Un persona korupto ta un persona ku ta hasi mal uso di su poder—spesialmente den polítika—pa su mes benefisio. Esaki no ta nada nobo, pasobra Beibel ta kontené un lei ku ta prohibí soborno den kasonan hudisial. Pues, for di un 3.500 aña pasá tabata eksistí korupshon. (Éksodo 23:8) Klaru ku korupshon ta enserá mas ku djis aseptá plaka pasá bou di mesa. Funshonarionan korupto sa hasi uso di servisio- i propiedatnan públiko ku nan no ta outorisá pa usa. Nan sa asta hòrta plaka i usa nan puesto den gobièrnu pa faboresé nan famia- i amigunan.

Korupshon ta un problema ku por surgi den kualke organisashon, pero ta parse ku esaki ta mas komun den órganonan gubernamental. Na aña 2013, Transparency International a publiká un artíkulo titulá Global Corruption Barometer ku a bisa ku hende rònt mundu ta pensa ku e sinku entidatnan di mas korupto na mundu ta partidonan polítiko, kuerpo polisial, kuerponan di empleado públiko (òf, ámtenar), podernan legislativo i sistemanan hudisial. At’akí algun ehèmpel ku ta mustra esaki:

• AFRIKA: Na 2013, un 22.000 empleado públiko di Suráfrika a ser akusá di korupshon.

• SURAMÉRIKA: Na 2012, nan a sentensiá 25 hende na Brazil ku a usa plaka di gobièrnu pa haña apoyo polítiko. Un di esnan ku a ser sentensiá tabata e di dos persona di mas importante di e pais, e eks lider di e gabinete di e presidente di Brazil.

• ASIA: Na Seul, Surkorea, 502 hende a muri ora ku un pakus grandi a basha abou na 1995. Investigadónan a haña sa ku empleadonan públiko a aseptá plaka pasá bou di mesa i a laga e kontratistanan usa betòn di kalidat inferior i asina violá normanan di siguridat.

• EUROPA: Cecilia Malmström, minister di Asuntunan Interno di e Komishon Europeo, a bisa ku ‘korupshon ta un problema serio na Europa.’ El a sigui bisa: ‘Pa kaba ku korupshon, nos mester di apoyo polítiko, pero ta parse ku esei ta algu imposibel.’

Korupshon ta un problema ku tin rais profundo. Profesora Susan Rose-Ackerman, un eksperto riba tereno di kombatimentu di korupshon, a skirbi ku, pa drechá e situashon, gobièrnunan mester kambia nan sistema di goberná. Aunke ta parse ku e situashon ta iremediabel, Beibel ta sigurá nos ku tin solushon i ku kambionan grandi ta na kaminda.