1. Ngera soal a Jehovah er chelecha el taem?

 A SOAL a Dios er chelecha el taem a loberk a ungil chais el kirel a Renged er a beluulechad el rokir. (Mk. 13:10; 1 Ti. 2:3, 4) Tia urerel a Jehovah, e kmal klou a ultutelel a uchul me ngmla ngiltii a Ngelekel el mo omekrael er ngii. Ngulterekokl a rengud el kmo a Jesus el lomekrael er kid a uchul me a ureor a mo meketmokl er a uchei er a lemei a ulebongel loltirakl er a soal a Jehovah.​—Mt. 24:14.

2. Ngera kede mo mesaod er tia el suobel?

² Ngar tia el suobel e kede mo mesa el kmo a Jesus ousbech er a “blak a rengul e mellomes a rengul el mesiou” lomeskid a kall er a klereng e renrak er a rultirakl er ngii el kirel tia el kot el klou lureor er a berkel a klumech el mla ngar ngii. (Mt. 24:45) Kede dirrek el mo mesaod aike el sebechel a derta er kid el meruul el support er a Jesus me a blak a rengul el mesiou.

3. Ngera ta er a klisiich el lengiluu a Jesus?

³ A Jesus omekrael er a berkel a klumech. Ngmekera sebechel mo ulterekokl a rengud er tiang? Uchei er a lebora eanged a Jesus e ngmlo duum er a reblak a rengrir el uleltirakl er ngii er a rois el ngar er a Galilea. Ngdilu er tir el kmo: “A rokui el klisiich er omerreder er a eanged ma beluulchad a bla le beskak.” Momtab aike el ongingil tekingel: “Me chelechang e morael el mor a bek el bedengir a re chad er ker me ker e moruul er tir el mo obengkek.” (Mt. 28:18, 19) Me a ta er a klisiich el bla lenguu a Jesus a omekrael er a berkel a klumech.

4. Ngera uchul me ngsebechel mo ulterekokl a rengud el kmo a Jesus a dirk omekrael er a ureor er a berkel a klumech?

 ⁴ A Jesus a dilu el kmo a ureor er a berkel a klumech me a omeruul el disaiplo a mora “bek el bedengir a re chad er ker me ker” e ngii a mo obengterir a rultirakl er ngii “el mo lmuut er a ulebongel er a beluulchad.” (Mt. 28:20) Tia bleketakl lochotii el kmo a ureor er a berkel a klumech a melemolem el me lmuut er chelecha el taem er kid e a Jesus a omekrael er ngii.

5. Kede mekera olengeseu loltaut er a Psalm 110:3?

⁵ A Jesus a dimlak el bekikl el kmo ngmo el mo mekesai a rechad el omerk er a klumech er a taem er a ulebongel. Ngmle medengei el kmo a ulaoch el ngar er a Psalm a mo tmaut: “Sel sils el bo moumekemad er a re cherrouem, e a re chedam a di mo tir el kongei el mong.” (Psa. 110:3) A lsekum e kau a teloi er a ureor er a berkel a klumech, e ke support er a Jesus me a blak a rengul el mesiou e dirrek el olengeseu loltaut er tia el ulaoch. A ureor a meketmeklang, engdi ngngar ngii omelsemai.

6. Ngera ta er a omelsemai el lechelebangel er ngii a ruumerk er a chisel a Renged?

⁶ A ta er a omelsemai el bo lechelebangel er ngii a ruumerk er a chisel a Renged a ultok. A rumtok a mera el osisechakl, remengeteklel a klechelid, me a rechad er a balatiks a mla dmu betok el blulak el kirel a urered. A lsekum a rechedad, rechad el dodengelterir, me a rechad el dedak loureor a mecheblad er tir, e te locha mo orrimel er kid el mo stob el mesiou er a Jehovah e mo stob lomerk. Ngar er a bebil er a beluu e a ultok a mei loeak a ulekdakt, odechelakl, me a omengelebus. Ngkmal diak el mechas a rengud er aika el omerellir. A Jesus ulemlaoch el kmo: “Rokui el chad a mo ouketui er kemiu el ngak a uchul.” (Mt. 24:9) Kid el chuarm er chouaika el blekeradel ochotii el kmo kede oba kengei er a Jehovah. (Mt. 5:11, 12) A Diabelong a uchul aika el odechelakl. Me nguaisei engdi a Jesus a lmuut el mesisiich er ngii! Ngoeak a ngelsuil a Jesus e a ungil chais a oberkang el mora rokui el renged. Molatk aike el olechotel.

