PERO, frankamente, mi no a sinti mi malu ku ta un par di hende so tabata presente. Semper mi tabata un hende masha tímido. Tempu ku mi tabata yòn, mi tabata skonde ora hende bini di bishita na nos kas, maske tabata hende ku mi konosé.

I tòg, pa straño ku por parse, pa kumpli ku mayoria di mi asignashonnan den e organisashon di Yehova, mi tabatin ku papia ku hopi hende, tantu amigu komo hende deskonosí. Pero semper mi tabatin un lucha ku timides i falta di konfiansa den mi mes. Pues, mi no por tuma krédito pa niun éksito ku mi tabatin kumpliendo ku mi asignashonnan. Al kontrario, mi a mira ku di bèrdat Yehova ta kumpli ku su promesa, ku ta bisa: “Lo mi fortalesé bo, sí, lo mi yuda bo, sí, lo mi sostené bo ku mi man drechi di hustisia.” (Isa. 41:10) Un di e maneranan prinsipal ku Yehova a yuda mi ta mediante rumannan den kongregashon. Laga mi konta tokante algun di nan. Mi ta kuminsá for di tempu mi tabata mucha.

Riba un bunita djadumingu mainta den dékada 1940, Ruman Elsie Huntingford a yama na porta di nos boerderij na zùitwèst Ontario. Mi mama a bai atend’é miéntras ku ami ku mi tata—ku tambe tabata tímido—a keda sinta paden ta skucha. Komo ku nos a kere  ku Ruman Huntingford tabata kana bende kos i ku Mama lo a kumpra algu ku nos no tabatin mester, Tata a lanta bai bisa e ruman ku nos no ta interesá. E ora ei, Ruman Huntingford a puntra: “Boso no ta interesá den un estudio di Beibel?” Tata a respond’é: “Esei sí nos ta interesá den dje.”

Wèl, Ruman Huntingford no por a skohe un mihó momento pa bishitá nos. Dikon? Pasobra e tempu ei mi mayornan a kaba di bandoná Iglesia Uní di Canada, di kua nan tabata miembro masha aktivo. Pero kon bini nan a tuma e desishon ei? Wèl, e pastor di e iglesia tabata pone den lòbi di e edifisio un lista ku nòmber di tur e hendenan ku ta duna kontribushon; e sekuensia di e nòmbernan tabata segun e montante ku nan a duna. Awor, komo ku mi mayornan no tabatin masha entrada, generalmente nan nòmber tabata kasi te abou riba e lista, anto e lidernan di e iglesia tabata preshoná nan pa duna mas. Komo si fuera no tabata basta, un otro pastor a atmití abiertamente ku e no tabata siñando e hendenan loke é realmente tabata kere pa e no pèrdè su trabou. Ta p’esei mes nos a disidí di bandoná e iglesia. Pero nunka nos a stòp di buska un manera pa satisfasé nos nesesidat spiritual.

Komo ku e tempu ei e trabou di prediká di e Testigunan tabata prohibí na Canada, Ruman Huntingford tabata usa solamente Beibel i algun anotashon ku e tabatin den un buki pretu chikitu pa studia ku nos. Ora el a realisá ku nos lo no a traishon’é i denunsi’é na e outoridatnan, el a ofresé nos literatura basá riba Beibel. Despues di kada estudio di Beibel, nos tabata skonde e publikashonnan akí bon. *

Ruman Huntingford a sigui prediká e bon notisia zelosamente apesar di oposishon i prueba. Su entusiasmo a impreshoná mi i motivá mi pa skohe pa e bèrdat. Un aña despues ku mi mayornan a batisá, mi tambe a simbolisá mi dedikashon na Yehova. Mi a batisá ku 17 aña, dia 27 di febrüari di aña 1949, den un baki di metal ku kunukeronan tabata usa pa duna bestia awa. Despues di esei, mi meta tabata pa drenta sirbishi di tempu kompleto.

Mi tabata duda pa kuminsá traha mesora komo pionero. Pa un tempu, mi a traha na un banko i na un ofisina pasobra mi tabata konvensí ku mi mester a gana poko plaka pa mi por a sostené mi mes ora  mi kuminsá traha pionero. Pero komo ku mi tabata hóben i sin eksperensia, mi tabata gasta e plaka manera mi kobra. Un ruman hòmber ku yama Ted Sargent a animá mi pa tene kurashi i pone fe den Yehova. (1 Kró. 28:10) Su animashon a pone ku mi a kuminsá traha pionero na novèmber 1951. Mi tabatin solamente 40 dòler, un baiskel segunda mano i un maletin nobo. Pero Yehova semper a sòru pa mi tabatin loke mi tabatin mester. Mi ta masha kontentu ku Ted a animá mi pa kuminsá traha pionero! Esei a hiba na mas bendishon.

