1-3. (a) Ngera dilubech el mle sebechel mo uchul a klekakeakl er a ongdibel er a rekot el Kristiano? (b) Ngmekera mo klungioled sel dosuub er tia el cheldecheduch er a babier er a Rellir?

 A PAULUS me a Barnabas a kmal dmeu a rengrir. Te mla mo merek er a kot lomerollir el missionari e luueta el mei er a mats er a Antiok er a Siria. Ngkmal dmeu a rengrir e le Jehovah “mla mekengii a rael el kirir a re Chisentael me bo loumerang.” (Rel. 14:26, 27) Te omes er a osisiu el tekoi el duubecha er a Antiok! A ungil chais a mla oberk me “te betok el chad” er a Chisentael a mla mo Kristiano.—Rel. 11:20-26.

² Me nguaisei engdi a Rekristiano el ngar er a Judea er a lerenges el kirel, e ngdiak el tir el rokui a mle dmeu a rengrir. A rebebil er tir uluumerang el kmo a rokui el Kristiano a kirir el mora botk. Me a Rekristiano el Chijudea me a Rekristiano el Chisentael, ngkirel uangerang omerellir el mora tang me a tang, e kirel uangerang osengir a Rekristiano el Chisentael el bedul a Llach er a Moses? Tia el mondai el mlo uchul a nglemuu a kmal mlo klou el tekoi e mlo melsemai er a kltarreng er a rudam. Me te mekera mo sumecheklii?

³ Sel dorriter er tia el cheldecheduch er a babier er a Rellir e kede mo suub a betok el kmal mekreos el tekoi. Aika mo ngosukid el mo mengeluolu er a kltarreng er kid er chelechang sel leduubech a tekoi el mo melsemai er ngii.

 4. Ngera el cheleuid el uldasu a lullisiich a rebebil er a Rekristiano, e ngera el ker a duubech?

⁴ A disaiplo el Lukas a meluches el kmo: “A re bebil el chad a mlar a Judea el mor a Antiok e mocha olisechakl er a ruumerang el kmo, ‘Ng diak el sebechiu el suobel a lak mo botk el oltirakl a Llach er a Moses.’” (Rel. 15:1) Ngdiak dodengei el kmo tirka el “chad [el] mlar a Judea” te mle Farisi er a uchei er a bo le Kristiano. Engdi kede mesa el kmo te dirk mle cheltikaik er a uldasu el lullab a Refarisi, el kmal mle mesisiich el loltirakl er a Llach. Te dirrek el locha millekoi el kmo te mengedecheduch el kirir a rechapostol me a remechuodel el ngar  er a Jerusalem. (Rel. 15:23, 24) Ngera uchul me a Rechijudea el mla mo Kristiano a dirk millisiich er a botk, alta ngmla mo bekord el 13 el rak er uriul er a loutkeu er a rediak el blotk el Chisentael a apostol Petrus el mei er a ongdibel er a Rekristiano lotirakl er a ulekrolel a Dios? a—Rel. 10:24-29, 44-48.

5, 6. (a) Ngera uchul me a rebebil er a Rechijudea el mla mo Kristiano kmal dirk ulerreked er a botk? (b) A telbiil er a botk ngmle uldimukl er a telbilel a Jehovah el mora Abraham? Mosaod. (Momes er a footnote.)

⁵ Nglocha betok a uchul. A ta er ngii, a Jehovah ngii a dilu er a resechal er a rechedal el mo obotk, e mle olangch el kmo ngmla er ngii a ileakl el deleuill er tir me ngii. Ngdilu er a Abraham me a rokui el sechal el kiliei lobengkel me bo lobotk e a uriul a botk a mlo uldimukl er a telbiil er a Llach. b (Lev. 12:2, 3) A doltirakl er a Llach er a Moses e ngmo lmuut er a rechad el diak el chad er a Israel me ngkirir lobotk e seikid e ngmo sebechir el teloi a chedaol sils el uai a menga er a blengur er a Baskua. (Exo. 12:43, 44, 48, 49) Me ngngar osengir a Rechijudea e a chad el diak el blotk a diak el klikiid e diak el sebechel mesiou er a Dios.—Isa. 52:1.

