Nò, nos no ta preshoná ningun hende pa kambia di religion. Den nos revista prinsipal, E Toren di Vigilansia, nos a bisa: “Ta robes pa fòrsa hende kambia nan religion.” a Dikon nos no ta preshoná hende pa kambia di religion? Ata algun motibu:

•   Hesus nunka a preshoná hende pa aseptá su siñansanan. E tabata sa ku masha poko hende lo aseptá su mensahe. (Mateo 7:​13, 14) Un biaha, ora algun di su disipelnan a bai lag’é pasobra nan no tabata di akuerdo ku un di su siñansanan, el a laga nan bai; e no a obligá nan keda.​—Huan 6:60-62, 66-68.

•   Hesus a siña su siguidónan ku nan no mester fòrsa hende pa kambia nan kreensianan. Su siguidónan no tabata fòrsa hende pa aseptá e bon notisianan di Reino. Mas bien, nan a buska hende ku tabata ke skucha nan mensahe.​—Mateo 10:​7, 11-​14.

•   No ta bale la pena fòrsa hende pa kambia di religion pasobra Dios ta deseá pa hende ador’é di kurason.​—Deuteronomio 6:4, 5; Mateo 22:37, 38.

 Ta bèrdat ku nos ta hiba e mensahe di Beibel “te na e partinan di mas leu di tera,” i nos ta hasi esei “públikamente i … di kas pa kas,” manera e Palabra di Dios ta bisa. (Echonan 1:8; 10:42; 20:20) Anto meskos ku e promé kristiannan, tin biaha, nos ta ser akusá di obligá hende aseptá nos kreensianan. (Echonan 18:12, 13) Pero e akusashonnan ei ta falsu. Nos no ta fòrsa niun hende pa kere loke nos ta kere. Pero nos ta kere sí ku ta bon pa tur hende haña un oportunidat di siña tokante Beibel pa asina nan por tuma nan mes desishon.

 Nos no ta fòrsa niun hende pa kambia di religion. Ni nos no ta usa religion pa logra meta polítiko ni nos no ta ofresé ayudo sosial òf material pa haña miembro. Nos no ta manera e hendenan ku ta bisa ku nan ta kristian pero ku ta falta rèspèt pa Kristu pasobra nan ta hasi kos ku ta bai kontra loke Kristu a bisa. b

 Sí. Beibel ta mustra ku hende tin derecho di kambia di religion. Tin vários ehèmpel bíbliko di hende ku a skohe pa no sigui e religion di nan famia sino a disidí di adorá e Dios berdadero. Ken asina? Wèl, algun di nan tabata Ábraham, Rut, algun hende di Aténas i Apòstel Pablo. (Hosue 24:2; Rut 1:14-16; Echonan 17:22, 30-34; Galationan 1:14, 23) Ademas, Beibel ta rekonosé ku hende tin asta derecho di stòp di adorá e Dios berdadero, maske esei no ta un bon desishon.​—1 Huan 2:19.

 E dokumento Deklarashon Universal di Derecho Humano, ku segun Nashonnan Uní ta kontené “e normanan fundamental i internashonal di derecho humano,” ta bisa ku nos tur tin “libertat di kambia religion òf kreensia” i tambe ku nos tin derecho di “investigá, risibí i duna informashon i opinion.” I esei ta inkluí pensamentunan religioso. c Ta klaru ku e derecho akí ta enserá tambe ku nos mester respetá e derecho ku hende tin di defendé nan kreensianan òf rechasá esun di nos.

 No nesesariamente. Beibel ta animá nos pa respetá tur hende, sin importá ki religion nan tin. (1 Pedro 2:17) Ademas, Testigunan di Yehova ta obedesé e mandamentu bíbliko pa onra nan mayornan, asta si nan tin un otro religion.​—Efesionan 6:2, 3.

 Pero, no ta tur hende ta di akuerdo ku loke Beibel ta bisa. Un señora di Zambia a konta: “Den mi komunidat, kambia religion tabata . . . un akto di deslealtat i un traishon kontra bo famia i bo komunidat.” Tempu ku e tabata tiner, el a hañ’é ku e situashon ei ora el a kuminsá studia Beibel ku Testigunan di Yehova i disidí di kambia su religion. E ta sigui bisa: “Mi mayornan tabata bisa mi kada bes ku nan tabata hopi malkontentu ku mi, i ku mi a laga nan na kaya. Esei tabata difísil pa mi, pasobra aprobashon di mi mayornan tabata hopi importante pa mi . . . Skohe pa ta leal na Yehova en bes di na tradishonnan religioso no kier men ku mi no ta leal na mi famia.” d