Amigunan ta komuniká ku otro pa hasi nan amistat mas fuerte. Dios tambe ke pa bo papia kuné pa bo por ta su amigu. E ta bisa: “Boso lo sklama na mi i bin hasi orashon na mi, i lo mi skucha boso.” (Yeremías 29:12) Ora bo ta papia ku Dios, lo bo ‘hala serka dje, i lo e hala serka bo.’ (Santiago 4:8) Beibel ta sigurá nos ku Yehova “ta serka di tur esnan ku ta sklama na dje.” (Salmo 145:18) Mas nos resa na dje, mas será nos amistat kuné lo bira.

Hesus a bisa: “Tin un di boso ku si su yu pidié pan, e ta dun’é un piedra? Òf si e pidié un piská, e ta dun’é un kolebra? P’esei, si boso . . . sa di duna boso yunan bon regalo, kuantu mas boso Tata ku ta den shelu! E sigur lo duna kos bon na esnan ku pidié.” (Mateo 7:9-11) Sí, Dios ke pa bo resa na dje pasobra ‘e ta interesá den bo’ i ke yuda bo. (1 Pedro 5:7) I e ta asta bisa bo pa papia kuné tokante bo problemanan. Beibel ta bisa nos: “No sea anshá tokante nada; mas bien, den tur kos, pa medio di orashon i súplika huntu ku gradisimentu, laga Dios sa kiko ta boso petishonnan.”—Filipensenan 4:6.

Ekspertonan den komportashon humano a nota ku sientos di miónes di hende, inkluso algun ateista i agnóstiko, ta sinti ku nan tin ku hasi orashon. * Esaki ta konfirmá ku hende tin mester di Dios. Hesus a bisa: “Felis ta esnan ku ta konsiente di nan nesesidat spiritual.” (Mateo 5:3) Un manera ku nos por satisfasé e nesesidat akí ta ora nos ta papia regularmente ku Dios.

Ki benefisio nos lo haña si nos aseptá Dios su invitashon pa resa na dje?