1. Ngera ngosisecheklid er ngii a Tekingel a Dios?

NGSEBECHED el outekangel a ngii di el omelsemai e le Jehovah a Ngarbab el Sensei er kid. (Isa. 30:20, 21) A Tekingel a meskid aike el rokui el dousbech el mo “ungil kldmokl e ulsemuul el kirel a bek el ungil ureor.” (2 Ti. 3:17) Me sel dekiei el oltirakl a osisechakl er a Biblia, e ngkuk mo mellomes a rengud er tirke el melisiich er a “llomeserreng er tial belulechad.”​—1 Ko. 3:19, BT; Psa. 119:97-100.

2. Ngera kede mo mesaod er tia el suobel?

² Me ngua bo dosaod, a llomeserreng er tia el beluulechad a blechoel el melisiich aike el soad el tekoi. Me ngsebechel mo uchul e ngmo meringel er kid el oltngakl a uldesuir me a omerellir a rechad er tia el beluulechad. Sei a uchul me a Biblia a melekoi el kmo: “Bo mkerekikl me lak a chad el ebedemiu er a chelsengsang el leko ng llomeserreng er a klechad, el uldelid el mei el okiu a re chad.” (Kol. 2:8) Ngar tia el suobel, e kede mo mesa rolel e a rechad a mlo oumerang aike el eru el blulak el lullisechakl a Satan. Ngar er a derta er aika el tekoi, e kede mo mesa uchul me a llomeserreng er tia el beluulechad a klebelung me a dirrek el rolel e a llomeserreng er a Tekingel a Dios a kuk ngarbab er a ngii di el tekoi el lomeskid tia el beluulechad.

3-4. Ngera el omeldechel a uldasu el kirel a durs er a chebechiil a mlo er ngii er a beluu er a Merikel er aike el rak er a delongelel a 1900 me a 1930?

³ Ngar er a beluu er a Merikel, er aike el rak er a delongelel a 1900 me a 1930 e ngmlo klou a omeldechel a uldesuir a rechad el kirel a durs er a chebechiil. A uchei, e a rebetok a ulemdasu el kmo a durs a di kirel el meketmokl er a chelsel a chebechiil e mle mekull el dosaod er ngii er a buai. Engdi aika el uldasu a dikeang, e bai mla mo beot a osengir a rechad el kirel aika el tekoi.

 ⁴ Ngar aike el rak er a 1920 el mora 1929 e ngmlo okedongall el Roaring Twenties, e le seikid el taem, e a rechad a di mle ultaut a osengir er a tametereng me a udoud, el ileakl a uriul er a bo lecharm er a ringel el Kot el Mekemedil a Beluulechad. Me a uldesuir me a osengir a rechad el kirel a durs er a chebechiil a mlengodech er sel ulebengelel a Kot el Mekemedil a Beluulechad. A ta el merriter a tekoi a kmo: “A film er a mubi, me a sibai me a chelitakl me a babier me a advertisement a ulemuchel el di melisiich er a rolel a deleboes.” Ngar aikeikid el rak, e a rechad a meloik el kmal kikiongel a nglikir me a bilir a kmal mle metacherbesul. Me ngua lulemlaoch a Biblia el kirel a uriul sils, a rechad a di mo “betik a rengrir ra tametereng.”​—2 Ti. 3:4.

5. Ngua ngera uldesuir a rechad el kirel a tekoi er a kldung el ulemuchel er aike el rak er a 1960 el mei?

⁵ Ngar aike el rak er a 1960, e te mlo betok el chad a dilak el kiei el diak el bechiil me a remengolchotaor me a dertel a chebechiil a mlo tekoi er a bek el sils. A betok el rolel a ongelaod el melisiich a deleboes el omeruul a di milleketek. Me ngera mlo rsel aika el rokui el tekoi? A ta el chad el meluches a babier a melekoi el kmo, ngbetok a telemellel sel sekum a rechad a mo diak loltirakl a tekoi er a kldung. El ua tiang, a telungalek a mla obriid, me a rechad a chuarm a uldesuir me a lechub e te smecher er a osengel a mekngit el siasing. Me a lmuut el ta er a telemellel, a betok el bekoiueiuul el rakt, el ua AIDS. Aika el rokui a ochotii el kmo a llomeserreng er tia el beluulechad a klebelung.​—2 Pe. 2:19.

