Ak mlechell er a 1935 er a Darlaston, el ngii a tedebechel aike el beluu er a England lokedongall el Chedelekelek el Beluu, le ngdi chedelekelek er a chetul aike el betok el factory el ngar ngii. A rechad er a blik ulemuchel el mesuub lobengterir a Resioning er a Jehovah er a lebocha el eua rekik. Sera lebekord el 14-15 a rekik e ngmlo ulterekokl a renguk el kmo tia klemerang me ak miltecholb er a 1952 er a le 16 a rekik.

Osisiu el taem e a kulemuchel loureor er a klou el factory el mirruul a dongu me a dirrek el parts er a mlai. A kulemuchel el melai a training el mo secretary er a kombalii, e kmal mle soak tia el lureor.

Ngmlo kirek el meruul er a klou el omelilt er sel taem el odam loldingel a ongdibel a ullengit er ngak el mo conduct er a Book Study er a ongdibel el ngar er a Willenhall. Tia mle meringel. Ngar tiakid el taem e ak mle teloi a teblo el ongdibel. Sel le weekdays e ak ngar er a miting er a ongdibel el mle kmeed er a urerek el ngar er a Bromsgrove. Tia mle 20 el mael a cheridel er a blik. E sel le weekend el kubengterir a rechad er a blik e ak ngar er a miting er a ongdibel er a Willenhall.

Ngmle soak el support er a cheldebechelel a Jehovah me ak kilengei er ongtil a odam loldingel a ongdibel alta ngmle belkul a kmo ngmo diak kuureor er tia el kmal soak lureor. Ngak el milecherei a Jehovah me ngomekrael er a klengar er ngak er tiakid el taem, a milekengii a rael el mora klengar el kmal diak kuuchel er a renguk el kirel.

Sera kumais el ngar er a miting er a ongdibel er a Bromsgrove e ak mlo medengelii a odos el Anne, el ngii a kmal mle ulturk osengel er omesiungel el mora Jehovah. Aki mlo bechiil er a 1957, e aki mla chuarm a kakerous el rolel a omesiou el ua regular pioneer, special pioneer, mesiou el oldingel a ongdibel, me a mesiou er a Bethel. A Anne a uchul a klou el deurreng er a klengar er ngak.

Sera 1966 e ngkmal mle dmeu a rengmam el mora 42 el klas er a Gilead. Me a mle assignment  er kemam a mora Malawi, el beluu er a Africa lodengelii a rechad el kmo, te kot lungil a blekerdelir a rechad er ngii. Me nguaisei, engdi ngkmal dimlak ki modengei el kmo ngdiak ki mngar tia el beluu el meketeket.

Me aki mlora Malawi er a February 1, 1967. Sel kot el buil a ki muluusbech er ngii el mesuub er a omelekoi er tia el beluu, e a uriul e aki ulemuchel er a omesiungam loldingel ongdibel. A mlai el ki muluusbech er ngii a ledu el kmo ngkmal sebechel el mora ngii di el basio e sebechel merael imuul a omoachel. Engdi tia di mle sebechel rolii a kmal meched. E ngar ngii aike el taem el kim kiliei a blai el mle kirel medekedek a tenzio er ngii er a plastic me lak ki bom dekimes er a chull. Ngkora kmal mle meringel el rolel a ki bo modengelii a klemissionari engdi ngkmal mle somam!

A April e ak mlo mtebengii el kmo aki mo chobangel a mondai er a kabelment. Ak rirengesii a tekingel a president er a Malawi el Dr. Hastings Banda el kmo a Resioning er a Jehovah diak leharau a tax e ulemuchel a mondai el kirel a kabelment. Aika mle klsuul. Aki mle medengei el kmo a mera el mondai er tir el kirir a Resioning, a kid el diak domekbitang me a diak dekengei lomechar a membership card er a cheldebechel er a balatiks.