7. Ngera ke mla mes el lochotii a otutel a Ocholt 14:6, 7?

⁷ A dirrek el ta er a omelsemai el lechelebangel er ngii a ruumerk a chisel a Renged a rechad a diak leta omelekingir. Ngar er a ues el Jesus a milsa apostol Johanes e ngulemlaoch el kmo chelecha el taem er kid e a ungil chais a mo mesisiich er tia el omelsemai. (Monguiu er a Ocholt 14:6, 7.) Ngoeak a ngera el rolel? Kid a mla mesterir a rebetok a techellir el mo kongei er a klumech er a Renged. A rechad er chelechang a sebechir el menguiu a babier el mengai a uchetemel er a Biblia er a website er kid el jw.org le ngmla motobed el ngar er a betok er a 1,000 el omelekoi! A Governing Body a kilengei me lemoiuid el mo ngar er a betok er a 700 el omelekoi a Mkiei el Mo Cherechar!, el ngii sel babier el dousbech er ngii el meruul er a redisaiplo. A kall er a klereng a dirrek el motobed loeak a video el kirir a rebengong me a dirrek el braille el kirir a remeiko. Kede kmal omes a ulaoch er a Biblia el toutang. A re “chad er a bek el omelekoi er aike el ngodech el beluu” a mesuub el mo medengelii a “bliochel el omelekoi” el ngii a klemerang er a Biblia. (Sek. 8:23, NW; Sef. 3:9, NW) Aika el rokui a meketmokl el ngar cheungel a ulekrael er a Jesus Kristus.

8. Ngera mla meketmokl er a urered er a berkel a klumech?

⁸ Chelecha el taem e te betok er a 8,000,000 el chad el ngar er a 240 el beluu a chedal a cheldebechelel a Jehovah, e a derta el rak e te betok el telael el chad a metecholb! E sel lmuut el klou a ultutelel er a idisel a rechad el  mei er a klemerang a “ngikel beches el chad” el lomekbail er tir er ngii, el ngii a blekerdelir a Rekristiano el bla lukeroul. (Kol. 3:8-10, BT) A rebetok er tir a mla mo diak lengar er a deleboes, le bekongesengasech a rengrir e lolemall er a rebebil, longetukel, e lomdasu el kmo belurir a kot el ungil. A ulaoch el ngar er a Isaia 2:4 a toutang. Ng “diak lluut el mengedmokl el kirel a mekemad.” Sel doureor el meringel lomekbail er kid er ngike el beches el chad e kede rulleterir a rechad el mo sorir a cheldebechelel a Dios, e ochotii el kmo kede oltirakl er a Jesus Kristus el ngii omekrael er kid. (Jn. 13:35; 1 Pe. 2:12) Aika el tekoi a diak di ble le kiul el mo uaisei. Nguaisei e le Jesus el olengeseu er kid.

9. Ngera el ulaoch el kirel a taem er a ulebongel a louchais er ngii a Mateus 24:45-47?

⁹ Monguiu er a Mateus 24:45-47. A Jesus ulemlaoch el kmo a taem er a ulebongel e ngmo tutkii a “blak a rengul e mellomes a rengul el mesiou” el ngii a mo omeskid a kall er a klereng. Me kede melatk el kmo ngika el mesiou a locha kmal mo meringel loureor er chelecha el taem er kid. E tia kmal klemerang. A Jesus a mla ousbech er a kekerei el cheldellel a rengellitel el odam el omesterir a rechedal a Dios me a rechad el semeriar a “kelir er sel belsechel.” Tirka el odam a kmal diak lomdasu el kmo te mengedereder a klaumerang er a rechad. (2 Ko. 1:24) Te bai mtebengii el kmo ng Jesus Kristus a “mengeteklir” a rechedal.​—Isa. 55:4, NW.

