1-2. Ngera kede mo mesaod er tia el suobel?

A LEBEBIL er a taem e kede locha mo melatk el kmo a klengar er kid a kmal kedeb e “betok a ringelel.” (Job 14:1) Sei a uchul me ngar ngii a taem el bo lemechitechut a rengud. A rebetok el mesiungel a Jehovah er a irechar me te dirrek el mlo mechitechut a rengrir. A rebebil er tir a uluureng el mad. (1 Ki. 19:2-4; Job 3:1-3, 11; 7:15, 16) Me nguaisei engdi a Jehovah el Dios el luluumerang er ngii a mle blechoel el olterekokl a rengrir e olengeseu er tir. A tekoi el dilubech el mo er tir a melluches me bo el sebechel mengelaod e olisechakl er kid.​—Rom 15:4.

² Ngar tia el suobel e kede mo mesaod er a rebebil mesiungel a Jehovah el tir uluutekangel a omelsemai el mle uchul e ngmlo mechitechut a rengrir, el Josef el ngelekel a Jakob, melakl el dil el Naomi me a buchelsechal er ngii er a Ruth, ta er a Levait el milluches er a Psalm 73, me a apostol Petrus. Ngmilekera Jehovah e millisiich er tir? Ngera sebeched el suub er a kerebai er tir? A nger er aikang a olterekokl a rengud el kmo a “Jehovah a kmeed er tirke el chelam a rengrir” e ‘olsobel er tirke el mechitechut a rengrir.’​—Psa. 34:18, NW, ftn.

3-4. Ngera dilubech el mora Josef er a lekekerei el chad?

³ A Josef a mle bekord el 17 a rekil er a lengai a eru el berrous el mlara Dios. Aika el berrous a ulechotii el kmo a ta er a klebesei e ngmo klou a ultutelel el chad, el telungalek er ngii a mo mengull er ngii. (Gen. 37:5-10) Engdi kedeb el taem er uriul e ngklou a mlengodech er a klengar er ngii. A rubekul a dimlak lolecholt omengull el mo er ngii te bai ulterur el mo sibai. Ngmlo  sibai er a blil a ta er a ofiser er a Ekipten el Potifar. (Gen. 37:21-28) Chelsel a kedeb el taem e a Josef el kmal mle betik er a rengul a demal, a mlo sibil a ta er a ofiser er a Ekipten.​—Gen. 39:1.

⁴ Ngliluut el kmal mo meringel a klengar er ngii. A bechil a Potifar a ultelecheklii el kmo ngmillasem el olterebek er ngii. A Potifar a dimlak le siraber er tia el tekoi e chosmerii a Josef er a kelebus, me te lilecha deel el meliuekl er a chiklel. (Gen. 39:14-20; Psa. 105:17, 18) Ka di molatk er a uldesuel a Josef er a lotelecheklii el kmo ngmillasem el olterebek. E molatk er a otuub el mle sebechel mora ngklel a Jehovah. Me ngmera el mla er ngii a ungil luchul me ngmlo mechitechut a rengul!

5. Ngmilekera Josef me lak bo lemechitechut er a chelitechetul a rengul?

⁵ Me a Josef er a bo lesibai e lemekelebus e ngdimlak a klisichel er aika el tekoi el dilubech el mo er ngii. Ngera ngilsuir me ngmelemolem el ungil a uldesuel? Ngdimlak lultaut a osengel er aike el diak el sebechel meruul, ngbai mle blak a rengul er aike el ureor el mloterekokl er ngii. A ngaruchei er ngii, ngulemes er a Jehovah el kot el klou a ultutelel el Chad er a klengar er ngii. Me a Jehovah ulemekngeltengat a rokui el tekoi el lurruul.​—Gen. 39:21-23.

6. Ngmilekera berrusel a Josef e millisiich er ngii?

⁶ A Josef a locha dirrek el ngilai a omelisiich er a lolatk aike el berrusel el mlara Dios. Aikang a ullecholt el kmo nglmuut el mo mesa telungalek er ngii e mo ungil a klengar er ngii. E tia mera el mlo uaisei. Sera lebekord el 37 a rekil, e aika el berrusel a tilaut er a mengasireng el rolel!​—Gen. 37:7, 9, 10; 42:6, 9.

