1-2. Ngera el tekoi a kmal meklou a ultutelel el mora Resioning er a Jehovah?

KEDE chelebangel a meklou a ultutelel el tekoi er chelechang, el omengederederel a Jehovah me a omengedolel a ngklel. Kid el Sioning er a Jehovah a kmal soad el mesaod aika el tekoi. Engdi a omengederederel a Dios me a omengedolel a ngklel, ngteblo el kakerous el tekoi? Ngdiak.

² Kede rokui el mla mo medengei el kmo a ngklel a Dios a kirel mechedaol. Kede dirrek el mla suubii el kmo a omengederederel a Jehovah a kot el ungil. Me aika el teblo el tekoi a meklou a ultutelel.

3. Ngera uldimukl er a ngakl el Jehovah?

³ A ngakl el Jehovah a mesaod a rokui el tekoi el kirel a Dios er kid, el uldimukl er a rolel a longedereder. Me sel dolekoi el kmo ngklou a ultutelel a lemekikiid a ngklel a Jehovah er a rokui el otuub, e kede dirrek el kmo, a omengederederel a kirel mocholt el kot el lungil. A ngklel a Jehovah a rrengodel el mora omengederederel el Olab a Bek el Klisiich.​—Momes er a baks el “ Telengtengil a Klou el Omelsemai.”

4. Ngmekera Psalm 135:13 a losaod er a ngklel a Dios, e ngera el ker a bo donger?

⁴ Me a ngakl el Jehovah a kmal ileakl. (Monguiu er a Psalm 135:13.) Ngera rullii a ngklel a Dios me ngkmal klou a ultutelel? Ngmilekera er a lekot el motuub? E mekera Dios a longedaol er a ngklel? E mekera dolengeseu el mesebechakl er a ngklel? Kede mo onger aika el ker.

5. Ngera te mo melatk a rebebil el kirel a omengedolel a ngklel a Dios?

⁵ “Le mechedaol a ngklem.” (Mt. 6:9, BT) Tiakid a lullekoi er ngii a Jesus el kmo ngklou a ultutelel er a nglunguuch. Engdi ngera mle belkul a tekingel? A lemechedaol a kmung ngerang  a belkul a kmo ngmekikiid me a lechub e ngmo bliochel. Engdi a rebebil a sebechir el mo melatk el kmo, ‘A ngklel a Jehovah ngdiak el bla bo lechedaol e leklikiid e lebliochel?’ Me a bo donger er tia el ker, e ngkired el mo melatk el kmo ngerang a uldimukl er a ngakl.

6. Ngera rullii a ngakl me ngmo klou a ultutelel?

⁶ A ngakl a diak di el tekoi el llechukl er a babier me a lechub e ngmedung. Ka momtab a lolekoi a Biblia el kmo: “A lsekum ng kirem el melilt er a le ungil a chisem ma klou el kerruul, e molilt er a le ungil a chisem.” (Osi. 22:1; Oli. 7:1) Ngera me ngklou a ultutelel a ngkled me a lechub e ngchised? E le nguldimukl er a uldesuir a rechad el kired. Me a ngakl el llechukl er a babier me a lechub e ngmedung a diak el klou a ultutelel, e ngbai sel uldesuir a rechad sel lesang me a lechub e lerengesii ngii el ngakl.

7. Te mekera rechad e melemall er a ngklel a Dios?

⁷ Me a rechad sel lolekoi a blulak el kirel a Jehovah, e te melemall a chisel. E sel loruul uaisei, e te melasem el melemall er a ngklel. Me a kot el telemellel a ngklel a Dios me a chisel a dilubech er a uchelel a reksi er a rechad. Ka momtab aike el sebeched el suub er tiang.

