1, 2. Chelecha el taem e kede mo er ker e metik er a ungil el omderungel?

KA DI molatk er kau el leko ngmeses a eolt e ke merael er a rael. E ngii a mocha chedelekelek a eanged, e mo er ngii a bisebusech me a derumk, e ngongmengmii a chull. Me ke mocha orreched el osiik er a basio el bo momdor er ngii. E a omomes er a bita el rael, e ke mesang a ungil el omderungel el medidirt e selebechakl. Ke ulterekokl el kmal mo dmeu a rengum el kirel!

² A taem el dekiei er ngii er chelechang a ua taem er a ses el eolt. A blekeradel er a beluulechad a mekngit e di merael el lmuut el mo mekngit. Engdi ngngar er ngii a omderungel el sebechel el omekerreu er kid er a tellemall. Tiang ngerang? Momtab a lolisechakl a Biblia el kmo: “[A chad] a sebechel dmu [er a Jehovah]  el kmo, ‘Kau osebecheklek e klekerengek! Kau a Dios er ngak; ak uumeral ulsirs er kau.’”​—Psalm 91:2.

3. Kede mekera e rullii a Jehovah el mo osebechekled?

³ Ka molebedebek er tiang! A Jehovah, el Ngike el Ulemeob e Merreder er a eanged me a chutem a sebechel el mo osebechekled. Ngii ngike el kot el mesisiich me ngsebechel el omekerreu er kid er a ngii di el chad me a lechub a ngii di el ngerang el mo omtok er kid. Malta e nglocha sebechel el mo duubech a mekngit el me er kid, engdi a Jehovah a mo remuul el rokui el mo ungil er a ngar medad el klebesei. Me kede mekera rullii a Jehovah el mo osebechekled? Ngkired el mo oumerang er Ngii. A Tekingel a Dios a dirrek el mengelechel er kid el mo melemolem el “ngar a bltikerreng er a Dios.” (Jude 21) Chochoi, ngkired el melemolem el ngar er a bltikerreng er a Demad el ngar er a eanged e okesengii a deleuill er kid el obengkel. Seikid e ngmo ulterekokl a rengud el kmo ngosebechekled. Engdi ngmekerang e mo er ngii tia el kmes el deleuill er kid el obengkel a Jehovah?

4, 5. Ngera bebil er a rolel e a Jehovah a mla ochotii a bltkil a rengul el mei er kid?

⁴ A lsoad el melemolem el ngar er a bltikerreng er a Jehovah, e ngkired el mo melatk er a rolel a Jehovah a lolecholt er a bltkil a rengul el mei er kid. Ka molatk a bebil er a osisecheklel a Biblia el bla msuub loeak tia el babier. A Jehovah el Ngike el Ulemeob, a milskid a beluulechad el mo delengchekled. Ngmui er a kall me a ralm, me a lukel a klengar, me a bek el bedengel a charm, e kmal klebokel el basio. Ngmla ochotii er kid a ngklel me a blekerdelel el oeak a Tekingel el Biblia. Ngdirrek el ngar er a Tekingel e ngouchais er kid el kmo, ngulderechii a  betik er a rengul el Ngelekel el Jesus el mei er a beluulechad el mo chuarm e mad el kired. (Johanes 3:16) E tia el sengk ngngera belkul el kired? Ngmeskid a omelatk er a ungil el klengar er a ngar medad.

⁵ A omeltked er a ngar medad a dirrek el ultuil er a tekoi el bla leketmeklii a Jehovah, el ngii a kabelment el ngar er a eanged el longedereder er ngii a Mesias. Ngdi kmedung e tia el kabelment a mo torob a rokui el ringel e mo rullii tia el chutem el mo baradis. Ka di molatk er tiang! Ngmo sebeched el kiei el ngar er a budech me a deurreng el mo cherechar. (Psalm 37:29) Me nguaisei, chelecha el taem e a Dios a dirrek el mla osisecheklid el mo kiei el oltirakl er a kot el ungil el rolel a klengar. E mla meskid a mekreos el techall el sebeched el mimokl el mengedecheduch er Ngii. Aika di bebil er a rolel a Jehovah a olecholt er a bltkil a rengul el mei er kid el rokui.

