“Para firme kontra e trampanan di Diabel.”—EFE. 6:11.

1, 2. (a) Dikon Satanas no tin kompashon ku kristiannan ungí ni ku e ‘otro karnénan’? (b) Kua dos trampa di Satanas nos lo analisá den e artíkulo akí?

SATANAS E DIABEL no tin kompashon ku hende, i pió ku sirbidónan di Yehova. De echo, e tin un guera kontra e kristiannan ungí ku ainda ta riba tera. (Rev. 12:17) Pero ku kurashi e kristiannan akí ta sigui dirigí e trabou di prediká e Reino i ta laga hende sa ku ta Satanas ta goberná e mundu akí. Diabel ta odia e ‘otro karnénan’ tambe, kendenan ta sostené e ungínan i tin e speransa di haña bida eterno. (Huan 10:16) Satanas sí no tin e speransa di biba pa semper mas, p’esei mes e ta yen di rabia. Pues, sea ku nos ta ungí òf miembro di e otro karnénan, Satanas no tin nos bienestar na pechu. Mas bien, e ke hasi nos su víktima.—1 Ped. 5:8.

² I pa logra su meta, e ta pone vários trampa pa nos. Tin algun persona ku el ‘a siega nan mente’ pa nan no aseptá e bon notisia i asina rekonosé su trampanan. Pero lamentablemente, asta algun hende ku a aseptá e bon notisia ta kai den trampa di Diabel. (2 Kor. 4:3, 4) E artíkulo anterior a mustra kon nos por evitá tres trampa di Satanas. Nan ta: (1) e kustumber di papia sin pensa, (2) miedu di hende i preshon di otronan i (3) sintimentu di kulpa innesesario. Laga nos wak awor kon nos por para firme kontra dos otro trampa di Satanas—materialismo i adulterio.

MATERIALISMO —UN TRAMPA KU TA STEK HENDE

3, 4. Dikon inkietut di e era akí por hiba na materialismo?

³ Den ún di su ilustrashonnan, Hesus a papia di simia ku a ser sembrá den sumpiña. El a splika ku un  hende kisas ta tende e palabra, “ma e inkietut di e era akí i e poder engañoso di rikesa ta stek e palabra, i e [hende ei] no ta duna fruta.” (Mat. 13:22) Sí, materialismo ta un trampa di nos enemigu, Satanas.

⁴ Ripará ku ta un kombinashon di dos faktor ta stek e palabra. Un di nan ta “e inkietut di e era akí.” Den ‘e último dianan krítiko i difísil pa trata kuné’ akí, hende tin hopi inkietut. (2 Tim. 3:1) Kosto di bida ta subi, hopi hende ta sin trabou i kisas ta difísil pa bo perkurá pa bo pan di kada dia. Òf podisé bo ta preokupá tokante futuro i ta puntra bo mes: ‘Lo mi tin sufisiente entrada ora mi baha ku penshon?’ E inkietutnan akí ta pone algun hende kore tras di plaka, pensando ku plaka lo duna nan un sntido di siguridat.

5. Dikon e ‘poder di rikesa’ ta engañoso?

⁵ E otro faktor ku Hesus a menshoná ta “e poder engañoso di rikesa.” E faktor akí huntu ku inkietut por stek e palabra. Ta bèrdat ku Beibel ta bisa ku “plaka ta protekshon.” (Ekl. 7:12) Pero no ta sabí pa kore tras di plaka. Hopi hende a realisá ku mas nan lucha pa bira riku, mas nan keda atrapá den e trampa di materialismo. Algun a asta bira esklabo di rikesa.—Mat. 6:24.

6, 7. (a) Ki ora bo trabou por bira un trampa di materialismo? (b) Kiko un kristian mester tene kuenta kuné ora e haña oferta pa traha overtaim?

