1. A Jehovah, ngmilebid el ngar er ngii a ngera el duch er kid?

A JEHOVAH a ulemeob er a rechad el ngar er ngii a ileakl el duch er tir. Ngmilebid e meskid a duch er kid el di kid el mesmechokl a mondai er kid er chelecha el taem e dirrek el melatk a tekoi el bo doruul er a uriul. (Osisechakl 2:11) Ngmilskid a klisiched me ngsebeched el meruul a tekoi el dolatk el mo meruul e mo otaut a turrekong er kid. (Filipi 2:13) Ngdirrek el milskid a ukltked el ngii a rullid me ngsebeched el kutukel a mekngit me a ungil. A ukltked a ngosukid me ngsebeched el oibngid er a klengit e dirrek el sumechokl a mlo cheleuid el omerelled.​—Rom 2:15.

2. A Jehovah, ngmengerechir er kid el mo ousbech a duch er kid el mekerang?

² Me a Jehovah a mengerechir er kid el mo ungil el ousbech aika el duch er kid. E ngera uchul? E le ngbetik a rengul er kid e medengei el kmo ngmo dmeu a rengud a lsekum kede ousbech aika el sengk el bla lebeskid. El ua tiang, ngar er aike el Bades el tekoi er a Hebru e kede menguiu el kmo: “Ngikel blak a rengul el omdasu a mo betok a  ngera er ngii,” me a “ngii di le ngerang el bo moruul er ngii, msisichau el rullii.” (Osisechakl 21:5; Olisechakl 9:10) E ngar er aike el Bades el tekoi er a Grik e kede menguiu el kmo: “Sel le bor ngii a techelled, e doruul a ungil el mor a re bek el chad,” me a “ta ma tar kemiu bo lungil el ousbech a ikel le meduch er ngii el tekoi el le ngilai er a Dios, el mo klungiolir a re bek el chad.” (Galatia 6:10; 1 Petrus 4:10) Me ngbleketakl el kmo a Jehovah a soal a doruul aike el sebeched el mo uchul a klungioled kid me a rebebil.

3. Ngera telkelel a duch er a rechad?

³ A Jehovah a soal a dousbech aika el duch er kid, engdi ngmedengei el kmo ngar ngii a telkelel aike el sebeched el remuul. El ua tiang, ngdiak el sebeched el mo diak demecherrungel, e dokngemedii a klengit me a kodall. (1 King 8:46) Ngdirrek el diak el sebeched el omtebechel a klengar er a rechad, e le kede rokui el ngar ngii a llemelted el melilt a tekoi el doruul. Me alta e ngkmal mo klou a klemedengei er kid me a tekoi el dodengei, engdi ngkmal diak el sebeched el mo mekesiur sel klemedengei er a Jehovah.​—Isaia 55:9.

4. Ngera kede mo mesaod er tia el suobel?

⁴ Me ngkired el kongei er a Jehovah me ngomekrael er kid er a bek el taem, e mo oumerang el kmo ngolengeseu er kid e dirrek el mo kutmokl aike el diak el sebeched el remuul. Me nguaisei, engdi Ngii a dirrek el soal a bo doruul aike el sebeched el sumechokl a mondai er kid e ngosuterir a rebebil. (Monguiu er a Psalm 37:3.) Ngkired el mo ‘oumeral ulsirs er a RUBAK e meruul a ungil.’ Me ngmekera doruul er tiang? Me bo dosaod a blekerdelel a Noah me a David me a relmuut el bebil el blak a rengrir el mesiungel a Dios el tir a mle ultuil er Ngii el kirel  a ngeso. Kede mo mtebengii el kmo ngmla er ngii a tekoi el dimlak el sebechir el remuul, engdi te bai di mle blechoel el ultaut a osengir er aike el tekoi el mle sebechir el remuul.

5. Ka msodii a blekeradel el ble lechelebangel er ngii a Noah.

⁵ A Noah a kiliei er a taem el mekngit “a uleberk er a beluulchad el rokir.” (Genesis 6:4, 9-13) Me alta e ngmle medengei el kmo ngmo er ngii a taem e a Jehovah a mo okngemedii tia el mekngit el beluulechad, engdi a Noah a kmal mle chetil el omes aika el mekngit el omerellir a rechad. Me ngar er a chelsel tia el blekeradel e a Noah a mle ungil medengei el kmo ngar er ngii a tekoi el diak el sebechel el remuul, e dirrek el mla er ngii a tekoi el kuk mle sebechel el remuul.

6, 7. (a) Ngera el tekoi a dimlak el sebechel a Noah el remuul? (b) Ngmekera blekeradel el dengar er a chelsel e ua blekeradel er a taem er a Noah?