6. Ngmekera osengel a beluulechad el kirel a tekoi er a durs e otutii a moktek er a Satan?

⁶ A osengel a beluulechad el kirel a tekoi er a durs a oltaut er a moktek er a Satan. Ngulterekokl el kmal soal lomes er a rechad el ousbech a tekoi er a durs el diak loltirakl er a moktek er a Dios. E okiu tiaikid el rolel e te diak lolecholt a omengull el kirel a sengk er a chebechiil el Dios a milsterir a rechad. (Efe. 2:2) Me a rechad el meruul a deleboes a ochotii el kmo ngdiak longreos er sel sengk el Jehovah milsterir a rechad el mo oungalek, e dirrek el sebechel el mo uchul e a chad a diak el nguu a klengar el mo cherechar.​—1 Ko. 6:9, 10.

7-8. Ngera uchul me a osisecheklel a Biblia el kirel a durs er a chebechiil a lmuut el ungil er a uldasu el lolisiich tia el beluulechad?

⁷ A rechad el kongei er a llomeserreng er tia el beluulechad a oltuub er a tekoi er a kldung el ngar er a Biblia, e melekoi el kmo aika diak a ultutelel. A reuaisei el chad a locha mo oker el kmo, ‘Ngera uchul me a Dios a ulemeob er kid el ngar ngii a urunguled el soad a tekoi er a durs e  merrob er kid me ngdiak doruul er ngii?’ Te oker er tia el ker e le te omdasu el kmo a lsekum a rechad a sorir el meruul er a tekoi, e ngkirir el rullii. Engdi a Biblia a kuk ngodech a omesodel. Me sel dekengei el omtebechel a urunguled e ngrolel e kede mukebkall. (Kol. 3:5) Me a lmuut el tang, a Jehovah a mla meskid a sengk el ngii a chebechiil, el rolel e ngsebechir a rebechiil el chad el oldeu a rengrir el ngar er a melemalt el rolel. (1 Ko. 7:8, 9) Ngoeak tiang, e a rebechiil el chad a sebechir el mo dmeu a rengrir el meruul er tia el tekoi el diak el bekikl, e dirrek el diak louuchel a rengrir er ngii.

⁸ A osisecheklel a Biblia a kmal ngodech er a llomeserreng er tia el beluulechad e le ngmesaod er a tekoi er a durs el kmo ngdiak a telemellel. Ngmesaod el kmo a durs er a chebechiil a dirrek el uchul a deurreng. (Osi. 5:18, 19) Me nguaisei, engdi a Biblia a kmo: “Ma derta er kemiu bo lodengei el kmo ngmekera le ngara cheledaol ma chomengull el melai rar becherir, e lako muar diak lodengelii a Dios el Chisentail, el melamet a rengrir ra ngibes ra deleboes.”​—1 Th. 4:4, 5, BT.

9. (a) Te milekera rechedal a Jehovah er aike el rak er a delongelel a 1900 me a 1930, e mongeseu el mo oltirakl a ngarbab el llomeserreng er a Tekingel a Dios? (b) Ngera el mellomes el ulekrael a debetik er ngii er a 1 Johanes 2:15, 16? (c) Ngera el mekngit el omeruul a kired el oltngakl el ua losaod a Rom 1:24-27?

⁹ Ngar aike el rak er a delongelel a 1900 me a 1930, e a rechedal a Jehovah a dimlak lemecheblad er tirke el chad el “diak lodenge rur.” (Efe. 4:19, BT) Te bai millasem er a tkurrebab el sebechir el oltirakl a llechul a Jehovah. A May 15, 1926 el Watch Tower a millekoi el kmo “a sechal me a lechub e ngredil a kirel el klikiid e bliochel a uldesuel me a omerellel, el ileakl sel osengel el bedul a ta er a chad.” Me a rechedal a Jehovah a uleltirakl a ngarbab el llomeserreng er a Tekingel a Dios, alta e te omes aika el mekngit el tekoi el iliuekl er tir. (Monguiu er a 1 Johanes 2:15, 16.) Me kede kmal oba klou el omereng el saul el kirel a Tekingel a Dios! Kede dirrek el oba omereng el saul e le Jehovah a omeskid a kall er a klereng el ngosukid el mo oltngakl er a uldasu er a beluulechad el kirel a tekoi er a kldung. *​—Monguiu er a Rom 1:24-27.