8. Ngera te mle medengei a Adam me a Eva, e ngera el ker a duubech?

⁸ A Adam me a Eva a mle medengelii a ngklel a Jehovah me a meklou a ultutelel el tekoi el kirel. Te mle medengelii el kmo Ngulemeob, e Ngii ngike el milsterir a klengar, me a klebokel el delengcheklir, me a cherrungel el chebechiielir. (Gen. 1:26-28; 2:18) Me nguaisei, engdi tir, te mo melemolem el ousbech a cherrungel el uldesuir el melebedebek a rokui el tekoi el leriruul a Jehovah el kirir? Te mo melemolem el omekeroul er a bltkil a rengrir me a omereng el saul er tir el mora Jehovah? A nger er aikang a ulebeketakl er sera lemeasem er a cherrouel a Dios.

9. A doltirakl er a Genesis 2:16, 17 me a 3:1-5, e ngera ngdilu Jehovah el mo er tirke el kot el obekel? Ngmilekera Satan e ngildechii a klemerang?

⁹ Monguiu er a Genesis 2:16, 17 me a 3:1-5. A Satan a uluusbech er a bersoech el melekingel, e uleker er a Eva el kmo: “Ng meral dilu Dios el kmo ng diak kom mongang a redechel a ngii di le kerrekar el ngar a chelsel a  sers?” Me a keril a mle uldimukl er a blulak el kirel a Dios, el rirellii a Eva el mo oumededenger er a Dios. A mera er ngii, a Dios a dilu el kmo ngmle sebechir el menga redechel a rokui el kerrekar, ngdi ta er ngii a dimlak el sebechir. Me a Adam me a Eva a mle sebechir el menga redechel a betok el kakerous el kerrekar. (Gen. 2:9) Me a Jehovah a kmal bekururau. Engdi ngmilerrob er a Adam me a Eva me lak longa redechel a ta el kerrekar. Me a Satan a ngildechii a klemerang. Ngrirelleterir el mo omdasu el kmo a Dios a dimlak lebekururau. Me a Eva locha mlo melatk el kmo, ‘A Dios, ngar ngii a ungil tekoi el diak el soal lomeskak?’

10. Ngmilekera Satan e di mle beches el otubii a ngklel a Dios, e ngera dilubech?

¹⁰ A Eva dirk ulemes er a Jehovah el Merredelel. Me nguluuchais er a Satan a bleketakl el tekingel a Dios. E dirrek el dilu el kmo ngdimlak el kirir el rutechii sel kerrekar. Ngmle medengei tekingel a Dios el kmo a lak lolengesenges e te mo mad. Engdi Satan a dilu el kmo: “Ng diak bo mad.” (Gen. 3:2-4) Ngdimlekea lomart a tekingel, e ngbai di mle beches el oltuub er a ngklel a Dios e dilu er a Eva el kmo a Jehovah a bulak. Seikid e ngmlo diabelong, me a lechub e ngike el oltuub. Me a Eva mera el milecheblad, e mlo oumerang er a Satan. (1 Ti. 2:14) Ngmlo oumerang er a Satan el kuk ngaruchei er a Jehovah. Me ngmlo beot er ngii el rullii a kot el mekngit el omelilt, el mo diak lolengesenges er a Jehovah. Ngkillii sel rodech el Jehovah dilu el kmo ngdiak el kirir el menga er ngii. E a uriul, e ngmilsa Adam me ngdirrek el killii.​—Gen. 3:6.

11. Ngera mle sebechir a kot el demad me a delad el rullii, engdi ngera dimlak lerellii?

¹¹ Ka molatk a mle sebechel a Eva el dmung el mora Satan. Ngmle sebechel melekoi el kmo: “Ngdiak kudengelkau, engdi ak medengelii a Demak, el Jehovah, e betik a renguk e oumerang er ngii. Ngmla meskak ngak me a Adam a rokui el tekoi. Ngera me ke melekoi a mekngit el kirel? Mcheridau!” Ngulterekokl el mlo dmeu a rengul a Jehovah el remenges a chouaisei el tekoi el mla er a betik er a rengul el ngelekel! (Osi. 27:11) Engdi Eva dimlak loba cherrungel el bltikerreng el mora Jehovah, me a Adam me ngdirrek el mle uaisei. Tir el dimlak loba chouaisei el bltikerreng el mora Demerir a uchul me ngdimlak losebechakl er a ngklel.

