1-2. (a) Ngera ngmle kirir el meruul er ngii a retedei el apostol er a Jesus, me ngera te mirruul er ngii? (b) Ngera kede mo mesaod er tia el suobel?

URIUL er a Baskua er a 32 C.E., e a apostol Petrus, Jakobus, me a Johanes a milsa mengasireng el ues. Ngar er a kmal kedidai el rois el locha tedebechel a Rois Hermon e te milsa Jesus el mengodech a teletelel. “A medal a mlo medidiich el ua sils ma bilel a mlo medidiich a chellelengel.” (Mt. 17:1-4) Ngar er a ulebengelel tia el ues e tirka el apostol a rirengesii a Dios el melekoi el kmo: “Ngika betik er a renguk el Ngelekek el odeuir a renguk me morrenges er ngii!” (Mt. 17:5) Tirka el tedei a ulechotii loeak a klengar er tir el kmo te mera el ullerrenges er a Jesus. Ngkmal soad el oukerebai er tir.

² Ngar sel uleak uchei el suobel e kede silubii el kmo a dorrenges er a ngerel a Jesus e ngbelkul a kmo ngngar ngii a tekoi el kired el mo diak doruul. Ngar tia el suobel e kede mo mesaod a eru el tekoi el Jesus a dilu el kmo ngkired el meruul.

3. A doltirakl er a Mateus 7:13, 14, e ngngera kired el meruul er ngii?

³ Monguiu er a Mateus 7:13, 14. Mutebengii el kmo a Jesus a milsaod el kirel a teblo el siseball el mora kakerous el rael. A ta er ngii a “meteu” me a tang “obutek.” Ngkmal diak a ongedei el rael. Me ngkired el di kid el melilt el kmo ngngera  el rael a bo doeak ngii. Tiakid sel kot el klou a ultutelel el omelilt el kired el meruul er ngii e le klengar er kid el diak a ulebengelel a ultuil er ngii.

4. Ngmekera omosaod er a “meteu” el rael?

⁴ Ngkmal kired el melatk er a klekakerous er aika el eru el rael. Sel “meteu” el rael a kmal betok a rechad el merael er ngii e le ngbeot a dorael er ngii. Ngklengiterreng e le rebetok a melilt el di melemolem el merael er tia el rael e oltirakl aike el loruul a ruumesingd el chad. Te kmal diak lutebengii el kmo a Satan a ngike el meruul er a rechad el mo merael er tia el rael, el ngii a rael el mora kodall.​—1 Ko. 6:9, 10; 1 Jn. 5:19.

5. Ngera el tekoi a bla loruul a rebebil el mo metik e merael er a “obutek” el rael?

⁵ Sel “obutek” el rael a diak el uai a “meteu” el rael e le Jesus a dilu el kmo te di kesai el chad a metik er ngii. E ngera uchul? Ngar sel loeak uriul bades e a Jesus a dilu er a rultirakl er ngii el mo mengkar er tir er a rediak lemera el profet. (Mt. 7:15) Te kmo ngngar ngii a betok el telael el klechelid e a oumesingd er aika el klechelid a kmo te olisechakl er a klemerang. A rebetok el miliol el chad a mla mo diak el sorir me a lechub e ngrrau a rengrir me te mla mo diak lolasem losiik er a rael el mora klengar. Me nguaisei engdi ngmera el sebeched el metik er tia el rael. A Jesus a dilu el kmo: “A lsekum kom mo oltirakl osisecheklek, e kom meral obengkek; me kom mo medengelii a klemerang, ma klemerang a ngubetemiu el mo diak msibai.” (Jn. 8:31, 32) Aki kmal chotengau le ngdimlak bo moltirakl er a rechad e bai ulsiik er a klemerang. Kulemuchel mesuub e merriter er a Tekingel a Dios el mo medengei aike el soal a doruul e ullengesenges a osisecheklel a Jesus. Ke silubii el kmo a Jehovah mengerechir er kid el mo oltngakl a klsuul el osisechakl e mo diak doruul aike el chedaol sils el mengai a uchetemel er a klsuul osisechakl. Ke dirrek el mlo mtebengii el kmo ngdiak lebeot omoruul er a soal a Jehovah e mongoit aika el tekoi el diak el soal. (Mt. 10:34-36) Nglocha mle meringel er kau a meruul aika el omelodech. Me nguaisei engdi ke millemolem el melasem e le ngbetik a rengum er a Demam el ngar er a eanged e kmal soam el nguu a kengei er ngii. Nglocha kmal dmeu a rengul lomes er kau el meruul uaisei!​—Osi. 27:11.