Un atardi na final di ougùstùs 1952, mi a haña un yamada di telefòn for di Toronto. E sukursal di Testigunan di Yehova na Canada a invitá mi pa kuminsá sirbi na Bètel na sèptèmber. Nunka promé mi a bishitá e sukursal. I maske mi tabata un persona tímido, mi tabata ansioso pa bai Bètel pasobra algun pionero a konta mi hopi kos maravioso tokante Bètel. Manera m’a yega, mi a sinti mi na kas.

Dos aña despues ku mi a yega Bètel, mi a remplasá Bill Yacos den un kongregashon na Toronto. Bill tabata sirbidó di kongregashon (loke nos ta yama awe koordinadó di kuerpo di ansiano). E tempu ei, mi tabatin solamente 23 aña di edat. Mi a sinti mi manera un simpel mucha di kunuku. Pero Ruman Yacos humildemente a siña mi kiko mi mester a hasi. I Yehova a yuda mi.

Ruman Yacos—un ruman hòmber yen, kurpa chikitu, kende semper tabatin un smail riba su kara—semper tabata mustra interes den hende. E tabata stima e rumannan, i nan tambe tabata stim’é. Regularmente e tabata bishitá e rumannan na nan kas, i no solamente ora nan tabatin problema. Bill Yacos a animá mi pa hasi meskos i pa traha huntu ku e rumannan den sirbishi di vèlt. El a bisa mi: “Kèn, laga e rumannan mira ku bo ta interesá den nan. Esei lo kubri un multitut di piká.”

Desde yanüari 1957, Yehova a yuda mi na un manera masha spesial. E luna ei mi a kasa ku Evelyn, un graduado di e di 14 klas di e Skol di Galaad. Promé ku nos a kasa, Evelyn tabata sirbi na un provinsia di abla franses na Quebek. E tempu ei, gran parti di Quebek tabata bou di dominio di Iglesia Katóliko. Pues, Evelyn tabatin un asignashon masha difísil pa kumpli kuné, pero el a keda leal na Yehova i a sigui kumpli ku su asignashon.

I Evelyn semper a apoyá mi lealmente. (Efe. 5:31) De echo, su lealtat a ser poné na prueba djis despues ku nos a kasa! Ta asina ku nos tabatin plan di bai Flórida, Merka, djis despues ku nos kasa. Pero un dia despues di nos kasamentu, sukursal a pidi mi pa asistí na un reunion ku lo a dura henter ún siman na Bètel di Canada. E reunion akí lo a kambia nos plannan. Pero ami ku Evelyn tabata kla pa kumpli ku tur loke Yehova pidi nos. P’esei, nos a kanselá nos luna di miel. Durante e siman ei, Evelyn a traha den sirbishi den un teritorio serka di e sukursal. Maske e teritorio tabata masha distinto for di esnan na Quebek, el a perseverá.

Na final di e siman, mi a risibí un gran sorpresa: Nan a nombra mi komo superintendente di sirkuito na e parti nort di Ontario. Imaginá bo! Un hòmber di apénas 25 aña di edat, resien kasá i sin eksperensia.  Pero ku pleno konfiansa den Yehova, nos a kuminsá nos biahe. Anochi, den pleno wenter, nos a abordá un trein na Canada, huntu ku algun superintendente biahero eksperensiá ku tabata regresando kas pa sigui kumpli ku nan asignashon. Nan a animá nos mashá! Un ruman hòmber a asta insistí pa nos tuma e kabina ku kama ku el a reservá pa su mes di manera ku nos no mester pasa henter anochi sintá den stul. E siguiente dia, presis 15 dia despues ku nos a kasa, nos a bishitá e grupo chikitu na Hornepayne, e grupo ku mi a papia di dje anteriormente.

Pero tabatin mas kambio ta spera ami ku Evelyn. Por ehèmpel, na final di aña 1960, tempu ku mi tabata hasi e trabou di sirbidó di distrito, mi a haña invitashon pa asistí na e di 36 klas di e Skol di Galaad. Esaki tabata un kurso di dies luna na Brooklyn, New York, ku lo a kuminsá na febrüari 1961. Mi tabata masha entusiasmá ku e invitashon pero a la bes un poko tristu ku Evelyn no a ser invitá. Meskos ku tabata e kaso ku e otro esposanan den e mesun situashon, Evelyn mester a deklará por eskrito ku e ta bai di akuerdo pa nos keda separá for di otro pa por lo ménos dies luna. Evelyn a yora, pero nos a kumbiní ku lo mi a bai e skol. Evelyn a keda kontentu pasobra e tabata sa ku lo mi a risibí entrenamentu balioso na e Skol di Galaad.

