Kiko Hopi Hende Tin Miedu di Dje?
Kiko Hopi Hende Tin Miedu di Dje?
“Bo no mester ta un hende religioso pa kere ku mundu ta riba kaminda pa desaster.”—STEPHEN O’LEARY, PROFÈSER DI UNIVERSIDAT DI SUR CALIFORNIA. *
BO TA di akuerdo ku e deklarashon sitá ariba? E seri di artíkulonan akí lo repasá algun di e motibunan pakiko hende tin miedu di futuro. Pero tambe nan lo splika pakiko bo por tin sigur ku lo no bini un fin na bida riba tera. Apesar di e siguiente datonan preokupante ku bo ta bai lesa, tin bon motibu pa keda optimista.
Menasa serio di un guera nuklear. Na aña 2007, e Boletin di Sientífikonan Atómiko a duna e spièrtamentu ku e aña ei mundu tabata konfrontá e mesun desishonnan peligroso ku el a konfrontá tempu ku nan a tira e promé bòm atómiko riba Hiroshima i Nagasaki. Pakiko nan ta preokupá? E Boletin a informá ku na 2007 ainda tabatin rònt di 27.000 arma nuklear i ku 2.000 di esakinan tabata “kla pa keda lansá den algun minüt.” Asta si un porsentahe chikí di e armanan ei eksplotá, e resultado lo ta katastrófiko.
Akaso e menasa di un guera nuklear a mengua aworakí? Tur e sinku potensianan nuklear mas prominente—China, Fransia, Merka, Reino Uní i Rusia—“sea ta hasiendo uso di sistemanan di arma nuklear nobo òf a anunsiá ku nan tin intenshon di hasi esei,” segun SIPRI Yearbook 2009. * * Anto segun e anuario akí, e sinku paisnan ei no ta e únikonan ku tin arma nuklear. Investigadónan ta kalkulá ku India, Pakistan i Israel, kada un, tin alrededor di 60 pa 80 bòm nuklear. Nan a deklará tambe ku aktualmente tin rònt mundu un total di 8.392 arma nuklear kla pa ser lansá!
Kambio di klima lo por kousa desaster. Segun e Boletin di Sientífikonan Atómiko sitá ariba, “e peligernan ku kambio di klima ta krea ta kasi mes grave ku esnan di arma nuklear.” Sientífikonan respetá, manera Stephen Hawking, profèser penshoná di Universidat di Cambridge, i Sir Martin Rees, Direktor di Kolegio Trinity di Universidat di Cambridge, tambe a ripití e spièrtamentunan serio ei. Nan ta di opinion ku mal maneho di teknologia i e impakto humano riba medio ambiente lo por kousa kambionan ireversibel na bida riba tera i asta pone fin na sivilisashon.
Pronóstikonan di kalamidat ta preokupá miónes di hende. Si bo buska e frase “fin di mundu” i aña “2012” riba Internet, lo bo haña sientos di website ku ta spekulá ku e fin lo bini e aña ei. Dikon? Pasobra segun kálkulo, tin un kalènder antiguo di maya, konosí komo “e Konteo Largu,” ku lo terminá na aña 2012. Hopi hende tin miedu ku esaki di un òf otro manera ta señalá na e fin di nos sivilisashon.
Hopi hende religioso ta kere ku Beibel ta siña ku planeta Tera lo ser destruí. Algun ta di opinion ku Dios lo tuma tur kreyente fiel den shelu, miéntras ku e restu di humanidat lo keda atras pa sufri riba tera, ku lo ta den un káos, òf lo ser tirá den fièrnu.
Pero di bèrdat Beibel ta bisa ku tera lo keda kompletamente ruiná òf destruí? Apòstel Juan a spièrta: “No kere tur ekspreshon inspirá, sino pone e ekspreshonnan inspirá na prueba pa mira si nan ta originá di Dios.” (1 Juan 4:1, NW) En bes di djis bai tras di loke otro hende ta bisa, pakiko bo no ta habri bo Beibel i mira pa bo mes kiko e ta bisa tokante fin di mundu? Loke Beibel ta siña kisas lo sorprendé bo.
[Nota]
^ par. 2 Saká for di e artíkulo “Desasternan Ta Oumentá Pronóstiko di Kalamidat pa Humanidat,” publiká riba e website di MSNBC, 19 di òktober 2005.
^ par. 5 SIPRI ta para pa Instituto Internashonal di Investigashon pa Pas na Stockholm.
^ par. 5 E informe den e SIPRI Yearbook 2009 tabata skirbí pa Shannon N. Kile, un investigadó importante i hefe di e proyekto di arma nuklear di SIPRI su Programa di Kontròl i Prohibishon di Arma; Vitaly Fedchenkoi, un investigadó di SIPRI su Programa di Kontròl i Prohibishon di Arma; i Hans M. Kristensen, direktor di e proyekto di informashon nuklear na e Federashon di Sientífikonan Merikano.
[Rekonosementu pa Potrèt na página 4]
Nubia nuklear: U.S. National Archives photo; potrèt di orkan: WHO/League of Red Cross and U.S. National Archives photo
