1. Ngmekera mo klungioled sel dorriter er a Psalm 15:​1-5 (NW)?

 NGAR er a uleak uchei el suobel, e kede silubii el kmo a retelecholb el mesiungel a Dios a sebechir el mo guest er a okesiu el tento er ngii loeak sel lebekurulii a kmes el deleuill er tir el lobengkel. Engdi ngmekera sebeched el mo sechelil? A 15 el bliongel er a Psalm a mesaod el kirel. (Monguiu er a Psalm 15:​1-5, NW. a) Tia el bliongel er a Psalm ouchais er kid er a rolel e ngsebeched el mo kmeed er a Dios.

2. Ngera locha uldbechii a David el milluches er tia el Psalm el mo mesaod er a tento er a Jehovah?

² A 15 el bliongel er a Psalm omuchel el kmo: “Jehovah, ngtecha sebechel mo guest er a tento er kau? Ngtecha sebechel mo kiei er a chedaol el bukl er kau?” (Psa. 15:​1, NW) A David el milluches er tia el Psalm er a losaod er a “tento” er a Jehovah e nglocha millatk er a chedaol tento el mlara Gibeon er tiakid el taem. Ngdirrek el milsaod er a “chedaol el bukl” me nglocha millatk er a Sion el ngar er a Jerusalem. A David a kiltmeklii a tento er a basio er bita er a dimes er a Gibeon e loia blil a telbiil er ngii el dimerekmo lebekedecherur a templo.—2 Sa. 6:17.

3. Ngera uchul me ngkired el semeriar er a 15 el bliongel er a Psalm? (Dirrek el momes er a siasing.)

³ Nguaisei el oumesingd er a rechad er a Israel a dimlak el losiou er a chedaol tento e di mle mekesai a sebechir el mo soiseb  er a tento el mla er ngii a blil a telbiil. Me nguaisei engdi a rokui el blak a rengrir el mesiungel a Dios a sebechir el mo guest er a okesiu el tento er ngii loeak a bo lesechelil e lolemolem el sechelil. Tiang a tekoi el kid el rokui a soad. A 15 el bliongel er a Psalm a masech a bebil el tekoi el kired el mekeroul e mo olecholt a lsoad el melemolem el sechelil a Jehovah.

MOLENGESENGES ER A DIOS ER A ROKUI EL TEKOI E MBLECHOEL EL MERUUL A MELEMALT

4. Kede mekera medengei el kmo Jehovah mengerechir a lmuut el betok er a di mo metecholb? (Isaia 48:​1, NW)

⁴ A Psalm 15:2 (NW) a mesaod er a sechelil a Dios el kmo ng “merael el diak a telemellel, e meruul a llemalt.” A tekoi el “merael” me a “meruul” a belkul a kmo aika el tekoi a kired el melemolem el meruul. Engdi ngmera el sebeched el ‘merael el diak a telemelled’? Chochoi. Nguaisei el diak a chad el cherrungel engdi Jehovah mo omes er kid el kmo kede merael el diak a telemelled sel debora tkurrebab el klisiched el olengesenges er ngii. Sel detibir a klengar er kid el mora Dios e demetecholb e ngdi uchelel a deleuill er kid lobengkel. Mutebengii el kmo a taem er a Biblia e a omchad er a Israel e ngdiak el belkul a kmo ke mla mo guest er a Jehovah. A rebebil ulemekedong er ngii engdi ngdimlak el ngar er a “klemerang me a llemalt.” (Monguiu er a Isaia 48:​1, NW. b) Me a re bliochel a rengrir el chad er a Israel a mle kirir el mo medengei aike el longerechir a Jehovah e mo oltirakl. Ngdi osisiu, a lsoad el nguu a kengei er a Dios er chelecha el taem e ngkired el meruul a lmuut el betok er a di mo metecholb e mo chedal ongdibel er a Rekristiano. Ngkired el “meruul a llemalt.” Tia ngngera belkul?

