KIKO tabata dos kos ku a karakterisá e sirbishi di Hesus? Di promé, Hesus a trata di kambia kurason individual, no institushon polítiko. Por ehèmpel, tuma nota di loke el a enfatisá den su Sermon Riba Seru. Djis promé ku el a papia tokante e nesesidat di ta manera salu i lus, el a bisa su oyentenan ku ta hende ku ta “konsiente di nan nesesidat spiritual” ta realmente felis. I el a agregá: “Felis ta esnan ku tin un genio suave, . . . esnan di kurason puru, . . . esnan pasífiko.” (Mateo 5:1-11) Hesus a yuda su siguidónan mira e importansia di sirbi Dios di henter nan alma i di ahustá nan manera di pensa i nan sintimentunan pa esakinan kuadra ku Dios su norma di loke ta bon i malu.

Di dos, ora Hesus a mira hende sufri, su kompashon pa próhimo a motiv’é pa aliviá nan sufrimentu. Sinembargo, e no a pone komo meta ku e ta bai eliminá tur sufrimentu. (Mateo 20:30-34) El a kura hende malu, pero malesa a keda un parti di bida. (Lukas 6:17-19) El a trese alivio pa hende oprimí, ma inhustisia a sigui kousa sufrimentu. El a proveé kuminda pa hende hambrá, pero hamber a sigui tormentá humanidat.—Marko 6:41-44.

Hesus A Kambia Kurason di Hende i Aliviá Sufrimentu

Dikon Hesus a konsentrá riba kambia kurason di hende i aliviá sufrimentu pero no riba kambia institushonnan òf riba eliminá angustia? Hesus tabata sa ku Dios su propósito ta pa usa Su Reino den futuro pa kaba ku tur gobièrnu humano i eliminá tur loke ta kousa sufrimentu. (Lukas 4:43; 8:1) P’esei, un biaha ku e disipelnan a urgi Hesus pa dediká mas tempu na kura hende malu, el a bisa nan: “Laga nos bai otro kaminda, na e pueblonan den bisindario, pa mi por prediká einan tambe, pasobra ta pa e motibu akí mi a bini.” (Marko 1:32-38) Hesus a aliviá e sufrimentu físiko di hopi hende, ma el a duna prioridat na e trabou di prediká i di siña hende e palabra di Dios.

Testigunan di Yehova ta hasi esfuerso pa imitá Hesus den nan trabou di prediká awe. Nan ta sinti nan motivá pa duna yudansa práktiko na hende den nesesidat i asina aliviá nan sufrimentu. Pero e Testigunan no ta trata di eliminá e inhustisianan di mundu. Nan tin fe ku e Reino di Dios lo kaba ku tur loke ta kousa sufrimentu. (Mateo 6:10) Meskos ku Hesus, nan ta hasi esfuerso pa kambia kurason, no institushonnan polítiko. E forma di aktua ei ta realístiko, ya ku e problemanan prinsipal di hende no ta polítiko, sino moral.

Siudadano Responsabel

Testigunan di Yehova a la bes ta kere ku nan tin e responsabilidat kristian di ta bon siudadano. P’esei, nan ta onra i respetá outoridat di gobièrnu. Pa medio di nan publikashonnan i nan trabou di prediká, nan ta animá nan próhimo pa kumpli ku lei. Pero ora un gobièrnu ta eksigí algu ku ta na konflikto direkto ku e mandamentunan di Dios, e Testigunan no ta kumpli ku esei. Nan ta “obedesé Dios na promé lugá, i no hende.”—Echonan 5:29; Romanonan 13:1-7.

Testigunan di Yehova ta bishitá tur hende den nan komunidat pa ofresé nan un edukashon di Beibel grátis. E edukashon  akí a kambia miónes di kurason kaba. Tur aña, sientos di míles di hende ta haña yudansa pa vense práktikanan dañino manera humamentu, buracheria, uso di droga, wega di plaka i aktividat seksual parotin. Nan ta bira siudadano responsabel i di bon moral, pasobra nan a siña apliká e prinsipionan di Beibel den nan bida.—Wak e artíkulo “Beibel A Kambia Nan Bida,” na página 18 di La Atalaya di 15 di yüni 2012.

Ademas, e edukashon di Beibel ta yuda miembronan di famia oumentá nan rèspèt pa otro i drecha nan komunikashon, tantu entre esposa ku esposo komo entre mayor ku yu i tambe entre e yunan mes. E komunikashon akí ta fortalesé e lasonan di famia. Anto famia mas fuerte ta resultá den komunidat mas fuerte.

Kiko bo ta pensa despues di a repasá e puntonan ku a bini dilanti den e artíkulonan akí? Hende ku ta meskla religion ku polítika tin e aprobashon di Beibel? E kontesta ta bisto: Nò! E no ta di akuerdo ku esei. Akaso kristiannan berdadero mester ta siudadano responsabel? Sí! Kon nan por logra esei? Nan mester hasi loke Hesus a manda i ser manera salu i manera lus di mundu.

Hende ku ta hasi esfuerso pa apliká e instrukshonnan práktiko akí di Kristu lo benefisiá nan mes, nan famia i tambe e komunidat den kua nan ta biba. Testigunan di Yehova den bo área gustosamente lo kompartí mas informashon ku bo tokante e programa di edukashon di Beibel ku aktualmente nan ta efektuá den bo komunidat. *

[Nota]

[Komentario na página 7]

Hesus a trata di kambia kurason, no institushonnan polítiko

[Komentario na página 8]

Testigunan di Yehova ta kere ku nan tin e responsabilidat di ta bon siudadano