⁶ Me a Rechijudea el Kristiano uluusbech er a klaumerang me a klengariourreng el melodech a uldesuir el mo oltirakl er a beketeklel a klemerang. A Llach er a telbiil a mla mutechei er a beches el telbiil, me a obechell el Chijudea dikea lerellau el mo ta er a chedal a Dios. Me a Rechijudea el mla mo Kristiano el kiliei er a delongelir a Rechijudea, el ua Rekristiano el ngar er a Judea a uluusbech er a blekeu el mo kongei er a Kristus e kongei er a rekldemir er a klemerang el Chisentael el diak el blotk.—Jer. 31:31-33; Lk. 22:20.

 7. Ngera el klemerang a dimlak lutab tirke el “chad [el] mlar a Judea”?

⁷ Nguaisei a Dios a dirkak lengedechii a uldesuel e le omellach er a Llach er a Moses a deues er a beches el telbiil. (Mt. 22:36-40) El ua tiang, a Paulus a milluches er uriul el kirel a botk el kmo: “Ngikel chad ra Judea chelsel a rengul, ingii a chad ra Judea, me sel botk ra reng loeak a klereng, el diak loeak a llechukl, ingii a meral botk.” (Rom 2:29, BT; Dut. 10:16) Tirka el “chad [el] mlar a Judea” dimlak el lutab aika el klemerang e bai millisiich el kmo a Jehovah dirk mengerechir er a rechedal el mo obotk. Te mo kongei el ngmodech a uldesuir?

 8. Ngera uchul me te ngiluu a mondai er a botk el mora governing body el ngar er a Jerusalem?

⁸ A Lukas a melemolem el melekoi el kmo: “Mitia e ngdilubech a kloul nglemuu ma klaititekangel ra delongelir tir [el “chad [el] mlar a Judea”] ma Paulus ma Barnabas, mar udam a tilbir el kmo a Paulus ma Barnabas mar bebil er tir a mora Jerusalem loker rar apostel mar mechuodel er tial mondai.” c (Rel. 15:2, BT) A “nglemuu ma klaititekangel” ulechotii el kmo ngkmal mle mesisiich a uldesuel a bitang me a bitang me a ongdibel er a Antiok a dimlak el sebechel sumecheklii. Me a ongdibel ulechotii a llomeserreng el kiltmeklii me lenguu tia el tekoi el “mora Jerusalem loker rar apostel mar mechuodel” el tir a mle governing body, me a ongdibel lolemolem el budech e ngar er a kltarreng. Ngera sebeched el suub er a remechuodel er a Antiok?

9, 10. Ngoeak a ngera el rolel e a rudam er a Antiok me a dirrek el Paulus me a Barnabas a kutmeklii a ungil kerebai el kired er chelecha el taem?

⁹ A ta er a klou a ultutelel el tekoi el desuubii a kmo, ngkired loumerang er a cheldebechelel a Dios. Molatk er tiang: A rudam er a Antiok a mle medengei el kmo a rechedal a governing body a Rekristiano el Chijudea. Engdi te uluumerang el kmo te mo sumecheklii a mondai er a botk el loltirakl er a Bades. E ngerang? Tia el ongdibel a mle ulterekokl a rengrir el kmo a Jehovah mo omekrael er tia el tekoi loeak a chedaol reng er ngii me a Bdelul ongdibel er a Rekristiano el Jesus Kristus. (Mt. 28:18, 20; Efe. 1:22, 23) Sel leduubech oberaod el mondai er chelecha el taem e doukerebai er a ungil kerebai el lekiltmeklii a rudam er a Antiok loeak a doumerang er a cheldebechelel a Dios me a Governing Body el rruul er a rengellitel el Kristiano.

¹⁰ Kede dirrek el muklatk er a klungel a ultutelel a klengariourreng me a kllourreng. A chedaol reng a tiltkii a Paulus me a Barnabas el mo er aike el renged engdi te dimlak lomdasu el kmo tia milsterir a llemeltir el mesmechokl er a mondai el dilubech er a Antiok. (Rel. 13:2, 3) Me a lmuut kung a Paulus a milluches er uriul el kmo: “Ak mlo [er a Jerusalem] el ocholt a uchul,” el ngii ochotii el kmo a chedaol reng ulemekrael er ngii. (Gal. 2:2, BT) A remechuodel er chelecha el taem me te dirrek el mora tkurrebab el klisichir el olecholt er a osisiu el klengariourreng me a kllourreng sel leduubech a mondai el  sebechel mo uchul a klekakeakl. Te diak loumondai e lolisiich el kmo a uldesuir a melemalt, te bai omes el bedul a Jehovah loeak a lorriter a bades me a osisechakl me a ulekrael er a blak a rengul mesiou.—Fil. 2:2, 3.

