1, 2. Ki meta tur kristian mester tin? Duna un ehèmpel.

ORA un ama di kas ta bai supermerkado pa kumpra fruta, no ta semper e ta buska esun di mas grandi òf mas barata. Mas bien, e fruta mester tin bon smak, mester hole dushi i mester ta nutritivo. Ku otro palabra, e ta skohe fruta hechu.

² Despues ku un persona batisá, e ta sigui progresá ku e meta pa bira un kristian maduro. Apòstel Pablo a animá e kristiannan na Efeso pa sigui hasi progreso spiritual. El a animá nan pa sigui hasi esfuerso pa “alkansá union den fe i den konosementu di [e] Yu di Dios.” Anto el a agregá: “E ora ei nos lo ta hende adulto, ku un madures ku ta igual na perfekshon di Kristu.”—Efe. 4:13, BPK.

3. Ki similaridat tin entre e kongregashon di Efeso di promé siglo i e pueblo di Dios awe?

³ Tempu ku Pablo a skirbi su karta na e kristiannan di Efeso, e kongregashon tabata eksistí pa algun aña kaba. Hopi di nan ya a alkansá un grado di madures spiritual. Pero, algun di nan ainda mester a sigui krese den sentido  spiritual. Awe tambe, hopi ruman ku ta sirbiendo Yehova pa vários aña kaba a alkansá madures spiritual. Pero otronan, manera e míles di rumannan ku ta batisá tur aña, no a yega na e punto ei ainda. Kiko di abo?—Kol. 2:6, 7.

4, 5. Kon kristiannan maduro ta diferensiá for di otro, pero kiko nan tur tin en komun? (Wak e promé plachi.)

⁴ Ora bo kompará vários fruta hechu ku otro, bo ta ripará ku no ta tur ta meskos. Tòg nan tin algun karakterístika ku ta mustra ku nan ta hechu. Meskos tambe, kristiannan maduro ta bini di diferente rasa i nashonalidat; tambe nan ta varia di edat i eksperensia di bida, personalidat i kustumbernan. Sinembargo, nan tur a desaroyá kualidatnan ku ta demostrá ku nan ta spiritualmente maduro. Kon asina?

⁵ Wèl, un kristian maduro ta purba di imitá e ehèmpel di Hesus den su bida. E ta “sigui su pasonan fielmente.” (1 Ped. 2:21) Hesus a indiká ku ta hopi importante pa nos stima Yehova ku henter nos kurason, alma i mente, i pa stima nos próhimo meskos ku nos mes. (Mat. 22:37-39) Un kristian maduro ta hasi esfuerso pa obedesé e konseho ei. P’esei, e kos mas importante den su bida ta su relashon ku Yehova i e amor ku e ta mustra na otro hende.

6, 7. (a) Kiko ta algun kualidat ku ta identifiká un kristian maduro? (b) Ki preguntanan nos lo bai kontestá?

⁶ Pero nos tin ku kòrda ku amor ta djis un di e kualidatnan di e fruta di spiritu ku un kristian maduro mester demostrá. (Gal. 5:22, 23) Otro kualidatnan manera suavedat, dominio propio i pasenshi tambe ta importante. E kualidatnan akí por yuda un kristian keda kalmu den situashonnan difísil i yud’é trata ku desepshon sin pèrdè speransa. Den su estudio personal e ta buska prinsipionan ku por yud’é entrená su konsenshi pa asina e por distinguí loke ta bon for di loke ta malu. Di e manera ei e por tuma desishonnan ku ta demostrá ku e ta un kristian maduro. Ademas, komo ku e ta rekonosé ku Yehova su manera di pensa i hasi kosnan semper ta esun mihó, e ta mustra ku e ta humilde. * E ta hasi tur su esfuerso pa prediká e bon notisia i promové union den kongregashon.

⁷ Maske kuantu aña nos por tin den e bèrdat, nos tur mester puntra nos mes: Mi tin ku hasi sierto kambionan pa mi imitá Hesus mas mihó? Tin kaminda ku mi por mehorá pa mi sigui krese spiritualmente?

8. Kon nos por sa ku Hesus tabatin un bon konosementu i komprondementu di e Palabra di Dios?

⁸ Hesus tabatin un bon komprondementu di e Palabra di Dios. Asta tempu ku e tabatin solamente 12 aña di edat, e por a papia ku e maestronan den tèmpel tokante temanan bíbliko. “Tur esnan ku tabata skuch’é a keda asombrá di su komprondementu i di  su kontestanan.” (Luk. 2:46, 47) Mas despues, durante su sirbishi riba Tera, Hesus a hasi bon uso di e Palabra di Dios pa silensiá su opositornan.—Mat. 22:41-46.

