ngar er sel soad el rolel. A klengar er kid a rechad a “betok a ringelel” le kid el rokui a diak demecherrungel. (Job 14:1) Me a lmuut kung a rumtok a locha mo merrob er a urered me ngdiak el sebeched el mimokl lomerk er a klumech. (1 Ko. 16:9; 1 Th. 2:18) Me ngmekera Jehovah lorriter el kmo a omesiunged a ungil me a lechub e ngdiak? Molatk a bebil omellach er a Biblia el ngosukid el mo medengelii a nger er tiang.

6. Ngmekera Jehovah lomes e lorriter el kmo a omesiunged a ungil?

⁶ A Jehovah omes er a blakerreng me a ducherreng er kid. A Jehovah omes er a omesiunged el ungil sel leblak a rengud el omerk le ngbetik a rengud er ngii, el diak loltirakl er a lorrenges er kid a rechad me a lak. A Paulus a milluches el kmo: “A Dios a diak le chebirukel me di lobes a ureriu ma bltkil a rengmiu er ngii el mulechotii er cho mosiou er a re chedal.” (Heb. 6:10) A Jehovah melatk a urered me a bltkil a rengud el mo lmuut me a lsekum me ngdiak a chad el dosuub el obengkel el metecholb. Me a tekoi el ledilu Paulus el mora rechad er a Korinth a klemerang el kirem. Ngdilu el kmo: “A ureriu el kirel a Rubak a diak bo lak a ultutelel” el mo lmuut me a lsekum a meringel el urerem a diak bo luchul a tekoi el muluureng el kirel.​—1 Ko. 15:58.

7. Ngera kede suub er a rolel e a apostol Paulus milsaod er a omesiungel?

⁷ A apostol Paulus a kmal mle ungil missionari el ulemuchel a betok el ongdibel el ngar er a  betok el beluu. Me nguaisei engdi sel taem el rechad a mlo melekoi a mekngit el kirel a omesiungel e ngdimlak losaod er a ildisir a rechad el lengilsuterir el mei er a klemerang. Ngbai dilu el kmo: “Ak liluut el meringel el oureor.” (2 Ko. 11:23) Bo deua Paulus e lak dobes el kmo a blakerreng me a ducherreng er kid aike el kot el meklou a ultutelel er a Jehovah.

8. Ngera el tekoi a kired el melatk er ngii el kirel a omesiunged?

⁸ A omesiunged a odeuir a rengul a Jehovah. A Jesus a ulderecheterir a re 70 el disaiplo el mo omerk er a klumech er a Renged. Sera bo lemerek er a omesiungir e ngkmal mle ‘dmeu a rengrir.’ Ngera mle uchul a deuil a rengrir? Te dilu el kmo: “Ngmo lmuut rar mekngit el reng el mlechedereder er kemam loeak a ngklem!” Me nguaisei engdi Jesus a ulemeklemalt er a uldesuir e dilu er tir el kmo: “Lak bo ldeu a rengmiu era kmo a reng cholengesenges er kemiu; e bai bo ldeu a rengmiu ra kmo a ngkliu a llechukl ra eanged.” (Lk. 10:17-20, BT) A Jesus a mle medengei el kmo ngdiak el bek el taem el bo leues a ungil rsel a omesiungir. Ngkmal diak dodengei el kmo te tela er a rechad el lulengedecheduch er tir tirka el disaiplo a mlo oumerang. Me a redisaiplo a dimlak el kirir el di metik a deurreng er a rsel a omesiungir ngbai kmal mle klou a ultutelel a bo ledeu a rengrir er a blakerreng er tir, el ngii a odeuir a rengul a Jehovah.

9. A doltirakl er a Galatia 6:7-9, e ngera mo duubech a lsekum e kede moba ducherreng el omerk er a klumech?

⁹ A lsekum e kede mo meduch a rengud lomerk er a klumech e kede mo nguu a diak a ulebengelel el klengar. Sel doruul er sel kot el tkurrebab el sebeched el omerk e olisechakl er a ungil chais e kede dirrek el “meruul er a soal a Reng” e le kede mecherei a chedaol reng me ngmimokl loureor er a klengar er kid. “Me lak bo de mesaul” e “di dolemolem” e le Jehovah a oterekeklii el kmo a doruul el uaisei e kede mo nguu a diak a ulebengelel el klengar, mo lmuut me a lak a chad el dengesuir el mo metecholb.​—Monguiu er a Galatia 6:7-9.