6. Ngera sebechem el rullii el kirel a bltikerreng er a Jehovah el eko er kau?

⁶ A klou a ultutelel el ker el kirem el mo melatk er ngii a kmo: Ngera sebechek el rullii el kirel a bltikerreng er a Jehovah? Te betok a mo melekoi el kmo, “Ngdirrek el kirek el mo betik a renguk er a Jehovah.” Kau nguaisei a uldesuem? A Jesus a dilu el kmo, tia sel kot el ngarbab el llach. Ngmillekoi el kmo: “Bo le betik a rengum er a Rubak el Dios er kau er a rengum el rokir, ma klengar er kau el rokir, ma uldesuem el rokir.” (Mateus 22:37) Me ngar er ngii a kmal el betok el uchul e ngbetik a rengum er a Jehovah el Dios. Engdi ngmekera e mo betik a rengum er a Jehovah er a rengum el rokir, me a klengar er kau el rokir, me a uldesuem el rokir?

7. A bltikerreng er kid el mo er a Dios, ngngosukid el mo mekerang? Mosaod.

 ⁷ Me a Biblia a mesaod el kmo, a bltikerreng er kid el mo er a Dios a kmal klou a ultutelel. Me a bltkil a rengud el mo er Ngii ngngosukid el mo mekerang? Ngsebeched el omekesiu er ngii el uai tiang, a lsekum e ngsoam el menga rodech, e ngmo ungil a rengum a lsekum a chad a di meskau a tane? Ngkmal diak! Tia el tane a di uchelel a dellomel el ngii a mo ourodech. Ngdi uai sel tane, a bo debetik a rengud er a Dios a di uchelel a mera el bltikerreng el mo er a Jehovah. A Biblia a melekoi el kmo: “Ele bltikerreng er a Dios a belkul a kmo kede oltirakl a llechul. E a ikeikid el tekoi a diak lesal meringel er kid el meruul.” (1 Johanes 5:3) Me a lsekum e ngmera el betik a rengud er a Dios, e a bltikerreng er kid a kirel mukeroul e mo ungil el lourodech. E tiang a mocholt el oeak a omeruul.​—Monguiu er a Mateus 7:16-20.

8, 9. Ngmekera dolecholt a bltikerreng me a omereng el saul el mo er a Dios?

 ⁸ Kede ochotii a bltikerreng er kid el mo er a Dios sel doltirakl a llechul e bo doltaut a omellach er Ngii. Tia diak el meringel a doruul er ngii, e le Jehovah a riruul a llechul el mo olengeseu er kid el mo dmeu a rengud e ungil a klengar er kid. (Isaia 48:17, 18) Me kede ochotii el mo er a Demad el ngar er a eanged el kmo kede mera el oba omereng el saul el kirel aike el bla el rruul el kired, a lsekum e kede kiei el oltirakl a ulekrael er Ngii. Engdi ngklengiterreng e le te di mekesai er chelechang a olecholt a omereng el saul el mo er Ngii. Ngdiak el soad el mo uai a rechad el kiliei er a taem er a Jesus el dimlak loba omereng el saul. A Jesus a ulemekungil er a reteruich el chad el mle chebedes, engdi ngdi mle ta er tir a mlo oureng a sulel. (Lukas 17:12-17) Ngulterekokl el diak el soad el mo uai tirke el tetiu, ngbai soad el mo uai ngike el ulecholt er a omereng el saul!

⁹ Me ngngera el llechul a Jehovah el kired el oltirakl? Kede mla suub a betok er ngii er tia el babier, engdi ka me bo domelekl a bebil. A doltirakl a llechul a Dios e ngngosukid el mo melemolem el ngar er a bltikerreng er Ngii.

10. Msodii a klungel a ultutelel a dolemolem el melai a klemedengei el kirel a Jehovah el Dios.

¹⁰ A lsoad el mo kmeed er a Jehovah e ngkmal klou a ultutelel a dosuub el kirel. E tia tekoi el kired el melemolem el meruul er ngii. El uai tiang, a lsekum e ke mla er rikl e ngii a kmal mlo mekelekolt me ke chumlii a ngau me bo lsebechem el mengeald er kau, e ke mo mecherei tia el ngau me ngmad a ngeuil? Ngdiak, ke locha bai di omelecha idungel er ngii me ngmelemolem el kmard e mekeald. Me ngua idungel el meruul er a ngau  me ngdiak el mad a ngeuil, a “klemedengei er a Dios” a meruul er a bltikerreng er kid el mo er a Jehovah me ngdi mesisiich.​—Osisechakl 2:1-5.