A September aki chiliuii er a news el kmo a president oltelechakl er a rudam el kmo te omuchel a mondai er a beluu. Ngdilu el ngar er a ta el klou el ongdibel er a balatiks el kmo a kabelment er ngii a di kmedung e ngmo torrob a rokui el urerir a Resioning er a Jehovah. Tia dilubech er a October 20, 1967. Kedeb el taem er uriul e a rebulis me a rechad er a immigration a mlei er a branch el me mengesimer er ngii e otebedeterir a remissionari er a beluu er a Malawi.

 Uriul er a kim kelebus el edei el klebesei, e te mle deport er kemam el mora Mauritius el beluu el ngar cheungel a klisichel a Britain. Me nguaisei engdi te dimlak lekengei er kemam el mo kiei er a Mauritius el missionari. Me aki mlora Rhodesia (el chelechang e ng Zimbabwe). Sera ki bong e a ta el mekngit a kse er ngii el ofiser er a immigration a dimlak lekengei er kemam me kim siseb er a beluu, e dilu el kmo: “Te diak lekengei er kemiu me mkiei er a Malawi. E diak lekengei er kemiu me mkiei er a Mauritius, e chelecha e ko mermang le ngsebechiu el mei er tiang.” A Anne a mocha lmangel. Ngua lemlak a sorir el melai er kemam! Tiakid el taem e ngdi mlo soak el merael e lmuut el mo remei er a England. A rechad er a immigration a kilengei er kemam me aki mo bad er a branch engdi te dilu el kmo ngmle kiram el lmuut el mong er a klukuk. Ngkmal mle mesaul a bedengam, engdi aki millemolem el mechei a rokui el tekoi er chimal a Jehovah. A bo lekukuk er a telia el sils e ngkmal mle mechas a rengmam le te kilengei er kemam el kiei er a Zimbabwe. Ngkmal diak kubes er tiakid el sils, ngkmal mlo ulterekokl a renguk el kmo a Jehovah omekrael er a rolam.

Ak mlukngerachel el mo oureor er a Service Department er a branch el omekerreu a ureor er a Malawi me a Mozambique. Te kmal mle meringel loldechelakl er a rudam er a Malawi. A ta er a telengtengil a urerek a oliuid a report er a re circuit overseer er a Malawi. A ta el kesus e ak kuluureor el kmal mo osoi loliuid er a ta el report, e kmal lilangel er a kunguiu el kirel a meringel odechelakl lechelebangel a rudam me a rudos er ngak. * Engdi ak dirrek el kmal ngilai a omelisiich er a blakerreng, klaumerang, me a ducherreng er tir.​—2 Ko. 6:4, 5.

Aki mirruul aike el rokui el sebechemam el mo omesterir a kall er a klereng a rudam el dirk mlara Malawi me a dirrek el tirke el chiliis el mora Mozambique. Tirke el uliuid a babier el mo Chichewa el ngii a kot el klou el omelekoi er a Malawi, a millukl el mora klou el sersel a odam el ngar er a Zimbabwe. Ngika milekedechor a blai me a obis el kirir. Ngar tiang e te millemolem er tia el kmal klou a ultutelel el ureor el oliuid a babier el mengai er a Biblia.

Aki kiltmeklii a rolel e a re circuit overseer er a Malawi a mlo sebechir el mora convention el tekoi er a Chichewa er a bek el rak er a Zimbabwe. Ngar itiang e te ngilai a outline er aike el cheldecheduch er a convention. Ngar omerollir el lmuut el mora Malawi e te mirruul aike el rokui el sebechir el mo share aikang el obengterir rudam. A ta er a rak er a lemei er a Zimbabwe e aki kiltmeklii a Kingdom Ministry School el mo melisiich er tirka el circuit overseer el kmal lullecholt er a blekeu.