6. A doltirakl er a Psalm 119:9, 10, 45, 133, e ngngera ngosukid el melemolem el merael er a obutek el rael?

⁶ Kede mla metik er a obutek el rael, me ngera sebeched el meruul el melemolem el merael er ngii? Molatk er tia el okesiu. A rail er a rael a omekerreu er a chad el omekall me a mlai el merael er a tkul a rois. Tia el rail a omekerreu er a rechad me ngdiak lerebet er a deliobech. Ngkmal diak a mo oumondai er a uchul me te meruul aika el rail. A omellach er a Jehovah el debetik er a Biblia a sebeched lomekesiu er ngii er aika el rail. Ngngosukid el melemolem el merael er a obutek el rael.​—Monguiu er a Psalm 119:9, 10, 45, 133.

7. A rengeasek ngungil a bo leua ngera osengir el kirel a obutek el rael?

⁷ Kemiu el ngeasek, ko mo omdasu a lebebil er a taem el kmo a llechul a Jehovah a bongai er kemiu? A Satan a kmal soal obo momdasu el uaisei. Ngkmal soal obo molatk aike el loruul tirke el ngar er a meteu el rael, el tir a kora kmal oldeu a rengrir er a klengar. Ngsebechel lousbech aike el loruul a rengalek er a skuul me a lechub aike el momes er a Internet el rullau el mo omdasu el kmo ke kmal miss out a fun. A Satan a kmal soal obo momdasu  el kmo a llechul a Jehovah a uchul e ngdiak el sebechem loldeu a rengum er a klengar er kau. * Engdi lak mobes er tiang: A Satan a diak el soal tirke el merael er a meteu el rael a bo lodengelii a ulebengelel tia el rael. Me nguaisei engdi a Jehovah a mla ouchais el kmo a ungil klengar a mengiil er kid er a ulebengelel a obutek el rael.​—Psa. 37:29; Isa. 35:5, 6; 65:21-23.

8. Ngera sebechir a rengeasek el suub er a Olaf?

⁸ Molatk aike el sebechem el suub er a odam el Olaf. * A rengalek el ledak el skuul a ullerrimel er ngii el mo meruul er a deleboes. Sera lesodii el mo er tir el kmo a Resioning er a Jehovah a kiei el oltirakl aike el lolekoi a Biblia, e a rebebil redil er a class er ngii a liluut el kmal mo meringel el muri er ngii el mo bad el obengterir. Me nguaisei a Olaf a mle mesisiich el dechor el kirel a llemalt. Engdi ngdiak di le tiakid a blo lechebengelii.  A Olaf a kmo: “A resensei er ngak a ulerrimel er ngak el mora ngarbab el skuul e le sel kuruul uaisei e a rechad a mo olecholt a omengull er ngak. Te dilu el kmo a lsekum e ngdiak bong e ngkmal diak bo lungil a klengar er ngak.” Ngera ngilsuir a Olaf el mo mesisiich er tia el orrimel? Ngdmu el kmo: “Ak milekurulii a kmes el deleuill er ngak me a rechad er a ongdibel er ngak. Tirka mlo telungalek er ngak. Ak dirrek el kmal mlo blak a renguk el mesuub er a Biblia. Sera lorael el mo dmolech a klemedengei er ngak e ngmlengal mo ulterekokl a renguk el kmo tia klemerang. Ngrirellak el mo soak el mesiou er a Jehovah.”

9. Ngera kirir el meruul er ngii tirke el sorir el melemolem el merael er a obutek el rael?

⁹ A Satan a kmal soal obo lak morael er a rael el mora klengar. Ngsoal obo mteloi er a ruumesingd el chad el tir a ngar er a meteu el rael “el mor a tellemall.” (Mt. 7:13) Me nguaisei engdi kede mo melemolem el merael er a rael el mora klengar a lsekum e kede mo orrenges er a Jesus e dirrek el kired el mo omes er tia el rael el kmo ngomekerreu er kid. Chelecha e me dosaod er a lmuut el ta er a tekoi el Jesus a dilu el kmo ngkired el meruul er ngii.

