1-2. Ngera uchul me kede locha mo feel el kmo a Jehovah a diak longer a nglunguched?

 “MOSIIK er a deuil a rengum el obengkel a RUBAK e ng mo meskau sel msal oureng er ngii.” (Psa. 37:4) Tia mera el lungil telbiil! Engdi kid kede mo expect el kmo, a Jehovah di mereched el mo meskid aike el rokui el dolengit? Ngera uchul me kede mo oker er tia el ker? Ka molatk aika el blekeradel. A mesobil el odos a meluluuch el kmo lesiseb er a Skuul el Kirir a Rumerk er a Rengedel a Dios (SKE). Engdi ngmla mo chuib a rak. Kekerei el odam olengit er a Jehovah me bo lungil er a oberaod el rektel me bo lsebechel meruul a betok er a ongdibel. Engdi ngdirkak bo lungil er a secherel. Roungalek el Kristiano a meluluuch el kirel a ngelekir me lolemolem el ngar er a klemerang. Engdi a ngelekir a ngiltii el mo diak losiou er a Jehovah.

² Kau me ke locha mla olengit er a kmung ngerang er a Jehovah, engdi ngdirkak mnguu. Ke locha omdasu el kmo a Jehovah onger a bebil el nglunguuch engdi nglunguchem a diak. Me a lechub ke mo melatk el kmo ngngar ngii a mekngit el bla mrellii. A odos el Janice b a mle feel el uaisei. Ngii me a bechil a milluluuch el mora Jehovah el kirel a urungulir el mo mesiou el ngar er a Bethel. Ngkmo: “Ngkmal mle ulterekokl a renguk el kmo aki mora Bethel.” Engdi ngmlo melai a buil e mo melai a rak e di diak okedong el mora Bethel. A Janice a kmo: “Ngkmal mlo rrau a renguk e mekngit a renguk. Ak mlo melatk el kmo ngera bla krellii el diak lodeuir a rengul a Jehovah. Ak kmal milluluuch losiik er a ulekrael er ngii. Ngera uchul me ngdimlak longer er a nglunguchek?”

3. Ngera kede mo mesaod er tia el suobel?

³ A lebebil e kede locha mo melatk el kmo, a Jehovah ngorrenges a nglunguchek. Mo lmuut er a reblak a rengrir el chad  er a irechar me te mlo omdasu el uaisei. (Job 30:20; Psa. 22:2; Hab. 1:2) Ngera sebechel lolterekokl er a rengum el kmo a Jehovah mo onger a nglunguchem? (Psa. 65:2) A kot e me donger aika el ker el ngii a mo ngosukid longer er tia el ker: (1) Ngera sebeched el expect er ngii er a Jehovah? (2) Ngerang ng expect er ngii er kid a Jehovah? (3) Ngera uchul me nglocha mo kired el adjust a bebil er a nglunguched?

4. A doltirakl er a Jeremia 29:​12, e ngerang ngtibir el mo meruul er ngii a Jehovah?

⁴ A Jehovah tibir el kmo ngmo orrenges a nglunguched. (Monguiu er a Jeremia 29:12.) A Dios er kid a betik a rengul er a reblak a rengrir el mengull er ngii, ngkmal diak bo el ignore a nglunguchir. (Psa. 10:17; 37:​28, NW) Me nguaisei engdi tia diak lebelkul a kmo ngmo onger a rokui el ongtid. A bebil er a tekoi el dolengit a locha kired el mengiil el mora beches el blekeradel.

5. Jehovah ngerang ngmelatk sel lorrenges a nglunguched? Mosaod.

⁵ A Jehovah sel lorrenges a nglunguched e ngmelatk er a moktek er ngii. (Isa. 55:​8, 9) Ngtelengtengil a moktek er ngii el beluulechad bo lemui er a resechal me a redil el tang el ngar cheungel a omengederederel. Engdi a Satan a kmo ngbai lmuut lungil a rechad a di le tir el mengedereder. (Gen. 3:​1-5) Me a Jehovah omechei er a rechad me te di tir el mengedereder me lobeketakl el kmo ngdiak el klemerang a tekingel a Satan. Omengederederir a rechad a uchul a betok el mondai er chelecha el taem. (Oli. 8:9) E kede medengei el kmo a Jehovah a diak bo longeroid aika el mondai. A loruul el uaisei e a rebebil a mo el mo omdasu el kmo a omengederederir a rechad a sebechel el sumechokl a mondai er a rechad.

