HÓBENNAN SA PUNTRA

Dikon Mi Mester Hasi Orashon?

TOKA NA

Segun un enkuesta, 80 porshento di hóben na Merka ta hasi orashon, pero solamente mitar di nan ta hasi orashon tur dia. Sin duda, algun di nan ta puntra nan mes: ‘Orashon ta djis un terapia pa mi sinti mi mihó?’

Kiko ta orashon?

Ora bo ta hasi orashon, bo ta papia ku e Kreador di tur kos. Djis pensa riba loke esei ta nifiká! Maske Yehova ta superior na hende den tur sentido, tòg “e no ta masha leu for di kada un di nos.” (Echonan 17:27) De echo, Beibel ta duna nos un invitashon spesial: “Hala serka Dios, i lo e hala serka boso.”—Santiago 4:8.

Kiko bo mester hasi pa hala serka Dios?

Bo mester papia ku Dios mediante orashon.
Un otro manera pa hala serka Dios ta ora bo ta studia Beibel. Asina Dios ta “papia” ku bo.

Komo ku e komunikashon ta bini di ámbos banda, esta, via orashon i estudio di Beibel, esei lo yuda bo bira un bon amigu di Dios.

“Papia ku Yehova, esta, komuniká ku e Haltísimo, ta un di e privilegionan di mas grandi ku un hende por tin.”—Jeremy.

“Ora mi kompartí mi sintimentunan di mas profundo ku Yehova den orashon, mi ta sinti mi mas serka dje.”—Miranda.

Dios ta skucha bo?

Asta si bo ta kere den Dios i ta resa na dje, kisas tòg por ta difísil pa bo aseptá ku Dios ta skucha bo. Sinembargo, Beibel ta bisa ku Yehova ta “Skuchador di orashon.” (Salmo 65:2, Beibel na Papiamentu Koriente) Beibel ta asta invitá bo pa ‘tira tur bo inkietut riba dje.’ Dikon? ‘Pasobra e ta interesá den bo.’—1 Pedro 5:7.

Pensa riba esaki: Bo ta dediká tempu na papia ku bo mihó amigunan riba un base regular? Bo por hasi meskos ku Dios. Papia kuné regularmente i usa su nòmber, Yehova. (Salmo 86:5-7; 88:9) Sí, Beibel ta invitá bo pa “hasi orashon konstantemente.”—1 Tesalonisensenan 5:17.

“Orashon ta un kòmbersashon entre ami i mi Tata den shelu; mi ta habri mi kurason kompleto p’e.”—Moises.

“Mi ta papia ku Yehova tokante kosnan importante, meskos ku lo mi papia ku mi mama òf un bon amigu.”—Karen.

Kiko mi por menshoná den orashon?

Beibel ta bisa: “Den tur kos, pa medio di orashon i súplika huntu ku gradisimentu, laga Dios sa kiko ta boso petishonnan.”—Filipensenan 4:6.

Esei ke men ku bo mag di papia tokante bo problemanan den orashon? Sí! Beibel mes ta animá nos pa hasi esei. E ta bisa: “Tira bo karga riba SEÑOR, i e lo sostené bo.”—Salmo 55:22, Beibel Santu.

Pero, ora bo ta hasi orashon, no papia di bo problemanan so. Chantelle ta bisa: “Si ta yudansa so mi ta keda pidi Yehova, esei lo no ta ègt un bon amistat. Ami ta haña ku mi mester gradisí Dios promé ku tur kos, i e lista di kosnan ku mi ta gradisidu p’e mester ta largu.”

Pensa riba esaki: Kiko bo ta gradisidu p’e? Bo por pensa di tres kos ku lo bo por gradisí Yehova p’e awe?

“Asta algu simpel, manera ora bo mira un flor, por animá bo pa hasi orashon i gradisí Yehova.”—Anita.

“Meditá riba algu den kreashon ku ta impreshoná bo òf meditá riba un teksto di Beibel ku bo gusta. Despues, gradisí Yehova p’e.”—Brian.

Loke otro hóbennan ta bisa

“Nos orashonnan mester ta profundo manera un laman; no manera un plas di awa. Yehova ke yuda nos, i maske e sa loke nos mester promé ku nos pidié, nos por mustra ku nos ta konfia den dje mediante nos orashonnan profundo.”—Moises.

“Orashon ta manera un kabuya: Yehova ta tene un banda i ami ta tene e otro banda. Ora mi ta hasi orashon tokante mi sintimentunan di mas profundo, ta komo si fuera mi ta tene mas duru na e kabuya i Yehova ta respondé. Asina nos relashon ta bira mas fuerte.”—Miranda.

“Si nos no tene kuidou, nos orashonnan por bira manera un lista di deseo. Pero ora nos ta gradisí Yehova, nos ta siña apresiá tur e kosnan ku el a duna nos i nos lo no focus riba nos nesesidatnan so.”—Jeremy.

“Mas nos gradisí Yehova, mas gradisidu nos lo bira. Ora nos ta gradisí Yehova den orashon, esei ta yuda nos focus riba nos bendishonnan i no riba nos problemanan.”—Shelby.