1. Ki eksperensia maravioso hopi hóben kristian ta disfrutá di dje aktualmente?

 NOS ta bibando den un tempu históriko. For di tur nashon, miónes di hende ta akudiendo na adorashon berdadero. Esei ta algu nunka bisto. (Rev. 7:9, 10) Hopi hóben ta gosa di eksperensianan emoshonante segun ku nan ta yuda hende komprondé e bèrdatnan ku tin den Beibel, bèrdatnan ku por salba nan bida. (Rev. 22:17) Algun di e hóbennan akí ta studia Beibel ku hende i ta yuda nan drecha e kalidat di nan bida. Otro hóbennan, yen di entusiasmo, ta siña un idioma nobo pa nan por prediká e bon notisia den teritorionan di otro idioma. (Sal. 110:3; Isa. 52:7) Kon abo por haña mas satisfakshon den e trabou akí ku e pueblo di Yehova ta hasiendo?

2. Kon e ehèmpel di Timoteo ta mustra ku Yehova ta dispuesto pa konfia hóbennan ku responsabilidat? (Wak e promé plachi.)

² Komo hóben, bo por tuma desishonnan awor ku despues por habri porta pa oportunidatnan maravioso den e sirbishi di Yehova. Un ehèmpel di esaki ta Timoteo di Listra. Ta bisto ku el a tuma desishon sabí ku a habri kaminda pa e bira un misionero ora e tabatin rònt di 20 aña. (Echo. 16:1-3) Kisas djis un par di luna despues di esei, apòstel Pablo a pidi Timoteo p’e bai yuda  e kongregashon nobo na Tesalónika, kaminda nan tabata persiguí e rumannan violentamente. Pablo a hañ’é obligá ta bai for di einan, pero e tabatin konfiansa ku Timoteo lo a fortalesé e rumannan. (Echo. 17:5-15; 1 Tes. 3:1, 2, 6) Bo por imaginá kon emoshoná Timoteo lo tabata ora el a risibí e tarea ei!

3. Kua ta e desishon di mas importante ku bo por tuma den bida, i ki ora bo tin ku tum’é?

³ E tempu pa tuma desishon importante ta awor den bo hubentut. Pero tin un desishon ku ta esun di mas importante ku tur. Kua esei ta? Esei ta bo desishon di sirbi Yehova. Ki ora ta e mihó momento pa tuma e desishon ei? Yehova ta bisa: “Kòrda . . . riba bo Kreador den e dianan di bo hubentut.” (Ekl. 12:1) E úniko manera aseptabel pa “kòrda” riba Yehova ta di sirbié ku henter bo kurason. (Deu. 10:12) Esei ta e desishon di mas importante ku bo por tuma. Lo e influensiá e restu di bo bida.—Sal. 71:5.

4. Kua desishonnan importante lo tin un efekto riba e manera ku bo ta sirbi Dios?

⁴ Klaru ku bo desishon di sirbi Yehova no ta e úniko desishon ku lo influensiá bo futuro. Lo bo tin ku disidí tambe si bo ke kasa, ku ken bo ke kasa i kon lo bo ke gana bo pan di kada dia. Esakinan ta desishonnan importante, pero lo ta sabí di bo parti pa disidí promé si bo ke sirbi Yehova ku henter bo kurason òf nò. (Deu. 30:19, 20) Dikon? Pasobra tur e desishonnan ei ta mará na otro i tin efekto riba otro. Loke bo disidí tokante matrimonio i trabou lo tin efekto riba e manera ku bo ta sirbi Dios. (Kompará ku Lukas 14:16-20.) Di otro banda, bo deseo di sirbi Dios lo tin efekto riba e desishonnan ku bo ta tuma relashoná ku matrimonio i trabou. Pues, disidí promé riba e kosnan di mas importante.—Flp. 1:10.

5, 6. Duna un ehèmpel ku ta mustra kon ora bo tuma e desishonnan korekto, esei por habri porta pa oportunidatnan maravioso den e sirbishi di Yehova. (Wak tambe e artíkulo “Un Desishon Ku Mi A Tuma na Mucha,” den e revista akí.)

