SIGUI VIGILÁ!

Religion i e Guera na Ukrania—Kiko Beibel Ta Bisa?

TOKA NA

Wak loke a sali resientemente den prensa tokante e posishon di algun lider religioso prominente relashoná ku e guera na Ukrania:

“Patriarka Kirill, kende ta na kabes di Iglesia Òrtodòks di Rusia, no a bisa nèt nada ku ta kondená e atakenan di Rusia. . . . Su Iglesia tabata hiba un kampaña sistemátiko di plama informashon falsu tokante Ukrania, i Putin a usa esei pa hustifiká e guera.”—EUobserver, 7 di mart 2022.
“Awor, Patriarka Kirill . . . a duna di komprondé bon kla ku e ta di akuerdo ku su pais a invadí Ukrania; el a indiká ku e guera ta parti di un lucha kontra piká.”—AP News, 8 di mart 2022.
“Djaluna ku a pasa, Metropolitano Epifanio I di Kiev, lider di Iglesia Òrtodòks di Ukrania, a bendishoná su hendenan pa ‘bringa kontra e invasornan ruso’ . . . [El] a bisa tambe ku no ta un piká pa mata sòldá ruso.”—Jerusalem Post, 16 di mart 2022.
“Nos [Konseho di Iglesia i di Organisashon Religioso di Ukrania (UCCRO)] ta apoyá ehérsito di Ukrania i tur hende ku ta defendé nos. Nos ta bendishoná nan pa e esfuerso ku nan ta hasi pa defendé Ukrania kontra e pais ku ta ataká nos, i nos ta resa pa nan.”—Deklarashon di UCCRO a 24 di febrüari 2022.

Kiko bo ta pensa? Ta bon pa religion ku ta bisa ku nan ta sigui Kristu animá nan miembronan pa bringa den guera? Kiko Beibel ta bisa?

Religion su papel den guera atraves di historia

Historia ta mustra ku hopi biaha religion a aprobá, hustifiká i asta promové guera, miéntras ku nan ta hasi komo si fuera ta pas nan ke logra. Pa vários dékada, Testigunan di Yehova a hala atenshon na e aktitut hipókrita ei den religion. Analisá algun ehèmpel ku a ser menshoná den nos publikashonnan.

E artíkulo na spañó “E Krusadanan Tabata un ‘Ilushon Trágiko’” ta mustra ku Iglesia Katóliko Romano tabata responsabel pa e matansanan ku a tuma lugá den nòmber di Dios i di Kristu.
E artíkulo na spañó “Iglesia Katóliko i Afrika” ta duna un ehèmpel kon religion no a prevení guera entre e tribunan ni genosidio.
E artíkulonan na spañó “Ta Religion Su Falta?,” “E Papel Ku Religion A Hunga den Guera,” i “Religion Ta Skohe Banda den Guera” ta splika kon pastor katóliko, òrtodòks i protestant a apoyá ámbos banda den hopi guera.

Religion kristian tin mag di apoyá guera?

Loke Hesus a siña hende: “Stima bo próhimo meskos ku bo mes.” (Mateo 22:39) “Sigui stima boso enemigunan.”—Mateo 5:44-47.

Pensa riba esaki: Si un religion ta animá su miembronan pa mata otro hende den guera, e por bisa ku e ta obedesé Hesus su mandamentu pa stima otro hende? Pa haña e kontesta, lesa e artíkulonan na spañó “Kristian Berdadero i Guera” i “Un Hende Por Stima Su Enemigunan?”

Loke Hesus a siña hende: “Mi reino no ta parti di e mundu akí. Si mi reino tabata parti di e mundu akí, mi sirbidónan lo a bringa pa mi no ser entregá den man di e hudiunan.” (Huan 18:36) “Hinka bo spada bèk na su lugá, pasobra ken ku usa spada lo muri pa medio di spada.”—Mateo 26:47-52.

Pensa riba esaki: Si e kristiannan no tabatin mag di bringa pa defendé ni sikiera Hesus, nan lo tin mag di usa arma pa bringa pa kualke otro motibu? Lesa e artíkulo na spañó “Kristianismo i Guera Ta Bai ku Otro?,” i lo bo mira kon e promé kristiannan a sigui Hesus su ehèmpel i apliká su siñansanan fielmente.

Kiko lo pasa ku religion ku ta promové guera?

Beibel ta siña ku Dios ta rechasá tur religion ku ta pretendé ku nan ta representá Hesus pero ku no ta apliká su siñansanan.—Mateo 7:21-23; Tito 1:16.

E buki Revelashon ta mustra ku Dios ta tene e religionnan ei responsabel pa morto di “tur [hende] ku a ser matá riba tera.” (Revelashon 18:21, 24) Si bo ke sa dikon Dios ta mir’é asina, lesa e artíkulo na spañó “Kiko Ta Babilonia e Grandi?”
Hesus a indiká ku meskos ku ta kap un palu ku ta pari fruta putrí i tir’é den kandela, asina tur religion ku Dios ta rechasá lo ser destruí pa e kosnan malu ku nan a hasi. (Mateo 7:15-20) Lesa e artíkulo “Fin di Religion Falsu Ta Serka!,” i lo bo haña sa kon esei lo sosodé.

Testigunan di Yehova Ta Otro

Testigunan di Yehova na Rusia i Ukrania, meskos ku esnan na tur otro parti di mundu, ta obedesé Hesus su mandamentu pa keda neutral den asuntu polítiko i pa no tin parti den guera. Pa e motibu ei, nos no ta partisipá den e konflikto akí ni niun otro konflikto. Nos no ta apoyá nan tampoko. Algun Testigu di Yehova ta ser persiguí pasobra nan ta determiná pa apliká loke nan ta siña for di Beibel. (Huan 15:19, 20; 2 Timoteo 3:12) Por ehèmpel, gobièrnu di Rusia a sera hopi Testigu di Yehova den prizòn i asta a torturá algun di nan. Nan a konfiská tambe nos lugánan di reuní pa adorashon. Pa mas informashon, bishitá e website www.jw-russia.org.

Wak e vidio ku ta mustra kon Testigunan di Yehova ta ser persiguí pa nan fe na Rusia. E vidio na spañó ta kuater minüt, i su tema ta Testigunan di Yehova na Irkutsk Ta Keda Fiel Apesar di Entrada Hudisial Violento.
Ta konosí pa hopi tempu ku Testigunan di Yehova ta keda neutral den asuntu polítiko. Wak e vidio Firme bou di Oposishon pa mira kon nan a keda neutral apesar di hopi persekushon bou di e régimen nazi na Alemania i tambe na eks Union Soviétiko.

Nos ta invitá bo pa bishitá e otro sekshonnan riba nos website i siña mas tokante nos kreensianan, entre otro, e promesa ku Beibel ta duna di un futuro sin guera. (Isaías 2:4; Yeremías 29:11) Bo por tuma kontakto ku nos libremente pa haña mas informashon.

Rekonosementu pa potrèt, di robes pa drechi: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a UCCRO, esta, Konseho di Iglesia i di Organisashon Religioso di Ukrania, ta inkluí 15 iglesia ku ta representá religion òrtodòks, katóliko griego, katóliko romano, protestant i evangéliko i tambe hudiu i mòslem.