Ak mlechell er a December 22, 1929 er a Noville, el ta er aike el etiu el sers el kmeed er a Bastogne, el ngar er a Belgian Ardennes. Ngkmal ngar ngii a ungil memory er ngak er a kngalek lobengterir a rechad er a blik er tia el sers. Ngak me a ochellek er a Raymond a ulemet a tul a kerbou er a bek el sils el melai a milk e ullengeseu er a bek el temel a sim. A rokui el chad er tia el kekerei el belumam a kmal mle kaingeseu er a delongelam.

A demak er a Emile me a delak er a Alice a kmal mle chad er a Katolik. Aki mlara misang er a bek el Sandei. Me nguaisei engdi sera 1939 e a re pioneer el mlara England el mei er a belumam a mle offer el oldurokl el mora demak a Consolation el magazine (el chelechang e ngokedongall el Awake!). A demak a di mle mereched el mo mtebengii el kmo tiang a klemerang me ngulemuchel el menguiu er a Biblia. Sera bo lak el ngar er a misang e a retonari er kemam el kmal mle ungil er kemam a mlo mesisiich lomtok er ngii. Tir el ulerrimel er a demak el mo melemolem el chad er a Katolik a uchul me ngkmal mle betok a meringel el cheldecheduch el kirel.

Ngkmal mle mekngit a renguk el lomes er a demak el chelebangel er a oberaod el orimel. Tiakid a uchul me ak mlo osiik er a ulengesuil a Dios el ngar er a nglunguuch el kulsaod er ngii er a uchelel. A retonari er a lokekokterir el mo diak lomtok er a demak e ngkmal mlo ungil a renguk. Ngmlo ulterekokl a renguk el kmo a Jehovah ‘onger a nglunguuch.’

A Nazi Germany a siliseb er a Belgium er a May 10, 1940 me a rebetok el chad a chiliis. A telungalek er kemam a chiliis el mora dimes er a France. Ngar omerollam el mong e aki mlo ochau a kdekudel el blekeradel er a resoldau er a Dois me a France el kaumekemad.

 Sera ki mluut el mora sersam e te mla ngmai a kloklam. Ngdi mle Bobbie el chermam el bilis a mla er ngii el outkeu er kemam. Chouaika el blekeradel a uchul me ak mlo melatk, ‘Ngera uchul me ngngar ngii a mekemad me a ringel?’

Ngar tiakid el taem e aki kmal ngilai omelisiich er a Brother Emile Schrantz, a el blak a rengul pioneer e ta er a remechuodel. Ngsilodii a uchul me ngngar ngii a ringel e ulenger a kerik el kirel a klengar. Ngmlo er ngii a dmolech el deleuill er ngak me a Jehovah e mlo ulterekokl a renguk el kmo ng Dios er a bltikerreng.

Mo lmuut er a uchei er a bo lemerek a mekemad e a telungalek er kemam a mle sebechel el mengoit a taem el lobengterir a rudam. A August 1943, e a Brother José-Nicolas Minet a mlei er a sersam e ultebedii a cheldecheduch. Nguleker el kmo, “Ngtecha soal mo metecholb?” Me ngak me a demak uleldars chimomam. Aki miltecholb er a kekerei el omoachel el ngar er a bita er a sersam.

A December 1944 e a resoldau er a Dois a milechelii sel klou e ulebongel el odelecheklir er a ngebard er a Europe, el dodengelii el kmo ng Battle of the Bulge. Aki kiliei er bita er sel basio el lemla er ngii tia el mekemad me ngmle kiram el kiei er a basement er a blimam el bekord el ta el buil. A ta er a klebesei e ak tilobed el mo omekang a charm e ngii obuu a sersam me a chedoel a blil a chermam a silebek. A soldau el chad er a Merikel el mlara blil a charm a uleldiu el kmo, “Bo bad er a chutem!” Me ak rirurt el mo er bita er ngii, e ngnguu a ulekungel el loia er a bdeluk el protect er ngak.

Uriul er a mekemad e aki mle blechoel el mengedecheduch er a ongdibel el ngar er a Liège el mlara diluches er kemam e mle bekord el 56 el mael a cherridel. Cherengel a taem e ngmlo sebecham el kutmeklii a kekerei el group er a Bastogne. A kulemuchel loureor er a siobai er omeruul el tax e mlo er ngii a techellek el mesuub a llach. Uriul e ak mlo oureor er a obis er a kabelment. E a 1951 aki rirellii a kekerei el assembly er a Bastogne. Bekord el dart el chad a mlei luldimukl er a ta er a blak a rengul el pioneer el odos el ngklel a Elly Reuter. Ngika mlara rrat el 31 el mael el mei. Me aki mle fall in love e mlo engage. A Elly a dirk ngiluu a invitation el mora skuul er a Gilead  er a beluu er a Merikel. Me ngmilluches el mora world headquarters el mesaod er a uchul me ngmle kirel kotouar er a invitation. A Brother Knorr el ulemekrael er a rechedal a Jehovah er tiakid el taem a milluches el kmo, a ta er a klebesei e nglocha sebechel mora skuul er a Gilead ngii me a bechil. Me aki mlo bechiil er a February 1953.

