Ngmla mo betok el telael rak el rechad a diak lodengelii a nger er tia el ker. Me nguaisei, engdi aika el bekoiueiuul rakt a mla mo uchul a kodellir a rebetok el miliol el chad. Engdi cherengel a taem, e a re scientist a mlo medengelii a klemerang el kirel tia el tekoi. Te mlo medengei el kmo a rakt a blechoel mo er ngii lokiu a betok el mekekerei el baiking el ua bacteria me a dirrek el baiking el ngar a eolt. Me a klemedengei er a rechad el kirel tia el klemerang el tekoi a mla ngosuterir a rechad el mo kerekikl me lak bo lsecher, e dirrek el mla remuul a kar lomekungil el uchul me a rebetok el biliol el chad a sebechir el kiei el meketeket e dirrek el mesisiich a bedengir.

E kuk uangera uldasu el kirel a lmuut el bebil er a meklou a ultutelel ker? Ngera ngmo rullii er kau a lsekum ke osiik a klemerang el tekoi el kirel aika el beldukl er iou el ker?

• Ngtecha Dios?

• Ngtecha Jesus Kristus?

• Ngerang a Rengedel a Dios?

• Ngera mo er ngii er a ngar medad el taem?

A rebetok el miliol a mla metik a nger er aika el ker, el mla rulleterir el mo ungil a klengar er tir. Kau me ngdirrek el sebechem el ngmai a klungiolem er aika el nger.

Ke locha mo melatk el kmo, ‘Ngmekera e sebechek el mo medengelii a klemerang el kirel a ngii di el tekoi?’ E le ngkora ua bo lemeringel a bo dodengei a klemerang el kirel a betok el tekoi. E ngera uchul?

A rebetok el chad a diak loumerang el kmo a kabelment me a siobai me a dirrek el chais er a beluu a melekoi a klemerang. Ngmla mo meringel er tir a mo medengei el kmo ngera el tekoi a klemerang, me a telkib el klemerang, me a di blulak el tekoi. Me ngar tia el mekngit eltel el beluulechad, e a rechad a dikea el kaumerang er a delongelir, e dirrek el kmal betekngang a blulak, el uchul me a rechad a di kakebosech a uldesuir el kirel a klemerang el tekoi me a dirrek el belkul ngii el klemerang.

Me alta e kede chelebangel chouaika el omelsemai, engdi ngdirk sebeched el mo medengei a klemerang el tekoi el kirel a meklou a ultutelel el ker el kirel a klengar. Lokiu a ngera el rolel? Lokiu a osisiu el rolel e ngsebechem el metik a nger er aike el diak lsal meklou a ultutelel ker.

Ngbek el sils el ngar ngii a techellem el osiik a klemerang el tekoi. Ka molatk er a blekeradel el lechelebangel er ngii a Jessica. Ngdmu el kmo: “A ngelekek el redil a chatar er a peanuts, ngmo lmuut me a lsekum ngar ngii a telkib el chesechesemel a peanuts er a kall e ngsebechel mo uchul a kodellel.” Me a Jessica a kirel mo medengei aike el kall el lomechar el bo longa ngelekel. Ngdirrek el dilu el kmo: “Me a kot el tekoi el kuruul er ngii, a menguiu a label er a kall, e dirrek el kerekikl el omes a ingredients er ngii. Ak dirrek el meruul a research er ngak me bo kudengei el kmo ngdimlak a peanuts el mo chelsechusem er aike el kall el mirruul er a kombalii. Ak dirrek el meruul a lmuut el bebil er a research me bo lulterekokl a renguk el kmo ngsebechek loumerang er a kombalii el mirruul ngii el kall.”

Me a ker el molasem el mo osiik a nger er ngii er a bek el sils, a locha diak el klou a ultutelel el ua keril a Jessica. Ngsebechem lousbech er tiaikid el rolel el mo metik a nger er a kerim:

• Mosuub a klemerang el tekoi.

• Moruul a lmuut el bebil er a research.

• E bo modengei el kmo a tekoi ngmlengai er ker.

Ngsebechem el ousbech er tiaikid el rolel el ngosukau el mo metik a mera el nger er aike el meklou a ultutelel ker el kirel a klengar. Ngokiu a ngera el rolel?

A Jessica er a losiik a klemerang er a Biblia, e nguluusbech er a osisiu el rolel el lousbech er ngii sel losiik a mo kelel a ngelekel. Ngdmu el kmo, “Ak mle kerekikl el menguiu e dirrek el mle blak a renguk el meruul a research, me ngilsukak el mo medengelii a klemerang er a Biblia.” Me a rebetok el miliol el chad a di ua Jessica el mla suubii a klemerang el tekoi er a Biblia el kirel aika el ker el kmo:

• Ngera uchul me kede ngar?

• Ngera duubech sel lemad a chad?

• Ngera uchul me a rechad a chuarm?

• Ngera ngmeruul er ngii a Dios el mo olekngemed a ringel?

• Ngoeak a ngera el rolel e ngsebechel a telungalek er kid el mo dmeu a rengul?

Ngsebechem el metik a mera el nger er aika el ker me a lmuut el bebil er a ker lokiu sel monguiu er a Biblia, e dirrek el moruul a research el ngar a www.jw.org.