5. Ngera belkul a bo dolengesenges er a Jehovah er a rokui el tekoi?

⁵ A bo ‘dorael el diak a telemelled e doruul a  llemalt’ er osengel a Jehovah e ngdiak el belkul a kmo kede di mo ngar er a bek el miting er a ongdibel. (1 Sa. 15:22) Ngkired el melasem el olengesenges er a Dios el ngar er a rokui el tekoi el doruul mo lmuut me a di bo lekid el tang. (Osi. 3:6; Oli. 12:​13, 14) Ngkmal klou a ultutelel a dolengesenges er a Jehovah mo lmuut er a mekekerei el tekoi. Sel doruul el uaisei e kede ochotii el kmo ngmera el betik a rengud er ngii, e rullii el lmuut el kmal mo betik a rengul er kid.—Jn. 14:23; 1 Jn. 5:3.

6. A doltirakl er a Hebru 6:​10-12, e ngera lmuut el klou a ultutelel er aike el durruul er a ngar er a mong lolecholt a blakerreng?

⁶ Jehovah kmal oba omereng el saul el kirel aike el durruul el kirel er a ngar er a mong. Me nguaisei alta kede mirruul a ungil er a ngar er a mong engdi tia diak el belkul a kmo kede mo melemolem el guest er a tento er a Jehovah. Tia debleketakl el mesang er a Hebru 6:​10-12. (Monguiu.) A Jehovah diak lobes a ungil deriruul. Engdi ngsoal a dolemolem el loba rengud el rokir el mesiou er ngii el “mo lmuut er a ulebongel.” Ngmo sechelid el mo cherechar a lsekum e ‘ngdiak bo de mesaul.’—Gal. 6:9.

MELEKOI A KLEMERANG ER A RENGUM

7. Ngera belkul a bo dolekoi a klemerang er a rengud?

⁷ A chad el soal mo guest er a tento er a Jehovah a kirel “melekoi a klemerang er a rengul.” (Psa. 15:​2, NW) Tia lmuut el dmolech a belkul er a di mo diak domulak. A Jehovah soal a bo de honest el ngar er a rokui el tekoi el dolekoi me a doruul. (Heb. 13:​18, BT) Tia kmal klou a ultutelel e le “Jehovah ouketui er a chad el mengeblad, engdi kmes a deleuill er ngii me tirke el meruul a llemalt.”—Osi. 3:​32, NW.

8. Ngkired el mengeroid er kid er a ngera el blekeradel?

⁸ Tirke el ‘melekoi a klemerang er a rengrir’ a diak el pretend el lolengesenges a llechul a Jehovah er mederir a rechad engdi te melemall a llechul sel ledi el tir el tang. (Isa. 29:13) Te diak longeblad er a rechad. A chad el cheblad a locha mo omuchel el oumededenger er a llomeserreng el ngar er a llechul a Jehovah. (Jak. 1:​5-8) Nglocha mo diak lolengesenges a llechul a Jehovah el ngar er aike el tekoi el lomdasu el kmo ngdiak el meklou a ultutelel. E a lsekum e ngdiak a mekngit el duubech sel lak lolengesenges e nglocha mo meruul a lmuut el oberaod  el tekoi. Me alta ngomdasu el kmo ngmesiou er a Dios engdi Jehovah kmal diak bo lekengei er omengull er ngii. (Oli. 8:11) Me nguaisei engdi kid a soad el mo honest el ngar er a rokui el tekoi.

9. Ngera sebeched el suub er a ketengel a Jesus el meet er a Nathanael? (Dirrek el momes er a siasing.)

⁹ Ngkmal klou a ultutelel a bo dechad el ‘melekoi a klemerang er a rengud.’ Kede mesa tiang er sel taem el Filip a ngiluu a sechelil er a Nathanael el mo meet er a Jesus. Alta ngmle ketengel a Jesus el meet er a Nathanael ngdilu el kmo: “Mesang, ngmeral chad ra Israel, el diak a telingaol ra rengul!” (Jn. 1:​47, BT) A Jesus a ulterekokl lulemes er a redisaiplo er ngii el kmo te honest engdi ngmilsang el kmo a Nathanael a kmal mle ileakl el bliochel a rengul. A Nathanael a mle uai kid el diak el cherrungel me nguaisei engdi ngdimlak a cheleblad er a rengul. A Jesus a kmal mle soal tiang el kirel a Nathanael e chilat er ngii el kirel. Ngmera el chetengakl el tekoi omko Jesus a tutkid e melekoi el uaisei el kired!