7. A doltirakl er a 1 Petrus 5:10, e ngera mo ngosukid el outekangel a omelsemai?

⁷ Klubeled. Kede muklatk el kmo tia mekngit el beluulechad el dekiei er ngii me a rechad a diak lebo el melemalt a omerellir el bedul kid. A kldemed er a klaumerang me ngsebechel tomellii a rengud. Engdi a bo domes er a Jehovah el Risois er kid e Cheuoteled, e ngmo  smisichid sel bo el mechitechut a rengud e diak bo demeterob el mesiou er ngii. (Psa. 62:6, 7; monguiu er a 1 Petrus 5:10.) Mdirrek el melatk el kmo a Josef a mle bekord el 17 a rekil er sel taem el Jehovah milsang aike el berrous. Me a Jehovah a oumerang er a rengeasek el mesiungel. Chelecha el taem, e te betok el ngeasek a di ua Josef, el oumerang er a Jehovah. A rebebil er tir a mlekelebus e le tir el melemolem er a blakerreng er tir el mora Dios.​—Psa. 110:3.

8. Ngera dilubech el mora Naomi me a Ruth?

⁸ A Naomi me a telungalek er ngii a tilobed er a Juda e mlo kiei er a Moab, e le ngmle klou a bosech er a beluu. Ngar isei e a bechil er a Elimelek a mlad me ngdi mlo ngii me a reteru el ngelekel el sechal. Cherengel a taem, e tirka el ngelekel a mlo becherir a redil er a Moab el Ruth me a Orpa. A bekord el teruich el rak er uriul, e a rengelekel a Naomi a mlad el dimlak a ngelekir. (Rut. 1:1-5) Molatk er a kngtil a rengrir tirka el tedei el dil! Me nguaisei, el Ruth me a Orpa a mle sebechir el lmuut el mo bechiil, engdi ngtecha mo omekerreu er a chudela el Naomi? A Naomi a kmal mlo mechitechut a rengul me a ta el taem e ngdilu el kmo: “Lak moleker er ngak el kmo Naomi, e moleker er ngak el kmo Mara, el ngikel telirm a rengul, ele Dios el Olab a Bek el Klisiich a kmal mlo meringel a tekingel el mer ngak.” Me a chelam a rengul el Naomi a liluut el mora Bethlehem, e a Ruth a ulebengkel.​—Rut. 1:7, 18-20.

9. A doltirakl er a Ruth 1:16, 17, 22, e ngmilekera Ruth e melisiich er a Naomi?

⁹ A diak lemengodech el bltikerreng a ngilsuir a Naomi. El ua tiang, a Ruth a ulecholt er a diak lemengodech el bltikerreng el mo er ngii e millemolem el obengkel. (Monguiu er a Ruth 1:16, 17, 22.) Ngar er a Bethlehem, e a Ruth a mle meringel el oureor el mengudel a grain el kelel ngii me a Naomi. Tia uchul me ngmlo ungil chisel er a rechad er a beluu.​—Rut. 3:11; 4:15.

10. Ngoeak a ngera el rolel e a Jehovah ulecholt a bltikerreng el mora remechebuul el ua Naomi me a Ruth?

¹⁰ A Jehovah milsterir a rechad er a Israel a llach el ulechotii a klechubechub er ngii el mora remechebuul el ua Naomi me a Ruth. Ngdilu er a rechedal el kmo sel bo loridm a rodech, e te mechei aike el ngar er a tkul a sers el kirir a remechebuul. (Lev. 19:9, 10) Me a Naomi me a Ruth a dimlak bo lolengetngit a kall. Ngbai mle sebechir el metik a kelir el ngar er a ungilbesul rolel.

11-12. Ngmilekera Boas e rullii a Naomi me a Ruth el mo dmeu a rengrir?

¹¹ Sel sers el blo longudel a grain er ngii a Ruth a mle sersel a merau el chad el Boas. A blakerreng me a bltikerreng el lullecholt er ngii a Ruth el mora Naomi a kmal riretechii a rengul a Boas me ngmilecherar a chetemel a telungalek er tir e ngiluu a Ruth el mo bechil. (Rut. 4:9-13) Tirka el obekel a mlo er ngii a ngelekir el Obed. Ngika mlo demal a demal a King David.​—Rut. 4:17.

¹² Molatk er a deuil a rengul a Naomi er a longuoku er a Obed e loluluuch loureng a sulel a Jehovah! Engdi ngar ngii a lmuut el ungil tekoi el medechel el kirel a Naomi me a Ruth. Sel lebekiis e te mo medengei el kmo, a Obed a ta er a ruchelel a Mesias el Jesus Kristus!

