E artíkulo akí ta trata algun pregunta ku kisas bo tin i e ta mustra bo unda pa haña e kontestanan den bo Beibel. Si bo ta deseá, Testigunan di Yehova gustosamente lo trata e preguntanan akí ku bo.

1. Kon maldat a kuminsá?

Maldat a kuminsá riba tera na momento ku Satanas a papia e promé mentira. Dios no a krea Satanas komo un persona malbado. E tabata un angel perfekto, pero e no a keda “para den e bèrdat.” (Juan 8:44) El a desaroyá un deseo pa adorashon ku eigenlijk ta pertenesé na Dios. Satanas a gaña e promé muhé, Eva, i el a konvens’é pa desobedesé Dios. Adam tambe a desobedesé Dios. E desishon ku Adam a tuma a kousa sufrimentu i morto.—Lesa Génesis 3:​1-6 i 17-19.

Ora Satanas a sugerí Eva pa desobedesé Dios, el a lanta un rebelion kontra Dios su derecho di goberná. Mayoria di hende a rechasá Dios komo Gobernante i a uni ku Satanas. Di e manera ei, Satanas a bira “e prens di e mundu.”—Lesa Juan 14:30; Revelashon 12:9.

2. Loke Dios a krea tabatin defekto?

Dios a krea tantu hende komo angel ku e kapasidat pa obedesé su rekisitonan perfektamente. (Deuteronomio 32:​4, 5) Dios a krea nos ku e libertat di skohe si nos ke hasi bon òf malu. E libertat ei ta duna nos e oportunidat pa demostrá nos amor pa Dios.​—Lesa Santiago 1:​13-15; 1 Juan 5:3.

3. Dikon Dios a permití sufrimentu?

Pa un tempu, Yehova a tolerá rebeldia kontra su derecho di goberná. Dikon? Pa mustra ku tur esfuerso ku hende a hasi pa goberná nan mes sin dje no ta benefisiá hende. (Jeremias 10:23) Despues di 6.000 aña di eksistensia humano, e resultado ta bisto. Gobernantenan humano no por kaba ku guera, krímen, inhustisia i malesa.​—Lesa Eklesiastés 7:29; 8:9; Romanonan 9:17.

En kambio, esnan ku aseptá Dios komo nan Gobernante sí ta benefisiá. (Isaias 48:​17, 18) Pronto, Yehova lo destruí tur gobièrnu di mundu. Solamente hende ku ke pa Dios ta nan Gobernante lo biba riba tera.​—Isaias 2:​3, 4; 11:9; lesa Daniel 2:44.

 4. E echo ku Dios tin pasenshi ta duna nos ki oportunidat?

Satanas a bisa ku hende no por mustra obedensia i lealtat na Yehova. E pasenshi ku Dios tin ta duna nos un oportunidat pa demostrá si nos ta na fabor di e gobièrnu di Dios òf di esun di hende. E manera ku nos ta biba ta indiká na kua banda nos ta.​—Lesa Jòb 1:​8-11; Proverbionan 27:11.

5. Kon nos ta skohe Dios komo Gobernante?

Nos ta skohe Dios komo Gobernante ora nos buska i praktiká adorashon berdadero basá riba su Palabra, Beibel. (Juan 4:23) Ademas, meskos ku Hesus, nos tampoko lo no mete den polítika ni guera.​—Lesa Juan 17:14.

Satanas ta usa su poder pa promové estilonan di bida inmoral i perhudisial. Ora nos rechasá e estilonan di bida ei, algun di nos amigu- i famianan por chèrcha òf oponé nos. (1 Pedro 4:​3, 4) Pues nos tin ku tuma un desishon. Nos ta skohe pa asosiá ku hende ku ta stima Dios? Nos lo obedesé su leinan ku ta amoroso i bon? Si nos disidí di hasi esei, nos ta proba ku Satanas a gaña ora el a bisa ku niun hende lo obedesé Dios.​—Lesa 1 Korintionan 6:​9 i 10; 15:33.

Pa mas informashon, wak kapítulo 11 di e buki akí, Kiko Beibel Ta Siña Realmente?, publiká pa Testigunan di Yehova.

[Plachi na página 8]

Adam a tuma un mal desishon

[Plachi na página 9]

Nos desishonnan ta mustra si nos ke Dios komo Gobernante òf nò