11, 12. Ngera uchul me ngkmal klou a ultutelel a dongiil er a Jehovah?

¹¹ Ngar er a bebil blekeradel e nglocha mo kired el mengiil er a Jehovah el omeketakl er a tekoi. Lak mobes el kmo a rudam er a taem er a Paulus a milengiil el mora bekord el 49 C.E., el ngii a mle 13 el rak er uriul er a lenguu a chedaol reng a Kornelius er a 36 C.E. e a Jehovah mlo meketeklii el mora rokui el chad el kmo a Rechisentael a diak lousbech el mora botk. Ngera uchul me ngmlo chuib a kemanget el taem? A Dios a locha mle soal lomesterir a re bliochel a rengrir el Chijudea a taem el mo melodech a uldesuir el mo oltirakl er a uldesuel. Tia el terebengel a telbiil el mla er ngii el 1,900 el rak, el lerirellii a Dios lobengkel a betik er a rengrir el ruchelir er a Abraham a kmal klou el omelodech!—Jn. 16:12.

¹² Ngmera el chetengakl el techall el Jehovah oba kllourreng el mekekokil lolisechakl e olengeseu er kid el mo omdasu e omelechesiu el uai ngii! Aike el dengai er ngii a blechoel lungil e uchul a klungioled. (Isa. 48:17, 18; 64:8) Me lak bo lekedidai a rengud e dolisiich a di uldesued me a lechub e bo de negative sel dengai omelodech er a cheldebechel me a lechub ngngeldechel omesodel a bades. (Oli. 7:8) A lsekum ke mtebengii el kmo ke kora mla mo feel me a lechub e komdasu el uaisei, e bom dmolech el melebedebek aike el sebechem el suub er a 15 el bliongel er a Rellir e molengit er a Jehovah me lengesukau el mo oltaut. d

13. Ngmekera sebeched el loukerebai er a Jehovah el ngar er a urered lomerk e olisechakl?

 ¹³ Kede locha kmal mo ousbech er a kllourreng sel dosuub lobengkel a chad el meringel er ngii a mengoit a cheleuid el klaumerang er ngii me a lechub e ngmeringel er ngii a stob el meruul a siukang er a klechelid. Ngar er a chelsel a chouaisei el blekeradel e kede mo ousbech er a taem el mecherei a chedaol reng er a Dios me ngoureor er a rengul. (1 Ko. 3:6, 7) Ngdirrek el kired el meluluuch el kirel. A Jehovah mo meketeklii sel kot lungil el rolel e ngsebeched el ngosuir.—1 Jn. 5:14.

14, 15. (a) Ngmilekera ongdibel er a Antiok e ochotii omengull el mora Paulus, Barnabas, me a rubengterir? (b) Milekera Paulus me a rubengkel e mle klengeltengat el mora rekldemir er a klemerang el blo le kasoues lobengterir?

¹⁴ A Lukas a melemolem el melekoi el kmo: “Me a rechad er a ongdibel a ulebengterir el rolii a tedobech er a omerollir e ngodeterir, me te mirrael el lokiu a Fenisia me a Samaria e uluuchais a komakai el tekoi el dilubech er a lobult a rechad er a renged me a rokui el odam a kmal mlo dmeu a rengrir.” (Rel. 15:3, NW) Me a ongdibel ulechotii a bltikerreng me a omengull el mora Paulus me a Barnabas me tirke el bebil er a lorael lobengterir el mora melengel omerollir, e ulechotii el kmo ngmle sorir a lenguu a klengeltengat er a Jehovah. Tia lmuut el ta er a ungil kerebai el lekiltmeklii el kired a rudam er a Antiok! Kau, ke ochotii omengull el mora rudam me a rudos er kau, el “ngar uchei e tirkel [remechuodel el] omerk e olisechakl a tekingel a Dios”?—1 Ti. 5:17.

