A DOREEN a kmal kilebetiekl er a bo lodengei el kmo a bechil el Wesley el dirk 54 a rekil a mla mo smecher er a meringel el rakt el kasinoma er a no er a bdelul. * A retoktang a silbedii el kmo ngdi medechel a sesei el buil er a klengar er ngii. Me a Doreen a dmu el kmo: “Ngkmal dimlak el sebechek el mo oumerang er tia el tekoi. Ngmlo betok el sandei el di lerrau a renguk. Tia el blekeradel a kulemes er ngii el ua le dubecha el mo er a rebebil er a rechad el diak el kemam el terung. Ngmera el dimlak kltmokl el kirel.”

Ngklengiterreng e le tia el blekeradel el blo lechelebangel er ngii a Doreen, a dirrek el kmal betok el chad a mo chormii. A meringel el rakt a sebechel el di duubech el mo er a ngii di el chad. Engdi kede kmal chemat er a rebetok el tir a kongei el mo omekerreu er chouaitirka el betik er a rengrir el chederir el smecher er a oberaod el rakt. E tia el tekoi a kmal diak lebeot. Me ngera sebechir a rechedal a telungalek el remuul el mo omekerreu e mengelaod er tirka el betik er a rengrir el smecher? Te mekera tirke el omekerreu e mo outekangel a betok ringelel a uldesuir er sel taem el tir a omekerreu er tirka el smecher? Ngera kirir el mo melatk er sel taem el lemedkung? A kot, e bo dosaod er a uchul me ngmeringel el tekoi a domekerreu er a rechad el smecher er a meringel el rakt er chelechang.

A tekoi er a ukeruul a mla ngodechii a rolel a kodall. A irechar e sel loleketek a beluu, e a klengar er a rechad a mengal mo kedeb a klemengetel. A rechad a di mereched el mad er a bekoiueiuul el rakt me a lechub a accident. E a osbitar a di kesai me a ruumesingd el chad a di lomekerreu er tir a rechederir e dirrek el di mad er a rekeblirir.

E chelechang, e ngmla mo betok a beches el rolel a ukeruul el mesterir a techellir a retoktang me te omkar, e omekungil a rakt me ngsebechel a chad el kiei el telkib el kemanget a klengar er ngii. Me a secher el mle sebechel el di mereched el mekodir a chad er a ngar er a mong, a mla mo sebechel el mukar me ngtelkib el komengetii a klengar er a chad el smecher. Me nguaisei, engdi tia el telkib el  klemengetel a klengar er tir a dirkak bo lsebechel el omekungil er a rektir. Me a chouaika el rektir a rulleterir me ngdiak el sebechir el di tir el omekerreu er tir. Me nglmuut el kmal mo meringel er a derta el chad el omekerreu er tirka el smecher.

Me chelechang e ngkmal betekngang a kodall el dikea lengar er a blai, e ngbai oumesingd el ngar er a osbitar. Me a rebetok el chad er chelechang a diak lodengei el kmo ngua ngera sel lemedei a chad, e di mekesai el chad a mla mesa chad el mad. Me a dakt el kirel tia el tekoi el diak lodengelii a rulleterir me te omai er a rengrir, me a lechub e ngchetirir el mo omekerreu er a rechad er a blirir sel bo lsecher. Me ngera sebechel el ngosuterir?

A rebetok a kmal mo meringel er tir el kongei el kmo, a betik er a rengrir a smecher er a meringel el rakt el ua dulsaod er ngii er a uchei el kirel a Doreen. Me ngar er a chelsel a taem er a ringelel a uldasu me a sebekreng me a klengiterreng, e ngera sebechel ngosukau el mo kltmokl el kirel tia el tekoi? A blak a rengul el mesiungel a Dios a milluluuch el kmo: “Mosisecheklemam el kmo ng ua ngeral kekedeb a klengar er kemam, me bo le mellomes a rengmam.” (Psalm 90:12) Nguaisei, a dmolech el nglunguchem lolengit er a Jehovah el Dios me losisecheklau el mo medengelii a ‘kldebengel’ a klengar a meskau a llomes me ngmo sebechem el ungil lousbech aike el medechel el sils er a klengar el obengkel a betik er a rengum el ngar er a kot el ungil el rolel.

Ngklou a ultutelel el bo dungil kltmokl. A lsekum a betik er a rengum a dirk sebechel el mengedecheduch e dirrek el kongei el mesaod er tia el tekoi, e ngbai uchul a llomeserreng a lsekum ke korir el kmo ngtechang a soal a bo losaod el kirel er sel taem el lekea lsebechel el di ngii el mesaod er ngii. Ngkmal ungil a bo lebeketakl aike el rokui el soal a bo lemeketmokl er sel taem el dikea lsebechel el mengedecheduch, el ua tekoi el kmo ngsoal a bo lolasem el lmuut el olekiis er ngii me a rolel a ukeruul el soal me a lechub a osbitar el soal. Aika di bebil er a tekoi el lemeketmokl e ngsebechel el kosadel a rraurreng me ngsebechir tirke el kiei el ungil a rengrir e diak lemekngit a ukltkir el kirel e le tir el mlo morimel el mo meruul a tekoi el kirem e le ngdikea lsebechem el di kau el mesaod er kau. Me a ungil rolel a cheldecheduch er a uchei a sebechel mesterir a techellir a rechedal a telungalek el mo ungil mengetmokl er a betik er a rengrir er a taem el lsecher. E a Biblia a kmo: “A lak a ngesou er a uldasu e ng mecheuid a uldasu.”​—Osisechakl 15:22.

