Un pelíkula fasinante, sin zonido, ku tabatin e título A Trip Down Market Street, a duna e hendenan ku a mir’é un idea kon e bida di tur dia tabata na San Francisco, Merka, na kuminsamentu di siglo 20. E produktornan a instalá un kámara ku nan tabata drei na man parti dilanti di un tram ku tabata move, pa asina kapta e imágennan di loke tabata tuma lugá den un kaya drùk. E esenanan a inkluí wagòn ku kabai tabata hala, outo di e promé modelonan, i tambe hende ku tabata hasi kompra i mucha ku tabata bende korant.

Loke a duna e pelíkula akí un toke trágiko ta ku probablemente nan a film’é na aprel di 1906, djis promé ku un temblor i kandela devastador, ku a tuma lugá dia 18 di aprel, a kosta bida di míles di hende i destruí e parti ei di e stat kasi kompletamente. Algun di e karanan bibitu den e pelíkula lo tabatin solamente un par di dia mas di bida. Scott Miles, desendiente di un di e produktornan di e pelíkula, a bisa: “Mira e hendenan ei. Nan no sa mes kiko ta bai pasa nan. Bo ta haña duele di nan.”

Nos ta mira un paralelo ku nos tempu. Nos tambe ta haña duele di nos próhimo. Nan ta dal bai ku nan aktividatnan di tur dia sin tene kuenta ku e kalamidat ku ta djis tras di porta, esta, destrukshon di e sistema di kosnan akí i di bida humano. Sinembargo, na kontraste ku un temblor ku ta bini sin previo aviso, ainda nos tin un oportunidat chikitu pa spièrta nos próhimo tokante Yehova su dia di huisio. Kasi sigur bo ta dedikando tempu kaba tur siman pa sali den sirbishi di kas pa kas, pero bo por hasi mas pa spièrta otro hende?

Hesus ta un ehèmpel notabel pasobra semper e tabata kla pa duna testimonio. El a papia ku tur hende ku el a topa, sea ta un kobradó di belasting ku el a pasa na kaminda òf un hende muhé ku el a topa na un pos durante un pousa di mèrdia. (Luk. 19:1-5; Huan 4:5-10, 21-24) Asta ora el a apartá poko tempu pa sosegá su kurpa, el a legumai loke e tabata bai hasi pa e por a siña hende. Su kompashon pa otro hende a motiv’é pa e duna muchu mas ku djis un testimonio pa formalidat. (Mar. 6:30-34) Kon algun di nos rumannan ta imitá Hesus su sentido di urgensia awe?

Melika ta biba den un kompleho di apartamento di alta siguridat. Hopi di su bisiñanan ta studiante ku a bini djafó i di kende nan nòmber no ta aparesé  den e lista di habitante di e kompleho. I e telefonnan selular ku nan ta usa no ta registrá riba nan nòmber tampoko. Melika ta probechá di e oportunidat spesial ku e tin pa kuminsá kòmbersashonnan riba temanan di Beibel ku nan den lòbi òf den left. E ta bisa: “Mi ta mira esei komo mi teritorio.” Melika ta kana ku literatura den vários idioma, i hopi di e studiantenan ta aseptá tratado i revista. Tambe e ta dirigí nan atenshon na nos website jw.org. Di e forma ei el a kuminsá vários estudio di Beibel.

Sonia tambe ta alerta pa duna testimonio na ken ku e topa. E ta traha na un klínika di dòkter, i el a pone e meta di duna un testimonio kabal na kada un di su kompañeronan di trabou. Na prinsipio el a tuma tempu pa haña sa kiko ta e nesesidat- i interesnan di kada un. Despues el a usa su pousa di mèrdia pa purba kòmbersá ku kada un di nan tokante Beibel. Komo resultado, Sonia por a kuminsá dos estudio di Beibel. Tambe e ta planiando pa tuma algun di su pousanan den e lòbi di e sentro médiko pa papia ku e hendenan ku ta warda riba nan turno.

Un di e sobrebibientenan di e temblor di 1906 a yam’é “e desaster di mas teribel ku a yega di pasa un estado òf stat.” Ma e tipo di desasternan akí no ta nada na komparashon ku e dia di vengansa ku lo bini pronto riba “esnan ku no konosé Dios.” (2 Tes. 1:8) Yehova ta anhelá pa hende kambia nan mente i kurason i reakshoná riba e spièrtamentu ku su Testigunan ta dunando.—2 Ped. 3:9; Rev. 14:6, 7.

Bo tin e privilegio di habri wowo di hende pa nan mira den ki tempu nos ta bibando i yuda nan stòp di sigui nan interesnan egoista, sino mas bien buska Yehova. (Sof. 2:2, 3) Abo por probechá di tur oportunidat pa duna testimonio na bo koleganan di trabou, na bo bisiñanan i na esnan ku bo ta topa ora bo ta atendé bo asuntunan di tur dia? Bo por hasi mas esfuerso pa spièrta otro hende?