1. Ngmekera Jehovah e di uai a chedil loltut er a ngelekel?

“NG SEBECHEL a redil el obes er a ngelekel tolechoi?” A Jehovah a uleker er tia el ker er a taem er a profet Isaia. Ngdilu er a rechedal el kmo: “A lta e a chedil a mo obes er a ngelekel, ngdi ngak a kmal diak kubes er kau.” (Isa. 49:15) Me a Dios a diak leblechoel lomekesiu er ngii el mora chedil. Engdi ngar tiang e ngmirruul uaisei. Nguluusbech er a deleongel er a chedil me a ngelekel el ochotii a dmolech el bltikerreng er ngii el mora remesiungel. A ruumesingd el chedil a di uai a uldesuel a odos el Jasmin el dilu el kmo, “Sel moltut er a ngelekem, e ke mekur a ileakl el deleongel el obengkel el diak a ulebengelel.”

2. Ngua ngera uldesuel a Jehovah sel bo el cheroid er ngii a ta er a rengelekel?

² A Jehovah a medengei sel lsekum a ta er a rengelekel a mo diak leteloi er a ongdibel e diak lomerk er a klumech. Ka di molatk er a kngtil a rengul sel leseterir a rebetok el telael el mesiungel el mla mo inactive * er a bek el rak.

3. Ngera soal a Jehovah?

³ A rebetok er tirka el rudam me a rudos el mle inactive a mla lmuut el mei er a ongdibel, e kmal dmeu a rengud sel loruul uaisei! A Jehovah a soal a lluut el mei, me kid me nguaisei a uldesued. (1 Pe. 2:25) Ngmekera dengesuterir el lmuut el mei? A uchei er a donger er tia el ker, e ngungil a bo dodengei a uchul me a rebebil a mla mo diak lemei er a miting e lomerk er a klumech.

4. Ngera duubech el mora rebebil el urerir a uchul?

⁴ A rebebil a kmal mla mo chemau a urerir. A Hung * el odam el kiei er a Southeast Asia a kmo: “Ak kmal mlo mechesang er a urerek. Ngdi mle ngak el mengeblad er ngak el kmo a lsekum e ngmo betok a ududek, e ngmo sebechek el ungil mesiou er a Jehovah. Me ak chiloit a lmuut el betok el sikang el oureor. Me ngmlo diak ngar er a miting el mocha diak teloi er a ongdibel. A Satan a ousbech er tia el beluulechad el mengesang er a rechad me a cherengel a taem e ngmo diak losiou er a Dios.”

5. Ngmilekera ta el odos er a bo lechelebangel a betok el mondai?

⁵ A rebebil rudam me a rudos a mla meieleb er a betok el mondai. A Anne er a Britain el teim a rengelekel a kmo: “A ta er a rengelekek a milechell el chitechut. E a uriul, e a ta er tir a milsuld a ngklel e dirrek el mla er ngii a ngelekek el sechal el mlo smecher a bdelul. Me ngkmal mlo mechitechut a uldesuek me ngmlo diak ngar er a miting e diak kumerk er a klumech. E a cherengel a taem, e ak mlo inactive.” Kede mera el oba klechubechub el kirel a Anne me a telungalek er ngii me a relmuut el bebil el chelebangel a osisiu el mondai!

6. Ngera me a chad a mo cheroid er a rechedal a Jehovah a lsekum e ngdiak loltirakl er a Kolose 3:13?

⁶ Monguiu er a Kolose 3:13. A rebebil mesiungel a Jehovah a metemall a rengrir er a omerellel a ta er a Kristiano. Me a apostol Paulus a mle medengei el kmo a lebebil e ngar ngii a ungil uchul a “ultutakl el kirel” a odam me a lechub e ngodos. Kede locha dirrek el mla chobangel a diak lemelemalt el omeruul. A lak dekerekikl, e ngsebeched el di orreked er a ngesechel a rengud. E tia el ngesechel a rengud a sebechel ngoikid el mo cheroid er a rechedal a Jehovah. Ka molatk er a tekoi el dilubech el mora Pablo, el odam el ngar er a South America. Ngmlotelechakl el kmo ngmirruul a mekngit me ngmlengai er a ngerechelel er a omesiou er a ongdibel. Me ngmilekerang? Ngmelekoi el kmo: “Ngmlo kesib a renguk, me a cherengel a taem, e ak mlo cheroid er a ongdibel.”