Tia el osisiu el rak e ngak me a Elly a mlora New World Society Assembly el tilobed er a Yankee Stadium, New York. Ngar tiang e ak mle meet er a odam el mle offer er a ungil ureor er ngak e mle invite er ngak el melukl el mei er a Merikel. Me aki milluluuch el kirel. Ngak me a Elly mle kotouar e liluut el mora Belgium el mo support er a reteruich el publisher el ngar er a Bastogne. A ongingil el rak e ngmlechell a ngelekam el sechal er a Serge. Ngkmal mekngit a rengmam e le euid el buil el uriul e ngmlo smecher e mad. Aki milluluuch louchais a kngtil a rengmam er a Jehovah me a omelatk er okiis a kmal millisiich er kemam.

A October 1961 e ngmle sebechek el metik er a part-time el urerek el luchul e ngmo sebechek el pioneer. Engdi ngar tia el osisiu el sils e ngike el branch servant er a Belgium ulemekedong. Nguleker el kmo ngsebechek el omuchel el mesiou el circuit servant (el chelechang e ngokedongall el circuit overseer). Me a kullengit el kmo: “Ngsebecham el mesiou el pioneer el kot er a uchei er a ki mkengei er tia el assignment?” Me ngkilengei me aki milsiou el pioneer el eai el buil e ulemuchel er a ureram loldingel ongdibel er a September 1962.

Me aki milsiou el oldingel ongdibel el eru el rak e te invite er kemam el mo mesiou er a Bethel el ngar er a Brussels. Me aki mlora Bethel er a October 1964. Tia el beches el assignment a mlo uchul a betok el klengeltengat. Kedeb el taem er uriul e a Brother Knorr a mle odngelii a Bethel er a 1965 e kmal mlo mechas a renguk le ngtiltkak el mo branch servant. Uriul e te mle invite er ngak me a Elly el mora 41st class er a Skuul er a Gilead. A tekingel a Brother Knorr er a 13 el rak er uchei a tilaut! Uriul er a ki mtobed er a skuul e aki liluut el mora Belgium Bethel.

Ngar er aika el mereko el rak e ngmla er ngii a ileakl el techellek el lousbech er a klemedengei er ngak er a llach el lolengeseu el mesebechakl er a llemeltir a rechedal a Jehovah el mengull er ngii er a Europe me a lmuut el bebil er a beluu. (Fil. 1:​7, NW) Tia uchul me ak mle meet er a rebetok el chad el ngar er a betok er a 55 el kakerous el beluu el merrob a urered. Ngdimlak kusaod er tir a experience er ngak er a llach ak bai dilu er tir el kmo “ngak a chedal a chelid.” Ak blechoel el osiik er a ulekrael er a Jehovah loeak a nglunguuch e le kmtebengii el kmo a “rengul a king [me a lechub e ng judge] a omoachel el longedereder er ngii a RUBAK, ng orrael er ngii el mor sel soal.”—Osi. 21:1.

A ta el experience el kmal diak kubes er ngii a cheldechedechak lobengkel a ta er a chedal a European Parliament. Ngmle betok el taem el kulasem el mengedecheduch er ngii e ngmocha kongei  el meet er ngak. Ngdilu el kmo, “Ak kmal di meskau a eim el bung e merekong.” Me ak mlo terrob e meluluuch. Me nguleker er ngak el kmo ak mekerang. Me a kulkisii a medak e kmo, “Ak mirreng a sulel a Dios e lekau a ta er a mesiungel a Dios.” Me nguleker el kmo, “Ngera belkul a tekingem?” Me a kulechotii er ngii a Rom 13:4. Ngika mle chad er a Prodestant me ngkmal tilab osengel er tia el bades. Me ngngera dilubech? Aki mle chadecheduch el 30 el bung e kmal mle ungil a miting er kemam. Ngdirrek el dilu el kmo ngkmal respect er a urered.

Ngar er aika el mereko el rak e a rechedal a Jehovah mla oldechelakl a betok el kerrekeriil er a Europe el kirel a diak domekbitang er a tekoi er a balatiks, custody er a rengalek, tax, me a lmuut el betok. Ngmeral el ileakl el techall el mlo sebechek el teloi a betok er ngii e mesa rolel e a Jehovah milsekemam a klisiich. A Resioning er a Jehovah mla mo kats er a betok er a 140 el case er a European Court of Human Rights!