9. (a) Ki bon kustumber di estudio ta importante si bo ke alkansá madures? (b) Ku ki meta bo mester studia Beibel?

⁹ Si un kristian ke alkansá madures, e tin ku imitá Hesus su ehèmpel. Lo e no keda konforme ku un konosementu superfisial. Mas bien, lo e tin e bon kustumber di profundisá su mes den e Palabra di Dios pasobra e ta komprondé ku “kuminda sólido” ta pa hende maduro. (Heb. 5:14) Un kristian maduro lo ke haña un “konosementu eksakto di e Yu di Dios.” (Efe. 4:13) Lo ta bon pa puntra nos mes anto: Mi tin e kustumber di lesa Beibel tur dia? Mi ta hasi estudio personal riba un base regular? Mi ta saka tempu pa adorashon komo famia tur siman? Ora bo ta studia e Palabra di Dios, hasi esaki ku e meta pa buska prinsipionan di Beibel ku por yuda bo haña sa kon Yehova ta pensa i sinti. Despues, usa e prinsipionan akí ora bo ta tuma desishon. Esaki lo yuda bo hala mas serka di Yehova.

10. Kon un kristian maduro ta mustra ku e ta stima e konseho- i prinsipionan di Dios?

¹⁰ Un kristian maduro sa ku e konosementu ku e tin riba su mes no ta sufisiente; tambe e mester stima e konsehonan i prinsipionan di Dios. E por demostrá esei ora e ta pone e boluntat di Dios na promé lugá en bes di sigui tras di su mes deseonan. E mester kambia su manera di pensa, di biba i di aktua. Di e manera ei, e ta imitá e  ehèmpel di Hesus i bisti e personalidat nobo ku ta “kreá segun e boluntat di Dios den berdadero hustisia i lealtat.” (Lesa Efesionan 4:22-24.) Yehova a laga hende skirbi su Palabra bou di guia di spiritu santu. P’esei, ora un kristian ta profundisá su mes den Beibel, spiritu santu lo yud’é haña mas konosementu i mas amor pa e leinan di Dios. Esei lo yud’é madurá.

11. Kiko Hesus a eksperensiá tempu e tabata riba Tera?

¹¹ Tempu ku Hesus tabata riba Tera komo un hòmber perfekto, e tabata rondoná pa hende imperfekto. Tantu su mayornan komo su rumannan tabata imperfekto. Asta su disipelnan tabatin e mesun tendensianan di orguyo i ambishon ku e hendenan rònt di nan tabatin. Por ehèmpel, riba e anochi promé ku Hesus su morto, a lanta “un diskushon fuerte entre nan tokante kua di nan tabata esun di mas grandi.” (Luk. 22:24) Apesar di esei, Hesus tabatin konfiansa ku su disipelnan lo a krese spiritualmente i forma un kongregashon uní. E mesun anochi ei, Hesus a hasi orashon pa su apòstelnan por tabata mas uní. El a pidi su Tata: “Pa nan tur por ta un, meskos ku abo, Tata, ta den union ku mi i ami ta den union ku bo, pa nan tambe por ta den union ku nos, . . . ya nan por ta un meskos ku nos ta un.”—Huan 17:21, 22.

12, 13. (a) Kon Efesionan 4:15 i 16 ta enfatisá e nesesidat di promové union den kongregashon? (b) Kiko a yuda un ruman promové union den kongregashon?

¹² Un kristian maduro ta promové union den kongregashon. (Lesa Efesionan 4:1-6, 15, 16.) Komo kristian, nos mester tin e meta pa ta “armoniosamente uní” ku nos rumannan i pa kooperá ku otro. Kiko Beibel ta bisa ku nos tin ku hasi pa nos por keda uní ku otro? Pa kuminsá, nos mester ta humilde. Esei lo yuda nos mantené union apesar di e imperfekshon di nos rumannan. P’esei, puntra bo mes: Kon lo mi reakshoná ora un ruman faya ku mi? Lo mi keda sin papia kuné, na moda di papia, lanta un muraya entre ami kuné? Òf lo mi purba di traha un brùg entre ami kuné, esta, drecha mi relashon kuné? Un kristian maduro lo hasi esfuerso pa traha brùg, no muraya.