6. Ngera uchul me ngkirel mo ulterekokl a rengud el kmo a Jehovah blechoel el meruul a tekoi el loeak a bltikerreng me a llemalt?

⁶ A Jehovah locha mo onger a osisiu el nglunguuch el ngar er a kakerous el rolel. El ua tiang, a King Hesekia er a bo le imis el smecher e ngullengit er a Jehovah me lengesuir el mo ungil er a rektel. Me a Jehovah ulemekungil er ngii. (2 Ki. 20:​1-6) Engdi a apostol Paulus er a lolengit er a Jehovah me lecheridii a “secher el ulemekringel er a [bedengel] el ua ia toched,”e ngdimlak lecheridii a Jehovah. (2 Ko. 12:​7-9) Molatk er a apostol Jakobus me a Petrus. A King Herodes a mle soal lomekoad er tir el terung. Me a ongdibel a milluluuch el kirel a Petrus me a dirrek el ulterekokl el kirel a Jakobus. Me nguaisei engdi a Jakobus a lulekodir e a Petrus a silobel loeak a mengasireng el rolel. (Rel. 12:​1-11) Me kede locha mo melatk, ‘Ngera uchul me a Jehovah ulsebelii a Petrus e dimlak losebelii a Jakobus?’ A Biblia diak louchais. c Engdi ngsebechel mo ulterekokl a rengud el kmo a Jehovah a “meruul a llemalt.” (Dut. 32:4) Me kid a medengei el kmo a Petrus me a Jakobus uleba kengei er a Jehovah. (Och. 21:14) Nguaisei, a lebebil e a rolel a Jehovah onger a nglunguched a diak loltirakl er a soad. Engdi kid loumerang el kmo Jehovah onger a nglunguched loeak a bltikerreng me a llemalt, a uchul e ngdiak doumededenger er a rolel e ngonger a nglunguched.—Job 33:​13, NW.

7. Ngera kede melasem el diak doruul er ngii, e ngerang?

⁷ Kede melasem el diak domekesiu er kid er a rebebil. El ua tiang, kede locha olengit er a Jehovah me lengesukid er a ileakl el rolel, engdi ngdiak denguu a nger el soad. Uriul e  kede mo medengei el kmo a chad a ullengit er a osisiu el tekoi e a Jehovah ulenger er ngii. Tia dilubech el mora odos el Anna. Ngmilluluuch lolengit er a Jehovah me bo lemesisiich a bechil er a Matthew el mle kasinoma. Te dirrek el mla er ngii a reteru el chudelang el odos el mle kasinoma. Me ngkmal mle blak a rengul el meluluuch el kirir me a bechil. Tirka el odos a mlo mesisiich engdi a Matthew a mlo smecher. A uchelel e a Anna mlo melatk el kmo, tirka el odos te mlo mesisiich le Jehovah el ullengeseu er tir? A leuaisei, e ngera uchul me ngdimlak longer er a nglunguchel el kirel a bechil? Ngdiak dodengelii a uchul me tirka el teru el odos a mlo mesisiich. Engdi kede medengei el kmo a Jehovah mo sumechokl a rokui el ringel, e kmal mengiil el mo olekiis er a resechelil el mla mlad.—Job 14:​15, NW.

8. (a) A doltirakl er a Isaia 43:​2, e ngmekera Jehovah support er kid? (b) Ngmekera nglunguuch e sebechel ngosukid sel dechebangel a meringel el blekeradel? (Momes er a video el Prayer Helps Us to Cope.)

⁸ A Jehovah mo support er kid. Jehovah el betik a rengul el Chedam a kmal diak el soal lomes er kid el chuarm. (Isa. 63:​9, NW) Me nguaisei, engdi ngdiak lorrob a rokui el ringel el bo dechebangel, el ngii a sebeched el lomekesiu el mora ralm me a ngau. (Monguiu er a Isaia 43:2.) Engdi Jehovah a tibir el mo ngosukid el ‘mechakl’ a ringeled. E kmal diak bo lebechei a ringeled me bo luchul a diak a ulebengelel el tellemall el mei er kid. A Jehovah a dirrek el meskid a chedaol reng er ngii el lolengeseu er kid loutekangel. (Lk. 11:13; Fil. 4:​13, NW) Me ngsebechel mo ulterekokl a rengud el kmo ngmo blechoel el ngar ngii aike el dousbech el mo outekangel e melemolem loba blakerreng el mo er ngii. d