10. A doltirakl er a Mateus 5:23, 24 e a Jesus ngdilu el kmo ngngera kired el meruul er ngii?

¹⁰ Monguiu er a Mateus 5:23, 24. A Jesus a milsaod er a tekoi el kmal klou a ultutelel er a Rechijudea el ulerrenges er ngii. Molatk er a chad el ngar er a templo el mocha omsa prist a charm el tengetengel. A lsekum e ngngar tiakid el taem e nglotkii el kmo a odam er ngii a mla er ngii a kngtil a rengul er ngii e ngmle kirel mecherei a tengetengel er medal a olengetongel. E ngera uchul? Ngngera mle lmuut el klou a ultutelel er a oldars a tenget el mora Jehovah? A Jesus a dilu el kmo: “Mereched el mo rullii a delongelem kau ma odam er kau.”

11. Msodii a rolel e a Jakob a ulemudech er a delongelel ngii me a Esau.

¹¹ Ngkmal sebeched el ngmai a klubeled er a Jakob el kirel omeruul el budech. A Jakob a mle dibus er a belual el bekord el 20 el rak e a Dios a dmu er ngii loeak a anghel el kmo lluut el mo remei. (Gen. 31:11, 13, 38) Me nguaisei engdi ngmla er ngii a mondai. A obekul er a Esau a mle soal lomekoad er ngii. (Gen. 27:41) A Jakob a “kmal mlo medakt me ng mlo ouedikel a rengul” el kmo a obekul a dirk olab a kngtil a rengul bedul ngii. (Gen. 32:7) Me ngngera ngmirruul er ngii a Jakob el meruul er a budech? A kot e ngkmal mle blak a rengul el meluluuch el mora Jehovah el kirel. Ngmlo merek e odurokl a kmal betok el sengk el mora Esau. (Gen. 32:9-15) E sera bo lekasoues ngii me a obekul e ngkmal mle kullii a Esau. Ngika dimlak losus er ngii el ta me a lechub e ngeru el taem e ngbai ulsus er ngii el euid el taem! A Jakob el ulechotii a klengariourreng e kullii a Esau a uchul me ngrirellii a budech er a delongelir.​—Gen. 33:3, 4.

12. Ngera kede suubii er a kerebil a Jakob?

¹² Kede ngmai a klubeled er a rolel e a Jakob a kiltmeklii el mo omes er a obekul me a dirrek el rolel er a longedecheduch er ngii. A Jakob a kmal ullengit er a ngelsuil a Jehovah. E uluureor loltirakl er a nglunguchel er a lebora tkurrebab el sebechel el meruul er a budech. Sera bo lekasoues e ngdimlak losaod el kmo ngngii a melemalt e a Esau a cheleuid. A moktek er a Jakob a mlo meruul er a budech. Kede mekera e oukerebai er ngii?

13-14. Ngera kired el meruul er ngii a lsekum kede tomellii a rengul a odam me a lechub e ngodos er kid?

¹³ Kid el merael er tia el rael el mora klengar a kmal kired el mo melisiich er a budech er a delongeled kid me a rudam me a rudos. (Rom 12:18) Ngera kired el meruul er ngii a lsekum e kede mtebengii el kmo kede mla tomellii a rengul a odam me a lechub e ngodos? Ngsoad el mo uai a Jakob el kmal milluluuch el mora Jehovah. Ngsebeched lolengit er ngii me lengesukid el omudech er a delongeled kid me a odam er kid.

¹⁴ Ngdirrek el kired el mengoit a taem el merriter er kid. Ngsebeched el di kid loker: ‘Ngak ak kongei el nguu a renguk el moriou e olengit er a klausubes e rullii a budech? Ngmo uangera uldesuel a Jehovah me a Jesus sel lomes er ngak el melasem el meruul er a budech lobengkel a odam me a lechub e ngodos er ngak?’ A nger er kid er aika el ker a sebechel odbechid el mo orrenges er a Jesus e nguu a rengud el moriou e mo rullii a budech. Sel doruul el uaisei e kede oukerebai er a Jakob.

