Kuantu biaha bo no a yega di bisa e palabranan ei ora bo habri un revista nobo? E bunita plachi- i potrètnan ei ta ser prepará kuidadosamente i poné den nos revistanan ku un propósito. Nan ta medionan di enseñansa ku ta konmové nos kurason i ku ta yuda nos pensa riba e informashon ku e revista ta trata. Nan por ta un gran yudansa ora di prepará i partisipá den e Estudio di Toren di Vigilansia.

Por ehèmpel, ora bo ta studia un artíkulo di estudio, tuma un tiki tempu i purba di saka afó pa ki motibu a skohe e promé plachi den e artíkulo ei. Kiko e ta ilustrá? Ki relashon e tin ku e tema di e artíkulo òf ku e teksto sentral? Pa loke ta e otro plachinan, wak ki konekshon nan tin ku e tópiko ku ta ser tratá i kon nan por yuda bo den bo bida.

E ruman ku ta dirigí e Estudio di Toren di Vigilansia mester duna e kongregashon oportunidat pa duna komentario riba kada plachi; nan por splika ki relashon e plachi tin ku e lès òf ki efekto e tabatin riba nan personalmente. Tin biaha, tin un nota bou di e plachi ku ta indiká na kua paragraf e plachi ta pertenesé. Pero ora ku no ta asina, e ruman ku ta dirigí e lès por disidí na kua paragraf ta mihó pa trata kada plachi. Di e manera akí, tur hende lo benefisiá di e plachi- i potrètnan ku ta yuda e lektor visualisá loke e Palabra di Dios ta siña nos.

Ta manera un ruman hòmber a bisa: “Despues di lesa un bunita artíkulo, e plachinan ta manera e chèri riba e bolo.”