Ngar er a chelsel aike el rak er a 1990 e a kuluureor el lobengkel a Brother Philip Brumley, er a world headquarters, me a Brother Valter Farneti, er a Italy, el lolengeseu er a rudam er kid er a Cuba el mo sebechir el mimokl el mengull er a Jehovah. Me ak milluches el mora embassy er a Cuba el ngar er a Belgium e mle meet er a chad el mlukngerachel el mo merriter a ongtid. Ngar er aike el miting er kemam er a uchelel e ngdimlak el sebecham el sumechokl aike el luchul me a kabelment a milerrob a urered.

Uriul er aki moluluuch lolengit a ulekrael er a Jehovah e aki ullengit el mo oldurokl a 5,000 el Biblia el mora Cuba, me te kilengei. Uriul er a lebong a Biblia el diak el klsakl e ngmlo ulterekokl a rengmam el kmo a Jehovah omekngeltengat a ureram. Me aki ullengit me lsebeched el lmuut el oldurokl a 27,500 el Biblia. Tiang me te kilengei er ngii. Ngkmal mlo ungil a renguk el olengeseu er a rudam me a rudos er a Cuba el derta er tir a mlo er ngii a Biblia er tir.

Ngmla mo betok el taem el kbora Cuba lolengeseu me lsebeched el mo mimokl el mengull er a Jehovah er ngii. Tiakid a uchul me ngmlo sebechek el mak a ungil deleuill lobengterir a rechad er a kabelment er ngii.

Sera 1994 e te mle betok er a 1,000,000 el chad a mlad er a koadelchad el mlora re Tutsi el ngar er a beluu er a Rwanda. A rebebil  er a rudam me a rudos er kid a lulekodeterir. Ngdi mle telkib e te omekngerachel er a rudam el mo omesterir a rudam me a rudos er tiang aike el lousbech.

A group er kemam er aki bora Kigali el capital er a Rwanda, e aki mlo metik er a obis er a ruliuid e milsa el kmo a obis me a betok er a babilenged a blsibs er a kelel a boes. Aki rirenges a kmal mekngit el chais el kirel a rudam me a rudos el lulemekoad er tir lolab a songdang. Engdi aki dirrek el rirenges a chisel a bltikerreng er a Klekristiano. El ua tiang a ta el odam el Tutsi a lulemart er ngii a ta el telungalek er a Hutu el Sioning er a chelsel a kliis el chutem el 28 el klebesei. Ngar er a miting el mla er ngii er a Kigali e aki milengelaod er a rebetok er a 900 el odam me a odos el lousbech a Bades.

A uriul e aki mlora Zaire (el chelechang e ngokedongall el Democratic Republic of the Congo) el mo osiik er a klou el group er a Resioning el chad er a Rwanda el chiliis el mora ike el kiamp el ngar er a bita er a Goma. Ngdimlak el sebecham el metik er tir me aki milluluuch lolengit a ulekrael er a Jehovah. E aki mesa chad el merael el bedul kemam me aki uleker er ngii el kmo ngngar ngii a Resioning er a Jehovah el lodengelterir. Me ngdilu el kmo, “Ngak a ta er a Sioning. Kmal dmeu a renguk el ngoikemiu el mora relief committee.” Uriul er aki molisiich er a relief committee e aki mle meet lobengterir a rebekord el 1,600 el chad el chiliis e milengelaod e melisiich er tir. Aki dirrek el chiliuii a babier el mlara Governing Body. Ngkmal rirutech a rengrir a rudam me a rudos er a lerenges a tekingir el kmo: “Kom blechoel el ngar er a nglungucham. Aki medengei el kmo a Jehovah a diak bo le chitemiu.” Ngkmal mle klemerang a tekingel a Governing Body. Chelecha el taem e te betok er a 30,000 a Resioning er a Rwanda!

Ngak me a Elly a mle bechiil el bekord el 58 el rak e ngmo smecher er a 2011. A Jehovah kmal milengelaod er ngak er a kululuuch el louchais er ngii a kngtil a renguk. Ngdirrek el kmal milengelaod er ngak el share er a ungil chais er a Renged el mora rengar bita er ngak.

Me alta ngmla mo 90 me a derengel a rekik, ak dirk omerk er a klumech er a bek el sandei. Ngdirrek el kmal dmeu a renguk el sebechek lolengeseu er a Legal Department er a branch er a Belgium, e ouchais a experience er ngak el mora rebebil, e melisiich er a remekekerei er a telungalek er a Bethel.

Bekord el 84 el rak er a mla me mong e ak mle kot el meluluuch el mora Jehovah. Tia mle uchelel a ungil klengar e uchul me a kmla lmuut el mo kmeed er a Jehovah. Ak mera el oba omereng el saul el klengar er ngak el rokir e a Jehovah blechoel el orrenges a nglunguchek.—Psa. 66:19. b