10. Ngera er aike el babier el ngar er a siasing a ngilsukau el mo omuchel el mesiou er a Jehovah?

¹⁰ Sera 1919 el mei e ngika el blak a rengul el mesiou a mla kutmokl a betok el babier el mla mesterir a resemeriar el chad a techellir el mo mesuub a klemerang er a Biblia. Sera 1921 e te ultebedii a book el The Harp of God el mo  olengeseu er a resemeriar el mo medengei aike el beot el osisechakl er a Biblia. Omerollel a taem e te ultobed a lmuut el bebil er a babier loltirakl er a ngeldechel a blekeradel. Ngera el babier a ngilsukau el mo medengelii e mo betik a rengum er a Demad el ngar er a eanged? Ngbabier el “Let God Be True,” A Klemerang el Choitikikid el Mora Klengar, Ng Sebechem el Kie er a Paradis er tia el Chutem el mo Cherechar, Knowledge That Leads to Everlasting Life, Ngerang Mera el Lolisechakl a Biblia?, What Can the Bible Teach Us?, me a lechub e ngtia el beches el babilenged el Mkiei el Mo Cherechar! Aika el babier el rokui a mileketmokl lolengeseu er kid el meruul er a remo disaiplo. Aika el babier a mle chatter er a blekeradel er sel taem er a lemotobed.

11. Ngera uchul me ngklou a ultutelel a derokui el melai a kall er a klereng?

¹¹ Ngdiak di el tirke el beches el semeriar ousbech a medecherecher el kall er a klereng. Kede rokui lousbech er ngii. A apostol Paulus a dilu el kmo: “A medecherecher el kall a kirir a re meklou el chad, el loeak a ikel bla lesuub e ng sebechir el tiriter a ungil ma mekngit.” (Heb. 5:14) Ngkmal sebechel mo meringel er kid oltirakl a llechul a Jehovah e le betok er a rechad a meruul a diak el klikiid el tekoi. Me nguaisei engdi Jesus oterekeklii el kmo kede mo nguu a klisiich el dousbech er ngii loeak a kall er a klereng. Aika el kall a mei loeak a Tekingel a Dios el Biblia. A blak a rengul el mesiou a meruul e oltobed aika el kall loeak a ulekrolel a Jesus.

12. Ngua Jesus, kede mekera mla odengesii a ngklel a Dios?

¹² Ngua Jesus, kede msa ngklel a Dios a odanges el leredemelel. (Jn. 17:6, 26) El ua tiang, sera 1931 e kede ngiluu a ngakl el mengai er a Bades el Resioning er a Jehovah. Tia ochotii el kmo a ngklel a Dios a kmal klou a ultutelel er kid e soad a rechad a bo  lodengelkid loeak tia el ngakl. (Isa. 43:10-12) E ulemuchel er a October er tiakid el rak el mei er chelechang, e tia el ngakl a desang er a medal a bek el Ongkerongel el motobed. Me a lmuut kung, a oidel a Biblia el New World Translation of the Holy Scriptures a mla olutii a ngklel a Dios el mo er aike el kirel ngar ngii. Ngkmal ngodech a desang er a klechelid er a beluulechad el mla otebedii a ngklel a Jehovah er a betok el oidel er a Biblia!