¹³ Laga nos wak e ehèmpel di un ruman hòmber ku yama Uwe. Den pasado, e tabatin e tendensia di laga e imperfekshon di otronan molesti’é. Na dado momento el a disidí di usa Beibel i e buki Perspikasia pa Komprondé e Skritura pa analisá e bida di David. Dikon el a skohe David? Uwe a splika: “David a mira e mal komportashon di otro sirbidónan di Dios. Por ehèmpel, Rei Saul a purba di mat’é, otronan a purba di piedr’é i asta su mes kasá a hasi bofon di dje. (1 Sam. 19:9-11; 30:1-6; 2 Sam. 6:14-22) Apesar di tur esei, David no a laga e mal kondukta di otronan afektá su relashon ku Yehova. Ademas, David tabata un hòmber miserikòrdioso; esei ta algu ku mi mester a traha ariba. Loke mi a siña a yuda mi kambia e manera ku mi ta mira e imperfekshon di mi rumannan. Mi no ta keda kòrda mas riba e foutnan ku hende ta hasi. Mas  bien, mi ta hasi esfuerso pa promové union den kongregashon.” Abo tambe ta hasi esfuerso pa logra esei?

14. Ken Hesus a skohe komo su amigunan?

¹⁴ Hesus tabata amabel ku tur hende. Tantu hòmber komo muhé, hóben, hende grandi i asta mucha tabata sinti nan mes konfortabel den su presensia. Pero e no a skohe kualke hende komo su amigu. El a bisa su apòstelnan: “Boso ta mi amigunan si boso ta hasi loke mi ta manda boso.” (Huan 15:14) Hesus a skohe amigu ku tabata siguié fielmente i sirbi Yehova ku henter nan kurason. Abo, meskos ku Hesus, ta skohe amigu ku ta sirbi Yehova ku henter nan kurason? Dikon esei ta importante?

15. Ki benefisio hóbennan por saka for di nan amistat ku kristiannan maduro?

¹⁵ Mayoria di fruta ta hecha mihó ora nan haña kalor di solo. Di igual manera, e kalor di nos hermandat, es desir, e amor ku nan ta demostrá, por yuda bo alkansá madures. Kisas bo ta un hóben ku ta pensando riba kiko lo bo bai hasi ku bo bida. Si ta asina, lo ta sabí di bo parti pa asosiá ku rumannan ku tin hopi aña ta sirbi Yehova i ku ta promové union den kongregashon. Atraves di añanan, kisas nan a enfrentá kontratempu i asta por a haña nan mes ku sierto retonan den bida. Rumannan asina por yuda bo skohe e mihó manera di biba. Bo amistat ku nan por yuda bo tambe pa tuma bon desishon i alkansá madures.—Lesa Hebreonan 5:14.

16. Kon rumannan ku mas eksperensia a yuda un ruman muhé mas yòn?

¹⁶ Un ruman muhé ku yama Helga ta kòrda ku durante su último aña eskolar su kompañeronan di klas tabata papia tokante nan plannan pa futuro. Hopi di nan kier a bai universidat pa despues nan por haña un bon trabou. El a papia di e asuntu ku algun di su amigunan di kongregashon. El a bisa: “Hopi di mi amigunan tabata mas grandi ku mi, i nan a yuda mi masha hopi mes. Nan a animá mi pa bai den e trabou di tempu kompleto, i mi a traha sinku aña komo pionero regular. Awor, mi ta kontentu ku mi por a dediká gran parti di mi hubentut na sirbi Yehova. No ta duel mi ku mi a hasi esei.”

17, 18. Dikon ta importante pa nos alkansá madures kristian?

¹⁷ Si nos sigui imitá e ehèmpel di Hesus, nos lo krese i bira un kristian maduro. Asina nos lo hala mas serka Yehova, i nos deseo pa sirbié lo bira mas grandi. P’esei, ta te ora un sirbidó di Dios alkansá madures, e por sirbi Yehova lo mihó posibel. Hesus a animá su disipelnan: “Laga boso lus bria dilanti di hende, pa asina nan por mira boso obranan ekselente i duna gloria na boso Tata ku ta den shelu.”—Mat. 5:16.

¹⁸ Manera nos a mira, un kristian maduro por tin un bon influensia riba e kongregashon. Su madures ta keda bisto den vários manera. Un di nan ta den e manera ku e ta usa su konsenshi. Kon nos konsenshi por yuda nos tuma bon desishon? I kon nos por respetá e konsenshi di nos rumannan? Nos lo haña kontesta riba e preguntanan akí den e siguiente artíkulo.