10-11. Ngera ngmillekoi a Biblia el kmo ngmo duubech er aike el uriul sils?

¹⁰ A Biblia a ulemeklatk el kmo ngar aike el uriul sils, e a rechad a di mo “betik a rengrir ra di tir.” (2 Ti. 3:1, 2, BT) Ngdiak lemechas a rengud sel domes er a beluulechad el di melisiich er a rechad el di mo melatk er a di tir. A ta el babier a melekoi el kmo ngar aike el rak er a 1970, e “ngkmal mlo betok aike el babier el olisechakl er a rechad er a rolel e ngmo ungil a klengar er tir.” A bebil er aika el babier a “mengelechel er a remenguiu el mo omdasu el di kirir e mo di tir el mengebkall er tir.” El ua tiang, a ta el babier a melekoi el kmo: “Bo el betik a rengum er kau e le ke kot el klebokel e ungil chad el diak a uai kau.” Tia el babier a mesaod el kmo “a chad a kirel el di ngii el melilt a mo blekerdelel me a tekoi el bo loruul el oltirakl er a osengel el kirel a llemalt el ngar sel soal.”

¹¹ Ke mla ta el mrengesii tia el tekoi? A Satan a millisiich er a Eva el mo meruul er a osisiu el tekoi. Ngdilu el kmo ngsebechel ngii el Eva el “mo ua [Dios] el mo medengei a ungil ma mekngit.” (Gen. 3:5) Me chelecha el taem, e a rebetok a kmal imis el omdasu el di kirir e melatk el kmo ngdiak a chad, el mo lmuut er a Dios, el sebechel melilt a melemalt me a cheleuid el kirir. E tia el uldasu a kmal mla obeketakl lokiu a omerellir a rechad el kirel a chebechiil.

12. Ngera el uldasu el kirel a chebechiil a lolisiich er ngii a beluulechad?

¹² A Biblia a olisechakl er a bechiil el sechal me a bechiil redil el mo olecholt a omengull er a  delongelir e mo oltirakl a telbilir er a chebechiil. Ngmelisiich er a rubekel el mo blak a rengrir er a chebechiielir, el melekoi el kmo: “Isei a uchul ma sechal a mecherei a demal ma delal e mo obengkel a bechil, me bo letal chelechad.” (Gen. 2:24) Me nguaisei engdi tirke el mukrael er a llomeserreng er tia el beluulechad a kuk ngodech a uldesuir, e le te melekoi el kmo a chad el bechiil a kirel el di melatk aike el ousbech. A ta el babier el kirel a omerort el chebechiil a kmo, “Ngar er a bebil el merengel a chebechiil, e sel telbiil el kmo ‘a klemengetel a taem el dirk dechad’ a mla mutechei el ousbech er a tekoi el kmo ‘a klemengetel a taem el dekaubltikerreng.’” Me a chouaika el uldasu el kirel a chebechiil a mla mo uchul a diak lemochur el telemellel a telungalek e dirrek el uchul me a rebetok a kmal mla metemall a rengrir. Me ngbleketakl el kmo, a osengel a beluulechad el kirel a chebechiil a kmal klebelung.

