E mal notisia: Si bo ta tímido, òf verlegen, bo por pèrdè chèns di haña bon amigu òf di hasi algu nobo òf dushi.

 E bon notisia: Timides no nesesariamente ta algu malu. E por yuda bo pensa bon promé ku bo papia, i e por yuda bo ta un hende ku ta opservá bon i ku ta skucha bon ora otro hende ta papia.

 E mihó notisia: Bo no tin nodi di keda tímido, òf verlegen, pa semper. Bo por kontrolá bo timides. E artíkulo akí lo mustra bo kon bo por hasi esei.

•  Saka afó kiko ta preokupá bo

•  Loke bo por hasi

•  Loke otro hóben ta bisa

 Timides por pone ku ta difísil pa bo papia ku hende kara kara. P’esei, kisas bo por sinti bo isolá, òf bo so, manera ta den un kamber skur bo ta bo so. Esei no ta nada dushi. Pero si bo saka afó dikon bo ta sinti ku ta difísil pa bo papia ku hende, ta manera bo ta sende un lus. I probablemente, bo ta ripará ku no tin motibu pa ta hopi preokupá. Ban wak tres ehèmpel.

•   Preokupashon #1: “Mi no sa di kiko mi tin ku papia.”

   Realidat: Hopi biaha, loke hende ta keda kòrda mas di un kòmbersashon ta kon bo a laga nan sinti i no loke bo a papia di dje. Si bo no sa kiko pa papia di dje, bo por enfoká riba skucha bon; ta importante pa bo ta realmente interesá den loke hende ta konta bo.

   Pensa riba esaki: Ken bo ta preferá di tin komo amigu? Un hende ku ta papia papia so i ku semper tin algu di bisa òf un hende ku ta skucha bon?

•   Preokupashon #2: “Hende ta bai pensa ku mi ta laf.”

   Realidat: Semper hende lo tin nan mes opinion tokante bo, sea bo ta tímido òf nò. En bes di pensa ku hende lo haña bo laf, bo por yuda hende forma un mihó opinion di bo si bo laga nan konosé bo mihó. Asina, nan por mira kon bo ta di bèrdat.

   Pensa riba esaki: Si bo ta pensa ku tur hende ta pensa malu di bo, no ta nèt abo ta husgando nan, pensando ku nan no ta gusta bo?

•   Preokupashon #3: “Mi ta bai pasa bèrgwensa si mi bisa algu robes.”

   Realidat: Esei ta pasa ku tur hende. Loke bo por hasi ta di mira e erornan ei komo un chèns pa mustra ku bo no ta pensa ku bo ta perfekto.

   Pensa riba esaki: Bo no ta preferá di ta ku hende ku ta atmití ku nan no ta perfekto?

 Bo tabata sa esaki? Tin hende ta pensa ku nan no ta tímido pasobra nan ta manda hopi mensahe. Pero ta mas fásil pa bo haña bon amigu ora bo ta kòmbersá ku hende en persona. Sherry Turkle, un sikólogo i eksperto den teknologia, a skirbi esaki den un buki: “Ora nos ta wak otro su kara i skucha stèm di otro, nos ta trata otro na un manera mas humano.” a

•   No kompará bo mes ku otro hende. Bo no tin nodi di bira un hende super sosial. Bo por pone meta pa ta ménos tímido. Asina, bo ta evitá di pèrdè chèns di haña bon amigu òf di hasi algu nobo òf dushi.

   “Un kòmbersashon no tin nodi ta largu, ni bo no tin nodi ta e sentro di atenshon di e kòmbersashon. Bo por djis sera konosí ku un hende ku bo no konosé òf hasi algun pregunta simpel.”—Alicia.

   Prinsipio di Beibel: “Laga kada un di boso analisá su mes akshonnan, anto e ora ei lo e tin motibu pa ta masha kontentu ku su mes, sin kompará su mes ku otro hende.”—Galationan 6:4.

•   Opservá otro hende i siña for di nan. Opservá kon hende sosial ta kòmbersá ku otro hende. Kiko ta funshoná bon pa nan i kiko nò? Kua di nan bon kualidatnan bo por desaroyá?

   “Opservá hende ku ta sera amistat fásil, i siña for di nan. Wak kiko nan ta hasi i skucha kiko nan ta bisa ora nan sera konosí ku un hende.”—Aaron.

   Prinsipio di Beibel: “Meskos ku heru ta mula heru, hende ta hasi otro skèrpi.”—Proverbionan 27:17.

•   Hasi pregunta. Generalmente, hende gusta duna nan opinion. Pues, hasimentu di pregunta ta un bon manera pa kuminsá un kòmbersashon. Ademas, esei lo kita un tiki di e atenshon for di bo tambe.

   “Si di antemano bo prepará loke bo ta bai bisa, lo bo ta ménos nèrvioso. Promé ku bo bai un evento sosial, bo por pensa algun tópiko ku bo por papia di dje ku un hende òf algun pregunta ku bo por hasié. Asina, lo bo ta ménos inkómodo ora bo sera konosí ku un hende.”—Alana.

   Prinsipio di Beibel: “No buska boso mes interes so, ma tambe interes di otro hende.”—Filipensenan 2:4.