7. Ngera sebechel duubech el mora chad el ukltkel a di oldechelakl er a rengul?

⁷ Ngsebechel a ukltkel a chad el di oldechelakl er a rengul el kirel a mekngit el tekoi el lerirellii er a irechar, e rullii el mo omdasu el kmo ngdiak el rredemelel a bltkil a rengul a Dios. Me alta ngulebult e ngiluu a klechubechub, engdi ngsebechel dirk omdasu el kmo ngdiak lerredemelel a teloi er a rechedal a Dios. A odam el Francisco a mle uaisei a uldesuel. Ngmillekoi el kmo: “Ak ngiluu a omellach e le ngak el rirebet er a deleboes. Me alta sera uchelel, e ak millemolem el ngar er a miting, engdi ngmlo mechitechut a uldesuek e mlo omdasu el kmo ngdiak rredemelel a teloi er a rechedal a Jehovah. A ukltkek a dirk milengesang er ngak, me ak ulemdasu el kmo a Jehovah a dirkak lousubes er ngak. Cherengel a taem, e ngmlo diak teloi er a ongdibel.” Ngua ngera uldesuem el kirir a rudam me a rudos el chelebangel a chouaika el blekeradel? Kau ke medengei a ringelir? E a ngaruchei, ngua ngera uldesuel a Jehovah el kirir?

8. A Jehovah ngobes er tirke el milsiou er ngii? Mosaod.

⁸ A Jehovah a diak lobes er tirke el milsiou er ngii engdi te mla meterob el telkib el taem, e diak lobes a ureor lurruul el ngar omesiungir. (Heb. 6:10) A profet Isaia  a milluches el kirel a klebokel el okesiu el olecholt er a ulekerreuil a Jehovah el mora rechedal. Ngmilluches el kmo: “Ng mo omekerreu a delebechel sib er ngii el ua tal mengkerengel a sib; ng mo chemudel a ngelekel a sib el mo dmak e mo menguoku.” (Isa. 40:11) Ngua ngera uldesuel ngika el Ngarbab el Mengkerengel a sib sel sekum a ta el chermel sib a mo cheroid er a delebechel? A Jesus a ulechotii a uldesuel a Jehovah er a loker er a redisaiplo er ngii el kmo: “Ng ngera uldesuiu er a tal chad el oucharm a 100 el sib e a chimo er ngii a remiid? Ng mo meche ikel 99 el sib me ng menga er a tkul a ked e ngii a mo osiik er ngikel ririid el sib. E ak subedemiu el kmo sel le betik er ngii, e a deuil a rengul el kirel ngikel di chimol sib a kuk morbab er a deuil a rengul el kirel a ikel 99 el dimlak leriid.”​—Mt. 18:12, 13.

9. A rungil mengkerengel a sib er a taem er a Biblia, ngmle uangera omerellir el mora chermir sib? (Momes er a siasing er a medal tia el babier.)

⁹ Ngera uchul me ngungil a domekesiu er a Jehovah el mora mengkerengel a sib? A ungil mengkerengel a sib er a taem er a Biblia a kmal ulemekerreu a sib er ngii. El ua tiang, a David a uleldechelakl er a laion me a kuma el olsobel er a delebechel sib. (1 Sa. 17:34, 35) Me a ungil mengkerengel a sib a medengei sel bo el dibus a ta er a chermel. (Jn. 10:3, 14) Me ngmechititerir a re 99 er a blil a sib me a lechub e ngar er a ulekerreuil a kuk ta er a mengkerengel a sib e ngii a mo osiik er ngike el ririid. A Jesus a uluusbech er tia el okesiu el osisecheklid er a klou a ultutelel el tekoi el kmo: “A Demmiu el ngara eanged a diak el soal a lriid a ta er tirikal mekekerei.”​—Mt. 18:14, BT.

