NA MUCHA, Antoine Skalecki tabata traha den un mina di karbon. Ku yudansa di kabai, e tabata transportá karbon ku difikultat dor di tùnelnan skur ku tabata keda 500 meter bou di tera. E tata di Antoine a sufri leshonnan serio ora ku un mina a basha den otro, i e famia no por a hasi nada otro ku manda Antoine bai traha na su lugá den e minanan. E tabata traha 9 ora pa dia, i na un okashon el a hera di pèrdè su bida ora ku un mina a basha den otro.

Antoine tabata un di e hopi yunan ku a nase di mayornan polako na Fransia den dékada di 1920 i 1930. Dikon tabatin asina tantu polako na Fransia? Wèl, ora ku Polonia a haña su independensia despues di Promé Guera Mundial, e pais a hañ’é ku un problema serio di sobrepoblashon den sierto parti di e pais. Fransia, en kambio, ku urgensia tabatin mester di hòmber pa traha den su minanan di karbon, ya ku el a pèrdè mas ku un mion hòmber den guera. Pues, gobièrnu di Fransia i di Polonia a firma un akuerdo di imigrashon na sèptèmber 1919. Pa 1931, ya tabatin 507.800 polako ta biba na Fransia, i mayoria di nan a establesé nan mes den e regionnan di mina den parti nort di e pais.

E imigrantenan polako, ku tabata trahadónan diligente, a bini ku nan kustumbernan kultural i tambe nan fervor religioso. Segun Antoine, kende awor tin 90 aña: “Mi tawela Joseph tabata papia ku masha rèspèt di e Santu Skritura, un rèspèt ku el a siña serka su tata.” Riba djadumingu, famianan polako tabata bisti nan mihó paña pa bai misa, manera nan tabata hasi na nan pais di orígen. Nan no tabata wòri ku e miradanan di despresio di algun di nan bisiñanan franses ku no tabata masha religioso.

For di 1904, Studiantenan di Beibel tabata prediká ku masha entusiasmo den e region Nord-Pas-de-Calais. Ei tabata kaminda hopi imigrante polako a haña nan promé kontakto ku e bèrdat. Na 1915 a kuminsá publiká e edishon mensual di E Toren di Vigilansia na polako, i na 1925, e revista E Époka di Oro (awor ¡Despertad!) a bira disponibel na e idioma ei. Hopi famia a aseptá e mensahe  bíbliko di e revistanan akí i di e buki E Harpa di Dios na polako.

E famia di Antoine a drenta den kontakto ku e Studiantenan di Beibel via di un tio di dje ku a bai su promé reunion na 1924. E mesun aña ei, e Studiantenan di Beibel a tene nan promé asamblea na polako na Bruay-en-Artois. Ménos ku un luna despues, den e mesun stat ei un representante di e sede mundial, Joseph F. Rutherford, a tene un reunion públiko kaminda 2.000 persona a asistí. Konmoví pa e kantidat grandi di hende presente, di kua mayoria tabata polako, Ruman Rutherford a bisa nan: “Yehova a trese boso Fransia pa boso siña e bèrdat. Awor boso ku boso yunan mester yuda e fransesnan! Ainda tin hopi trabou di hasi den e predikashon, i Yehova lo sòru pa mas predikadó.”

I esei ta loke Yehova a hasi tambe! E kristiannan polako a traha mes diligente den e trabou di prediká ku nan a traha den e minanan! Algun di nan asta a bai bèk Polonia pa kompartí e bèrdatnan presioso ku nan a siña. Entre nan tabatin Teofil Piaskowski, Szczepan Kosiak i Jan Zabuda.

Pero hopi ruman di abla polako a keda Fransia i a sigui prediká ku entusiasmo huntu ku nan rumannan franses. Na 1926, na un asamblea general den e komunidat franses Sin-le-Noble, 1.000 persona a asistí na e seshon polako i 300 na e esun franses. E Anuario 1929 a bisa: “Durante e aña akí, 332 ruman polako a simbolisá nan konsagrashon [dedikashon] pa medio di boutismo.” Promé ku Segundo Guera Mundial a kuminsá, 32 di e 84 kongregashonnan na Fransia tabata di abla polako.

Na 1947, hopi Testigu di Yehova a aseptá e invitashon di e gobièrnu polako pa regresá Polonia. Sinembargo, danki na e trabou ku nan a hasi huntu ku nan rumannan franses, e aña ei tòg tabatin un oumento di 10% den e kantidat di publikadó di Reino. Durante e añanan ku a sigui, di 1948 pa 1950, tabatin oumento di 20%, 23% i asta di 40%! Pa yuda e publikadónan nobo akí, e sukursal na Fransia a nombra e promé superintendentenan di sirkuito na 1948. Di e sinku rumannan ku nan a skohe, kuater tabata polako, i Antoine Skalecki tabata un di nan.

Hopi Testigu di Yehova na Fransia ainda tin e fam polako di nan antepasadonan, kendenan a traha duru tantu den e minanan di karbon komo den e trabou di prediká. Awe tambe tin un kantidat grandi di imigrante ta siña e bèrdat na Fransia. Sea ku e publikadónan akí bolbe na nan pais di orígen òf keda Fransia, nan tur ta prediká ku entusiasmo i ta sigui e ehèmpel di nan predesesornan polako.—For di nos archivo na Fransia.