⁵ Unabes bo a disidí ku bo ta sirbi Yehova, buska pa sa kiko e ke pa bo hasi, i e ora ei bo por disidí kon lo bo sirbié. Un ruman hapones a skirbi: “Un biaha, tempu ku mi tabatin 14 aña, mi tabata den sirbishi ta prediká ku un ansiano i el a ripará ku mi no tabata gusta sirbishi mashá. Na un manera suave el a bisa mi: ‘Yuichiro, bai kas. Sinta na bo lèsenar i pensa bon riba loke Yehova a hasi pa bo.’ M’a hasi manera el a bisa mi. De echo, m’a sigui pensa i hasi orashon pa vários dia. Pokopoko, mi aktitut a kambia. No a tarda mashá ku m’a realisá ku mi tabata disfrutá di sirbi Yehova. Mi tabata gusta lesa tokante e misioneronan, i m’a kuminsá pensa riba un manera pa sirbi Yehova mas plenamente.”

⁶ Yuichiro a sigui konta: “M’a kuminsá tuma sierto desishon ku un dia lo a yuda mi sirbi Yehova den un otro pais. Por ehèmpel, mi a disidí di bai un lès di ingles. Ora m’a kaba skol, m’a skohe trabou partaim, dunando lès di ingles, ya asina mi por a traha pionero. Ora mi tabatin 20 aña, mi a kuminsá siña e idioma mongol i a haña chèns di bishitá un grupo di publikadó di e idioma ei. Dos aña despues, na 2007, m’a bishitá Mongolia. M’a bai prediká ku algun di e pioneronan einan i a mira ku hopi hende tabata buska e bèrdat. E ora ei m’a haña gana di bin biba einan pa yuda. M’a bai bèk Hapon pa plania mi kosnan, i for di aprel 2008, mi ta trahando pionero na Mongolia. Bida no ta fásil akinan. Pero e hendenan ta aseptando e bon notisia, i mi por yuda nan hala serka Yehova. Mi ta haña ku loke mi a skohe ta e mihó manera di biba.”

7. Kua ta algun desishon ku nos kada un mester tuma pa nos mes, i kiko nos por siña for di Moises?

 ⁷ Kada hende mester disidí pa nan mes kon nan lo usa nan bida komo un Testigu di Yehova. (Hos. 24:15) Nos no por bisa bo si bo mester kasa ni ku ken bo mester kasa. Tampoko nos no por bisa bo ki trabou bo mester traha. Lo bo skohe un trabou ku bo no tin mester di hopi skol p’e? Algun di boso, hóbennan, ta biba den barionan pober; otronan ta biba den áreanan riku. Boso personalidat, abilidat, edukashon, interes i metanan spiritual ta masha diferente for di otro. Boso bida probablemente ta masha diferente for di otro, meskos ku Moises su bida tabata masha diferente for di bida di e otro hóbennan hebreo na Egipto di antigwedat. Komo yu di e yu muhé di Fárao, Moises tabata riku, miéntras ku e hóbennan hebreo tabata katibu. (Éks. 1:13, 14; Echo. 7:21, 22) Meskos ku bo, nan tabata biba den un tempu históriko. (Éks. 19:4-6) Ma kada un di nan mester a disidí kiko nan kier a hasi ku nan bida. Moises a tuma e desishon korekto.—Lesa Hebreonan 11:24-27.

8. Unda hóbennan por haña yudansa pa tuma bon desishon?

⁸ Yehova ta yuda bo tuma desishon sabí den bo hubentut. Kon e ta hasié? Wèl, e ta duna bo konseho den forma di prinsipionan di Beibel ku bo por usa den kualke sirkunstansia. (Sal. 32:8) Anto si bo no sa sigur kon pa apliká e prinsipionan akí den bo bida, bo por pidi bo mayornan kristian òf e ansianonan di kongregashon pa yuda bo. (Pro. 1:8, 9) Laga nos analisá tres prinsipio bíbliko ku por yuda bo tuma desishon sabí ku lo tin un bon efekto riba bo futuro.

9. (a) Kon Yehova ta onra nos ku boluntat liber? (b) Kon lo bo benefisiá si bo ‘buska promé e Reino’?

⁹ Buska promé e Reino i e hustisia di Dios. (Lesa Mateo 6:19-21, 24-26, 31-34.) Yehova ta onra nos ku boluntat liber. Bo mes por disidí kiko bo ta hasi ku bo tempu. E no ta bisa bo kuantu tempu di bo hubentut bo mester dediká na e trabou di prediká. Ma Hesus a siña nos ku ta importante pa buska promé e Reino. E manera ku bo ta pone na práktika loke Hesus a bisa lo duna bo hopi oportunidat pa demostrá bo amor pa Yehova, bo interes den bo próhimo i bo gratitut pa e speransa di bida eterno. Bo desishonnan relashoná ku matrimonio i trabou ta demostrá ku bo ta mas preokupá tokante bo nesesidatnan material, òf nan ta revelá ku bo ta buska promé e Reino i e hustisia di Dios?