10. A doltirakl er a Esekiel 34:11-16, e a Jehovah ngtilbir el mo mekerang el kirel a ririid el chermel sib?

¹⁰ A Jehovah a betik a rengul er a derta er kid, el uldimukl er tirke el “mekekerei” el mla mo cheroid er a delebechel er ngii. Me ngokiu a profet Esekiel, e a Dios a tilbir el kmo ngmo osiik a ririid el sib e ngosuterir el lmuut el mo mesisiich er a tekoi er a klereng. Ngulemasech a tekoi el kirel meruul el mo olsobel er tir, el  ngii el tekoi a lurruul a mengkerengel a sib er a Israel a lsekum e ngremiid a chermel sib. (Monguiu er a Esekiel 34:11-16.) A kot, e ngkirel a mengkerengel a sib losiik er ngii, e tia ousbech er a klou el taem me a klisiich. E sel lebetik er ngii, e nglmuut el nguu el mei er a delebechel. E a lsekum e ngmiltemall me a lechub e ngsongerenger, e ngmo ungil mekerreuii e le ngii el mechitechut, e omkar a telemellel, e menguoku er ngii, e omeka er ngii. Me a remechuodel el tir a mengkerengel a “delebechel el sib er a Dios” a dirrek el kirir el meruul aika el tekoi el mo ngosuir a chad el mla mo cheroid er a ongdibel. (1 Pe. 5:2, 3) Te osiik er tir, e ngosuterir el lmuut el mei er a ongdibel, e olecholt a bltikerreng el mo er tir sel lomesterir aike el lousbech el tekoi er a klereng. *

11. Ngera ngmle medengei a ungil mengkerengel a sib?

¹¹ A ungil mengkerengel a sib a mle medengei el kmo a sib a sebechel remiid. E a lsekum a sib a mo cheroid er a delebechel, e a mengkerengel a sib a diak bo longelebed er ngii. Ka momtab er a kerebai el Dios a kiltmeklii er sera lengesuterir a rebebil er a remesiungel el mlo cheroid er ngii el telkib el taem.

12. Ngmle uangera omerellel a Jehovah el mora Jona?

¹² A profet Jona a chiliis er a ngerechelel. Me nguaisei engdi a Jehovah dimlak lotngeklii. A Jehovah a di ua ungil mengkerengel a sib el ulsebelii e ngilsuir el nguu a klisiich el luluusbech er ngii el mo kutmeklii a ngerechelel. (Jon. 2:7; 3:1, 2) E a uriul, e nguluusbech er a dellomel el ngosuir a Jona el mo medengelii a kerresel a klengar er a rederta el chad. (Jon. 4:10, 11) Me ngera klubeled er tiang? A remechuodel a diak el kirir el mereched el oltngakl er tirke el mla mo inactive. Te bai melasem el mo medengei a uchul me te mlo cheroid er a delebechel. E sel lluut el mei er a Jehovah, e a remechuodel a melemolem el olecholt er a bltikerreng el mo er tir.

13. Ngera sebeched el suubii er a omerellel a Jehovah el mo er ngike el milluches er a Psalm 73?

¹³ Ngike el milluches er a Psalm 73 a mlo mechitechut a rengul er a lomes er a remekngit el  di ungil a klengar er tir. Me ngmlo oumededenger a klungiolel a doruul a soal a Dios. (Psa. 73:12, 13, 16) Me ngmilekera Jehovah? Ngdimlak loltngakl er ngii. E ngbai milechei a tekingel me ngllechukl er a Biblia. Cherengel a taem, e ngika el milluches er a psalm a mlo medengei el kmo ngdiak a ungil klengar el uai sel lengar ngii a deleuill er kid me a Jehovah. (Psa. 73:23, 24, 26, 28) Ngera klubeled er tiang? A remechuodel a diak el kirir el di mereched loukerrekeriil er tirke el mocha oumededenger er a klungiolel a dosiou er a Jehovah. Ngdiak loltngakl er tir, ngbai kirir el melasem el mo medengelii a uchul me te mengedecheduch e meruul a tekoi el uaisei. Ngdi seikid e ngmo sebechir el mo medengei a ulterekokl el Bades el sebechir el ousbech el melisiich er tir.