A ngerechelel ngike el omekerreu a kirel el mengelaod er ngike el smecher. A chad el medkung a kirel el mo mechelaod a rengul e mo melechesuar el kmo a rechedal a betik a rengrir er ngii me ngdiak el cheloit. Me ngmekera doruul er tiang? Monguiu me a lechub e mongitakl me lorrenges, e molilt a babier me a chelitakl el melisiich er ngii e dirrek el soal lorrenges. A rebetok a kmal mo mechelaod a rengrir a lsekum a ta er a chederir a orreked er a chimorir e ungil mengedecheduch er tir.

 Ngdirrek el ungil a dekerekikl er a rechad el me oldingel er a smecher el chedad. A ta er a omesuub a mla metik el kmo: “A oderengesel a chad a ta er aike el kot el ulebongel el klekedellel a bedengel a chad el mo diak loureor. Me alta e a chad a kmal socherang engdi nglocha dirk sebechel el orrenges, me ngungil a dekerekikl me lak dolekoi aike el tekoi el dodengei el kmo ngdiak el sebeched el melekoi er ngii a lsekum ngdirk medengelii a rengul.”

A lsekum e ngsebechel, e mdak el meluluuch. A Biblia a mesaod er a ta el taem el apostol el Paulus me a rulebengkel a kmal chilarm er a meringel el uldasu me te urridii a omeltkir el kirel a klengar er tir. Me te milekerang? A Paulus a ullengit er a resechelirir me loluluuch el kirir el kmo: “E kemiu a dirrek el ngosukemam ra nglunguchiu.” (2 Korinth 1:8-11, BT) Me a nglunguuch el mera el ngar er a reng er sel taem el lemeringel a uldesuel a chad, e lecharm er a ringel a kmal mekreos el diak el sebechel el mochar.

Ngkmal meringel el tekoi sel dodengei el kmo a betik er a rengud a medkung. E tiang a kmal meketeklii el kmo ngdiak el kirel el mo er ngii a kodall. Kid a dimlak dobeob el kired el mo mad a uchul me tiang a kot el meringel el tekoi. (Rom 5:12) A Tekingel a Dios a omekedong er a kodall el “cherarou.” (1 Korinth 15:26) Me ngkmal diak a telemellel e melemalt el tekoi sel lemekngit a rengud el kirel a kodellel a betik er a rengud.

Me nguaisei, engdi a lsekum kede kutmeklid er a uchei el kirel tia el tekoi el sebechel mo duubech, e ngmo ngosuterir a rechedal a telungalek er kid el mo diak el bekikl e bai mo ungil el kltmokl el kirel. Me a bebil er a tekoi el sebechel el mo duubech a sebeched el metik er a chelsel a baks el “ Aike el Ulebongel el Sandei er a Klengar er a Chad.” Kede medengei el kmo, ngdiak el ngii el rokui el blekeradel a mo duubech el mo er a rebek el smecher, me a lechub e ngduubech er a di ta el taem el osisiu a blechebechel. Me nguaisei, engdi a ruumesingd er tirka el smecher a mo chelebangel a bebil er aika el tekoi.

Me sel lemad a betik er a rengud, e nguchul a llomeserreng a domekedong er a kmeed el sechelid el ngii a kilengei er a uchei el mo olengeseu er kid. Me tirke el ulemekerreu me a dirrek el telungalek a kmal kirir el mo ulterekokl a rengrir el kmo, ngika el betik er a rengrir a dikea lechuarm er a ringel e dirrek el mocha olengull. E le ngika el Ulemeob er a rechad a kmal oterekokl a rengud el kmo a “rulekoad a diak a ngeral lodengei.”​—Olisechakl 9:5.

Ngkmal klou a ultutelel el bo dultuil er a Dios, el diak di el sel taem el bo lsecher a chedad er a meringel el rakt, e ngdirrek el sel taem el lemad. A Dios a kmal sebechel el ngosukau el okiu a ungil el tekingir me a omerellir a rechad. A Doreen a kmo: “Ak silubii el kmo ngdiak el kirek el oltngakl er a ngelsuil a chad. Aki mlo melechesuar a klungel a ultutelel a rokui el ngeso el kim ngilai, e kmal mlo imis el dmeu a rengmam. Me ngak me a bechik a mlo medengei el kmo tiaikid a rolel e a Jehovah a ouchais er kemam el kmo, ‘Ngak tiang el lobengkem e olengeseu er kau er tia el ringel.’ Me ngkmal diak el sebechek el obes er tia el blekeradel.”

Nguaisei, a Jehovah a ngike el kot el ngarbab el Omekerreu. Ngii a Ulemeob er kid me ngkmal ungil el medengei a ringeled me a kngtil a rengud. Ngkmal sebechel e dirrek el semeriar el ngosukid e smisichid me ngsebeched el outekangel. Me a lmuut el tang, ngmla tibir el kmo ngkmal di kmedung e ngmo okngemedii a kodall el mo cherechar e mo olekiis er a rebetok el biliol el chad er a kodall el tir a ngar er a omeltkel. (Johanes 5:28, 29; Ocholt 21:3, 4) Seikid e ngmo sebechir a rokui el chad el melekoi er a tekingel a apostol el Paulus el kmo: “Kau el Kodall, ng ngar ker a klisichem? Kau el Kodall, ng ngar ker orsum el omekoad?”​—1 Korinth 15:55.