11. A osisecheklel a Jesus ngera ngrirellii er a rulebengkel?

¹¹ A Jesus a mle soal a bltkil a rengrir a rubengkel el kirel a Jehovah me a klemerang el Tekingel a lolemolem el mesisiich. Uriul er a okisel, e ngulsisecheklterir a reteru er a redisaiplo er ngii a bebil er a ulaoch el ngar er a Chuodel el Renged el tilaut er ngii. Me ngngera dilubech? Uriul e te dilu el kmo: “Ng kor a kilard a rengud er ser a longedecheduch er kid er a rael e losaod er kid a Chedaol Llechukl?”​—Lukas 24:32.

12, 13. (a) Ngua ngera bltkil a rengrir a ruumesingd el chad er chelechang el kirel a Dios me a Biblia? (b) Ngmekera bltikerreng er kid e melemolem el mesisiich?

¹² Sera omkot el mo medengei el kmo ngerang mera lolisechakl a Biblia, e ngulterekokl el kmal mlo dmeu a rengum, e blak a rengum, e mlo betik a rengum er a Dios. Te betok a dirrek el mlo melechesuar el uaisei. Engdi chelechang e ngkmal kired el mo blak a rengud me a bltikerreng er kid el mo er a Dios a mukeroul e melemolem el mesisiich. Ngdiak el soad el oltirakl er a blekeradel er tia el beluulechad, el lullekoi er ngii a Jesus el kmo: “Ngmo mekelekolt a bltikerreng rar betok.” (Mateus 24:12) Me ngmekerang a bltikerreng er kau el mo er a Jehovah me a klemerang er a Biblia e melemolem el mesisiich?

¹³ Molemolem el mesuub el kirel a Jehovah el Dios me a Jesus Kristus. (Johanes 17:3) Bo molebedebek aike el mosuub el ngar er a Biblia e di lekau el oker el kmo: ‘Tia ngngera ngosisecheklak er ngii el kirel a Jehovah el Dios? Ngmekera ngosukak el lmuut el mo betik a renguk er Ngii el oba renguk el rokir, me a uldesuek el rokir, me a klengar er ngak el rokir?’ (Monguiu er a Psalm 77:12.) A omoruul el uaisei e ngrullii  a bltikerreng er kau el mo er a Jehovah me ngdi melemolem el mesisiich.

14. Ngmekera nglunguuch e ngosukid me ngdi melemolem el mesisiich a bltikerreng er kid el mo er a Jehovah?

¹⁴ A ta er a rolel e a bltikerreng er kid el mo er a Jehovah a melemolem el mesisiich a oeak sel deblechoel el meluluuch. (1 Thesalonika 5:17) Ngar er a 17 el Bliongel e kede silubii el kmo, a nglunguuch a ileakl el techelled el sebeched el mengedecheduch er a Dios. Me ngdi uai a deleuill er a rechad el mo mesisiich el oeak sel leblechoel el chadecheduch, a deblechoel el mengedecheduch er a Jehovah el oeak a nglunguuch a dirrek el rullii a deleuill er kid el obengkel me ngmelemolem el mesisiich. Me ngkmal diak el kired el mechei a nglunguched me di bo el tekoi el di domelekl e diak a mera el belkul. Ngkired el mengedecheduch er a Jehovah el ua ngalek a longedecheduch er a betik er a rengul el demal. Ngsoad el oba omengull e mengedecheduch er Ngii el ouchais a mera el ngar er a rengud. (Psalm 62:8) Nguaisei, a omesubed er a Biblia el di kid el tang me sel doluluuch el mera el ngar er a rengud a meklou a ultutelel el tekoi er a omengull er kid. Ngdirrek el ngosukid el mo melemolem el ngar er a bltikerreng er a Dios.

15, 16. Ngera uchul me kede omes er a berkel a klumech el kmal mekreos e dirrek el kmal ileakl el techall el dobang?