⁶ E deseo pa bira riku por lanta den nos sin ku nos ta realisá esei. Suponé ku bo doño di trabou ta aserká bo i bisa bo: “Mi tin bon notisia pa bo! Nos kompania a kaba di sera un kontrakt pa un trabou grandi. Esaki ta nifiká ku e siguiente lunanan, nos tin ku traha hopi overtaim. Pero mi ta garantisá bo ku e pago lo ta masha bon mes. Pues, ta bale la pena!” Kon lo bo reakshoná riba e oferta ei? Ta bèrdat ku bo tin ku perkurá materialmente pa bo famia. Pero kòrda ku esei no ta bo úniko responsabilidat. (1 Tim. 5:8) Tin vários otro kos ku bo mester tene kuenta kuné. Por ehèmpel, kuantu overtaim bo mester traha? Bo trabou lo stroba bo di sirbi Yehova? Lo e stroba bo por ehèmpel di asistí na bo reunionnan di kongregashon i di tene bo Adorashon Komo Famia?

⁷ Ora di tuma desishon, kiko mester ta mas importante? Gana poko plaka èkstra òf bo relashon ku Yehova? Lo bo stòp di pone e Reino na promé lugá pa bo gana mas plaka? Bo ta mira kon fásil bo por kai den e trampa di materialismo si bo ta neglishá bo relashon ku Yehova, esta, bo spiritualidat, i esun di bo famia? Si aktualmente bo ta den un situashon asina, kon  bo por para firme i evitá ku materialismo ta bira un trampa pa bo?—Lesa 1 Timoteo 6:9, 10.

8. Ki ehèmpelnan bíbliko por yuda nos analisá nos estilo di bida?

⁸ Pa evitá ku deseo pa kos material ta stek bo, analisá bo estilo di bida regularmente. Sòru pa nunka bo bira manera Esou, kende a despresiá kosnan spiritual. (Gén. 25:34; Heb. 12:16) No sea tampoko manera e hòmber riku ku Hesus a animá pa bende su propiedatnan, duna e plaka na hende pober i siguié. En bes di hasi esei, e hòmber a “bai tur tristu, pasobra e tabatin hopi propiedat.” (Mat. 19:21, 22) E hòmber ei a kai den e trampa di rikesa i a pèrdè un privilegio masha grandi, esta, e oportunidat di sigui e hòmber di mas importante ku a yega di biba riba tera. P’esei, nos mester tene kuidou pa nos no pèrdè e privilegio di ser disipel di Hesukristu.

9, 10. Kiko ta Beibel su punto di bista di kos material?

⁹ Si nos no ke kai den e trampa di materialismo, nos tin ku sigui e konseho di Hesus, ku ta bisa: “No sea nunka anshá i puntra: ‘Kiko nos lo kome?’ òf: ‘Kiko nos lo bebe?’ òf: ‘Kiko nos lo bisti?’ Pasobra tur e kosnan akí ta loke e nashonnan ta kore tras di dje. Ma boso Tata selestial sa ku boso tin mester di tur e kosnan akí.”—Mat. 6:31, 32; Luk. 21:34, 35.

¹⁰ Pa nos no bira víktima di e poder engañoso di rikesa, nos mester tin e mesun pensamentu ku Agur, un eskritor di Beibel. El a bisa: “No duna mi ni pobresa ni rikesa—duna mi solamente mi pan di kada dia.” (Pro. 30:8) Ta bisto anto ku Agur a rekonosé e balor di plaka i ku e tabata konsiente di e poder engañoso di rikesa. Di igual manera, nos mester realisá ku e inkietut di e era akí i e poder engañoso di rikesa por ruina nos spiritualidat. Si nos ta preokupá indebidamente ku kos material, esei por kaba ku nos energia, pone nos pèrdè tempu i keda ku poko òf sin niun motivashon pa sigui tras di interesnan di Reino. P’esei, sea determiná pa nunka laga Satanas gara nos den su trampa di materialismo.—Lesa Hebreonan 13:5.

ADULTERIO​—UN TRAMPA BON SKONDÍ

11, 12. Kon un kristian por kai den e trampa di adulterio na trabou?

¹¹ Yagdónan ku ke gara un bestia grandi tin biaha ta koba un buraku kaminda nan sa ku e bestia ta pasa hopi biaha. Generalmente, nan ta tapa e buraku ku palu i tira tera riba dje. Satanas tin un trampa similar: inmoralidat seksual. Esei ta ún di e trampanan ku e tin mas éksito kuné. (Pro. 22:14; 23:27) Algun kristian a kai den e trampa akí pasobra nan a hinka nan mes den situashonnan ku fásilmente ta hiba na inmoralidat. Por ehèmpel, algun di nan a kometé adulterio pasobra nan tabatin un relashon inapropiá ku un persona ku no ta nan kasá.

