Spiritu—Nos Por Komuniká ku Nan?

DIOS TODOPODEROSO a konfia sierto responsabilidatnan na otro kriaturanan spiritual. Por ehèmpel, el a pone gobernashon di e tera den man di Hesukristu, i el a asigná angelnan fiel pa yuda dirigí e trabou di prediká e bon notisia. (Revelashon 14:6) Sinembargo, den kaso di orashon sí no ta asina. E no a delegá skuchamentu di orashon na niun otro persona. Pues, ta na Dios so nos mester hasi orashon.

Yehova ta Esun “ku ta skucha orashon.” (Salmo 65:2) Ademas, ta e ta kontestá nan tambe. Den apòstel Juan su karta na e otro sirbidónan di Yehova, el a skirbi lo siguiente tokante orashon: “Si nos pidi kualke kos konforme su boluntat, [Dios] ta tende nos. I si nos sa ku e ta tende nos den tur loke nos pidi, nos sa ku nos tin e petishonnan ku nos a pidi di dje.”​—1 Juan 5:​14, 15.

E angelnan fiel no kier pa nos purba komuniká ku nan òf hasi orashon na nan. Nan ta komprondé i ta kooperá ku Dios su areglo di orashon ku, de bes en kuando, ta enbolbé nan tambe. Kon asina? Wèl, ora profeta Daniel a resa na Yehova tokante e desolashon di Yerusalèm, Dios a kontestá su orashon i a  manda angel Gabriel ku un mensahe di animashon.​—Daniel 9:3, 20-22.

Nos Por Komuniká ku e Mortonan?

Nos tin ku buska manera pa komuniká ku e mortonan? Tin hopi relato tokante hendenan ku supuestamente a kòmbersá ku personanan ku a muri. Por ehèmpel, na Irlanda un spiritista a konta un señora ku e anochi anterior el a kòmbersá ku Fred, e kasá di e señora. Pero e kos ta ku Fred a muri algun siman promé. E spiritista a sigui kont’é e kosnan ku “Fred” a bis’é. Pero e señora a kere ku ta e so tabata sa e kosnan ei. Fásilmente lo e por a konkluí ku Fred tabata na bida den e mundu di spiritu i ku e tabata purba komuniká kuné via e spiritista. Sinembargo, e konklushon ei ta kontradisí loke Beibel ta bisa tokante kondishon di e mortonan.—Mira e kuadro aki bou.

Pero awor, kon nos por splika susesonan manera esaki? Wèl, demoñonan ta gaña hende usando un método den kua nan ta hasi hende kere ku nan ta e persona ku a muri. Pues den e kaso menshoná aki un spiritu a pretendé di ta Fred. Pakiko nan ta hasi esei? Pa alehá hende for di loke Beibel ta siña i debilitá nan fe i konfiansa den Yehova. Sin duda, Satanas i e demoñonan ta gaña hende “ku tur poder i señalnan i maravianan falsu, i ku tur e engaño di inikidat pa esnan ku ta peresé.”​—2 Tesalonisensenan 2:​9, 10.

Un kos ta sigur, spiritistanan i esnan ku ta akudí na nan ta kere firmemente ku esun ku nan ta komuniká kuné ta hende ku a  muri. Pero si nan komuniká ku spiritu mes, en realidat nan ta komunikando ku spiritunan ku ta kontra Yehova. Di mes manera, tin hende ku ta kere ku nan ta adorá Dios pero esei no ta asina. Bou di inspirashon apòstel Pablo a duna e spièrtamentu fuerte akí: “E kosnan ku e paganonan ta sakrifiká, nan ta sakrifiká na demoño i no na Dios.”​—1 Korintionan 10:​20, 21.

Awor ku nos sa ku nos por resa na e Haltísimo, kende ta stima nos i ta interesá den nos, pakiko nos lo bai hasi orashon na kualke otro persona? Al fin i al kabo, Beibel ta duna nos e siguransa akí: “Wowo di SEÑOR ta move bai bin dor di henter tera, pa e por sostené fuertemente esnan ku nan kurason ta kompletamente di dje.”​—2 Krónikanan 16:9.

[Komentario na página 9]

Awor ku nos sa ku nos por resa na e Haltísimo, kende ta stima nos i ta interesá den nos, pakiko nos lo bai hasi orashon na kualke otro persona?

[Kuadro/​Plachi na página 8, 9]

Korekto òf Inkorekto?

SATANAS TA UN PERSONA REAL. KOREKTO

“Satanas mes ta disfrasá su mes komo un angel di lus.”​—2 Korintionan 11:14.

“Sea sobrio, sea alerta. Boso atversario, e Diabel, ta kana rònt manera un leon ku ta gruña, buskando ken e por devorá.”​—1 Pedro 5:8.

“Esun ku ta praktiká piká ta di Diabel; pasobra Diabel a hasi piká for di prinsipio.”​—1 Juan 3:8.

“P’esei, someté boso na Dios. Resistí Diabel i e lo hui for di boso.”​—Santiago 4:7.

“E Diabel . . . tabata un matadó for di prinsipio, i no ta para den e bèrdat, pasobra no tin bèrdat den dje. Ki ora ku e papia un mentira, e ta papia for di su mes naturalesa, pasobra e ta un gañadó i e tata di mentira.”​—Juan 8:44.

ORA UN HENDE MURI SU SPIRITU TA SIGUI BIBA. INKOREKTO

“Ku sodó di bo frenta lo bo kome pan, te ora bo bolbe na tera, pasobra for di dje bo a wòrdu tumá; pasobra stòf bo ta, i na stòf lo bo bolbe.”​—Génesis 3:19.

“E bibunan sa ku nan lo muri, ma e mortonan no sa nada.”​—Eklesiastés 9:5.

“Tur loke bo man haña pa hasi, hasié ku tur bo forsa; pasobra no tin ni aktividat ni planifikashon ni sabiduria den Seol [e graf], kaminda bo ta bai.”​—Eklesiastés 9:10.

“Su spiritu ta sali, e ta bolbe na tera; e mes dia ei su pensamentunan ta peresé.”​—Salmo 146:4.

ANGELNAN FIEL TA INTERESÁ DEN NOS. KOREKTO

“E angel di SEÑOR ta kampa rònt di esnan ku ta tem’é, i ta reskatá nan.”​—Salmo 34:7; 91:11.

“Nan [e angelnan] tur no ta spiritunan ku ta sirbi, mandá pa sirbi esnan ku lo heredá salbashon?”​—Hebreonan 1:14.

“Mi a mira un otro angel ta bula meimei di shelu, kende tabatin un evangelio eterno pa prediká na esnan ku ta biba riba tera, i na tur nashon i tribu i lenga i pueblo; i el a bisa na bos haltu: ‘Teme Dios i dun’é gloria.’”​—Revelashon 14:​6, 7.

HESUS TA IGUAL KU DIOS. INKOREKTO

“Mi kier pa boso komprondé ku Kristu ta e kabes di tur hòmber, i e hòmber ta e kabes di e muhé, i Dios ta e kabes di Kristu.”​—1 Korintionan 11:3.

“Ora tur kos ta wòrdu sometí na dje, e ora ei e Yu mes tambe lo wòrdu sometí na Esun, kende a someté tur kos na dje, pa Dios por ta tur den tur.”​—1 Korintionan 15:28.

“Di bèrdat, di bèrdat, mi ta bisa boso, e Yu no por hasi nada di su mes, si no ta algu ku e ta mira e Tata hasi.”​—Juan 5:19.