13. Ngera ta er a uchul me a Jehovah ouketui er a remekedidai a rengrir el chad?

¹³ A Biblia a kmo: “A RUBAK a ouketui er a re bek el mekedidai a rengrir.” (Osi. 16:5) Ngera uchul me a Jehovah a ouketui er a remekedidai a rengrir el chad? A ta er a uchul tia el tekoi a kmo tirke el mekedidai a rengrir a olecholt a blekerdelel a Satan. Ka di molatk er tiang, a Satan a ulemdasu el kmo a Jesus, el ngike el luluusbech er ngii a Dios el omeob a rokui el tekoi, a kirel mo terrob e mengull er ngii! (Mt. 4:8, 9; Kol. 1:15, 16) Me a reuaisei el chad el omdasu el kmo ngkmal meklou a ultutelir a oterekeklii el kmo a llomeserreng er tia el beluulechad a klebelung er osengel a Dios.

14. Ngmekera Rom 12:3 e ngosukid el mo tabesul a uldesued el kired?

¹⁴ A Biblia a ngosukid el mo tabesul a uldesued el kired. Ngmelekoi el kmo ngmelemalt a lebo er ngii a telkib el bltkil a rengud el kired. A Jesus a dilu el kmo: “Bo le betik a rengum er a ngar bita er kau el ua le betik a rengum er kau,” el ochotii el kmo ngkired el dirrek el melatk aike el dousbech. (Mt. 19:19) Me nguaisei engdi a Biblia a diak lolisechakl el kmo ngkired el mo omes er kid el kuk ngarbab er a rebebil. Ngbai melekoi el kmo: “Lak moruul a ngii di le ngerang el mengaiuechit  er a re chad, ma lechub e ng di somiu a lechat er kemiu a re chad e bai moba klengariourreng el di blechoel el omdasu er a re bebil er a re chad el kmo te kuk ungil er kemiu.”​—Fil. 2:3; monguiu er a Rom 12:3.

15. Ngera uchul me ke omdasu el kmo ngkmal ungil a ulekrael er a Biblia el kirel a chad el omdasu el kmo ngklou a ultutelel?

¹⁵ Chelecha el taem, e tirke el leko te mellomes a rengrir a melenguul a ulekrael er a Biblia el kirel a chad el omdasu el kmo ngklou a ultutelel. Te melekoi el kmo, sel domes er a rebebil el kuk ngarbab er kid, e kede di rulleterir el di mo melai a sorir er kid. Engdi a mera er ngii, ngera mla duubech e le ngblekeradel el lolisiich a beluulechad er a Satan? Ngera ke mla mtebengii? A rechad el di melatk er a di tir, ngdmeu a rengrir? Ngdmeu a rengrir tir me a telungalek er tir? Ngar ngii a rungil sechelirir? Ngar ngii a kmes el deleuill er tir me a Dios? Ngokiu aika el tekoi el momes, e ngera mo uchul a kot el ungil tekoi, ngsel moltirakl er a llomeserreng er tia el beluulechad me a lechub a llomeserreng el ngar er a Tekingel a Dios?

16-17. Kede oba omereng el saul el kirel a ngerang, e ngera uchul?

¹⁶ A rechad el oltirakl a ulekrael er tirke el lomes er tir a beluulechad el kmo te mellomes a rengrir, a di ua tourist el olengit er a ta er a tourist el kirel a ulekrael alta te di diul diak lodengei el kmo te mo er ker. A Jesus a millekoi el kirir tirke el “mellomes a rengrir” el chad er a taem er ngii el kmo: “Te meiko e leko te mengetakl er a re meiko; ma tal meiko a longetakl er a tar a meiko, e te dul mo ruebet er a delebedeb.” (Mt. 15:14) Me ngbleketakl el kmo, a llomeserreng er tia el beluulechad a klebelung er osengel a Dios.

¹⁷ Me ngmla obeketakl el kmo a mellomes el ulekrael er a Biblia a blechoel el sebeched el ousbech el “olisechakl a klemerang, e mellach, e mesmechokl, e olecholt a meral rolel a ungil klengar.” (2 Ti. 3:16) Kede mera el oba klou el omereng el saul el mora Jehovah, e le ngokiu a cheldebechelel, e ngmla omekerreu er kid er a llomeserreng er tia el beluulechad! (Efe. 4:14) A kall er a klereng el bla lebeskid a smisichid el mo oltirakl a Tekingel. Me ngkmal ileakl el techall el mo sebeched el mukrael er a diak a telkelel el llomeserreng el ngar er a Biblia!