12. Ngmilekera Satan er a lerellii a Eva el mo oumededenger, e ngera dimlak el sebechel a Adam me a Eva el rullii?

¹² Me ngua dulsaod, a Satan a ulemuchel el melemall a chisel a Jehovah er a lolasem el meruul er a Eva el mo oumededenger el kmo a Jehovah a ungil Chedam. A Adam me a Eva dimlak losebechakl er a ngklel a Jehovah me a chisel. Sei a uchul me ngmle beot er tir el mo orrenges er a Satan e mo omtok er a Demerir. A Satan a ousbech er a osisiu el rolel er chelechang. Ngmelemall er a ngklel a Jehovah  lokiu sel loltuub er ngii. Me a rechad el oumerang a blulekngel a beot er tir el mo oltngakl er a melemalt el omengederederel a Jehovah.

13. Ngmekera Esekiel 36:23 a losaod er a uchetemel a klumech er a Biblia?

¹³ A Jehovah ngdi kongei a chouaika el otuub e diak bo losebechakl er a ngklel? Ngkmal diak! A Biblia a ouchais aike el bla leruul el mo mengedaol er a ngklel er a otuub el mla er ngii er a Eden. (Gen. 3:15) Ngsebeched el mesaod er a uchetemel a klumech er a Biblia el ua tiang: A Jehovah mengedaol er a ngklel lokiu a Renged el longedereder er ngii a Ngelekel e mo olutii a llemalt me a budech el mei er tia el beluulechad. Me a Biblia a ngosukid el mo medengelii a rolel e a Jehovah a mo mengedaol er a ngklel.​—Monguiu er a Esekiel 36:23.

14. Ngmekera e a omerellel a Jehovah el kirel a ultok er a Eden e chemedolii a ngklel?

¹⁴ A Satan a mla remuul aike el rokui el sebechel el mo merrob er a Jehovah me lak lotutii a moktek er ngii. Engdi ngdiak el sebechel el mo mesisiich. A Biblia olecholt aike el bla leruul a Jehovah, e tia meketeklii el kmo ngkmal diak a uai a Jehovah el Dios. Ngmera el tekoi, a ultekengel a Satan me tirke el obengkel a uchul a klou el kngtil a rengul a Jehovah. (Psa. 78:40) Engdi Jehovah mesmechokl er tia el omelsemai loba llomeserreng, kllourreng, me a llemalt. Ngdirrek el mla ochotii a klisichel lokiu a betok el rolel. E sel ngaruchei er ngii, ngolecholt er a bltikerreng el ngar er a bek el tekoi el loruul. (1 Jn. 4:8) Ngdiak lemeterob el mengedaol er a ngklel.

15. Ngmekera Satan e oltuub er a ngklel a Dios, e ngera mla duubech?

¹⁵ A Satan a dirk oltuub er a ngklel a Dios. Ngmengesuseu er a rechad el mo oumededenger el kmo a Dios a mesisiich, e melemalt, e mellomes a rengul, e betik a rengul. El ua tiang, ngmeruul er a rechad el mo oumerang el kmo a Jehovah a diak el Ngike el Ulemeob. E a lsekum te oumerang el kmo ngar ngii a Dios, e ngrulleterir el mo omdasu el kmo a  llechul a meringel e diak el tabesul. Ngdirrek el lolisechakl el kmo a Jehovah a diak el chubechub e melul er a rechad er a beluu er a ngau. Me a rechad sel bo loumerang aika el blulak el tekoi, e ngmo beot er tir el otngeklii a melemalt el omengederederel a Jehovah. Me ngmo lmuut er sel taem el bo lemokngemed, e a Satan a melemolem el oltuub er a Jehovah, e meruul er kau el mo oltngakl er a Jehovah. Ngsebechel el mo mesisiich?