13. Ngera el meklou a ultutelel tekoi a sebeched el suub er a cheldechedechal a Naomi me a Ruth?

¹³ Klubeled. Sel bo dechelebangel a omelsemai, e nglocha mo mechitechut a rengud e mo chelam a rengud. Kede locha mo omdasu el kmo ngdiak a smecheklel a mondai er kid. Ngar chouaika el taem, e ngkired el mo mui lultuil er a Demad el ngar er a eanged e melemolem el kmeed er a rekldemed er a klaumerang. Nguaisei el Jehovah a diak bo longeroid er a omelsemai.  El ua tiang, ngdimlak lolekiis er a bechil me a rengelekel a Naomi. Me nguaisei engdi ngmo ngosukid el outekangel, el locha oeak a diak lemengodech el bltkil a rengrir a telungalek er kid er a klereng.​—Osi. 17:17.

14. Ngera me a ta er a Levait a kmal mlo mechitechut a rengul?

¹⁴ Ngike el milluches er a Psalm 73 a ta er a Levait. Me ngmla er ngii a ileakl el techellel el mesiou er a blil a omengull el mora Jehovah. Me nguaisei engdi a ta el taem e ngkmal mlo mechitechut a rengul. E ngera uchul? Ngmlo mechechei er a remekngit me a remekedidai a rengrir el diak el mekngit el omerellir a uchul e ngbai tir el ua ble lungilbesul a klengar er tir. (Psa. 73:2-9, 11-14) Ngmla er ngii a rokui er tir, el iltetir, ungil klengar, e diak a sebekreng er tir. Tia rirellii el kmal mo mechitechut a rengul me ngdilu el kmo: “A le ua isei, e ng kol di dimlak a belkul el kulengeroid er ngak er a klengit, ma chimak le klikiid er a klengit?” Me tia mle sebechel mo uchul e ngmo diak losiou er a Jehovah.

15. A doltirakl er a Psalm 73:16-19, 22-25, e ngmilekera Levait el milluches er tia el psalm e mlo mesisiich er a chelitechetul a rengul?

¹⁵ Monguiu er a Psalm 73:16-19, 22-25. Ngika el Levait a ‘mlor a Templo’ er a Dios. Ngar er a delongelir a rekldemel el mengull er a Dios, e ngmlo sebechel el chelellakl e omtab e meluluuch el kirel tia el tekoi. Seikid e ngmlo sebechel mtebengii el kmo a uldesuel a dimlak el melemalt e tia el uldasu a mo uchul e ngoridii a deleongel er ngii me a Jehovah. Ngdirrek el miltebengii el kmo a remekngit a ngar er a “bekititerachel” e mora “kdekudel el ulebengelir.” Me ngmle kirel mo oba uldesuel a Jehovah me bo lsebechel mo mesisiich er a chelitechetul a rengul me a chelechei. Sera loruul uaisei, e ngmlo budech a uldesuel e dmeu a rengul. Ngdilu el kmo: “Me chelechal mngar ngii er ngak [e Jehovah], e ng ngera ngodech el soak el ngar a chutem?”

16. Ngera sebeched el suub er a ta er a Levait?

¹⁶ Klubeled. Ngkmal diak el kired el mo mechechei er a remekngit el chad el kora ua lungilbesul a klengar er tir. A deurreng er tir a diak lemera el deurreng e di tedeb, me tir a diak bo  el kiei el mo cherechar. (Oli. 8:12, 13) A bo demechechei er tir e ngmo mechitechut a rengud e metemall a deleuill er kid me a Jehovah. Me a lsekum ke omelechesiu er kau el mechechei er a remekngit e bo moruul er a lurruul er ngii ngika el Levait. Molengesenges er a ulekrael er a Dios el mo obengterir tirke el meruul a soal. Sel bo lebetik a rengum er a Jehovah el kuk ngaruchei er a ngii di el tekoi, e ke mo metik er a mera el deurreng. E mo sebechem el melemolem el merael er a rael el mora “meral klengar.”​—1 Ti. 6:19.