10. Kiko a hasi Hesus felis, i kiko abo mester hasi pa bo ta felis?

¹⁰ Sirbi otro hende pa bo ta felis. (Lesa Echonan 20:20, 21, 24, 35.) Esei ta un prinsipio básiko di bida ku Hesus a siña nos. E mes tabata un persona masha felis pasobra el a biba segun e prinsipio ei. El a hasi e boluntat di su Tata, en bes di loke e mes tabata ke, i a sirbi otro hende dor di kompartí e bon notisia ku nan. (Luk. 10:21; Huan 4:34) Podisé bo mes tambe a yega di sinti e felisidat ei ora bo a yuda otro hende. Pues, ora bo tin ku tuma desishon grandi den bida, lo bo hasi bo mes felis—i tambe Yehova Dios—si bo basa nan riba e prinsipionan ku Hesus a siña hende.—Pro. 27:11.

11. Dikon Baruk a pèrdè su goso, i ki konseho Yehova a dun’é?

¹¹ Nos felisidat di mas grandi ta bini di sirbi Yehova. (Pro. 16:20) Aparentemente, Baruk, sekretario di Yeremías, a lubidá esei. Dado momento, e no tabata disfrutá di e sirbishi di Yehova mas. Yehova di kuné: “Bo ta buska kosnan grandi pa bo mes? No buska eseinan; pasobra mira, mi ta bai trese desaster riba tur karni, . . . ma lo mi duna bo bo bida komo botin, na tur lugá ku bo bai.” (Yer. 45:3, 5) Kiko bo ta kere lo a hasi Baruk  felis: hasi loke e tabata ke i pèrdè su bida, òf hasi loke Yehova tabata ke i sobrebibí e destrukshon di Herúsalèm?—Sant. 1:12.

12. Ki desishon Ramiro a tuma ku a yud’é hiba un bida felis?

¹² Un ruman hòmber ku ta sintié felis sirbiendo otro hende ta Ramiro. El a konta: “Mi ta bini di un famia pober ku ta biba den un pueblito den e Serunan di Andes. Pues, ora mi ruman hòmber mas grandi a ofresé pa paga pa mi bai universidat, esei tabata un gran oportunidat. Pero nèt mi a batisá komo Testigu di Yehova, i mi a risibí un otro oferta: Un pionero a invitá mi pa bai prediká huntu kuné den un stat chikitu. Mi a bai einan, siña pela i a habri un barberia pa mantené mi mes. Hopi hende den e stat ei tabata aseptá estudio di Beibel. Despues, mi a bai un kongregashon di idioma indígena ku nan a kaba di forma. Mi tin awor 10 aña den sirbishi di tempu kompleto, i ningun otro profeshon lo por a duna mi e goso ku mi ta sinti ora mi ta yuda hende studia e bon notisia den nan mes idioma.”

13. Dikon hubentut ta un bon tempu pa sirbi Yehova plenamente?

¹³ Sirbi Yehova ku goso den bo hubentut. (Lesa Eklesiástes 12:1.) No pensa ku bo mester tin un bon trabou promé ku bo por kuminsá sirbi Yehova plenamente. E mihó tempu pa kuminsá ta den bo hubentut. Dikon? Pasobra hopi hóben tin masha tiki responsabilidat di famia i nan tin e salú i energia pa aseptá asignashonnan difísil. Kiko lo bo tin gana di hasi pa Yehova den bo hubentut? Kisas bo tin e meta di traha pionero, òf lo bo ke prediká na hende di otro idioma. Podisé bo por sirbi mas tantu den bo kongregashon aktual. Sea kual sea ta bo meta den e sirbishi di Dios, lo bo tin ku haña un manera pa gana bo pan di kada dia. Puntra bo mes: ‘Ki trabou lo mi skohe, i kuantu skol lo mi mester pa esei?’