¹⁵ A omesubed er a Biblia el di kid el tang me a nglunguuch a rolel a omengull el doruul el di kid. Engdi me bo dosaod er a ta er a tedebechel a omengull el doruul er a buai, el ngii sel dongedecheduch er a rechad el kirel a klaumerang er kid. Kau ngmla ta el moruul er tiang? A leuaisei, e ke ulterekokl el mle dmeu a rengum er tia el  ileakl el techall. Sel douchais a klemerang el bla desuub el kirel a Jehovah el Dios, e kede meruul er a kmal klou a ultutelel el ngerachel el mloterekokl er a rokui el mera el Kristiano, el ngii a berkel a ungil el chais er a Rengedel a Dios.​—Monguiu er a Mateus 24:14; 28:19, 20.

¹⁶ A apostol el Paulus a ulemes er a omesiungel el kmal mekreos. (2 Korinth 4:7) Me a kot el ungil el ureor el sebechem el meruul er ngii a sel mouchais er a rechad el kirel a Jehovah me a moktek er Ngii. Ke mo mesiou er a kot el ungil el Mastang. Ke dirrek el mo ngmai aike el kot el ungil el klungiaol. Me sel moruul er tia el ureor, e ke olengeseu er a remelemalt a rengrir el mo kmeed er a Demad el ngar er a eanged e dirrek el mo nguu a diak a ulebengelel el klengar! Ngkmal diak a ngodech el ureor el sebechel meskid a uaisei el deurreng. Ngdirrek el sel mouchais el kirel a Jehovah me a Tekingel e ngsmisichii a klaumerang er kau me a bltkil a rengum el mo er Ngii. Me a Jehovah a dmeu a rengul er aike el omoruul. (Hebru 6:10) Sel omechesang el meruul er tia el ureor e ngngosukau el mo melemolem el ngar er a bltikerreng er a Dios.​—Monguiu er a 1 Korinth 15:58.

17. Ngera me a berkel a klumech a kmal orechudel er chelecha el taem?

¹⁷ Ngkmal klou a ultutelel a lak dobes el kmo, tia el ureor er a berkel a klumech a kmal orechudel. E ngerang? A Tekingel a Dios a kmo: “A kloul sils er a RUBAK a kmedang, ng kmal kmeed me ng di mereched el mei.” (Sefania 1:14) Nguaisei, ngkmal di kmedung e a Jehovah a mo okngemedii tia el blekeradel er a beluulechad. Me ngkired el mo mengelechel er a rechad! Ngkirir el mo medengei el kmo chelechang e ngmla mo taem el lolilt er a Jehovah el mo Merredelir. E le ulebongel a “diak bo le meoud.”​—Habakuk 2:3.

18. Ngera me ngkired el mengull er a Jehovah el teloi er a remera el Kristiano?

 ¹⁸ A Jehovah a soal a dongull er Ngii el teloi er a remera el Kristiano. Ngar er a Tekingel e ngmelekoi el kmo: “Bo de kaukerreu e de kaingeseu el olecholt er a bltikerreng e  doruul a ungil. E lak dongoit a ongdibel er kid el ua blekerdelir a re bebil er a re chad, e bai le mengal mo blak a rengud el kasisiich er chelechal domes er sel Sils er a Rubak el olekedang.” (Hebru 10:24, 25) Sel dobengterir a rekldemed el ngar er a miting er a Rekristiano e ngmeskid a kmal ungil el techall el mo mengebkall e mengull er a betik er a rengud el Demad. Ngdirrek el sebeched el kasisiich er a delongeled.

19. Ngmekera doureor el melisiich er a bltikerreng er a chelsel a ongdibel er a Rekristiano?

¹⁹ Sel dobengterir a remesiungel a Jehovah, e kede smisichii a bltikerreng me a klausechelei er kid el ngar er a ongdibel. Ngkmal klou a ultutelel a domes a ungil el blekerdelir a rebebil, el uai a Jehovah el omes a ungil er kid. Lak dobes el kmo a rekldemed er a klaumerang a di uai kid el diak el mecherrungel. A rokui el ngar er a ongdibel a dirk omekeroul er a ungil el deleuill er tir el obengkel a Dios, me a lebebil er a taem e te mo remuul a cheleuid. (Monguiu er a Kolose 3:13.) Sel bo momekeroul er a deleongel er kau el obengterir tirke el betik a rengrir er a Jehovah, e ke mo melechesiu er kau el olengeriakl er a tekoi er a klereng. Nguaisei, a omongull er a Jehovah el obengterir a rekldemem er a klaumerang e ngngosukau el mo melemolem el ngar er a bltikerreng er a Dios. Ngmekera Jehovah a lomesterir a omeksullir tirke el blak a rengrir el mengull er Ngii me te melemolem el ngar er a bltikerreng er Ngii?