Mientrastantu, Evelyn tabata yuda na e sukursal di Canada. E tabatin e privilegio spesial di kompartí un kamber ku un ruman muhé ungí masha stimá, Margaret Lovell. Ta klaru ku ami ku Evelyn tabata sinti otro su falta mashá. Pero ku Yehova su yudansa, nos a logra kustumbrá i kumpli ku nos asignashonnan temporal. E echo ku Evelyn tabata dispuesto pa sakrifiká e tempu ku nos por tabata huntu ku otro pa asina nos por ta personanan mas útil pa Yehova i su organisashon a konmové mi mashá.

Despues ku mi tabatin mas o ménos tres luna na Galaad, Ruman Nathan Knorr, kende e tempu ei tabata dirigí e obra mundial di prediká, a proponé mi algu ekstraordinario. El a puntra mi si mi kier a stòp ku e Skol di Galaad i bai Canada bèk pa sirbi temporalmente na e sukursal komo instruktor di e Skol di Ministerio di Reino. Ruman Knorr a bisa mi sí ku mi no ta obligá di aseptá e proposishon; si mi ke mi ta kaba e kurso di e Skol di Galaad i sigui despues komo misionero. Pero el a bisa tambe ku si mi aseptá pa bai Canada bèk, kisas nunka mas lo mi haña un invitashon pa asistí na e Skol di Galaad i ku, kisas ku tempu, nan lo por pidi mi pa bai traha bèk den teritorio na Canada. Pero el a laga pa mi mes disidí kiko mi ke hasi, naturalmente despues ku mi papia ku mi esposa.

Pero komo ku mi tabata sa kaba kon Evelyn ta pensa tokante asignashonnan teokrátiko, mesora mi a bisa Ruman Knorr ku “nos ta kla pa hasi tur loke Yehova su organisashon pidi nos.” Semper nos tabata pensa ku nos mester ta kla pa bai unda ku Yehova su organisashon manda nos, sin importá nos preferensianan.

Pues, na aprel 1961, mi a bandoná Brooklyn i regresá Canada pa duna lès na e Skol di Ministerio  di Reino. Mas despues, nos a kuminsá sirbi komo bètelita. I pa mi sorpresa, mi a risibí un invitashon pa asistí na e di 40 klas di e Skol di Galaad, ku lo a kuminsá na 1965. Atrobe Evelyn mester a skirbi un karta pa bisa ku e ta bai di akuerdo pa nos keda algun luna separá for di otro. Pero algun siman despues, nos a haña e grato notisia ku Evelyn tambe por a asistí na e skol huntu ku mi.

Despues ku nos a yega skol di Galaad, Ruman Knorr a bisa nos ku studiantenan ku ta inskribí den e klas di abla franses, manera tabata e kaso ku nos, lo a ser mandá Afrika. Pero ora nos a gradua, nos a haña e asignashon pa bai Canada bèk. Mi a ser nombrá komo e superintendente nobo di e sukursal (awor koordinadó di Komité di Sukursal). Mi tabatin solamente 34 aña di edat. I mi a rekordá Ruman Knorr ku mi ta “hopi yòn.” Ma el a animá mi i a duna mi konfiansa. For di prinsipio, mi a hasi esfuerso pa konsultá ku rumannan maduro, ku tabatin mas eksperensia na Bètel, promé ku mi a tuma kualke desishon di peso.

Na Bètel, mi a haña hopi oportunidat maravioso pa siña for di otronan. Mi tabatin masha rèspèt i atmirashon pa e otro miembronan di e Komité di Sukursal. Mi a siña masha hopi tambe for di vários ruman, tantu hóben komo adulto, kendenan di un òf otro manera tabatin kontakto ku nos na sukursal òf den e vários kongregashonnan ku nos a yega di sirbi.

Bètel a duna mi e oportunidat tambe di siña otronan i fortalesa nan fe. Apòstel Pablo a bisa Timoteo: “Sigui den e kosnan ku bo a siña.” Ademas, Pablo a bis’é: “E kosnan ku bo a tende serka mi, i ku a keda konfirmá pa hopi testigu, konfia nan na hòmbernan fiel, kendenan na nan turno lo ta adekuadamente kapasitá pa siña nan na otro hende.” (2 Tim. 2:2; 3:14) Mi tin 57 aña ta sirbi na Bètel, i algun ruman sa puntra mi kiko mi a siña durante e añanan ei. Mi kontesta simpel ta: “Ser semper dispuesto i kla pa hasi tur loke Yehova su organisashon ke pa bo hasi i dependé riba Yehova pa su yudansa.”

Ta komo si fuera ta ayera mi a yega Bètel, siendo un hóben sin eksperensia i tímido. Pero, atraves di tur e añanan akí, Yehova a ‘sostené mi ku su man drechi.’ I spesialmente pa medio di yudansa oportuno di nos bondadoso rumannan den fe, Yehova ta sigui sigurá mi: “No tene miedu, lo mi yuda bo.”—Isa. 41:13.