10. Ngera rullii a chad el mo orrenges me a lechub e ngdiak lorrenges er kid?

¹⁰ Ngkmal di mo ior er a rengul a chad. A Jesus a silodii tiang el ngar er a okesiu er ngii er a chad er a sers el millalem a tane er a kakerous el chutem e di mle ta er ngii a mo ourodech. (Lk. 8:5-8) Ngdilu el kmo aika el kakerous el chutem omtechei a rengrir a rechad el kakerous a rolel a bo lenguu a “tekingel a Dios.” (Lk. 8:11-15) Me kid a di uai ngike el chad er a sers el diak a klisichel er a dbechel a dellomel. Ngkmal di mo ior er a rengrir tirke el orrenges. Me a ngerecheled a di melalem a tane er a klemerang. E ua lolekoi a apostol Paulus, a derta el chad a “di dul mo ngma omeksulir el kirel a urerir” ngdiak el dbechel a urerir.​—1 Ko. 3:8.

11. Ngera uchul me a Noah a mle ungil rullii a ngerechelel el “omerk ra llemalt”? (Momes er a siasing er a medal tia el babier.)

¹¹ A Resioning er a Jehovah er a uchei me te dirrek el lulemerk a klumech el mora rechad el dimlak el sorir el orrenges. El ua tiang, a Noah a ‘ulemerk ra llemalt’ el betok el rak. (2 Pe. 2:5, BT) Nglocha kmal uluureng el kmo rechad bo lekengei er a klumech, me nguaisei engdi a Jehovah dimlak ledu el kmo te ngar ngii a mo orrenges. Ngbai dilu er a Noah el kmo: “Ke mo doiderekl er ngii el diall kau ma bechim, ma re ngelekem el sechal ma re becherir.” (Gen. 6:18) A Noah a dirrek el locha mlo mtebengii el kmo te diak lebetok el chad a mo orrenges er ngii e le klungel a arhe el Jehovah dilu el kmo ngmo omekedechor er ngii a dimlak el sebechir a rebetok el chad el soiseb er ngii. (Gen. 6:15) E kid a medengei el kmo ngdimlak a chad er sel mekngit  el beluulechad el kilengei er a klemechel a Noah. (Gen. 7:7) Me a Jehovah ngmlo omdasu el kmo a Noah a dimlak lungil merkii a klumech? Ngkmal diak el uaisei! A Jehovah kmal mle dmeu a rengul er a Noah e le ngriruul aike el rokui el ledilu er ngii el mo meruul.​—Gen. 6:22.

12. Ngmilekera Jeremia e melemolem el dmeu a rengul alta rechad a dimlak el sorir lorrenges e ulemtok er ngii?

¹² A Jeremia me ngdirrek el ulemerk er a klumech el betok el rak el mora rechad el dimlak el sorir el orrenges e ulemtok er ngii. Ngkmal mlo mechitechut a rengul er a ‘otubir me a omelenguul’ er a rumtok me ngmlo soal mengoit er a ngerechelel. (Jer. 20:8, 9) Me nguaisei engdi Jeremia di millemolem! Ngera ngilsuir el mo mesisiich e melemolem el oba deurreng el ngar er a omesiungel? Ngmle ulturk a osengel er a eru el meklou a ultutelel el tekoi. A kot e a klumech el lulemerk er ngii a milsterir a rechad “omelatk me a ungil klengar er a ngar medad.” (Jer. 29:11, NW) Ongerung, a Jehovah ngileltii el mo mengedecheduch el kirel e ouchais er a rechad er a klemechel. (Jer. 15:16) Kid me kede dirrek loba klumech er omelatk el mora rechad me a Jehovah a mla ngiltid el mo Sioning el kirel. Sel bo lulturk a osenged er aika el eru el meklou a ultutelel tekoi e ngmo sebeched el metik a deurreng er a omesiunged, a lorrenges er kid a rechad me a lak.

13. Ngera kede suubii er a okesiu er a Jesus el ngar er a Markus 4:26-29?

¹³ A chad ousbech er a taem el mukeroul. A Jesus a silodii tiang el ngar er a okesiu er ngii er a chad er a sers el ngii a mo mechiuaiu. (Monguiu er a Markus 4:26-29.) A dbechel a urerel a uluusbech a taem el mukeroul e ngii a dimlak a klisichel er a ulekurulel. Kid me ngdirrek el locha diak demereched el mo mes a dbechel a urered er a omeruul el disaiplo e le ngousbech er a taem. E dirrek el di ua chad er a sers el diak lsebechel lorreched a rdechel a dellemelel, kid a diak el sebeched lorrimel er a rechad el dosuub el obengterir me lemereched el olengeriakl. Me lak bo lemechitechut a rengum me a lechub e bo mesaul a lsekum te diak lolengeriakl el ngar er a rolel el mulemdasu er ngii. Kede di ua chad er a sers el kired el mo oba kllourreng.​—Jak. 5:7, 8.