¹⁵ Ngar omerollel a Paulus me a rubengkel el mora Jerusalem e te kmal millisiich er a Rekristiano el ngar er a Fenisia me a Samaria er a louchais er tir a “komakai” el tekoi el dilubech er a lomerk el mora Rechisentael. A rebebil er a rudam el ulerrenges er tir a locha Rechijudea el Kristiano el chiliis el mora ika el beluu er a lokodir a Stefanus. Ngdi osisiu er chelecha el taem, a rudam sel lerenges a chais el kirel a Jehovah lomekngeltengat er a ureor el meruul er a remo disaiplo e ngkmal melisiich er tir, tokubets tirke el chelebangel a ringel. Kau, ke melai a mui el klungiolem er a chouaika el chais loeak omngar er a miting, assembly, me a convention me a dirrek sel monguiu a experience me a chisel a klengar er a rechad el loltobed er aika el babilenged me a jw.org?

16. Ngera ochotii el kmo a tekoi er a botk a klunga el mondai?

¹⁶ Uriul er a lorael el 350 el mael el bedul a dimes e a rudam el  mlara Antiok a merema er a Jerusalem. A Lukas a melluches el kmo: “Me a lebocha er a Jerusalem e a ongdibel me a rechapostol me a remechuodel a uluuetkeu er tir, me te uluuchais er tir aike el rokui el leriruul a Dios el oeak tir.” (Rel. 15:4, NW) Me nguaisei engdi a “rebebil er a rechedal a cheldebechel er a Refarisi el mla mo oumerang a milekiis e kmo: ‘Ngkirir el lobotk e kede dmu er tir me bo loltirakl er a Llach er a Moses.’” (Rel. 15:5, NW) Me ngbleketakl el kmo a betkir a Rekristiano el Chisentael a mla mo klou el mondai el mocha kirir el sumecheklii.

17. Te techa rirellii a governing body er a Jerusalem, e ngera uchul me a “re mechuodel” a mle uldimukl e tir?

¹⁷ A Osisechakl 13:10 a kmo: “Ng tekoi er a llomeserreng a dolengit a ngesou er a ungil uldasu.” Ngoltirakl er tia el omellach e a “re apostol ma re mechuodel a mlo kldibel el mesaod er [a mondai er a botk].” (Rel. 15:6) A “re apostol ma re mechuodel” a mirruul omelilt el kirel a rokui el ongdibel el ua loruul er ngii a Governing Body er chelecha el taem. Ngera uchul me a “re mechuodel” a milsiou lobengterir a rechapostol? Lak dobes el kmo a apostol Jakobus a bla lokodir me a Petrus a mle kelebus el telkib el taem. A osisiu el tekoi, ngsebechel duubech el mo er tirke el bebil er a apostol? A leuaisei e ngkmal klou a ultutelel a lengar ngii a lmuut el bebil er a rengellitel el odam el olengeseu el omekrael er a ureor.

18, 19. Ngera ngdilu Petrus, e ngera te mlo mtebengii a rulerrenges er ngii?

¹⁸ A Lukas a melemolem el melekoi el kmo: “Te mle kemanget el kaititekangel e sola e a Petrus a mocha dechor e dmu el kmo, ‘Rudam er ngak, kom medengei el kmo ng meketeketang er a le ngiltak a Dios er a delongeliu el mo olisechakl er a re Chisentael a tekoi er a Ebangkelio me bo le sebechir el rongesii e bo loumerang. Ma Dios, el ngii a medengei a uldesuir a re bek el chad, a ulechotii el ungil er a rengul a re Chisentael me ng milsterir a Chedaol Reng, el di ua ser a le beskid.  Ng dimlak loruul er a klekakerous er kid me tir; ng uluusubes a kngterir ele uchul e tir el mlo oumerang.’” (Rel. 15:7-9) A doltirakl er a ta el reference e a tekoi er a Grik el moiuid el “kemanget el kaititekangel” el ngar er a 7 el kekerei el bades a belkul a kmo, “oker a ker e merriter.” Me alta rudam a mle kakerous a uldesuir engdi te mle kongei el mesaod er ngii e kauchais a uldesuir el kirel.