16. Ngera sebechem el rullii el dimlak el sebechel a Adam me a Eva el rullii?

¹⁶ A Jehovah a kongei er a rediak lemecherrungel el chad el mo olengeseu el mengedaol er a ngklel. Me kau a sebechem el mo rullii sel dimlak el sebechel a Adam me a Eva el rullii. Me alta ke iliuekl er a rechad el oltuub e melius er a ngklel a Jehovah, engdi ngar ngii a techellem el mo mesebechakl er a ngklel a Jehovah, e ouchais er a rechad el kmo Ngii a chedaol, e melemalt, e ungil, e betik a rengul. (Isa. 29:23) Ngsebechem el melisiich er a omengederederel. E sebechem louchais er a rechad el kmo ngdi ta el omengederederel a Jehovah a melemalt e mo uchul a budech me a deurreng.​—Psa. 37:9, 37; 146:5, 6, 10.

17. Ngmilekera Jesus er a lolecholt er a ngklel a Demal?

¹⁷ Sel dosebechakl er a ngklel a Jehovah, e kede oltirakl er a kerebil a Jesus Kristus. (Jn. 17:26, BT) A Jesus a dimlak di louchais el kirel a ngklel a Jehovah, ngdirrek el milsebechakl er ngii. El ua tiang, ngulemtok er a Refarisi, el tir a millekoi el kmo a Jehovah a mekngit a blekerdelel, e betok a longerechir, e cheroid er a rechad, e diak el chubechub. Engdi Jesus a ngilsuterir a rechad el mo mesa el kmo a Demal a tabesul a omerellel, e klou a rengul, e betik a rengul, e ousubes. Ngdirrek el ngilsuterir el mo medengelii a Jehovah loeak sera lolecholt a blekerdelel a Demal.​—Jn. 14:9.

18. Ngmekera domeklemalt a blulak me a otuub el kirel a Jehovah?

¹⁸ Kid a ua Jesus el sebeched louchais er a rechad aike el dodengei el kirel a Jehovah, el kmo ngbetik a rengul e bekokuii. E sel doruul uaisei, e kede meklemalt a blulak me a otuub el kirel. Kede chemedolii a ngklel a Jehovah er a uldesuir me a rengrir a rechad. Ngdirrek el sebeched loukerebai er a Jehovah, alta ngdiak demecherrungel. (Efe. 5:1, 2) Me a tekinged  me a omerelled sel lolecholt a mera el blekerdelel a Jehovah, e kede olengeseu el chemedolii a ngklel. Kede mesebechakl er a ngklel sel dengesuterir a rechad el mo medengelii a klemerang el kirel. * Kede dirrek el meketeklii el kmo a rediak lemecherrungel el chad a sebechir el lomelemii a blakerreng er tir.​—Job 27:5.

19. Ngmekera Isaia 63:7 e ngosukid el mo medengelii a moktek er kid sel dolisechakl?

¹⁹ Ka molatk er a lmuut el ta er a tekoi el sebeched el rullii. Sel dolisechakl a tekoi er a Biblia el mora rechad, e kede blechoel melisiich er a omengederederel a Jehovah, el kmo ngii a ngar ngii a llemeltel el mengedereder er a eanged me a chutem. Me alta ngklou a ultutelel a dolisechakl a llechul a Dios, engdi a moktek er kid a ngosuterir el mo betik a rengrir er a Jehovah el Demad e mo oba blakerreng el mo er ngii. Me ngkired el melisiich a klebokel el blekerdelel, lolecholt el kmo ngua ngera el Dios a Jehovah. (Monguiu er a Isaia 63:7.) Sel dolisechakl el uaisei, e kede ngosuterir el mo betik a rengrir er a Jehovah e mo olengesenges er ngii e le tir el sorir el oba blakerreng el mo er ngii.

20. Ngera bo dosaod er a ongingil el suobel?

²⁰ Ngmekera doterekeklii el kmo a omerelled me a osisechekled a mo ngosuterir a rechad el melatk a ungil tekoi el kirel a Jehovah e molekeed er tir er ngii sel lerengesii a ngklel? A ongingil suobel a mo mesaod er tia el ker.