17. Ngera bebil uchul me a Petrus a mlo mechitechut a rengul?

¹⁷ A Petrus a mle meklekilt me nguaisei engdi ngdirrek el mle blekerdelel diak lomdasu e mereched el dmu tekingel. Sei a uchul me a lebebil e ngriruul me a lechub e ngdilu tekoi el blo louuchel er a rengul el kirel. El ua tiang, a Jesus er a ledu er a rechapostol er ngii el kmo ngmo chuarm e mad, e a Petrus a mle meringel el melekoi er ngii el kmo: “Tia diak le kirel el ekor kau!” (Mt. 16:21-23) Me a Jesus a ulemeklemalt er a Petrus. Sel taem el seked a mlo melai er a Jesus el mo kelebus, e a Petrus a di mle mereched el meruul a tekoi e diak lomdasu el luchul me ngkilemdii a dingal a sibil a ngarbab el prist. (Jn. 18:10, 11) Me a Jesus a liluut el omeklemalt er ngii. A Petrus a dirrek el uluumead er ngii el melekoi el kmo, a lsekum tirke el bebil er a rechapostol a choitii a Kristus, engdi ngii a kmal diak bo loruul uaisei! (Mt. 26:33) Engdi tia el kldidiul a rengul a mlo uchul a dektel er a rechad, me nguluumededenger er a Mastang er ngii el edei el taem. Tia kmal chiltechetur a rengul me “ng tilobed e kmal lilangel.” (Mt. 26:69-75) Nglocha millatk el kmo, a Jesus ngsebechel el ousubes er ngii.

18. Ngmilekera Jesus e ngosuir a Petrus el mo mesisiich er a chelitechetul a rengul?

¹⁸ Me nguaisei engdi Petrus a dimlak lekengei el meieleb er a chelitechetul a rengul. Ngmilsibas engdi ngliluut el mo mesisiich me a uriul e kede metik er ngii el obengterir tirke el bebil er  a rechapostol. (Jn. 21:1-3; Rel. 1:15, 16) Ngera ngilsuir el lmuut el mo mesisiich? Ngdimlak lobes el kmo a Jesus a milluluuch el kirel er a uchei me lak bo lemechitechut a klaumerang er ngii, e milengelechel er ngii el lmuut el mei e lolisiich er a rudam er ngii. Me a Jehovah ulenger er tia el nglunguuch. E a uriul e a Jesus a mlo duum er a Petrus el mo melisiich er ngii. (Lk. 22:32; 24:33, 34; 1 Ko. 15:5) Ngdirrek el mlo duum er a rokui el apostol er a lengar er a chei el ta el kesus e dimlak a chelderir. Tiaikid el taem e a Jesus a milsa techellel a Petrus el mo olterekokl er a bltkil a rengul el mo er ngii. Nguluusubes er ngika el betik er a rengul el sechelil e ulemekngerachel er ngii er a betok el ureor.​—Jn. 21:15-17.

19. Ngmekera Psalm 103:13, 14 e ngosukid el mo oba osengel a Jehovah el kirel a kngtid?

¹⁹ Klubeled. A omerellel a Jesus el mora Petrus a ochotii el kmo ngkmal chubechub, e a Jesus a cherrungel lokesiul a Demal. Me sel deruul a cheleuid, e ngdiak el kired el di kid el oukerrekeriil er kid el kmo ngdiak el sebeched el mo ungil. Lak dobes el kmo a Satan a soal a bo domdasu el uaisei. Me ngbai soad el lomes er kid me tirke el tomall a rengud el oba osengel a Demad el ngar er a eanged, el ngii a chubechub e bltikerreng.​—Monguiu er a Psalm 103:13, 14.

20. Ngera kede mo mesaod er a ongingil el suobel?

²⁰ A tekoi el dilubech el mora Josef, Naomi me a Ruth, ta er a Levait, me a apostol Petrus a olterekokl a rengud el kmo a “Jehovah a kmeed er tirke el chelam a rengrir.” (Psa. 34:18) Ngmechikid me kede mo chelebangel a omelsemai e mo mechitechut a rengud a lebebil er a taem. Me nguaisei engdi a doutekangel loeak a ngelsuil a Jehovah e nglmuut el mo mesisiich a klaumerang er kid. (1 Pe. 1:6, 7) Ngar er a ongingil el suobel, e kede lmuut el mo omes a rolel e a Jehovah olengeseu er tirke el blak a rengrir el mo mechitechut a rengrir, el locha chelitecheterir a uchul me a lechub e ngmeringel el blekeradel.