Mi a lanta na Los Angeles, California, den diferente bario konosí pa gang di kaya i droga. Mi mayornan tabatin seis yu i ami tabata e di dos.

Mi mama tabata hiba nos na un misa evangelista, pero tempu mi tabata tiner mi tabata hiba un bida dòbel. Riba djadumingu mi tabata kanta den kor di misa, anto sobrá di siman mi tabata bati kaya, usa droga i hiba un bida parotin.

Mi tabata rabia lihé i mi tabatin un karakter hopi violento. Mi tabata usa kiko ku ta komo arma, djis pa gana un pelea. Loke mi a siña den misa no a yuda mi ku nada; al kontrario, mi tabata bisa tur ora: “Vengansa ta di Señor, anto ami ta su ayudante!” Tempu mi tabata bai skol sekundario na final di añanan 60, mi tabata bou di influensia di un grupo polítiko yamá Black Panthers ku tabata masha konosí pa nan forma agresivo di defendé derechonan sivil. Mi a djòin un grupo di studiante ku tambe tabata hiba e lucha akí. Na vários okashon nos tabata organisá protesta ku tin biaha tabata pone skol sera pa un par di dia.

Mi tabata asina violento ku esei no tabata sufisiente pa mi. P’esei mi a kuminsá kometé krímen motivá pa odio rasial. Por ehèmpel, ami ku mi amigunan tabata bai wak algún pelíkula ku tabata mustra kon e katibunan afrikano tabata sufri na Merka. E inhustisianan ku nos tabata mira a indigná nos asina tantu ku nos tabata ataká e hóbennan koló kla ku tabata den e sala ei mes. Despues, nos tabata bai den e barionan di hende blanku pa buska mas hende pa bati.

Tempu mi tabatin kasi 20 aña, ami ku mi ruman hòmbernan ya kaba tabata kriminalnan peligroso ku semper tabata kai den man di hustisia. Un di mi ruman hòmbernan chikí tabata den un gang notorio, i ta ku nan mi tabata anda. Mi bida tabata bai di malu pa pió.

Mi tabatin un amigu kende su mayornan tabata Testigu di Yehova. Nan a invitá mi na un di nan reunionnan di kongregashon, i mi a bai. For di ora ku mi a yega mi por a mira ku e Testigunan ta diferente. Tur hende tabatin nan mes Beibel, i nan tabata us’é durante e reunion. Asta e hóbennan tabata duna diskurso! Mi a keda masha impreshoná ora mi a siña ku Dios tin un nòmber, Yehova, i ora mi a tende kon nan tabata us’é. (Revelashon 4:11) E kongregashon tabatin hende di diferente nashonalidat, pero mi por a mira bon kla ku no tabatin diskriminashon.

 Na kuminsamentu mi no tabata ke studia Beibel ku e Testigunan, pero mi tabata gusta bai nan reunionnan sí. Un anochi, miéntras mi tabata na un di e reunionnan ei, algun di mi amigunan a bai un konsierto. Einan nan a bati un hóben te mat’é pasobra e no kier a duna nan su djèket di kueru. E siguiente dia nan tabata kana broma ku nan a mata un hende. Nan a asta hari i hasi chèrchi durante nan huisio. Mayoria di nan a keda sentensiá na bida largu. Ta mas ku klaru ku mi tabata hopi kontentu ku ami no tabata ku nan e anochi ei. Mi a disidí di kambia mi bida i kuminsá studia Beibel.

Komo ku mi a mira asina tantu diskriminashon, loke mi a nota entre e Testigunan a impreshoná mi. Por ehèmpel, ora ku un Testigu koló kla mester a biaha pa eksterior, el a laga su yunan serka un famia koló skur pa nan kuida nan. Tambe mi a mira kon un famia di Testigu koló kla a laga un yònkuman koló skur, ku no tabatin kas, bai biba serka nan. Mi a yega na e konklushon ku Testigunan di Yehova di bèrdat ta kumpli ku loke Hesus a bisa na Huan 13:35: “Na esaki tur hende lo sa ku boso ta mi disipelnan, esta, si boso ta stima otro.” Mi tabata sa ku mi a haña un berdadero hermandat.

Segun ku mi tabata studia Beibel, mi a realisá ku mi mester a kambia mi manera di pensa. Mi mester a hasi esfuerso pa no djis komportá mi mes na un manera pasífiko sino pa ta pasífiko di kurason. (Romanonan 12:2) Tiki tiki mi a progresá i na yanüari 1974 mi a batisá komo Testigu di Yehova.

Pero asta despues ku mi a batisá, mi mester a sigui traha riba mi karakter. Por ehèmpel, un biaha ku mi tabata prediká di kas pa kas, mi a kore tras di un ladron ku a kaba di hòrta e radio di mi outo. Ora mi tabata serka di yeg’é, el a tira e radio abou i kore bai. Ora mi a konta esnan ku tabata prediká ku mi kon mi haña mi radio bèk, un ansiano den e grupo a puntra mi: “Stephen, kiko lo bo a hasi si bo a gara e ladron?” E pregunta ei a pone mi pensa i a motivá mi pa sigui hasi esfuerso pa ta na pas ku tur hende.

Na òktober 1974, mi a kuminsá sirbi komo un predikadó di tempu kompleto, dedikando 100 ora pa luna na siña hende tokante Beibel. Despues mi a haña e privilegio di traha komo boluntario na e sede mundial di Testigunan di Yehova na Brooklyn, New York. Na 1978, mi a bai Los Angeles bèk pa kuida mi mama ku tabata malu. Dos aña despues mi a kasa ku mi esposa stimá Aarhonda. El a apoyá mi hopi durante e tempu ku nos mester a kuida mi mama, te dia ku mi mama a fayesé. Poko tempu despues ami ku Aarhonda a asistí na e Skol Bíbliko di Galaad di Watchtower, i nos a haña e asignashon di bai sirbi na Panamá, kaminda te awe nos ta sirbi komo misionero.

For di dia ku mi a batisá, mi a haña mi ku vários situashon ku por a pone mi reakshoná na un manera violento. Pero mi a siña kalma mi mes òf alehá for di hende ku ta purba di provoká mi. Hopi hende, inkluso mi kasá, a elogiá e manera ku mi a trata ku e situashonnan akí. Mi mes no por kere ku mi a kambia asina tantu! Mi sa sí ku no ta ku mi mes forsa mi a logra e kambionan akí. Mas bien, nan ta duna prueba ku e Palabra di Dios tin poder pa kambia bida di hende.—Hebreonan 4:12.

Beibel a duna mi un propósito den bida i a siña mi kiko realmente ta nifiká ta na pas ku tur hende. Mi no ta maltratá hende mas. Mas bien, awor mi ta yuda nan spiritualmente. Mi a asta duna un kurso di Beibel na un persona ku tabata mi enemigu tempu nos tabata bai skol sekundario! Despues ku el a batisá, nos a bira kompañero di kamber pa un tempu i te awe nos a keda bon amigu. Ami ku mi kasá a dirigí hopi kurso di Beibel i a yuda mas ku 80 hende bira Testigu di Yehova.

Mi ta masha gradisidu ku Yehova a duna mi un propósito den bida i felisidat meimei di rumannan ku di bèrdat ta stima otro.