¹² Mayoria di biaha, relashon romántiko inapropiá por kuminsá na boka di trabou. Segun un estudio, mas ku sinkuenta porshento di hende muhé i kasi tres di kada kuater hòmber ku kometé adulterio a hasi esaki ku un kolega di trabou. Abo sa haña bo konstantemente den kontakto ku e sekso opuesto na bo trabou? Si ta asina, ki klase di relashon bo tin ku nan? Bo ta mantené sierto distansia pa mustra ku ta un relashon di trabou so bo ke tin i nada mas? At’akí algun ehèmpel: Un ruman muhé ta kòmbersá regularmente ku un hòmber ku e ta traha kuné. E ta sera asina tantu kuné ku e ta asta kuminsá  kont’é su problemanan matrimonial. Un ruman hòmber ta bira bon amigu ku un mucha muhé na su trabou. Pensando riba e mucha muhé ei, e ta bisa: “E sí ta balorá mi opinion i ta skucha atentamente ora mi ta papia kuné. E ta respetá mi. Mara mi kasá tabata asina!” Bo ta mira e peliger ku e kristiannan akí ta den? Nan a hinka nan mes den un situashon ku fásilmente por hiba na adulterio.

13. Kon un relashon romántiko inapropiá por desaroyá den kongregashon?

¹³ Un relashon romántiko inapropiá por desaroyá den kongregashon tambe. Wak por ehèmpel kiko a pasa ku Daniel i su kasá Sara. * Nan tur dos tabata pionero regular. Daniel a atmití ku e tabata un ansiano ku nunka ta bisa nò; semper e tabata kla pa aseptá tur asignashon ku e haña den kongregashon. Ademas, e tabatin sinku estudio di Beibel. Tres di nan a batisá. E ruman hòmbernan resien batisá akí tabatin mester di basta yudansa. Pero debí ku Daniel tabata okupá ku vários asignashon teokrátiko, hopi biaha ta Sara tabata yuda nan. A bira un kustumber ku e tabata yuda nan tambe ku nan problemanan emoshonal. Di otro banda, ora Sara tabatin mester di atenshon, nan tambe tabata dun’é. E situashon akí a bira un trampa fatal. Daniel a bisa: ‘Debí ku mi kasá pa lunanan largu a usa tur su energia pa yuda otro hende, e mes a bira spiritualmente i emoshonalmente débil. Esaki i e echo ku mi no tabatin tempu p’e a pone ku el a kometé adulterio ku ún di e hòmbernan ku mi a studia kuné. Mi tabata asina okupá ku mi privilegionan den kongregashon ku mi no a realisá mes ku mi esposa a bira spiritualmente débil.’ Kon bo por evitá un tragedia asina?

14, 15. Kon kristiannan kasá por evitá di kai den e trampa di adulterio?

¹⁴ Pa evitá di kai den e trampa di adulterio, nos mester pensa profundamente riba e nifikashon di kompromiso matrimonial. Hesus a bisa: “No laga ningun hende separá loke Dios a uni bou di un yugo.” (Mat. 19:6) Nunka pensa ku bo responsabilidatnan den kongregashon ta mas importante ku bo kasá. Es mas, si konstantemente bo ta laga bo kasá su so pa bo atendé kosnan di ménos importansia, esei por afektá boso relashon, i esaki na su turno por hiba na tentashon i posiblemente na piká serio.

¹⁵ Awor kiko si bo ta un ansiano? Ta klaru ku bo mester kuida e tou. Apòstel Pedro a skirbi: “Pastoriá e tou di Dios ku ta bou di boso kuido, no obligá, sino di buena gana; no pa amor pa ganashi desonesto, sino ku entusiasmo.” (1 Ped. 5:2) Sí, un ansiano no mester neglishá e miembronan di kongregashon. Sinembargo, bo responsabilidat komo wardadó no mester bai a kosto di bo responsabilidat komo esposo. No tin ningun sentido pa dediká tur bo atenshon pa fortalesé e kongregashon miéntras ku bo kasá mes ta birando débil. Daniel, e ruman ku nos a menshoná anteriormente, a bisa: ‘Nunka nos mester ta asina okupá ku nos ta neglishá nos famia.’