A February 1975 e ak mlo oldingel er a Resioning er a Malawi el chiliis el mora ike el kiamp er a Mozambique. Tirka kmal uleltirakl a ulekrael er a cheldebechel, luldimukl er ngii a chelechad er a remechuodel. Tirka el beches el mechuodel a riruul a betok el ureor er a omesiou, el ua oltobed a cheldecheduch el mora buai, mesaod er a day’s text me a Ongkerongel, e dirrek el meruul a assembly. Te riruul aika el kiamp el mo ua convention, el ngar ngii a department er a omengetmokl, omerusel a kall, me a security. Ngoeak a klengeltengat er a Jehovah e tirka el blak a rengrir el odam a riruul a kmal betok, me te kmal silsichak.

Ngar er a ulebengelel aike el rak er a 1970 e a branch er a Zambia a mlo oungerachel er a ureor er a Malawi. Engdi ak mle blechoel el melatk e meluluuch el kirir a rudam er a Malawi, me a rebetok me te dirrek el mirruul el uaisei. Ngak a mle chedal a Branch Committee er a Zimbabwe me ngmle betok a techellek el mo mengedecheduch er tirke el mlei lomtechei er a headquarters, me a dirrek el rudam er a Malawi, South Africa, me a Zambia. A bek el taem e aki milsaod er tia el osisiu el ker, “Ngera sebeched el meruul el kirir a rudam er a Malawi?”

Omerollel a taem e ngmlo kekerei a odechelakl. A rudam el chiliis a milekekoketerir el lmuut el melukl el mora Malawi, e tirke el di mle kiei a mlo diak el meringel a odechelakl el mo er tir el ua ngar er a  mong. Aike el kmeed el beluu a mlo diak lomtok a urered me a rechedal a Jehovah a mlo sebechir el ngar er a miting e oldingel. A Mozambique a mlo meruul er osisiu el tekoi er a 1991. Engdi aki millatk el kmo, ‘Oingerang e a Resioning er a Jehovah er a Malawi a mo mimokl?’

Ngmilengodech a blekeradel er a Malawi me a 1993 a Resioning er a Jehovah a mlo mimokl. Uriul er tiang, e ak milengedecheduch er a ta el missionari el uleker er ngak el kmo, “Kau, ke lmuut el mora Malawi?” Ngak a mle 59 a rekik me ak dilu el kmo, “Ngdiak, ngak a kmal chudelang!” Me nguaisei engdi ngar tia el osisiu el sils e aki ngiluu a fax el mlara Governing Body el invite er kemam el lmuut el mora Malawi.

Ngkmal mle somam a assignment er kemam er a Zimbabwe, me tia kmal mle meringel el omelilt. Ngkmal mle dmeu a rengmam el ngar er a Zimbabwe ngdirrek el mla er ngii a rungil sechelimam er tiang. A Governing Body a kmal mle ungil a tekingir e dilu el kmo a lsomam e ngkmal sebecham el di kiei er a Zimbabwe. Me ngmle sebechem el di kemam el melilt er a rolam e di ngar er a Zimbabwe. Engdi ak dirk melatk er ngak el mlo melatk el kirel a Abraham me a Sara el chilitii a ungil delengcheklir er a cheluodel er tir e ullengesenges a ulekrael er a Jehovah.​—Gen. 12:1-5.

Me aki ngileltii el mo oltirakl a ulekrael er a cheldebechelel a Jehovah e liluut el mora Malawi er a February 1, 1995, el ngii sel sils er a kim kot el mora Malawi er a 28 el rak er a mla memong. Ngmileketmokl a Branch Committee, el ngii a mle ngak me a reteru el odam. Aki di mle mereched el lmuut el omuchel a urerir a Resioning er a Jehovah er a Malawi.

Ngmera el klengeltengat el sebechek el mesa Jehovah lomekeroul er a ureor! A ildisel a publisher a di mle mereched lobdois. Ngmle bekord el 30,000 er a 1993 e sera lebo el 1998 e ngngilasech el mo betok er a 42,000. * A Governing Body a kilengei er a okedecherul a beches el branch obis el mo oungerachel er a klou el ureor el ngar ngii. Ngulebechar a 30 el acre el chutem er a Lilongwe e ngak a mlukngerachel el mo mesiou er a committee er a ureor el omekedechor.

