Tabata un dia friu ku hopi bientu na Alberta, Canada. Bob tabata stür su vèn ku un velosidat di 100 kilometer pa ora, ora ku diripiente un tayer di su vèn a rementá. Na promé instante, Bob no a realisá kiko a pasa i a disidí di sigui kore e sinku kilometernan ku tabata falta pa e yega su kas.

 Despues, den un karta ku el a manda pa e Salòn di Reino lokal di Testigunan di Yehova, Bob a splika kiko a pasa. El a skirbi: “Sinku hóben den un outo a kore den mi banda, a habri nan bentana i bisa mi ku un di e tayernan di mi vèn a rementá.” Nos a para kantu di kaminda i nan a ofresé pa kambia e tayer. Mi no tabata sa si mi tabatin djèk òf tayer di sper. Mi a sinta kantu di kaminda den mi ròlstul. E hóbennan a bai bou di e vèn, a haña e tayer di sper i e djèk i a kambia e tayer. Tabata hasi hopi friu i sneu tabata kai. Nan tabatin nan pañanan bunita bistí, pero tòg nan a yuda mi pa mi por a sigui mi kaminda. Ami sigur lo no por a kambia e tayer mi so.

 “Mi ta gradisí e sinku Testigunan di Yehova hóben ei ku a yuda mi. Nan tabata riba kaminda pa bai prediká di kas pa kas. E hóbennan ei sigur ta praktiká loke nan ta prediká. Nan a skapa mi for di un situashon masha difísil ku lo mi no por a sali afó mi so. Ken por a pensa ku e dia ei lo tabatin ‘angel’ riba kaminda pa yuda mi?”