15. Ngmekera ngosukid el mo meruul er a budech sel doltaut er a omellach er a Efesus 4:2, 3?

¹⁵ Molatk er a tekoi el locha dilubech a lsekum a Jakob a dimlak le boriou a rengul el mengedecheduch er a obekul. Nglocha kmal mo klou a tellemall. Me sel debora odam er kid el mo meruul er a delongeled e ngkmal kired el mo ngariou a rengud. (Monguiu er a Efesus 4:2, 3.) A Osisechakl 18:19 a melekoi el kmo: “Mngesuir a ta er kau e ng mo sobecheklau el ua mesisiich el cheuotelel a beluu, ngdi cho moutoketok er ngii e ng chosimer a chesmerel el kirem.” A bo lengariou a rengud el olengit a klausubes e ngsebechel ngosuir el mo meruul er a budech lobengked.

16. Ngera kired el melatk er ngii, e ngera uchul?

¹⁶ Ngdirrek el kmal kired el mo ungil lmatk a tekinged me a dirrek el rolel a bo dongedecheduch er a chad. Sel bo dekltmokl el mengedecheduch er ngii e dongedecheduch el moktek er kid a lmuut el meruul er a deleuill er kid me ngii el mo ungil. Nglocha mo dmu er kid a diak lungil tekoi er a uchelel. Me ngkmal sebechel mo beot er kid a ngmasech a rengud me a lechub e kede mo melasem lomeklemalt er kid. Engdi omomdasu aikang ngmo uchul a budech? Ngkmal diak. Lak mobes el kmo a omeruul el budech a lmuut el klou a ultutelel er a mo medengei el kmo ngtecha ngike el mlo mekngit.​—1 Ko. 6:7.

17. Ngera sebechem el suub er a Gilbert?

 ¹⁷ A odam el Gilbert a kmal millasem el mo chad er omeruul el budech. Ngmelekoi el kmo: “Ngkmal mle betok a mondai er ngak me a ngelekek el redil. Ngmle betok er a eru el rak el kulasem el budech e mengedecheduch er ngii e meruul er a deleuill er kemam el lmuut el mo ungil.” Ngera ngdirrek el mirruul er ngii a Gilbert? Ngkmo: “A uchei er a kungedecheduch er ngii e ak blechoel el meluluuch e dirrek el mengedecheduch er a renguk el kmo lak lengasech a renguk sel ledu mekngit er ngak. Ngmle kirek el mo kltmokl lousubes. Ak silubii el kmo ngkmal diak el kirek el melasem lomeklemalt er ngak ngbai a moktek er ngak a kirek el melisiich er a budech.” Me ngngera dilubech? A Gilbert a kmo: “Ngkmal budech a renguk er chelecha el taem le ngkmal lungil a deleuill er ngak me a rokui el chedal a telungalek er ngak.”

18-19. A lsekum e kede tomellii a rengul a chad, e ngkired el mekerang? E ngera uchul?

¹⁸ Ngera kirem el rullii er a rengum el mo meruul er ngii a lsekum e ke mtebengii el kmo ke mla tomelii a rengul a odam me a lechub e ngodos er kau? Morrenges er a Jesus e bo mrellii a budech. Moluluuch el mora Jehovah el kirel e multuil er a chedaol reng er ngii el mo ngosukau el rullii a budech. Sel moruul el uaisei e ngkmal mo dmeu a rengum me kau a ochotii el kmo ke orrenges er a Jesus.​—Mt. 5:9.

¹⁹ Kede kmal loba omereng el saul le Jehovah meskid a ulekrael lokiu a “bdelul a eklesia” el Jesus Kristus. (Efe. 5:23, BT) Mrellii er a rengum el mo ‘orrenges er ngii’ el ua apostol Petrus, Jakobus, me a Johanes. (Mt. 17:5) Kede mla suubii a rolel a doruul el uaisei loeak sel domudech er a delongeled kid me ngike el detilemellii a rengul. Sel bo doruul el uaisei e dolemolem el merael er a obutek el rael el mora klengar e kede mo ngmai a betok el klengeltengat er chelechang me a diak a ulebengelel el klengeltengat er a ngar medad.