9. Ngua losaod a Jakobus 1:​6, 7, ngera uchul me ngkired loumerang el ulsirs er a Jehovah el mo ngosukid?

⁹ A Jehovah expect er kid el mo oumerang el ulsirs er ngii. (Heb. 11:6) A lebebil e kede mo feel el kmo a ringeled a kmal mla mo meringel me ngdikea el sebeched el otekau. Kede locha mo oumededenger el kmo a Jehovah mo ngosukid. A Biblia olterekokl er a rengud el kmo ngoeak a klisichel a Dios e ngsebeched el “ongengur a cheuatel.” (Psa. 18:29) Me lak bo doumerang a klaumededenger er kid er a Jehovah e bai doluluuch el mo er ngii el mui el oumerang el kmo ngmo onger a nglunguched.—Monguiu er a Jakobus 1:​6, 7.

10. Mosaod a rolel e ngsebeched loureor lobengkel a nglunguched.

¹⁰ A Jehovah expect er kid el mo oureor lobengkel a nglunguched. El ua tiang, a odam olengit er a Jehovah me lengesuir el mela off er a ureor me bo lsebechel el mora convention. Ngmekera Jehovah e mo onger er a nglunguchel? Nglocha mo msang a blekengel el mo mengedecheduch er a merredelel. Engdi ngika el odam a kirel mengedecheduch er a merredelel. E locha mo kirel lolengit er ngii el betok el taem. Nglocha mo kirel trade a shift er a ureor lobengkel a ta er a chad. E a lekmal dikea el sebechel, e nglocha mo offer el melai a off e diak bo luduudel el kirel.

11. Ngera uchul me ngungil a di doluluuch el kirel a tekoi el meklou a ultutelel er kid?

¹¹ Jehovah expect er kid el di meluluuch el kirel a tekoi el meklou a ultutelel er kid. (1 Th. 5:17) Kede suubii er a tekingel a Jesus el kmo a bebil er a nglunguched a diak bo el mereched el monger. (Lk. 11:9) Me lak em give up! Bo leblak a rengum el meluluuch e lak mekimd el meluluuch. (Lk. 18:​1-7) Sel di doluluuch el kirel a tekoi e ngochotii er a Jehovah el kmo  ngklou a ultutelel er kid. Kede dirrek lochotii el kmo kede oumerang el kmo ngmo ngosukid.

12. (a) Ngera el ker el kirel ongtid a ungil di lekid el oker er ngii, e ngerang? (b) Ngmekera doterekeklii el kmo a nglunguched olecholt er omengull el mora Jehovah? (Momes er a baks el “ A Nglunguchek, Ngochotii Omengull el Mora Jehovah?”)

¹² A lsekum ngdiak el monger a ongtid e ngsebeched el di kid loker a edei el ker. A kot, ‘Ngmelemalt a tekoi el kululuuch el kirel?’ Oumesingd el taem e kede omdasu el kmo kede medengelii a ungil el kired. Engdi klemengetel a taem a mo ochotii el kmo a tekoi el dolengit a locha diak lungil kired. A lsekum kede meluluuch el kirel a mondai, e nglocha ngar ngii a lmuut el lungil rolel e ngmesmechokl er sel dolengit er ngii. Me a dirrek el bebil er a tekoi el dolengit a locha diak loltirakl er a soal a Jehovah. (1 Jn. 5:14) El ua tiang, molatk er tirke el oungalek el dulsaod er tir er a uchei. Te ullengit er a Jehovah me a ngelekir lolemolem el ngar er a klemerang. Tia kora ungil el ongit. Me nguaisei, a Jehovah diak lorrimel er a ngii di el chad el mo mesiou er ngii. Ngsoal kid el rokui, el luldimukl er a rengeleked, a lolilt el mo mengull er ngii. (Dut. 10:​12, 13; 30:​19, 20) Me tirka el oungalek a bai sebechir el meluluuch lolengit er a Jehovah me lengesuterir el rutechii a rengul a ngelekir, me a ngelekir bo el betik a rengul er a Jehovah e mo Sechelil.—Osi. 22:6; Efe. 6:4.

