Kiko Por Yuda Bo Komprondé Beibel?

2. Les’é ku un Mente Habrí

Un amigu a yega di konta bo kosnan negativo di un persona ku bo no a topa nunka? Awor dia bo a topa e persona ei, bo no a ripará ku e komentarionan di bo amigu a stroba bo di mira e talentonan i bon kualidatnan di e persona ei? Algu paresido por pasa ku Beibel.

APÒSTEL Pablo a spièrta nos tokante kiko por sosodé si nos no lesa Beibel ku un mente habrí. El a skirbi di algun hudiu di su tempu: “Mi ta duna testimonio di nan, ku nan tin un zelo pa Dios, ma no segun konosementu.”—Romanonan 10:2.

Algun di e hudiunan ei di promé siglo no tabata dispuesto pa aseptá un bèrdat ku e Skritura Hebreo a revelá bon kla, esta, e identidat di e Mesias. Hesus di Názarèt a kuadra ku tur loke e Skritura a bisa di e Mesias. El a kumpli tambe ku tur loke e Mesias lo a hasi segun profesia. Ma hopi di su  paisanonan tabatin un mente será, i esei, kombiná ku nan prehuisio, a stroba nan di komprondé e Palabra di Dios.

Kiko nos por siña di esei? Ta importante pa lesa Beibel ku un mente habrí. Prehuisio òf ideanan formá di antemano por ta manera un velo ku ta stroba un lektor di komprondé e bèrdatnan di Beibel.

Por ehèmpel, un profesor di estudionan religioso na Nort Carolina, Merka, a deskribí Beibel komo “un buki realmente di hende, basá riba ideanan di hende.” Segun e, “hopi di esakinan no ta kuadra ku otro i ningun di nan no ta duna e guia infalibel pa mustra nos kon nos mester biba.” Si un persona mester lesa Beibel komo “un buki realmente di hende,” lo e no ta mas inkliná e ora ei na rechasá instrukshon òf prinsipionan ku e no ta gusta?

Na kontraste ku esei, Beibel ta animá nos pa studi’é diligentemente. E Skritura ta bisa di e hendenan di Berea ku a biba den tempu di Pablo: “Nan a risibí e palabra ku bon boluntat i tabata skudriñá e Skrituranan tur dia, pa mira si e kosnan akí tabata asina.” (Echonan 17:11) Meskos ku e hendenan ei, kisas bo tin ku kita kualke prehuisio òf punto di bista krítiko ku bo por tin relashoná ku Beibel i ku podisé ta manera un velo ku ta stroba bo di komprondé esaki. Lesa e Palabra di Dios ku un mente habrí, ansioso pa haña sa kiko ta e mensahe masha emoshonante ku su Outor tin pa nos.