DIKON TIN HENDE TA DUDA: Algun hende ta sinti ku ta egoista di nan parti pa pidi Dios pa yuda nan trata ku nan problemanan asta ora nan mester di konsuelo desesperadamente. Un señora ku yama Raquel a bisa: “Ora mi pensa riba e kantidat inmenso di hende na mundu ku ta konfrontá problemanan serio, mi problemanan ta mustra dje chikitu ei ku mi ta duda si mi tin ku pidi Dios yudansa.”

LOKE BEIBEL TA SIÑA: Dios ya kaba a yuda i konsolá hende na un manera masha remarkabel. Nos tur a nase den piká, pues ningun di nos no por kumpli ku tur loke Dios ta eksigí. Pero, Dios “a stima nos i a manda su Yu [Hesukristu] komo un sakrifisio di rekonsiliashon pa nos pikánan.” (1 Huan 4:10) Mediante Hesus su sakrifisio di reskate, Dios ta hasi posibel pa nos haña pordon pa nos pikánan, pa nos por tin un konsenshi limpi i e speransa di bida eterno den un mundu nobo pasífiko. * Pero e sakrifisio akí ta únikamente pa humanidat en general òf e ta reflehá Dios su interes den bo personalmente?

Laga nos wak e ehèmpel di Pablo. E echo ku Hesus a sakrifiká su bida pa humanidat a konmové asina tantu ku el a skirbi: ‘Mi ta biba pa medio di fe den e Yu di Dios, kende a stima mi i a entregá su mes pa mi.’ (Galationan 2:20) Ta bèrdat ku Hesus a muri promé ku Pablo a bira un kristian. Ma Pablo a konsiderá e sakrifisio akí komo un regalo ku Dios a dun’é personalmente.

Hesus su sakrifisio di reskate ta Dios su regalo personal pa abo tambe. E regalo ei ta mustra kon presioso bo ta pa Dios. E por duna bo ‘konsuelo eterno i un speransa maravioso.’ Pues e por ‘konsolá bo i fortalesé bo den tur bon obra i bon palabra.’—2 Tesalonisensenan 2:16, 17.

Pero Hesus a ofresé su bida komo sakrifisio kasi 2.000 aña pasá. Kiko ta mustra ku Dios ke tin un relashon ku bo awe?