13. A doltirakl er a Hebru 4:​16, e ngoingerang e a Jehovah mo ngosukid? Mosaod.

¹³ Ongeru el ker, ‘Ngtemel a Jehovah el longer er a nglunguchek?’ Kede locha mo feel el kmo kede ousbech er a nger er a nglunguched er a di mereched el taem. Engdi a Jehovah medengelii sel kot lungil taem el mo ngosukid. (Monguiu er a Hebru 4:16.) Sel lak  demereched el nguu a dolengit er ngii e kede locha mo omdasu el kmo a nger er a Jehovah a ‘Ngdiak.’ Engdi a nger er ngii a locha ‘Ngdirkak bo el taem.’ El ua tiang, molatk er ngike el odam el mle soal mo ungil er a secherel. A lsekum a Jehovah uleak a mengasireng el rolel e omekungil er ngii, e a Satan a sebechel mo melekoi el kmo ngika el odam a melemolem el mesiou er a Jehovah le ngii el mlo ungil er a secherel. (Job 1:​9-11; 2:4) Me a lmuut kung, a Jehovah mla oterekeklii a taem el bo lolekngemed a rokui el secher. (Isa. 33:24; Och. 21:​3, 4) Chelechang e ngdiak el sebeched el expect el mo ungil er a sechered loeak a mengasireng el rolel. Me ngika el odam a sebechel lolengit er a Jehovah me lebsa klisiich me a budech el mo outekangel er a secherel e melemolem el mesiou er ngii el loba blakerreng.—Psa. 29:11.

14. Ngera ke suubii er a experience er a Janice?

¹⁴ Molatk er a experience er a Janice el milluluuch el mo mesiou el ngar er a Bethel. Ngmlo chuib eim el rak e ngii a mlo mtebengii a rolel a Jehovah ulenger er a nglunguchel. Ngkmo: “A Jehovah uluusbech er tia el taem el olisechakl er ngak e ngosukak el lmuut el mo ungil el Kristiano. Ngmle kirel mukeroul a klaumerang er ngak er ngii. Ngmle kirek lolengeriakl er a rolel a kuruul er a omesubek el di ngak el tang. E mle kirek el suubii el mo dmeu a renguk el mesiou er a Jehovah er a ngii di el ker.” Uriul e a Janice me a bechil a mlo teloi er a omesiou el oldingel ongdibel. A Janice a melatk er a klengar er ngii e kmo: “A Jehovah ullenger er a nglunguchek, engdi ngdimlak el ngar er a rolel el kullatk er ngii. A kuluusbech er a taem el mo mesa klebekelel a nger er ngii er a nglunguchek. Ak mera el oba omereng el saul el mle sebechek el mo chormii a bltkil a rengul me a ungilreng er ngii.”

15. Ngera uchul me nglocha ungil a lak el sal specific a nglunguched? (Dirrek el momes a siasing.)

 ¹⁵ A ongedei el ker, ‘Ngungil a kululuuch el kirel a kuk ta er a tekoi?’ Alta ngungil a bo de specific sel doluluuch, engdi kede locha mo mtebengii a soal a Jehovah el kired a lsekum ngdiak el sal komakai a nglunguched. Molatk er ngike el mesobil lodos el milluluuch el mora skuul er a SKE. Ngsoal el mo er tia el skuul me bo lsebechel mo mesiou er a beluu lousbech a ngeso er a ruumerk er a klumech. Ngmelemolem el meluluuch el kirel engdi osisiu el taem e ngolengit er a Jehovah me lengesuir el mo mes a rolel e ngsebechel menglou er a omesiungel. (Rel. 16:​9, 10) E sebechel loureor loltirakl er a nglunguchel loeak a loker er a circuit overseer er ngii el kmo ngngera el ongdibel ousbech er a rechad el pioneer. Me a lechub e ngmeluches el mora branch office loker el kmo ngngar ker ousbech a ngeso er a berkel a klumech. e

16. Ngera sebechel mo ulterekokl a rengud er ngii?

¹⁶ Kede mla suubii el kmo, ngkmal sebechel mo ulterekokl a rengud el kmo a Jehovah mo onger a nglunguched el loeak a bltikerreng me a melemalt el rolel. (Psa. 4:3; Isa. 30:18) A lebebil e ngdiak bo lemereched el monger a nglunguched. Engdi a Jehovah kmal diak el ignore a nglunguched. Ngkmal betik a rengul er kid e kmal diak el bo lechitid. (Psa. 9:10) Me molemolem el “oumeral ulsirs er ngii” e moluluuch louchais er ngii aike el rokui el ngar er a rengum.—Psa. 62:8.