13. Ngera oterekeklii a rengum el kmo, a Jesus a ousbech er a “blak a rengul e mellomes a rengul el mesiou” er chelecha el taem? (Johanes 6:68)

¹³ Ngoeak a “blak a rengul e mellomes a rengul el mesiou” e a Jesus a mla toketekii a cheldebechel er tia el beluulechad el ngii a melisiich er a bliochel el omengull. Ngera uldesuem el kirel tia el cheldebechel? Ke locha mo melatk a tekingel a Petrus er a ledu er a Jesus el kmo: “Rubak, ng techa ki bor ngii? Kau olab a tekoi er a diak a ulebengelel klengar.” (Jn. 6:68) A derta me a derta er kid, ngmo ua ngerang klengar er kid er chelechang a lemlak bo dodengelii a cheldebechel a Jehovah? Ngoeak tia el cheldebechel e a Kristus olterekokl el kmo, kede ungil blengur er a kall er a klereng. Ngdirrek el lousbech er ngii el train er kid el mo ungil kutmeklii a berkel a klumech. Ngdirrek lolengeseu er kid el mo oubail er “ngikel beches el chad” me bo dodeuir a rengul a Jehovah.​—Efe. 4:24, BT.

14. Ngera el klungiaol obla mngai er a temel a rakt el COVID-19 e le kau el chedal a cheldebechelel a Jehovah?

¹⁴ A Jesus a meskid a mellomes el ulekrael sel leduubech a bkaischemrungel. A klungiolel aika el ulekrael er ngii a mleues er a ledubech a rakt el COVID-19. Alta rebetok a dimlak  lodengei el kmo te mekerang, a Jesus a ulterekeklii el kmo kede mo ngmai a bleketakl el ulekrael el mo melemolem el safe. Te millisiich er kid el mo ou face covering e practice a physical distancing. A remechuodel a lulemeklatk er tir el mo blechoel el check er a rechad er a ongdibel e mo medengei aike el lousbech me bo lsebechir el melemolem el safe, e mesisiich a bedengir, e kmeed er a Jehovah. (Isa. 32:1, 2) Kede dirrek el ngilai a lmuut el bebil er a ulekrael me a omelisiich er aike el update er a Governing Body.

15. Ngera el ulekrael a dengilai el kirel a miting me a odingel er a temel a COVID-19, e ngera dilubech?

¹⁵ Temel a COVID-19 e kede dirrek el ngilai a bleketakl el ulekrael el kirel a rolel a doruul a miting er kid e domerk er a klumech. Kede di mle mereched el mo ngar er a miting, assembly, me a convention lousbech a videoconference. Me a rolel a domerk er a klumech a di mlo ousbech a dengua me a letter writing. A Jehovah a ulemekngeltengat er kid. A betok el branch a mla report a klou el ildois er a publisher el mlo er ngii. Ngbetok a ungil experience el dilubech el kmal melisiich er kid.​—Momes er a baks el “ A Jehovah Omekngeltengat er a Berkel a Klumech.”

16. Ngera sebechel mo ulterekokl a rengud el kirel?

¹⁶ A rebebil a ulemdasu el kmo a cheldebechel a kmal meringel a tekingel el kirel a pandemic. Ngdi ngbek el taem el lemlocholt el kmo ngmellomes a ulekrael el bilskid. (Mt. 11:19) Sel dolebedebek er a rolel a Jesus a omekrael er a rechedal, e ngolterekokl er a rengud el kmo a ngii di el ngerang el mo duubech a Jehovah me a Ngelekel a obengked.​—Monguiu er a Hebru 13:5, 6.

17. Ngera uldesuem sel modengei el kmo ke oureor er cheungel a ulekrael er a Jesus?

¹⁷ Ngmera el dmeu a rengud el ngar cheungel a ulekrolel a Jesus! Kede chedal a cheldebechel el tang alta kede chad er a kakerous el beluu el kakerous a omelekinged me a siukang er kid. Kede melai a betok el ulekrael er a Tekingel a Dios e dirrek el melai a training el dousbech el mo kutmeklii a ureor er a berkel a klumech. A derta er kid a mongeseu el mo oubail er ngike el beches el chad, e mesuub el mo kaubltikerreng. Kede kmal chansing er kid le Jesus ngike el omekrael er kid!