⁶ A tekoi el dimlak el sebechel a Noah el remuul: A Noah a mle blak a rengul el mengelechel er a rechad er a klemechel a Jehovah, engdi ngdimlak el sebechel el orrimel er tir el mo kongei er tia el tekoi. Ngdirrek el dimlak el sebechel el orechedii a temel a Ieleb. Ngbai mle kirel el ultuil a klaumerang er ngii er a Jehovah el kmo Ngmo otutii a telbilel el mo okngemedii a chelebirukel, e dirrek el oumerang el kmo Ngmo kutmeklii er sel ulterekokl el temel.​—Genesis 6:17.

⁷ Kid me kede dirrek el kiei er a chelsel a beluulechad el mui er a chelebirukel, el dodengelii el kmo a Jehovah a mla tibir el mo okngemedii. (1 Johanes 2:17) Engdi ngkmal diak el sebeched el orrimel er a rechad el mo kongei er  “tial Ebangkelio el kirel ngii el Renged.” E dirrek el diak el sebeched el orechedii a temel a “chelebuul.” (Mateus 24:14, 21) Me kede di ua Noah el kirel el mo mesisiich a klaumerang er kid, e mo oumerang el kmo ngkmal di kmedung e a Dios a mo okngemedii a chelebirukel. (Psalm 37:10, 11) Ngulterekokl a rengud el kmo a Jehovah a kmal diak lekengei a chelebirukel er tia el beluulechad me lolemolem el engelakl er a ta el sils er sel telutk el temel.​—Habakuk 2:3.

8. A Noah, ngmle blak a rengul el meruul er a ngerang? (Momes er a siasing er a uchelel a suobel.)

⁸ A tekoi el mle sebechel a Noah el remuul: A Noah a dimlak bo lemechitechut a rengul el kirel aike el tekoi el dimlak el sebechel el remuul, e ngbai mle ultaut a osengel er aike el mle sebechel el remuul. Ngmle blak a rengul el mengelechel er a rechad el oba klemechel a Jehovah. (2 Petrus 2:5) Me tia el ureor a ulterekokl el ngilsuir me ngmelemolem el melisiich er a klaumerang er ngii. Uldimukl er tia el berkel a klumech el lurruul er ngii, e ngmle blak a rengul el oltirakl a ulekrael er a Jehovah er a loleketek er a arhe.​—Monguiu er a Hebru 11:7.

9. Ngmekera doukerebai er a Noah?

⁹ Me kid a di ua Noah el kmal mechesang el “oureor el kirel a Rubak.” (1 Korinth 15:58) El ua tiang, kede teloi a oureor el ua okedecherul me a omengetmeklel a Blil a Ongdibel me aike el meklou el Blil a Ongdibel, e tonget a temed el oureor el kirel a meklou el ongdibel, me a lechub e kede oureor er aike el obis er a Resioning er a Jehovah me a lechub e ngike el obis er a ruliuid a babier. E sel kot el ngaruchei e kede kmal mechesang el omerk er a klumech, el ngii a melisiich er a omeltked el kirel a ngar medad el klebesei. A ta el blak a rengul el odos a mesaod er sel taem el louchais er a rebebil el kirel aike el klengeltengat el mei el okiu a Rengedel a Dios el kmo, ngmlo mtebengii el kmo a rechad a mera el diak a omeltkir, e dirrek el omes a mondai er tir el kmo ngdiak bo lak. Me kid a di ua uldesuel ngika el odos e le ngar er ngii a omeltked, e tiang a mengal mo mesisiich er a cherengel a taem el douchais er a rebebil el kirel. Me tia el omelatk a ngosukid me kede melemolem el mengaidesachel el kirel a klengar!​—1 Korinth 9:24.

10. Ka msodii a blekeradel el lechilebangel er ngii a David.

¹⁰ A King el David a mle blak a rengul el chad, e a Jehovah a kmal mle betik a rengul er ngii. (Rellir 13:22) Engdi ngmlo bad el obengkel a Bathseba, e tiang a kmal mle oberaod el klengit. Ngdirrek el rirellii a lmuut el oberaod el tekoi er a leketmeklii a rolel e ngmo mekodir a bechil a Bathseba el Uria er a mekemad. Me nglilechesii er a babier e nguu msang me ngulebang el merael! (2 Samuel 11:1-21) Engdi cherengel a taem e aika el kngtil a David a mlo chemolt. (Markus 4:22) Me ngera dilubech? Ngmilekera David?