10. Ngera uchul me ngkired el mo kerekikl er a rolel a dousbech er a duch er kid el mengedecheduch? (Jakobus 1:26)

¹⁰ A 15 el bliongel er a Psalm oumesingd el mesaod omerelled el mora rebebil. A Psalm 15:3 (NW) a melekoi el kmo a guest er a tento er a Jehovah “[diak] loba chural loltuub, ngdiak loruul a mekngit el mora rengar bita er ngii, e diak lolemall a chisir a resechelil.” A lsekum kede mekngit lousbech er a duch er kid el mengedecheduch e ngsebechel mo uchul a klou el tellemall el mora rebebil e mo uchul me ngmo diak de guest er a tento er a Jehovah.—Monguiu er a Jakobus 1:26.

11. Ngera otuub, e ngera mo duubech el mo er tirke el oltuub el diak lekengei el ngmodech a omerellir?

¹¹ Ngika el milluches er tia el Psalm a mesechii otuub. Ngera otuub? Ngblulak el sebechel tomellii a chisel a chad. A rechad el loltuub e diak lekengei lobult el ngmodech omerellir a mesuld a ngklir er a ongdibel er a Rekristiano.—Jer. 17:10.

12-13. Ngera bebil el blekeradel el sebechel diak el durengud e tomellii a chisel a sechelid? (Dirrek el momes er a siasing.)

 ¹² A Psalm 15:3 (NW) a dirrek el lomeklatk er kid el kmo a re guest er a Jehovah a diak loruul a mekngit el mora rengar bita er tir e diak lolemall a chisir a resechelirir. Ngera uldimukl er ngii?

¹³ Nglocha diak el durengud e tomellii a chisel a chad loeak a domriid a negative el tekoi el kirel. El ua tiang: (1) a odos a mo diak lengar er a mui el taem el omesiou, (2) obekel a mo diak losiou el ngar er a Bethel, me a lechub (3) a odam a mo diak losiou el ta er a remechuodel me a lechub e ng ministerial servant. Omomdasu e ngungil omolechedech er a uchul e mouchais er a rebebil el kirel? Nglocha betok a uchul me ngmlo uaisei engdi ngdiak dodengei. Me a lmuut kung, a guest er a tento er a Jehovah “[diak] loruul a mekngit el mora rengar bita er ngii, e diak lolemall a chisir a resechelil.”

MOLDANGES ER TIRKE EL MELUU ER A JEHOVAH

14. Mosaod er a rolel e a re guest er a Jehovah oltngakl er a “ngii di el chad el ketiaol.”

¹⁴ A Psalm 15:4 (NW) a kmo a sechelil a Jehovah “[oltngakl] er a ngii di el chad el ketiaol.” Ngmekera doruul er tiang? Kid el diak demecherrungel a uchul me ngdiak el sebeched el mo medengei el kmo a chad a ketiaol me a lechub e ngdiak. E ngerang? E le kid a locha mo soad a blekerdelir a rebebil e checherd a rengud er a rekuk bebil. Sei a uchul me ngkired el oltngakl er tirke el Jehovah omes er tir el kmo te “ketiaol.” (1 Ko. 5:11) Tirka uldimukl er tirke el diak el kengei el lobult er a mekngit el omerellir, diak lolecholt er omengull el kirel a klaumerang er kid, me a lechub e te melasem el mengitechut er kid er a klereng.—Osi. 13:20.

15. Ngera ta er a rolel e ngsebeched el oldanges er “tirke el meluu er a Jehovah”?

¹⁵ A ongingil e a Psalm 15:4 (NW) a kmo moldanges er tirke el “meluu er a Jehovah.” Me kede osiik a rolel e meruul a ungil e olecholt omengull el mora resechelil a Jehovah. (Rom 12:10) Ngmekera doruul er tiang? A Psalm 15:4 (NW) a mesechii a ta er ngii. Ngkmo a guest er a tento er a Jehovah ‘diak el lechitii a telbilel, mo lmuut me a bo lemekngit er ngii.’ Sel lak dotutii a telbiled e ngsebechel mo uchul a tellemall el mora rebebil. (Mt. 5:37) El ua tiang, a Jehovah expect er a re guest er ngii el mo oltaut a telbilir er a chebechiil. Ngdirrek el kmal mo dmeu a rengul sel lomes er a ruungalek el oureor el mo oltaut a telbilir el mora rengelekir. A bltkil a rengud el mora Dios me a rengar bita er kid a rullid el mo oltaut aike el dedung el mora tkurrebab el klisiched.

