A bebil er a sengk el mei er kid a kmal mekreos e le ngmla er a ngarbab el chad me a lechub e ngchad el kmal dongull er ngii. E a kuk bebil alta ngdiak el meringel a cheral, engdi ngkmal mekreos e le ngmla er a kmal kmeed er kid el chedad me a lechub e ngsechelid. E tia sebeched el mesa er sel sengk er a Russell el mo er a Jordan el dulsaod er ngii er a uchei. Me nguaisei, engdi tia ngngera belkul el kirel a sengk er a olubet?

A kot, e a Biblia a melekoi el kmo: ‘A Dios . . . a ulderchii a di tal Ngelekel el mer a beluulchad, me bo dokiu ngii el mo nguu a klengar.’ (1 Johanes 4:9) Sei a uchul me tia el sengk a kmal mekreos. A Dios a ngike el kot el ngarbab. A ta er a chad er a Hebru el milluches er a Psalm a millekoi el kirel a Dios el kmo: “Ng di kau el tang a RUBAK, ke ngarbab el merreder er a beluulchad el rokir.” (Psalm 83:18) Ngii a kot el ngarbab el chad el sebeched el nguu a sengk el mla er ngii.

A ongerung, e a Dios ‘a Demad.’ (Isaia 63:16) Ngoeak a ngera el rolel? Ngii a uchul a klengar. Ngdirrek el kmal omekerreu er kid el di ua betik a rengul el chedam el omekerreu er a rengelekel. A Dios er a longedecheduch er a rechedal er a irechar e ngmillekoi el kmo: “Israel, kau a kmal cheleoch el ngelekek el sechal, el kot el betik er a renguk el ngalek. . . . A renguk a melatk er kau; ak mo chubkau.” (Jeremia 31:20) Me a Dios a osisiu a uldesuel el kirir a remengull er ngii er chelechang. Ngii a diak el di el kot el mesisiich el Ulemeob, e ngdirrek el betik a rengul el Demad e Sechelid. Tia ngdiak el rullii a ngii di el sengk el mla er ngii el kmal mo mekreos?

A bebil er a sengk a kmal mekreos e le ngolechotel a bltkil a rengul ngike el milskid. Ngike el mera el ngar er a rengul e ousengk a diak longerechir el kirel a tekoi el rirellii.

A Dios a tilengetengii a Ngelekel el kired e le ngkmal betik a rengul er kid. A Biblia a melekoi el kmo: “A Dios a ulechotii a bltkil a rengul er a loderchii a di tal Ngelekel.” E ngera uchul? “Me bo dokiu ngii el mo nguu a klengar.” (1 Johanes 4:9) A Dios ngmle kirel el meruul er tia el tekoi? Ngkmal diak! A Biblia a melekoi el kmo tia el “ngubet el ngara Kristus Jesus” a olechotel a “grazia ra Dios.”​—Rom 3:24, BT.

Ngera uchul me tia el sengk a olechotel a “grazia ra Dios”? A Biblia a melekoi el kmo: “Dios a ulechotii a bltkil a rengul er kid, ele ser a dirk de ngar a klengit, e a Kristus a mlad el kired.” (Rom 5:8) A bltikerreng er a Dios a uchul me ngmle soal el olengeseu er kid a rechad el kmal mechebuul e ngar er a klengit. Kid a diak derredemelel tia el bltikerreng me a diak el sebeched el kokedir a Dios. Tia el sengk a kot el ngarbab el olechotel a bltikerreng el mla mocholt.

A bebil er a sengk a kmal mekreos e le ngolechotel a tekoi el mileketmokl me bo el sebeched el nguu. A lsekum a chad a kongei el mo cheroid er a tekoi el kmal mekreos er a rengul me bo el sebeched el nguu, e tia el tekoi a kmal mo mekreos er a rengud.

A Dios a ‘milskid a di tal Ngelekel.’ (Johanes 3:16) Ngdimlak a chad el lmuut el kmeed er ngii. Ngar er a chelsel sel taem el Dios a ulemeob a rokui el tekoi, e a Jesus a ulebengkel el omeob e mlo “uchul a deuil a rengul . . . er a bek el sils.” (Osisechakl 8:30) A Jesus a “Ngelekel el betik er a rengul . . . el okesiul a diak le moues el Dios.” (Kolose 1:13-15) Ngdiak a ngodech el deleongel el mo mekesiur tia el kmes el deleuill er a Jesus me a Demal.

Me nguaisei, engdi a Dios a “dimlak le kiresii a Ngelekel.” (Rom 8:32) A Jehovah a milskid sel kot el ungil er ngii.

A bebil er a sengk a kmal mekreos e le kede kmal ousbech er ngii. El di uai tiang, ke locha oba klou el omereng el saul el mo er a chad el milengkad er a ukeruul el ulsebelii a klengar er kau, el dimlak el sebechem el di kau el kutmeklii! Tiang diak el kmal mekreos er a rengum?

“Ma rokuil chad a mukngar el ngara Kristus, el ua rokuil chad el mad el ngara Adam.” (1 Korinth 15:22, BT) Kid el uldidellel a Adam a uchul me kede mo “mad” e diak el sebeched el mo imikr er a secher me a kodall el ka el sebeched el muklemalt er a medal a Dios. Me kid a di chad me ngdiak el sebeched el di kid el “mukngar.” A Biblia a meketeklii tiang el kmo: “A tal chad a kmal diak el sebechel el di ngii el ngubetii; ng diak el sebechel el mengkad er a Dios er sel char el kirel a klengar er ngii, . . . A ikel bo le kekad a kmal diak bo lungil a ildisel.” (Psalm 49:7, 8) Kede kmal ousbech a ngeso e le ngdiak el sebeched el mecherar a olubet.

Ngoeak a kmal klou el bltkil a rengul, e a Jehovah a kilengei el kokedir tia el kmal dousbech er ngii el tekoi me loeak a Jesus e a “rokuil chad a mukngar.” Ngmekerang a olubet e kutmeklii tiang? “Rsechel a Jesus el Ngelekel a kikidid er a rokui el klengit.” Ochoi, a klaumerang er kid er a mloitel el rsechel a  Jesus a uchul e ngsebechel el musubes a kngtid e mo nguu a diak a ulebengelel el klengar. (1 Johanes 1:7; 5:13) Me a olubet, ngngera ngrullii el mo er tirke el mla mad el betik er a rengud? “A kodall a mlei el okiu a tal chad, me ng dirrek el ua isei a okiis er a kodall a mlei el okiu a tal chad [Jesus].”​—1 Korinth 15:21. *

Ngdiak a lmuut el ngarbab el sebechel el meskid a sengk me a lechub a klou el olechotel a bltikerreng el ua tengetengel a Jesus. Ngdiak a chad el mla meskid aike el rokui er ngii el mo uai a Jehovah. E diak a ngodech el sengk el meskid aike el dousbech el ua olubet el rullid el mo mimokl er a klengit me a kodall. Nguaisei, ngkmal diak a ngodech el sengk el mo mekesiur tia el sengk er a olubet.