E artíkulo akí ta trata algun pregunta ku kisas bo tin i ta mustra bo unda pa haña e kontestanan den bo Beibel. Si bo ta deseá, Testigunan di Yehova gustosamente lo trata e preguntanan akí ku bo.

1. Kon nos mester konmemorá e morto di Hesus?

Hesus a instruí su siguidónan pa konmemorá su morto mediante un sena simbóliko, usando pan i biña. E pan ta representá su kurpa, i e biña ta representá su sanger.—Lesa Lukas 22:19, 20.

Durante e último sena, Hesus a usa pan sin zürdeg. Dikon? Pasobra hopi biaha, Beibel ta usa zürdeg komo símbolo di piká. I siendo ku Hesus no tabatin piká, pan sin zürdeg tabata un símbolo apropiá pa representá su kurpa perfekto. Hesus a sakrifiká su kurpa perfekto i asina a pone un fin na sakrifisio di animal ku e Lei di Moises a stipulá. (Hebreonan 10:5, 9, 10) E biña a simbolisá e sanger presioso di Hesus ku el a drama pa nos por haña pordon di piká.—Lesa 1 Pedro 1:19; 2:24; 3:18.

2. Ki dia nos mester konmemorá e morto di Hesus?

Hesus a muri riba 14 di nisan despues ku solo a baha, pasobra segun kalènder hudiu, dia ta kuminsá ora ku solo baha. Awor, riba e anochi promé ku Hesus a muri, el a selebrá e Pasku Hudiu ku su apòstelnan i despues a instituí un otro sena pa konmemorá su morto.—Lesa Lukas 22:14, 15.

Awe, e pueblo di Dios ta konmemorá e morto di Hesus, pa medio di kua Dios a hasi posibel pa humanidat ser librá di piká i morto. Den tempu bíbliko, nan tabata selebrá e Pasku Hudiu ún biaha pa aña. Pues, nos tambe ta konmemorá e morto di Hesus ún biaha pa aña. I segun kalènder di Beibel, nos ta selebrá Memorial riba 14 di nisan despues ku solo baha.—Éksodo 12:5-7, 13, 17; Lesa Huan 1:29.

  3. Ken por kome di e pan i bebe di e biña?

Ora Hesus a pasa e biña pa su disipelnan, el a bisa: “E kopa akí ta representá e pakto nobo.” (1 Korintionan 11:25) E pakto nobo a remplasá e pakto di Lei ku Yehova a sera ku e israelitanan pa medio di Moises. Si nan lo a obedesé Yehova den tur kos, nan lo a bira su pueblo manera el a primintí. (Éksodo 19:5, 6) Pero komo ku e israelitanan a desobedesé Yehova, el a introdusí un pakto nobo.—Lesa Yeremías 31:31.

Ta algun hende so—144.000 persona—ta forma parti di e pakto nobo. I pa medio di nan, Yehova lo bendishoná miónes di hende. Sí, miónes di hende, prosedente di tur nashon, lo risibí bida eterno den paradeis aki riba tera. Algun di e miembronan di e pakto nobo ta sirbiendo Yehova riba tera awe. Ta nan so mag kome di e pan i bebe di e biña pasobra ta ku nan Yehova a sera “e pakto nobo” ku a drenta na vigor mediante e sanger di Hesukristu.—Lesa Lukas 12:32; Revelashon 14:1, 3.

4. Kon Memorial ta benefisiá nos?

Ora ku nos konmemorá e morto di Hesus, nos ta haña mas apresio pa e amor ekstraordinario ku Yehova a demostrá na nos. El a manda su Yu pa muri pa nos pikánan. P’esei, Memorial ta yuda nos pensa seriamente riba loke e morto di Hesus ta nifiká pa nos. Nos mester pensa kon nos por demostrá nos gratitut pa loke Yehova i Hesus a hasi pa nos.—Lesa Huan 3:16; 2 Korintionan 5:14, 15.

Pa mas informashon, wak página 206-208 di e buki akí, Kiko Beibel Ta Siña Realmente?, publiká pa Testigunan di Yehova.