“Por reina e impreshon ku ta te na fin di siglo 4 numa hende a inventá e doktrina di Trinidat. Den un sentido, esei ta bèrdat . . . [pasobra] e definishon di ‘un solo Dios partí den tres Persona’ no tabata firmemente establesé promé ku fin di siglo 4 i sigur no a haña akohida kompletu den bida kristian ni den su ekspreshon di fe.”​—New Catholic Encyclopedia (1967), Volúmen 14, página 299.

“E Konsilio di Nisea a reuní dia 20 di mei di aña 325 [di nos era]. Constantino mes a dirigí e reunion, guiando e diskushonnan aktivamente, i a proponé personalmente . . . e fórmula desisivo enkuanto e relashon di Kristu ku Dios den e kredo ku e konsilio a emití, [esta, ku Kristu ta] ‘di e mesun esensia ku e Tata.’ . . . Intimidá pa e emperador, e obispunan, ku eksepshon di dos so, a firma e kredo, hopi di nan, kontra di nan boluntat.”​—Encyclopædia Britannica (1970), Volúmen 6, página 386.

“Esteban, yená ku spiritu santu, a hisa kara wak shelu i a mira gloria di Dios i el a mira Hesus pará einan na man drechi di Dios. El a bisa: ‘Ata mi ta mira shelu habri i [e] Yu di hende pará na man drechi di Dios!’”​—Echonan 7:​55, 56, BPK.

Kiko e vishon akí a revelá? Yená ku e forsa aktivo di Dios, Esteban a mira Hesus “pará . . . na man drechi di Dios.” Ta bon kla anto ku Hesus no a bira Dios despues ku el a resusitá bai shelu sino, mas bien, un kriatura spiritual distinto. Ademas, ningun kaminda e relato no ta hasi menshon di un di tres persona banda di Dios. Apesar di intentonan pa haña tekstonan ku ta apoyá e doktrina di Trinidat, e pastor dominikano Marie-Émile Boismard a skirbi den su buki À l’aube du christianisme​—La naissance des dogmes (Na Prinsipio di Kristianismo​—Nasementu di Doktrina): “E deklarashon di ku tin tres persona den un solo Dios . . . no ta aparesé ningun kaminda den Tèstamènt Nobo.”

Constantino a promové e doktrina di Trinidat ku e intenshon di pone fin na e desakuerdonan ku tabatin den e Iglesia di siglo 4. Ma, en realidat, el a lanta un otro kuestion: Akaso Maria, kende a duna lus na Hesus, ta “Mama di Dios”?

Wak tambe e versíkulonan di Beibel akí: Mateo 26:39; Juan 14:28; 1 Korintionan 15:27 i 28; Kolosensenan 1:15 i 16