A odam el Guy Pierce el ta er a chedal a Governing Body a ultebedii a cheldecheduch el mengedaol er tia el beches el branch er a May 2001.  Betok er a eru el telael el odam el chad er a Malawi a mla er tia el klechedaol, el oumesingd er tir a mla metecholb el betok er a 40 el rak. Tirka el blak a rengrir el rudam me a rudos a uluutekangel a kmal meringel el odechelakl el betok el rak er a lomtok a urered er a Malawi. Alta te kmal mle chebuul er a rolel a klechad engdi te kmal merau er a tekoi er a klereng. Chelecha e te kmal dmeu a rengrir el tour er a beches el Bethel er tir. Bek el basio el lebo er ngii e te milengitakl a chelitakl er a Renged e harmonize el ua teletelir a rechad er a Africa longitakl, e tia el klechedaol a kmal rirtechii a renguk el ngaruchei er a ngii el di el tekoi el blak experience er ngii. Tia mle ngar lochotel a kmo a Jehovah omekngeltengat er tirke el melemolem er a blakerreng er tir er a chelsel a ringel.

Uriul er a bo lemerek a okedecherul a branch, e ngkmal mle dmeu a renguk el ngmai a assignment el mo mengedaol a Blil a Ongdibel. Aike el ongdibel er a Malawi millai a klungiolir er a arrangement er a cheldebechel el kirel a okedecherul a Blil a Ongdibel er aike el beluu lousbech a ngeso. Uchei e a bebil ongdibel a mlo kldibel er a mekekerei el delemerab el rruul er a kerrekar el eucalyptus. A chedoel a mle chelaus er a chudel e a kingellir a bench el rruul er a chutem. Chelecha rudam a dmeu a rengrir el meringel loureor el meruul a bricks e lousbech lomekedechor aika el beches el blil a ongdibel. Me nguaisei engdi ngdirk mle sorir lousbech a bench er a bai lousbech a kingall e le te kmo, Ngdirk ngar ngii a room el sebechel a lmuut el tang el mo dengchokl er a bench!

Ngdirrek el kmal dmeu a renguk lomes er a Jehovah el mla ngosuterir a rechad el mukeroul er a tekoi er a klereng. Ak kmal tokubets el chemat er a remekekerei el odam er a Africa el kmal kongei lolengeseu e ngmai a training er a cheldebechelel a Jehovah me a ureor loruul. Tiakid a mlo uchul me ngmlo sebechir el ngmai a lmuut el betok el ngerachel er a Bethel me a ongdibel. A ongdibel a dirrek el ngiluu a kmal klou el omelisiich er a letetketerir a rudam el chad er a Malawi el mo circuit overseer, el betok er tir a bechiil. Tirka el obekel a ngileltii el diak bo loungalek e mo mui el mesiou er a Jehovah alta siukang me a rechedal a telungalek er tir a orrimel er tir el mo oungalek.

Aki milsiou er a Africa el 52 el rak e ngmo er ngii a secherel a bedengek. Me a Governing Body a kilengei er a recommendation er a Branch Committee el mo reassign er kemam el mora Britain. Ngkmal mle mekngit a rengmam er aki morael engdi a telungalek er a Bethel er a Britain a kmal lungil omekerreu er kemam er chelecha el ki mechudelang.

Ngkmal ulterekokl a renguk el kmo, omelilt er ngak el mo mecherei a Jehovah me ngomekrael er a rolek a sel kot el ungil omelilt el krirellii. A lsekum ak mlo ultuil er a di llemesek, e nglocha kmal mlo ngodech a klengar er ngak. A Jehovah mle medengelii a kuluusbech er ngii el mo ‘omeklemalt er a rolek.’ (Osi. 3:5, 6) Sera kdirk kekerei el chad e ak kmal mle semeriar el mesuub er a rolel a lemeketmokl a ureor er a klou el kombalii. Me nguaisei a cheldebechel a Jehovah a milskak a lmuut el ungil el ureor. A denguu er ngak, e a bo dosiou er a Jehovah a kot el ungil klengar!