11, 12. (a) Ngera el tekoi a dimlak el sebechel a David el rullii er a uriul er a lerebet er a klengit? (b) Ngmo mekera Jehovah a lsekum kede ouuchel er a rengud e obult er a kngtid?

¹¹ A tekoi el dimlak el sebechel a David el remuul: A David a dimlak el sebechel el oluut aike el tekoi el bla letemall. Ngbai mlo chelebangel a ringel er a chelsel a klengar er ngii el mekngit el omerellel a uchul. (2 Samuel 12:10- 12, 14) Me ngmle kirel el melisiich er a klaumerang er ngii. Ngmle kirel el mo ultuil a klaumerang er ngii er a Jehovah e mera el ouuchel er a rengul, me bo el sebechel a Jehovah el ousubes er ngii e lengesuir el mo outekangel a ringel el omerellel a uchul.

¹² Me kid el diak demecherrungel a uchul me kede rokui el mo er a klengit. Engdi a bebil el klengit a lmuut el oberaod er a kuk bebil. E a lebebil e ngmo meringel er kid el oluut a cheleuid el tekoi el deriruul. Me seikid e kede dirrek el mo chuarm el mekngit el omerelled a uchul. (Galatia 6:7) Engdi kede oumerang er a telbilel a Dios el kmo a lsekum kede ouuchel er a rengud e obult er a mekngit el omerelled e ngmo ngosukid el outekangel a ringel el mo lmuut er a taem el ringel a mo er ngii el kid a mle uchul.​—Monguiu er a Isaia 1:18, 19; Rellir 3:19.

13. Ngmilekera David e sumechii a deleuill er ngii me a Jehovah?

¹³ A tekoi el mle sebechel a David el remuul: A David a mle soal el sumechii a deleuill er ngii me a Jehovah. Me ngmilekerang? Ngkilengei er a Jehovah me ngosuir. El ua tiang, ngkilengei el nguu a osmechokl er a Jehovah el ulekiu a profet el Nathan. (2 Samuel 12:13) Ngdirrek el milluluuch el mo er a Jehovah e uluuchais a rokui el kngtil, e ulechotii el kmo ngkmal mle soal el lmuut el nguu a kengei er Ngii. (Psalm 51:1-17) Ngdimlak bo lemechitechut a rengul, e bai ngiluu a klubelel er a cheleuid el leriruul, e dimlak lluut el mo meruul ngii el klengit. Me ngmle betok el rak el leblak a rengul e mlad er a uriul, engdi Jehovah a dirkak lobes er tia el blakerreng er ngii.​—Hebru 11:32-34.

14. Ngera kede suubii er a blekerdelel a David?

¹⁴ Ngera kede suubii er a blekerdelel a David? A lsekum kede ruebet er a oberaod el klengit, e ngkmal kired el ouuchel er a rengud, e ouchais a kngtid el mo er a Jehovah, e olengit a klausubes er ngii. (1 Johanes 1:9) Ngdirrek el kired el mengedecheduch er a remechuodel er a ongdibel, e le ngsebechir el ngosukid el sumechii a deleuill er kid me a Jehovah. (Monguiu er a Jakobus 5:14-16.) Me sel dekengei er a ngelsuil a Jehovah, e kede ochotii el kmo kede oumerang er sel telbilel el kongei el ousubes er kid. Me a lmuut el tang, ngkired el nguu a klubeled er a cheleuid el durruul e melemolem el mesiou er a Jehovah el ulterekokl a rengud.​—Hebru 12:12, 13.

15. Ngera kede suubii er a blekerdelel a Hana?

¹⁵ Ngsebechem el melatk er a relmuut el bebil el blak a rengrir el mesiungel a Jehovah el ngar er a Biblia, el tir a chilebangel a bebil er a meringel el blekeradel. El ua sel taem el Hana a dimlak el sebechel el mo oungalek. Ngdimlak a ngera el sebechel el rullii el kirel tia el tekoi, engdi nguluumerang el kmo a Jehovah a mo chemolodii. Me ngmillemolem el mo er a templo e mengull e meluluuch el mo er a Jehovah el ouchais aike el ngar er a rengul. (1 Samuel 1:9-11) Ngmera el ungil kerebai el kired! Me sel bo desecher me a lechub e kede mo chelebangel a lmuut el bebil el meringel el blekeradel, e ngungil a debsa Jehovah a sebekreng er kid e bo doumerang el kmo ngmo omekerreu er kid. (1 Petrus 5:6, 7) E mo er a tkurrebab el sebeched el ngmai a klungioled er aike el miting er kid me a lmuut el bebil er a tekoi el cheldebechelel a Jehovah a omeskid.​—Hebru 10:24, 25.