14. Ngera me a Elias a uluusbech a ngeso, e milekera Jehovah e ngosuir?

¹⁴ A profet Elias a chiliis er a Kuin Jesebel. (1 Ki. 19:1-3) Ngulemdasu el kmo ngmla mo diak a chad el mesiou el profet er a Jehovah, me a ureor el lurruul er ngii a dimlak a ultutelel. Me ngkmal mlo mechitechut a uldesuel me nguluureng el okmo ngmad. (1 Ki. 19:4, 10) A Jehovah dimlak loltngakl er a Elias, e ngbai ulterekeklii a rengul el kmo ngdiak di lengii el tang, e sebechel lultuil er a klisichel a Dios, e dirrek el dirk betok a ureor el kirel meruul. Me a Jehovah uleba blekokuii el orrenges a sebekreng er ngii e milsa beches el ngerechelel. (1 Ki. 19:11-16, 18) Ngera klubeled er tiang? Kid el rokui, el ileakl a remechuodel a kired el mo bekokuii el mora sib er a Jehovah. Me alta chad a ouchais a ngesechel a rengul me a lechub  e ngmelekoi el kmo ngdiak lerredemelel a klechubechub er a Jehovah, engdi a remechuodel a orrenges er ngii sel louchais a ngar er a rengul. E a uriul, e te mo melasem el olterekokl er a rengul el kmo, ngkmal mekreos er a rengul a Jehovah.

15. A doltirakl er a Johanes 6:39, e ngmle uangera osengel a Jesus el kirir a resib er a Demal?

¹⁵ A Jehovah, ngsoal a bo el uangera uldesued el kirir a ririid el sib? A Jesus a milecherei a kerebai el kired. Ngmle medengei el kmo a rokui el sib er a Jehovah a mekreos er a rengul, me ngmirruul a tekoi el ngosuterir “a ririid el sib er a re chad er a Israel” el lmuut el mora Jehovah. (Mt. 15:24; Lk. 19:9, 10) Ngii el kmal ungil mengkerengel a sib me ngdirrek el mlo er a tkurrebab el sebechel el diak lorideterir a resib er a Jehovah.​—Monguiu er a Johanes 6:39.

16-17. A remechuodel, ngkirel mo uangera uldesuir el kirel a ngeso el lousbech tirke el mlo cheroid er a Jehovah? (Momes er a baks el “ Aika Locha Uldesuel a Ririid el Sib.”)

¹⁶ A apostol Paulus a milengelechel er a remechuodel er a ongdibel er a Efesus el mo oukerebai er a Jesus. “Ng kired el olengeseu er a re mechitechut, e melatk a ikel tekoi el le dilu Rubak el Jesus el kmo, ‘Ng bai klou el deurreng a dorous er a dolai.’” (Rel. 20:17, 35) Me a remechuodel a ngar ngii a ileakl el ngerechelir el kirel tiang. A ta er a remechuodel er a Spain el Salvador a mesaod el kmo: “Sel kulatk er a dmolech el ulekerreuil a Jehovah el kirir a ririid el sib, e ngmelisiich er ngak el mo meruul aike el rokui el sebechek el mo ngosuterir. Ngak el mengkerengel a sib me ngulterekokl a renguk el kmo a Jehovah a soal a bo kumekerreu er tir.”

¹⁷ Tirke el rokui el dulsaod er tir er tia el suobel el mlo cheroid er a Jehovah a mlongeseu el lmuut el mei. Chelechang e te dirk betok a sorir el lmuut el mei. A ongingil el suobel a mo mesaod a komakai el tekoi el kirel a rolel a dengesuterir el lmuut el mei er a Jehovah.