16. Ngera lmuut el ta er a rolel e kede ochotii omengull el mora resechelil a Jehovah?

¹⁶ A lmuut el ta er a rolel e kede oldanges er a resechelil a Jehovah a bo debekururau e bo domtechakl er a rechad. (Rom 12:13) Sel dongoit a taem lobengterir a rudam me a rudos er kid er a ikrel a miting me a odingel e kede smisiich a deleuill er kid me tir me a dirrek el deleuill er kid me a Jehovah. Me a lmuut kung, sel domtechakl er a rechad e kede oukerebai er a Jehovah.

LAK BO LEBETIK A RENGUM ER A UDOUD

17. Ngera uchul me a 15 el bliongel er a Psalm a mesaod a udoud?

¹⁷ Kede menguiu el kmo a guest er a Jehovah a “loleng a ududel e ngdiak olengil, me a diak lemecheluch el mo omtok er a diak a telemellel.” (Psa. 15:​5, NW) Ngera uchul me a udoud a lomasech er ngii er tia el kedeb el babier er a Psalm? E le lak el tabesul osenged el kirel a udoud e ngsebechel mo uchul e kede tomelleterir a rebebil e tomellii a deleuill er kid me a Dios. (1 Ti. 6: 10) Taem er a Biblia e a rebebil uluusbech a bderrir er a rudam er tir el mechebuul loeak a lolai olengil a udoud el lulleng er tir. Ngdirrek a rebebil er a re judge a kilengei omengeluch e mlo diak el melemalt a kerrekerilir el mora rediak a telemellir. Chouaika el omeruul a mederdirk er a rengul a Jehovah.—Ese. 22:12.

18. Ngera el ker a sebechel ngosukid el mo merriter er a osenged el kirel a udoud? (Hebru 13:5)

¹⁸ Ngungil a di lekid el merriter er a osenged el kirel a udoud. Di lekau el oker: ‘Ngak, ak blechoel el melatk a udoud me aike el sebechek el mechar? A lsekum ak lmeng a udoud e ak meoud el harau, e le kumdasu el kmo ngike el klileng er ngii a diak lousbech er ngii? Ngak el ngar ngii a ududek ngrullak el mo feel el kmo ngkmal klou a ultutelek engdi ngrullak el mo diak bekururau? Ngak a kumes er a rudam me a rudos er ngak el kmo te sorir a kerruul le tir el ngar ngii a ududir? Ngak, ngsoak el sechelirir tirke el olab a udoud el diak el tirke el mechebuul?’ Kede mla nguu a ileakl el techall el mo guest er a Jehovah. Ngsebeched el mekerreuii tia el ileakl el techall loeak a dongeroid er a klengar er kid a ngibes er a udoud. Sel doruul el uaisei e a Jehovah kmal diak bo lechitid!—Monguiu er a Hebru 13:5.

A JEHOVAH BETIK A RENGUL ER A RESECHELIL

19. Ngera uchul me a Jehovah soal a doruul aike el rokui el medung er a 15 el bliongel er a Psalm?

¹⁹ A ulebengelel a 15 el bliongel er a Psalm a kmo: “A ngii di el chad el meruul aika el tekoi a diak a mo simesmengii.” (Psa. 15:​5, NW) Ngar tiang e a milluches er tia el Psalm ouchais er a uchul me a Dios a soal a doruul aika el tekoi. A Jehovah soal a bo ledeu a rengud. Me ngomeskid a ulekrael el mo uchul a klengeltengat me a osebechakl er ngii.—Isa. 48:17.

20. Ngera sebechir a re guest er a Jehovah lomes el beduluchei el kirel?

²⁰ A re guest er a Jehovah omes el beduluchei el kirel a ungil klengar er a ngar medad. A rengellitel a mo sebechir el soiseb aike el “betok [el] delemerab” el Jesus a mla kutmokl el kirir er a eanged. (Jn. 14:2) E tirke el mo kiei er tia el chutem a omes el beduluchei el kirel otutel a Ocholt 21:3. Me ngmera el chetengakl el techall el kede mla nguu a invitation er a Jehovah el mo sechelil e mo guest er a tento er ngii el mo cherechar!