A Dios a uleldak er a ruldidellel a rsechel a Abraham el mo ta el renged e milsterir a llecherir. Ngmilengeklii tia el renged el “Israel” e milsa ngerechelel el mo omekerreu er a mera el omengull me a tekingel. (Psalm 147:19, 20) Me tiang a mlo uchul e a rechad er a bek el beluu a sebechir el ngmai a klengeltengat el okiu a Israel.​—Monguiu er a Rellir 3:25.

A Dios a millilt er a rechad er a Israel el mo sioning er ngii. A reksi er tir a olecholt el kmo ngmo uchul a klungiolir a rechad sel lolengesenges a llechul a Dios. (Duteronomi 4:6) Me a rechad a mle sebechir el mesuub el mo medengelii a mera el Dios el okiu a rechad er a Israel.​—Monguiu er a Isaia 43:10, 12.

Cherengel a taem, e a renged er a Israel a urridii a kengei er a Jehovah me ngmlo diak el chedal, me ngmiltechir tia el renged el oba ongdibel er a Rekristiano. (Mateus 21:43; 23:37, 38) Me chelechang, e a remera el Kristiano a sioning el ouchais el kirel a Jehovah.​—Monguiu er a Rellir 15:14, 17.

A Jesus a ullisechakl er a rultirakl er ngii el mo omerk er a klumech e meruul er a remo disaiplo er a bek el beluu. (Mateus 10:7, 11; 24:14; 28:19, 20) Me chelecha el lolekedang a ulebongel, e tia el ureor a di kmedung e ngmo merek. A Jehovah a mla chudelterir a rebetok el miliol el chad er a bek el beluu el mo er a mera el omengull er chelecha el taem. (Ocholt 7:9, 10) A remera el Kristiano a dirrek el dmak el kasisiich e kaingeseu er a delongelir. Meliuekl er a beluulechad el rokir e te oldeu a rengrir er a osisiu el prokuram el kirel a osisechakl er a Biblia el ngar er aike el miting er tir.​—Monguiu er a Hebru 10:24, 25.

Ngar er aike el rak er a 1870, e a kekerei el cheldellir a remesuub er a Biblia a ulemuchel el mo medengei a mera el osisechakl er a Biblia el dimlak a rechad el medengei el kemanget el taem. Te mle medengei el kmo a Jesus a kiltmeklii a ongdibel er a Rekristiano el mo omerk er a klumech, me te ulemuchel er a ureor er a berkel a klumech er a Renged er a beluulechad el rokir. Sera 1931 e te ngiluu a ngakl el Resioning er a Jehovah.​—Monguiu er a Rellir 1:8; 2:1, 4; 5:42.

Sera irechar, e aike el ongdibel er a Rekristiano el ngar er a betok el beluu a ngilai a klungiolir er a chelechad er a ruungerachel el tir a ulemes er a Jesus el Bdelul a ongdibel. (Rellir 16:4, 5) Me ngdi osisiu, chelecha el sils e a Resioning er a Jehovah el meliuekl er a beluulechad el rokir a ngmai a klungiolir er a Chelechad er a Ruungerachel. Tia el chelechad er a rudam el mla chelebangel a betok el tekoi a oungerachel aike el obis er a Resioning er a Jehovah el oleiuid, e meruul, e merous a babier el kirel a omesubel a Biblia el ngar er a kuk betok er a 600 el omelekoi. Sei a uchul me ngsebechel el oltobed a omelisiich me a ulekrael el mengai er a Biblia el mo er a kuk betok er a 100,000 el ongdibel. Ngar er a derta el ongdibel, e te ngar er ngii a resechal el rredemelel a mesiou el mechuodel, el tir a omekerreu er a delebechel er a Dios el oba bltikerreng.​—Monguiu er a 1 Petrus 5:2, 3.

A Resioning er a Jehovah a kltmokl el mo omerk er a ungil chais e meruul er a remo disaiplo. Te uai a rechapostol el merael el oldingel a obliil. (Rellir 5:42) Te dirrek el mesuub a Biblia el obengterir a rechad el mera el betik a rengrir er a klemerang. Me nguaisei, engdi a Resioning er a Jehovah a diak el di el cheldebechel e lemerekong, te chimo el telungalek el ngar er ngii a betik a rengul el Demerir, e tir a rudam me a rudos el kaubltikerreng. (2 Thesalonika 1:3) A rechedal a Jehovah a sorir el odeuir a rengul e olengeseu er a rebebil a uchul, me te toketekii a cheldebechel er a rekmal dmeu a rengrir el chad.​—Monguiu er a Psalm 33:12; Rellir 20:35.