16, 17. (a) Kiko ta algun kos práktiko ku kristiannan kasá por hasi na trabou pa laga otronan sa ku nan no ta interesá den un relashon romántiko? (b) Menshoná un artíkulo ku e esklabo fiel a publiká ku por yuda kristiannan keda leu di e trampa di adulterio.

¹⁶ Tantu E Toren di Vigilansia komo ¡Despertad! a publiká diferente artíkulo ku ta kontené bon konseho ku ta yuda nos evitá di kai den e trampa di adulterio. Por ehèmpel, E Toren di Vigilansia di 15 di  sèptèmber 2006 a duna e siguiente konseho: ‘Ora bo ta na trabou òf na otro lugá, evitá situashonnan ku por pone bo bira íntimo ku un persona ku no ta bo kasá. Por ehèmpel, si bo ta traha overtaim den estrecho kompania di un persona di e sekso opuesto, esaki por hiba na tentashon. Pero komo un persona kasá, bo manera di papia i bo komportashon mester mustra bon kla ku bo no ta disponibel pa ningun relashon romántiko. Es mas, siendo un persona deboto na Dios, bo no mester flirt ni bisti na un manera inmoderá pa hala atenshon na bo mes. Ta bon pa pone potrètnan di bo kasá i di bo yunan na bo trabou. Nan ta sirbi komo rekordatorio, tantu pa bo mes komo pa otro hende, ku bo famia ta importante pa bo. Sea determiná pa nunka stimulá—ni sikiera tolerá—proposishon romántiko.’

¹⁷ E ¡Despertad! di aprel 2009 a publiká un artíkulo titulá “Kiko Fieldat den Matrimonio Ta Enserá Realmente?” E artíkulo ta mustra ku hende ku tin fantasianan seksual ku hende ku no ta nan kasá tin mas chèns di kometé adulterio. (Sant. 1:14, 15) Si bo ta kasá, ta sabí pa de bes en kuando repasá artíkulonan asina huntu ku bo kasá. Ta Yehova a instituí matrimonio, i e ta algu sagrado. Pues, ora bo ta traha tempu pa papia ku bo kasá tokante boso matrimonio, bo ta demostrá ku bo ta balorá kosnan sagrado.—Gén. 2:21-24.

18, 19. (a) Kiko ta e konsekuensianan di adulterio? (b) Kiko ta e benefisionan di keda fiel na bo kasá?

¹⁸ Awor, kiko si bo haña bo ku e tentashon pa kuminsá un relashon romántiko inapropiá? Meditá riba e daño ku fornikashon i adulterio ta kousa. (Pro. 7:22, 23; Gal. 6:7) Personanan ku ta kometé inmoralidat seksual ta desagradá Yehova, ta hasi daño na nan kasá i na nan mes. (Lesa Malakías 2:13, 14.) Pensa tambe riba e bendishonnan ku lo bo risibí si bo keda moralmente limpi: Bo por tin speransa di biba pa semper den futuro, i for di aworakí, bo por disfrutá di un mihó bida i un bon konsenshi.—Lesa Proverbionan 3:1, 2.

¹⁹ E salmista a kanta: “Esnan ku ta stima [Dios su] lei tin gran pas, i nada no ta hasi nan trompeká.” (Sal. 119:165) Pues, stima e bèrdat i ‘paga bon tinu pa e manera ku bo ta kana den e tempu malu akí no ta manera hende imprudente sino manera hende sabí.’ (Efe. 5:15, 16) Kòrda ku aunke Satanas ta pone hopi trampa pa e por gara Dios su adoradónan berdadero, nos no tin nodi di kai den su trampa. Yehova a perkurá tur loke nos mester pa por “para firme” i “paga tur e flechanan sendí di e Malbado”!—Efe. 6:11, 16.

[Nota]

[Preguntanan di Estudio]

[Plachi na página 29]

Materialismo por stek hende den sentido spiritual. No laga esei pasa ku bo

[Plachi na página 32]

Si bo ta flirt òf ta permití hende flirt ku bo, esei por hiba na adulterio