16. Ngera el blekerdelel a Samuel a sebechir a ruungalek el ngmai a klubelir er ngii?

 ¹⁶ E kuk mekerang tirke el blak a rengrir el oungalek el rengelekir a mo diak losiou er a Jehovah? A profet el Samuel a dimlak el sebechel el orrimel er a remeklunga el ngelekel sechal me lolemolem el blak a rengrir el mo er a Dios. (1 Samuel 8:1-3) Ngmle kirel di mechei aika el tekoi me lengar chimal a Jehovah. Me nguaisei, engdi a Samuel a riruul aike el sebechel me lolemolem el blak a rengul e loldeu er a rengul a Demal el ngar er a eanged. (Osisechakl 27:11) Me chelecha el taem, e a rebetok el Kristiano el oungalek a chelebangel er a osisiu el blekeradel. Engdi te di ua ngike el chedam el ngar er a okesiu er a Jesus el kirel a ririid el ngalek, el oumerang el kmo a Jehovah a kmal di kltmokl el mo outkeu er tirke el obult er a kngterir e lmuut el mo er Ngii. (Lukas 15:20) Me te melemolem el blak a rengrir el mo er a Jehovah e oba omelatk el kmo a ungil kerebai er tir a sebechel ngosuterir a rengelekir me te lmuut el mo er a Dios.

17. Ngmekera omerellel ngike el chebuul el melakl dil e melisiich er kid?

¹⁷ Ka di molatk er a ungil blekerdelel ngike el chebuul el melakl dil er a taem er a Jesus. (Monguiu er a Lukas 21:1-4.) Ngdimlak el sebechel el sumechokl a chelebirukel el meketmokl er a chelsel a templo, e dirrek el dimlak a ngera el sebechel el rullii me bo lak el chebuul. (Mateus 21:12, 13) Engdi sel klaumerang er ngii a silsichii me ngmelemolem el olengeseu er a mera el omengull. Me ngmle dmeu a rengul el tonget aike el rokui el mla er ngii er ngii el di mle “teblol sens.” Me tiang a mera el ochotii el kmo ngmle mui el oumerang er a Jehovah. Ngmle ungil medengei el kmo a lsekum ngmo nguu a omesiungel el mo er a Jehovah el mo kot, e ngmo msang aike el rokui el lousbech. Me kede di ua uldesuel el oumerang el kmo a denguu a Rengedel a Dios el mo kot, e a Jehovah a mo meskid aike el rokui el dousbech.​—Mateus 6:33.

18. Msodii a uldesuel a odam el mle tabesul a osengel er a tekoi.

¹⁸ A rebetok el rudam me a rudos er kid er chelechang a olecholt er a osisiu el klaumerang el mo er a Jehovah sel loruul aike el sebechir e lak lomdasu el kirel aike el diak el sebechir el remuul. Ka molatk er a odam el Malcolm, el mle blak a rengul el mo lmuut er a kodellel er a rak er a 2015. Chelsel aike el betok el rak el lulsiou er a Jehovah ngii me a bechil, e ngmla er ngii a deurreng er tir e dirrek el mla er ngii a mekngit el taem er a klengar er tir. Me ngdilu el kmo: “A klengar a kmal diak lulterekokl, ngmo rrau a rengud a lebebil, e mo meringel er kid el outekangel a lebebil er a taem, engdi a Jehovah a omekngeltengat er tirke el ultuil a klaumerang er tir er Ngii.” Me ngera uldesuel a Malcolm? Ngdmu el kmo: “Moluluuch me bo el sebechem el ungil el mesiou er a Jehovah el ngar er a tkurrebab el sebechem. Molatk aike el rokui el sebechem el remuul, e lak momdasu el kirel a tekoi el diak el sebechem el remuul.” *​—Momes er a footnote.

19. (a) Ngera me ngkmal ungil a bades er kid er a rak er a 2017? (b) Ngmekerang a obo moltaut er tia el bades er a rak er a 2017 er a klengar er kau?

¹⁹ Tia el mekngit el beluulechad a di “merael mengal mo mekngit,” me ngdiak lemechas a rengud a lsekum nglmuut el mo meringel a klengar. (2 Timothy 3:1, 13) Me ngkmal klou a ultutelel el bo dongesadel a sebekreng er kid er sel taem el bo lechetituokel a tekoi. Ngbai kirel el lmuut el mo mesisiich a klaumerang er kid er a Jehovah e mo kerekikl el meruul aike el sebeched el remuul. Tiaikid a uchul me a bades er kid er a rak er a 2017 a kmal ungil e le ngdmu el kmo: “Moumeral ulsirs er a RUBAK e moruul a ungil”!​—Psalm 37:3.