20, 21. Ngera “meral klengar”? E ngera me ngkmal ungil el omelatk?

²⁰ A Jehovah a mla mesterir a reblak a rengrir el mesiungel a klengar el omeksullir. Engdi ngngera el klengar? Kid ngdiak dengar e le kid el ngar er ngii a klengar er kid? Nguaisei, a ruumesingd el chad a mo kongei er tia el  tekoi e le kid el ngar el outeliil, e mengang, e melim. E ngar aike el taem el mera el dmeu a rengud e kede locha mo melekoi el kmo, “Tia e a klengar!” Nguaisei, engdi ngngar er a Biblia e ngochotii el kmo, tia el klengar er chelechang a diak lemera el klengar.

²¹ A Tekingel a Dios a mengelechel er kid el mo “nguu a klengar, el meral klengar.” (1 Timothy 6:19, BT) Tia ochotii el kmo, a “meral klengar” a tekoi el dolatk el mo melai er ngii er a ngar medad el taem. Nguaisei, sel bo demecherrungel, e kid a mera el mo medengelii a belkul a klengar, e le kede mo kiei el oltirakl er sel dimla moktek er a Dios. Me sel bo dekiei el ngar er a baradis el chutem el cherrungel a klisichel a bedenged, e ngar er a budech, e dmeu a rengud, e seikid e kede nguu a “meral klengar,” el ngii a diak a ulebengelel el klengar. (1 Timothy 6:12) Tia ngdiak el kmal ungil el omelatk?

22. Ke mekerang e “nguu a klengar, el meral klengar”?

²² Kede mekerang e “nguu a klengar, el meral klengar”? A Paulus a milengelechel er a Rekristiano “me loruul a ungil” e “bo le merau ra ungil lurreor.” (1 Timothy 6:18, BT) Me nguaisei, a klou er ngii a ultuil er a bo doltaut a klemerang el bla desuub er a Biblia. Me a tekingel a Paulus ngmle belkul a kmo, kede nguu a “meral klengar” el oeak a ungil el ureor el doruul? Ngdiak. A omeltked a ultuil er a “krasia er a Dios.” (Rom 5:15) E a Jehovah a dmeu a rengul el lomesterir a omeksullir tirke el blak a rengrir el mesiou er Ngii. Ngsoal el mesekau el mo nguu a “meral klengar.” Me a diak a ulebengelel el klengar el ngar er a deurreng me a budech a kltmokl el kirir tirke el melemolem el ngar er a bltikerreng er a Dios.

23. Ngera me ngklou a ultutelel a dolemolem el ngar er a bltikerreng er a Dios?

²³ A derta er kid di lekid el oker el kmo, ‘Ngak ak mesiou  er a Dios er sel rolel el lolecholt er ngii a Biblia?’ A lsekum a nger er kid a di choi er a bek el sils, e kede ngar er a melemalt el rael. Ngsebechel mo ulterekokl a rengud el kmo a Jehovah a osebechekled. Ngii a mo omekerreu er a reblak a rengrir el chedal er aika el uriul el sils er tia el mekngit el blekeradel. Ngii a mo osebelid me kede mo kiei er a chelsel a beches el blekeradel el ngii a kmal di kmedang. Ka di molebedebek er a deurreng el bo dobang er isei el taem! Ngulterekokl el mera el mo dmeu a rengud e le kid el mle ungil melilt a tekoi er chelecha taem! Me a obo mungil el melilt a tekoi er chelechang e ke mo nguu a “meral klengar,” el klengar el diak a ulebengelel el oltirakl er sel dimla moktek er a Jehovah el Dios!