14. Kiko bo tin ku tene kuidou kuné ora bo ta plania pa futuro?

¹⁴ E tres prinsipionan di Beibel ku nos a konsiderá por yuda bo disidí ki tipo di trabou lo ta bon pa bo. Kasi sigur bo mèntòrnan na skol òf sierto departamento di gobièrnu sa ki trabou tin disponibel den bo área òf kaminda bo ke bai sirbi. Nan informashon por ta útil, pero bo tin ku tene kuidou. Hende ku no ta stima Yehova lo por trata di sembra amor pa mundu den bo kurason. (1 Huan 2:15-17) Segun ku bo ta konsiderá e kosnan ku mundu ta ofresé, no lubidá ku bo kurason por gaña bo fásilmente.—Lesa Proverbionan 14:15; Yer. 17:9.

15, 16. Ken por duna bo bon konseho tokante trabou?

¹⁵ Unabes bo sa ki tipo di trabou bo por haña, bo mester di bon konseho. (Pro. 1:5) Ken por yuda bo usa prinsipio bíbliko pa evaluá bo opshonnan di trabou? Skucha e hendenan ku stima Yehova, ku stima bo i ku konosé abo i bo sirkunstansianan bon. Nan lo yuda bo ser onesto ku bo mes i analisá bo aptitutnan (kiko ta bo talentonan) i bo motivashon (kiko realmente bo ke hasi). Loke nan bisa bo kisas lo yuda bo rekonsiderá bo metanan. Si bo mayornan ta stima Yehova, esei por ta un gran yudansa pa bo. Ademas, e ansianonan di bo kongregashon ta hòmbernan di eksperensia ku por duna bo bon konseho. Bo por papia tambe ku e pioneronan i e superintendentenan biahero. Puntra nan dikon nan a disidí di drenta sirbishi di tempu kompleto. Kon nan a kuminsá traha pionero, i kon nan ta mantené nan mes? Ki satisfakshon nan ta haña for di nan sirbishi?—Pro. 15:22.

¹⁶ E rumannan ku realmente konosé bo bon por duna bo konseho sabí. Por ehèmpel, suponé ku e motibu prinsipal pakiko bo ke stòp di bai skol sekundario i kuminsá traha pionero ta pasobra bo tin ku traha duru na skol i bo no ta gusta esei. Un persona ku ta stima bo kisas ta mira bon kla dikon bo ke kita for di skol, i e por yuda bo komprondé ku si bo perseverá i kaba skol, bo ta siña pa no entregá fásilmente. Anto esei ta un kualidat nesesario si bo ke sirbi Yehova plenamente.—Sal. 141:5; Pro. 6:6-10.

17. Ki tipo di trabou nos mester evitá?

¹⁷ Tur hende ku ta sirbi Yehova lo haña nan ku peligernan spiritual, es desir, situashonnan ku por debilitá nan fe i alehá nan for di Yehova. (1 Kor. 15:33; Kol. 2:8) Pero algun tipo di trabou por ta mas peligroso pa bo fe ku otro. Tin ruman a pèrdè nan fe despues ku nan a skohe sierto tipo di trabou. Kisas bo konosé algun di nan. (1 Tim. 1:19) Lo ta sabí anto pa evitá kualke tipo di trabou ku lo por daña bo amistat ku Yehova.—Pro. 22:3.

18, 19. Kiko bo por hasi si bo no tin e deseo di sirbi Yehova?

¹⁸ Si bo a kultivá e deseo di sirbi Yehova den bo kurason, gosa di e oportunidatnan ku bo tin bo dilanti komo un sirbidó di Dios hóben. Tuma desishonnan ku lo permití bo sirbi Yehova ku goso den e tempu emoshonante akí.—Sal. 148:12, 13.

¹⁹ Di otro banda, kiko bo mester hasi si bo no tin e deseo di sirbi Yehova? Sigui purba di hasi bo fe den Yehova mas fuerte. No entregá! Despues ku apòstel Pablo a deskribí e esfuersonan ku el a hasi pa sigui un rumbo ku Dios lo a bendishoná, el a skirbi: “Si den kualke sentido boso ta pensa di otro manera, Dios lo revelá e aktitut korekto na boso. En todo kaso, te asina leu ku nos a progresá, laga nos sigui kana na un manera ordená den e mesun kaminda akí.” (Flp. 3:15, 16) Sigui meditá riba Dios su amor i su konseho sabí. Yehova ta esun ku por yuda bo tuma desishon sabí den bo hubentut. No tin riba su konseho.