¹⁹ A tekingel a Petrus a ulemeklatk er a rokui el chad el kmo, ngmla er sei er a lenguu chedaol reng er a 36 C.E. a rekot el diak el blotk el Chisentael el Kornelius me a telungalek er ngii. Me a lsekum e ngdiak a klekakerous er osengel a Jehovah a Rechijudea me a Rechisentael e ngngera klisichir a rechad el melekoi el uaisei? Me a lmuut kung, ngklaumerang er a chad er a Kristus a kikidii a rengul ngdiak el Llach er a Moses.—Gal. 2:16.

20. Te milekera tirke el millisiich er a botk e “melasem er a Dios”?

²⁰ Ngoltirakl aike el lebleketakl el dilu a Dios me a rolel e nguluusbech er a chedaol reng er ngii, e a Petrus a dilu el kmo: “A le ua isei, e ng ngera me chelechang e ng somiu el melasem er a Dios me kom omatk er a ruumerang er a tar a oberaod el chelungel el dimlak el sebechir a rucheled el cholngii me kid me ng diak el sebeched? Ng diak le ua isei! Kid oumerang el kmo kede mo suobel el okiu a krasia er a Rubak el Jesus, me tir me te ua isei.” (Rel. 15:10, 11) Me tirke el millisiich er a botk a ‘millasem er a Dios’ me a lechub e te “mengarm ra Dios” el ua loleiuid er ngii a ta el Biblia. Te millasem el meruul er a rediak el blotk el mo otirakl er a Llach, me nguaisei engdi tir me ngdiak el sebechir el cherrungel el lotireklii a Llach me te rredemelel a kodall. (Gal. 3:10) Me a Rechijudea el ulerrenges er a Petrus a bai mle kirir el oba omereng el saul er a krasia er a Dios el mlocholt loeak a Jesus.

21. Ngera ngdilu a Barnabas me a Paulus el ngilsuterir a rudam el mo ungil melilt?

²¹ A tekingel a Petrus a rirelleterir el mo omdasu e le “seked el rokir a di mlo lmuk.” Seikid e a Barnabas me a Paulus uluuchais “cholangch ma chongasireng el le riruul a Dios ra chelsir ar Chisentail luleak tir.” (Rel. 15:12, BT) Me chelechang e a rechapostol me a remechuodel a mocha sebechir el merriter a rokui el sioko e rullii omelilt el kirel a mondai er a botk el loltirakl er a soal a Dios.

22-24. (a) Ngmekera Governing Body er chelecha el taem e oltirakl er a kerebai er a governing body er a taem er a rekot el Kristiano? (b) Ngmekera sebechir a rokui el mechuodel el lochotii a respect er tir el kirel a rolel e a Jehovah soal a loruul a tekoi?

²² Chelecha el taem me a rechedal a Governing Body sel bo lekldibel e te melai a ulekrael er a Tekingel a Dios e meluluuch el lolengit  er a chedaol reng. (Psa. 119:105; Mt. 7:7-11, NW) Me a derta el chedal a Governing Body a di uchei e ngnguu a agenda me bo lsebechel melatk e meluluuch el kirel me lsebechir el meruul omelilt loltirakl er a uldesuel a Dios. (Osi. 15:28) E ngar er a miting e tirka el ngellitel el odam a sebechir el mimokl louchais a uldesuir el ngar er a rolel e ngochotii omengull. Te blechoel el ousbech er a Biblia er a temel a miting er tir.

²³ A remechuodel er a ongdibel a kirir el loltirakl er a kerebai er tir. A lsekum te mla mesaod er a oberaod el tekoi engdi ngdirk diak el sebechir el sumecheklii e ngsebechir el meluches el mora branch office er tir me a lechub ngtirke el telutk el lomtechei er a branch el ua re circuit overseer. A branch a mo meluches el mora Governing Body a lsekum e te mousbech el meluches el mong.

²⁴ Chochoi a Jehovah omekngeltengat er tirke el respect a ulekrael er a cheldebechel me a ongdibel e olecholt er a klengariourreng, blakerreng, me a kllourreng. Ngua bo desa er a ongingil bliongel, sel doruul el uaisei e a Jehovah mo omekngeltengat er kid er a budech, kltarreng, me a ongdibel a mukeroul.