14. Ngera el experience ochotii el kmo nglocha mo chuib a kemanget el taem e a rechad a mo omuchel lorrenges er kid?

¹⁴ Ngar er a bebil beluu e ngmo chuib a kemanget el taem e mo er ngii a chad el metecholb. Molatk er a experience er a reteru el odos el Gladys me a Ruby Allen. * Tirka miltutk er a 1959 el mo regular pioneer er a beluu el ngar er a Quebec er a Canada. Orrimel er a beluu me a Ikelesia er a Katolik a uchul me a rechad a dimlak el orrenges er a klumech er a Renged. A Gladys a melatk er tiakid el taem e melekoi el kmo: “Ngmle eru el rak el bek el sils el ki moldingel a obliil el eai el sikang e diak a chad el nguu a chesimer! A rechad a blechoel el mei er a chesimer e mesekemam e lmuut el obult. Engdi ngdimlak ki meterob.” Cherengel a taem e a rechad a mirrael el mo ungil a blekerdelir e mlo omuchel el orrenges. Chelecha e ngmla mo kldei a ongdibel er tia el beluu.​—Isa. 60:22.

15. Ngera ngosisecheklid a 1 Korinth 3:6, 7 el kirel a omeruul el disaiplo?

¹⁵ A omeruul el disaiplo a cherrengelel a urerir a rokui el chad. Ngtekoi el kmo, kede ousbech er a ongdibel el rokir el mo ngosuir a chad el nguu a techolb. (Monguiu er a 1 Korinth 3:6, 7.) El ua tiang, a odam a locha mo msang a chad el semeriar a tract me a lechub e ng magazine. Me nguaisei engdi mtebengii el kmo a schedule er ngii a uchul me ngdiak el sebechel lmuut el mo odngelii ngika el chad el  semeriar me ngolengit er a kuk ta er a odam el mo oldingel er ngii. Ngika el kuk ta er a odam a mechelii a omesubel a Biblia el obengkel ngika el chad. Ngii el odam a dirrek lolengit er a rekakerous el odam me a odos el mo teloi er a study er tir, e a derta er tir a melisiich er ngika el chad el ngar er a kakerous el rolel. A derta el odam me a odos el ngii el chad a mo medengelterir a melubs er a tane er a klemerang er a rengul. Ngoeak tiakid el rolel e a Jesus a dilu el kmo, a chad el melalem me a chad el melubs a dul dmeu a rengrir.​—Jn. 4:35-38.

16. Ngera me ngsebechel mo dmeu a rengum er a omesiungem alta secherem me a lechub e ngchelitechetul a bedengem a uchul e ngdiak el sebechem el meruul a betok?

¹⁶ Ngkuk mekerang a lsekum e ngdiak el sebechem el mengoit er a klou el taem el omerk e olisechakl e le ngsecherem me a lechub e ngchelitechetul a bedengem a uchul? Ngdirk sebechem el metik a deurreng er aike el sebechem el meruul el olengeseu. Molatk er a experience er a King David er sel taem el ngii me a rechedal a ulsebelterir a telungalek er tir e liluut el ngmai a kloklir er a rechad er a Amalek. A re eru el dart er a rechedal a kmal mle mesaul a bedengir me ngdimlak el sebechir el merael el obengkel me te di mle kiei el mengkar a klalo. Uriul er a bo lemesisiich er a rechad er a Amalek e a David a milii a klalo er a delongelir el rokui. (1 Sa. 30:21-25) Me ngdi osisiu el kirel a ureor er a berkel a klumech er a beluulechad el rokir. Nglocha diak el sebechem el meruul a betok el ngar er a omesiungem. Me nguaisei engdi sel moruul aike el rokui el sebechem e ngdirrek el mo dmeu a rengum sel lemongeseu a chad e lomuchel el merael er a rael el mora klengar.

17. Ngera kired loureng a sulel a Jehovah el kirel?

¹⁷ Me kede mera el mereng a sulel a Jehovah el kirel a rolel a lomes er a omesiunged el mo er ngii. Ngmedengei el kmo ngdiak el sebeched lorrimel er a rechad el mo orrenges er kid. Me ngomes er a blakerreng er kid me a bltkil a rengud el mo er ngii e omekngeltengat er kid. Ngdirrek el osisecheklid el mo dmeu a rengud er aike el sebeched el meruul lolengeseu er a berkel a klumech. (Jn. 14:12) Ngsebechel mo ulterekokl a rengud el kmo kede oba kengei er a Jehovah a lsekum e ngdiak bo demesaul!